ཨ་རིའི་ཕྱི་སྲིད་ལྷན་ཁང་གི་འདི་ལོའི་མི་ཚོང་ཁྲིམས་འགལ་གནད་དོན་སྐོར་གྱི་སྙན་ཐོའི་ནང་རྒྱ་ནག་གཞུང་གིས་བོད་མི་འབུམ་ ༥ ལས་མང་བ་བཟོ་གྲྭ་དང་ལག་ཤེས་སྦྱོང་བརྡར་ཁང་སོགས་སུ་ངལ་རྩོལ་དུ་བཀོལ་བཞིན་ཡོད་སྐོར་བརྗོད་འདུག
ཉེ་ཆར་ཨ་རིའི་ཕྱི་སྲིད་ལས་ཁུངས་གྱིས་ཕྱི་ལོ་ ༢༠༢༡ ལོའི་འཛམ་གླིང་ཁྱོན་ཡོངས་ཀྱི་མི་ཚོང་ཁྲིམས་འགལ་གནད་དོན་སྐོར་གྱི་སྙན་ཐོ་ (Trafficking in Persons Report) ཞིག་བཏོན་པའི་ནང་། རྒྱ་ནག་གིས་བོད་མི་དང་ཤར་ཊུར་ཀི་སི་ཐན་ཁུལ་དུ་གནས་སྡོད་ཡུ་གུར་མི་མང་རྣམས་བཙན་གྱིས་ངལ་རྩོལ་དུ་བཀོལ་བཞིན་པ་སོགས་ཀྱི་གནས་སྟངས་ལ་བརྟེན་ནས། རྒྱ་ནག་ནི་འདས་པའི་ལོ་ལྔ་རིང་ནས་བསྟུད་མར་འཛམ་གླིང་གི་མི་ཚོང་ (Human Trafficking) རྒྱག་མཁན་གྱི་རྒྱལ་ཁབ་སྡུག་ཤོས་གྲས་སུ་ཚུད་ཡོད་པ་རེད།
ཨ་རིའི་སྙན་ཐོ་དེའི་ནང་། རྒྱ་ནག་གཞུང་གིས་ཤིན་ཅང་(ཤར་ཊུར་ཀི་སི་ཐན)ཁུལ་དུ་འདུས་སྡོད་བྱེད་བཞིན་པའི་ཡུ་གུར་གཙོས་པའི་གྲངས་ཉུང་མི་རིགས་ས་ཡ་ ༡ ལས་མང་བ་བཙན་གྱིས་ངལ་རྩོལ་དུ་བཀོལ་གྱི་ཡོད་ཅིང་། དེ་ནི་རྒྱ་ནག་གཞུང་གིས་ལག་ཤེས་སྦྱོང་བརྡར་ལ་ཁག་དཀྲིས་ཏེ་གྲངས་ཉུང་མི་རིགས་རྣམས་ཀྱི་རིག་གཞུང་ངོ་བོ་དང་བཅས་པ་རྩ་བརླག་གཏོང་རྒྱུའི་སྲིད་ཇུས་ཤིག་ཡིན་སྐོར་དང་། རྒྱ་ནག་གི་མགོ་འཁྲིད་ཚོས་སྡིགས་ར་དང་། ཚུལ་མིན་འཁྲིག་སྤྱོད། མནར་གཅོད། རྡུང་རྡེག་སོགས་ཀྱི་ཐབས་ལམ་བརྒྱུད་ནས་བཀག་ཉར་ཁང་ནང་ཡོད་པའི་ཡུ་གུར་མི་རིགས་རྣམས་རྒྱ་ནག་གི་བཟོ་གྲྭ་ཁག་ལ་ངལ་རྩོལ་དུ་གཏོང་གི་ཡོད་སྐོར་བཀོད་འདུག
དེ་བཞིན་རྒྱ་ནག་གཞུང་གིས་དབུལ་གྲོལ་དང་། ལས་མི་གནས་སྤོས་ཀྱི་མིང་ཐོག་ནས་བོད་མི་འབུམ་ ༥ ལས་མང་བ་བཟོ་གྲྭ་དང་ལག་ཤེས་སྦྱོང་བརྡར་དུ་བཏང་ཡོད་པ་མ་ཟད། སྦྱོང་བརྡར་ཁང་དེ་དག་ནང་བོད་མི་ཚོར་གདམ་ཀ་སོགས་གང་ཡང་མེད་པར་རང་བཞིན་གྱིས་བཙན་བཀོལ་ངལ་རྩོལ་ཁོངས་སུ་ཚུད་ཀྱི་ཡོད་སྐོར་བཀོད་འདུག་ལ། ཨ་རིའི་གཞུང་གིས་མི་ཚོང་གནད་དོན་ཐད་གནས་སྟངས་སྡུག་པོ་ཡིན་པའི་རྒྱལ་ཁབ་ཚོར་དཔལ་འབྱོར་ཉེས་ཆད་གཅོད་རྒྱུ་ཡིན་པའི་ཉེན་བརྡ་ཡང་བཏང་ཡོད་འདུག
China’s Foreign Ministry Spokesperson Wang wenbin
