ཨ་རིའི་གྲོས་ཚོགས་འཐུས་མི་སི་ཁོ་ཊི་པེ་རེ་ལགས་ནས་རྒྱ་གཞུང་གིས་བོད་བཙན་བཟུང་བྱས་ཏེ་ལོ་ངོ་བདུན་ཅུ་ལྷག་འཁོར་བར་སྐྱོན་བརྗོད་དང་འབྲེལ་ཨ་རིས་བོད་རང་བཙན་གྱི་རྒྱལ་ཁབ་ཅིག་ཡིན་པ་ཡོངས་བསྒྲགས་གནང་དགོས་པའི་གྲོས་འཆར་བཏོན།
ཁ་སང་ཕྱི་ཚེས་ ༡ ཉིན་རྒྱ་ནག་གུང་ཁྲན་ཏང་དབུ་བརྙེས་ཏེ་ལོ་བརྒྱ་འཁོར་ཟེར་བའི་དུས་དྲན་དང་བསྟུན། རྒྱ་ནག་གཞུང་གིས་བོད་བཙན་བཟུང་བྱས་ཏེ་ལོ་ངོ་བདུན་ཅུ་ལྷག་འཁོར་གྱི་ཡོད་པར་སྐྱོན་བརྗོད་དང་སྦྲགས། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་སི་ཁོ་ཊི་པེ་རེ་ (Scott Perry) ལགས་ཀྱིས། ཨ་རིའི་གྲོས་ཚོགས་ནང་བོད་ནི་རང་བཙན་གྱི་རྒྱལ་ཁབ་ཅིག་ཡིན་པར་ངོས་འཛིན་དགོས་པའི་གྲོས་འཆར་བཏོན་ཡོད་སྐོར་བཀོད་འདུག
གྲོས་ཚོགས་འཐུས་མི་སྐུ་ཞབས་སི་ཁོ་ཊི་པེ་རེ་ལགས་སྒེར་གྱི་ཊུ་ཝེ་ཊུར་སྟེང་སྤེལ་བའི་གནས་ཚུལ་ནང་། མི་གསོད་ཁྲག་སྦྱོར་གྱི་རྒྱ་ནག་དམར་ཤོག་ཚོགས་པས་ཁྲིམས་འགལ་གྱིས་བོད་བཙན་བཟུང་བྱས་ཏེ་ལོ་ངོ་བདུན་ཅུ་ལྷག་འཁོར་ཡོད་པས། ད་ནི་ཨ་རི་འགུལ་སྐྱོད་བྱེད་པའི་དུས་ལ་རན་ཡོད་ལ། ངས་དེ་རིང་བོད་དེ་རང་བཙན་གྱི་རྒྱལ་ཁབ་ཅིག་ཡིན་པའི་ཁྲིམས་འཆར་བཏོན་ཏེ། ཨ་རིའི་སྲིད་འཛིན་བྷའེ་ཌན་ལགས་ནས་བོད་དེ་རང་བཙན་གྱི་རྒྱལ་ཁབ་ཅིག་ཡིན་པ་ཡོངས་བསྒྲགས་གནང་དགོས་པའི་འབོད་སྐུལ་ཞུ་རྒྱུ་བྱུང་བར་དགའ་སྤོབས་སྐྱེས་ཡོད། ཅེས་བརྗོད་འདུག
ཨ་རིའི་གྲོས་ཚོགས་ཀྱི་དྲ་རྒྱའི་གནས་ཚུལ་ལྟར་ན། འདི་ལོའི་ཕྱི་ཚེས་ ༦ ཚེས་ ༣༠ ཉིན་གྲོས་ཚོགས་འཐུས་མི་སྐུ་ཞབས་སི་ཁོ་ཊི་པེ་རེ་ལགས་ཀྱིས་བཏོན་པའི་གྲོས་འཆར་ཡིག་ཨང་ H.R.4281 པར་གྲོས་ཚོགས་འོག་མའི་འཐུས་མི་ (Scott DesJarlais) དང་འཐུས་མི་ (Thomas P. Tiffany) གཉིས་ཀྱི་རྒྱབ་གཉེར་འོག ཨ་རིའི་གྲོས་ཚོགས་ཀྱི་ཕྱི་སྲིད་ཚོགས་ཆུང་དང་གྲོས་ཚོགས་འོག་མའི་ནང་ངོ་སྤྲོད་བྱས་ཡོད་ཅིང་། གྲོས་འཆར་གྱི་སྙིང་བསྡུས་སུ། རྒྱ་ནག་དམར་ཤོག་ཚོགས་པས་ཁྲིམས་འགལ་ཐོག་བོད་བཙན་བཟུང་བྱས་པ་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་བྱས་ཚེ་ཉེས་ཆད་གཅོད་དགོས་པ་བཀོད་འདུག
