སྦེང་ལོར་ས་གནས་གཞོན་ནུ་ལྷན་ཚོགས་ཀྱིས་རྒྱ་གར་ཉམ་ཐག་ཁྱིམ་ཚང་ ༡༡༣ ལ་གྱོན་ཆས་དང་བཟའ་ཆས་ཕུལ་བ་བརྒྱུད་༧གོང་ས་མཆོག་གི་འཁྲུངས་སྐར་སྲུང་གཙི་ཞུས་གནང་འདུག
འདི་གའི་གསར་འགོད་པར་སྦེང་ལོར་ས་གནས་གཞོན་ནུ་ལྷན་ཚོགས་ཀྱི་ཚོགས་གཙོ་སྒྲོལ་དཀར་ལགས་ནས་གནས་ཚུལ་མཁོ་སྤྲོད་གནང་བ་ལྟར་ན། ༧གོང་ས་མཆོག་ནས་དུས་དང་རྣམ་པ་ཀུན་དུ་བཀའ་སློབ་ལམ་སྟོན་ཕེབས་པ་བཞིན། འདི་གར་སྦེང་ལོར་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་ད་ལོའི་༧གོང་ས་མཆོག་གི་སྐུའི་འཁྲུངས་སྐར་དེ་རང་ཉིད་ཀྱི་ནུས་པའི་ལྕོགས་ཚོད་ཀྱིས་གཞན་ཕན་དགེ་སྒྲུབ་ཀྱི་བྱ་བ་སྣ་མང་ཞིག་སྤེལ་ཏེ། སྐུའི་འཁྲུངས་སྐར་སྲུང་གཙི་ཞུ་འཆར་ཡོད་པ་ལྟར། དེ་རིང་སྦེང་ལོར་ཁུལ་གྱི་གྲོང་གསེབ་དབུལ་ཕོངས་མི་གྲངས་ ༡༡༣ ལ་གྱོན་ཆས་དང་བཟའ་ཆས་སོགས་ཕུལ་ཏེ། ༧སྐུའི་འཁྲུངས་སྐར་སྲུང་གཙི་ཞུས་གནང་ཡོད་པ་རེད།
དབུལ་ཕོངས་གྲོང་མི་ ༡༡༣ ལ་བཟའ་ཆས་དང་གྱོན་ཆས་ཕུལ་བ་དེ་ནི་༧ གོང་ས་མཆོག་དགུང་གྲངས་ ༡༡༣ ལ་བཞུགས་པའི་བཀའ་བཞེས་ཟབ་མོ་དེ་བདེ་བླག་ངང་ནས་འགྲུབ་པའི་སྨོན་མདུན་དང་རྟེན་འབྲེལ་མཚོན་པ་དང་། ལས་འཆར་དེ་ནི་ལས་འཆར་མང་པོའི་ནང་གཅིག་ཡིན་པ་མ་ཟད། ༧རྒྱལ་བའི་དགོངས་པ་དང་མཐུན་པའི་༧ སྐུའི་འཁྲུངས་སྐར་སྲུང་རྩིས་ཞུ་ཐབས་ཤིག་ལ་ངོས་འཛིན་བྱེད་ཀྱི་ཡོད་འདུག
དེ་ཡང་སྦེང་ལོར་ས་གནས་གཞོན་ནུ་ལྷན་ཚོགས་ངོས་ཏཱ་ལའི་བླ་མ་མཐོ་རིམ་སློབ་གཉེར་ཁང་དང་སྦེང་ལོར་བོད་ཁྱིམ་སྡོད་ཁང་སོགས་ཀྱི་སློབ་ཕྲུག་ལྷག་བསམ་ཅན་དུ་མ་ཞིག་གིས་གནང་བའི་གྱོན་ཆས་དག་རྒྱ་གར་གྲོང་གསེབ་ཁུལ་གྱི་ཉམས་ཐག་དག་ལ་སྤྲད་ཐབས་ཀྱི་ལས་འཆར་ཞིག་ཆགས་ཡོད་ཅིང་། གནས་ཚུལ་མཁོ་སྤྲོད་པས་དངོས་སུ་གྲོང་གསེབ་ཀྱི་མི་རྣམས་ལ་བཟའ་ཆས་དང་གྱོན་ཆས་སྤྲོད་སྐབས། གྲོང་གསེབ་ཀྱི་ཡུལ་མི་དག་གིས་དགའ་སྣང་གི་འཛུམ་དང་ལྷན་དུ་སླར་ཡང་མ་འོངས་པ་རོགས་པ་གནང་རོགས་ཞེས་ཡང་ཡང་རེ་བ་བྱེད་ཀྱི་ཡོད་སྐོར་སོགས་བརྗོད་བྱུང་།
ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
གཞོན་ནུ་དུམ་བུ་གཉིས་ལ་ཆགས་པས་ གཞོན་ནུ་ག་གི་དེ་རེད་ ?