དེ་ཡང་ཟླ་འདིའི་ཕྱི་ཚེས་ ༢ ཉིན་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝིན་པིན་ཟེར་བ་དེས། རྒྱ་ནག་ངོས་ནས་ཨ་རིའི་ཁུངས་ལྡན་མ་ཡིན་པའི་གནས་ཚུལ་དང་འཁྱར་གཏམ་ལ་གཞིར་བཟུང་བའི་སྐྱོན་འཛུགས་རིགས་དེར་ངོས་ལེན་རྩ་བ་ནས་བྱེད་ཐབས་མེད་པ་དང་། ཨ་རིའི་ངོས་ནས་དང་ཐོག་རང་ཉིད་ཀྱི་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་དབྱེ་འབྱེད་ཀྱི་གནད་དོན་ལ་བསྐྱར་ཞིབ་བྱེད་དགོས་པ་དང་། ཨ་རི་ལ་འགྲོ་བ་མིའི་ཐོབ་ཐང་འཆད་རྒྱུའི་ཐོབ་ཐང་མེད་སྐོར་སོགས་བརྗོད་ཡོད་འདུག
གཞན་ཡང་རྒྱ་ནག་གཞུང་གིས་རྒྱལ་ནང་ཙམ་དུ་མ་ཟད། ཨ་ཧྥེ་རི་ཀ་དང་ལྷོ་ཨ་མེ་རི་ཀ་ཡིས་མཚོན་པའི་ཕྱིའི་རྒྱལ་ཁབ་ཁག་ནང་དུའང་། རྒྱུད་གཅིག་ལམ་གཅིག་ཅེས་པའི་གཞི་རྒྱ་ཆེ་བའི་འཛུགས་སྐྲུན་ལས་གཞིའི་ཁྲོད་ངལ་རྩོལ་ལས་མི་རྣམས་ལ་ཆ་རྐྱེན་ཞན་པ་དང་། འཕྲོད་བསྟེན་སྨན་བཅོས་ཀྱི་མཐུན་འགྱུར་མེད་པ་སོགས་གནས་སྟངས་ཐབས་རྡུགས་ཡིན་སྐོར་བཀོད་ཡོད་འདུག ཨ་རིའི་ཕྱི་སྲིད་ལྷན་ཁང་གི་སྙན་ཐོ་དེའི་ནང་མི་ཚོང་ཞེས་པ་བུད་མེད་དང་ཕྲུ་གུ་སོགས་ལ་ཚུལ་མིན་འཁྲིག་སྤྱོད་ཀྱི་ལས་སམ། ཡང་ན་ངལ་རྩོལ་སོགས་ཀྱི་ཆེད་དུ་སྡིགས་རའམ་བསླུ་བྲིད་སོགས་ཀྱི་སྒོ་ནས་ཉོ་ཚོང་ངམ་བཀོལ་སྤྱོད་བྱེད་པ་ཞིག་ལ་ངོས་འཛིན་བྱེད་ཀྱི་ཡོད་འདུག
སྙན་ཐོ་དེས་འཛམ་གླིང་རྒྱལ་ཁབ་སོ་སོའི་ནང་མི་ཚོང་གི་གནས་སྟངས་དང་འབྲེལ་ནས་རིམ་པ་གསུམ་ཅན་གྱི་ཨང་རིམ་སྤྲད་ཀྱི་ཡོད་པའི་ཁྲོད་ནས། རྒྱ་ནག་དང་། འབར་མ། ཨབ་གྷ་ནི་སི་ཐན། ཨི་རཱན། བྱང་ཀོ་རི་ཡ། ཨུ་རུ་སུ། སི་རི་ཡ་སོགས་ཨང་རིམ་གསུམ་པའི་ནང་བཞག་ཡོད་ཅིང་། རྒྱལ་ཁབ་དེ་དག་གི་ནང་མི་ཚོང་ཤུགས་ཆེར་རྒྱག་གི་ཡོད་ནའང་། སྲིད་གཞུང་ངོས་ནས་དེར་དུས་ལྟར་གདོང་ལེན་དང་ཁ་གཏད་གཅོག་གི་མེད་པ་ཡིན་འདུག གཞན་ཡང་རྒྱ་ནག་ཚུད་པའི་རྒྱལ་ཁབ་ ༡༡ ནང་གཞུང་གི་ལས་གཞིའི་ནང་དུ་མི་ཚོང་རྒྱག་པ་དང་། གཞུང་གི་སྨན་བཅོས་སོགས་ཀྱི་ཚན་པ་འདྲ་མིན་ནང་བཙན་བཀོལ་ངལ་རྩོལ་ལག་བསྟར་བྱེད་པ་དང་། གཞུང་གི་ལས་བྱའི་ཁྲོད་དུ་ཚུལ་མིན་འཁྲིག་སྤྱོད་ཆེད་མི་ཚོང་རྒྱག་པ་དང་། ཕྲུ་གུ་ལོ་ཆུང་རྣམས་རྒྱལ་ཁབ་ཀྱི་དམག་མིར་བསྡུས་པ་སོགས་མི་ཚོང་རྒྱག་རྒྱུ་དེ་གཞུང་གི་སྲིད་ཇུས་དང་སྒྲོམ་གཞི་ནང་མངོན་གསལ་དུ་ཡོད་སྐོར་བཀོད་འདུག
གསར་འགོད་པ། པ་སངས་ཚེ་རིང་།