འདས་ལོའི་ཕྱི་ཟླ་ ༥ ཚེས་ ༡༩ ཉིན་གྲོས་ཚོགས་འོག་མའི་འཐུས་མི་སྐུ་ཞབས་སི་ཁོ་ཊི་པེ་རེ་ལགས་ཀྱིས། ཨ་རིའི་གྲོས་ཚོགས་འོག་མའི་ནང་ད་ལྟའི་རྒྱ་ནག་མི་དམངས་སྤྱི་མཐུན་རྒྱལ་ཁབ་འོག་ཡོད་པའི་བོད་རང་སྐྱོང་ལྗོངས་ནི་རྒྱ་ནག་ལས་ཐ་དད་དང་རང་བཙན་གཙང་མའི་རྒྱལ་ཁབ་ཅིག་ཏུ་ངོས་འཛིན་བྱ་རྒྱུའི་ཁྲིམས་འཆར་ཞིག་བཏོན་ཡོད་པ་དང་། སྐབས་དེར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་ཕྱི་ལོ་ ༡༩༩༡ ལོར་ཨ་རིའི་གྲོས་ཚོགས་ཀྱིས་བོད་ཅེས་པ་བོད་རང་སྐྱོང་ལྗོངས་ཙམ་མ་ཡིན་པར་བོད་ཆོལ་ཁ་གསུམ་ལ་ངོས་འཛིན་བྱས་པའི་ཚིག་ཐོ་གཞིར་བཟུང་། ད་ཐེངས་ཀྱི་ཁྲིམས་འཆར་དེའི་ནང་དུའང་བོད་ཅེས་པ་བོད་ཆོལ་ཁ་གསུམ་ཡོངས་རྫོགས་ལ་ངོས་འཛིན་གནང་རྒྱུའི་འབོད་སྐུལ་ཞུས་ཡོད་པ་རེད། ད་ལྟ་ཨ་རིའི་གྲོས་ཚོགས་ཕྱི་སྲིད་ཚོགས་ཆུང་གིས་ཁྲིམས་འཆར་དེ་ཨ་རིའི་ཨེ་ཤ་ཡ་དང་ཞི་བདེ་རྒྱ་མཚོའི་ཚན་པར་སྤྲད་ཡོད་པ་རེད།
ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་སི་ཁོ་ཊི་པེ་རེ་ལགས་ནི་ཕྱི་ལོ་ ༡༩༦༢ ལོར་ཨ་རིའི་པེན་སིལ་ཝེ་ནི་ཡ་ (Pennsylvania) མངའ་སྡེའི་ནང་འཁྲུངས་ཡོད་པ་དང་། ཕྱི་ལོ་ ༢༠༡༣ ལོར་ནས་བསྟུད་མར་སྐབས་ ༥ རིང་གྲོས་ཚོགས་མའི་འཐུས་མིར་འོས་འདེམས་བྱུང་ཡོད་འདུག་ལ། ཨ་རིའི་སྲིད་འཛིན་ཟུར་པ་ཊོམ་ཕུའི་སྲིད་གཞུང་སྐབས་བཞག་པའི་ཕྱི་ལོ་ ༢༠༠༢ ལོའི་ཨ་རིའི་བོད་དོན་ཐོག་འཛིན་པའི་སྲིད་བྱུས་ལག་བསྟར་དང་། བོད་ནང་འགྲོ་འོང་འདྲ་མཉམ་གྱི་སྲིད་བྱུས་ལ་ཁོང་གིས་རྒྱབ་སྐྱོར་གནང་ཡོད་པ་རེད།
གསར་འགོད་པ། ཀླུ་མགོན་ཐར།
