བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་དབུས་བོད་ཀྱི་སྨན་རྩིས་ཁང་དུ་གཞུང་འབྲེལ་འཚམས་གཟིགས་གནང་སྐབས་དེང་རབས་ཚན་རིག་དང་མཐུན་པའི་ཐོག་ནས་སྨན་རྩྭ་འདེབས་ལས་བྱེད་དགོས་པ་ཧ་ཅང་གལ་ཆེན་ཡིན་སྐོར་གསུངས་སོང་།
དེ་རིང་སྔ་དྲོ་ཆུ་ཚོད་ ༡༡།༣༠ ཐོག་སྲིད་སྐྱོང་སྤེན་པ་ཚེ་རིང་མཆོག་དབུས་བོད་ཀྱི་སྨན་རྩིས་ཁང་དུ་གཞུང་འབྲེལ་འཚམས་གཟིགས་སུ་ཕེབས་ཏེ་སྨན་རྩིས་ཁང་གི་ཚོགས་ཁང་དུ་གཞུང་འབྲེལ་མཛད་སྒོ་ཞིག་འཚོགས་སོང་བ་དང་། མཛད་སྒོའི་ཐོག་སྨན་རྩིས་ཀང་གི་དྲུང་ཆེ་ལས་ཚབ་དང་དྲུང་ཆེ་ལས་རོགས། སྐུ་བཅར་སྨན་རམས་པ། སྡེ་ཚན་ཁག་གི་འགན་འཛིན་རྣམས་ནས་སྲིད་སྐྱོང་མཆོག་ལ་ཕེབས་བསུའི་མཇལ་དར་འབུལ་ལམ་ཞུས་རྗེས། དབུས་སྨན་རྩིས་ཁང་གི་དབུ་འཛིན་ཚེ་རིང་བཀྲ་ཤིས་ལགས་ཀྱིས་སྤེན་པ་ཚེ་རིང་མཆོག་ལ་སྲིད་སྐྱོང་དུ་བདམས་ཐོན་བྱུང་བར་འཚམས་འདྲིའི་གསུང་བཤད་གནང་སོང་། དེ་ནས་སྨན་རྩིས་ཁང་གི་དྲུང་ཆེ་ལས་ཚབ་དང་སྡེ་ཚན་འགན་འཛིན་སོ་སོས་སྡེ་ཚན་གྱི་ལས་འགན་སྙིང་བསྡུས་རེ་སྙན་སྒྲོན་ཞུས་སོང་།
སྲིད་སྐྱོང་མཆོག་ནས་ད་ལྟའི་ཆར་བཀའ་བློན་རྣམས་བསྐོ་བཞག་བྱུང་མེད་ནའང་ཕྱག་ལས་སོགས་ལ་སྐུ་ངལ་དང་འགོག་རྐྱེན་གང་ཡང་ཡོང་གི་མེད་སྐོར་གསུངས་པ་དང་འབྲེལ། ཉེ་ལམ་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ཚན་པ་སོ་སོར་འཚམས་གཟིགས་སུ་ཕེབས་ཏེ་རྒྱུས་ལོན་གནང་ཡོད་པ་ལྟར། དབུས་བོད་མིའི་སྒྲིག་འཛུགས་སུ་ལས་བྱེད་རྒན་པ་མང་པོ་ཞིག་མེད་ཀྱང་འབྲིང་བ་མང་ཙམ་ཡོད་པ་དང་། ལྷག་པར་དུ་སློབ་སྦྱོང་ཚད་མཐོ་བོ་གནང་མཁན་གྱི་ན་གཞོན་མང་པོ་ཞིག་ཡོད་ཀྱང་། ཁོང་ཚོ་བོད་མིའི་སྒྲིག་འཛུགས་ཀྱི་འགྲོ་སྟངས་ཀྱི་སྒྲོམ་གཞིར་རྒྱུས་མངའ་དེ་ཙམ་མེད་པར་བརྟེན་ལམ་སྟོན་དགོས་གལ་ཆེ་སྟབས། མི་འགྱངས་བར་བཀའ་བློན་རྣམས་ཕེབས་མཚམས་སུ་གཞོན་སྐྱེས་ལས་བྱེད་མང་པོ་ཞིག་ནས་རང་མགོ་་ཐོན་སླད་ལམ་སྟོན་གནངས་དང་གནང་མུས་ཡིན་སྐོར་གསུངས་སོང་།
དེ་བཞིན་སྲིད་སྐྱོང་མཆོག་གིས། ད་ཐེངས་ཀྱི་བཀའ་ཤག་གིས་༧གོང་ས་སྐྱབས་མགོན་ཆེན་པོ་མཆོག་གི་དགོངས་བཞེད་དང་། བོད་མི་དམངས་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་ཟིན་པའི་བཅའ་ཁྲིམས་ཀྱི་དགོངས་དོན་དང་མི་འགལ་བར། དབུ་མའི་ལམ་གྱི་སྲིད་ཇུས་དང་་འཚེ་མེད་ཞི་བའི་ཐབས་ལམ་གྱི་ཐོག་ནས། རྒྱ་ནག་གཞུང་དམངས་གཉིས་ལ་འབྲེལ་ལམ་བཙུགས་ནས། བོད་རྒྱའི་དཀའ་རྙོག་སེལ་ཐབས་བྱ་རྒྱུ་དང་། ༧གོང་ས་སྐྱབས་མགོན་ཆེན་པོ་མཆོག་རྒྱ་ནག་དུ་ཆིབས་བསྒྱུར་གནང་ཐུབ་ན། སྐུ་འཁྲུངས་ཡུལ་སྟག་འཚེར་དང་། ལྷ་སར་ཕེབས་འདུན་ཡོད་པ་བཞིན། སྐུ་སྒེར་གྱི་ཕོ་བྲང་དང་སྐབས་བཅུ་དྲུག་པའི་བཀའ་ཤག་གཉིས་ཀྱིས་རྒྱ་ནག་གཞུང་ལ་འབྲེལ་ལམ་བཙུགས་ཐབས་ཀྱིས། བོད་རྒྱའི་དཀའ་རྙོག་སེལ་ཐབས་ལ་འབད་འབུངས་བྱ་རྒྱུ་དང་། ཇི་སྲིད་བོད་རྒྱའི་དཀའ་རྙོག་མ་སེལ་བར་དེ་སྲིད་བོད་ནང་གི་གནས་ཚུལ་བསྡུ་རུབ་མང་ཙམ་བྱས་ཏེ། བོད་ས་ཁག་ཏུ་རྒྱ་མི་གནས་སྤོར་བྱེད་མུས་ཡིན་པའི་གནད་དོན་དང་། བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་རང་དབང་མེད་པ་དང་། ཆོས་སྡེ་ཁག་ལའང་ཆོས་ལུགས་ཀྱི་བྱེད་སྒོ་སོགས་བཀག་འགོག་བྱེད་མུས་ཡིན་པ་དེར། རྒྱལ་ཁབ་ ༢༥ ལྷག་གི་ནང་གནས་མུས་ཡིན་པའི་བོད་རིགས་ན་གཞོན་ཚོས་རྒྱལ་སྤྱིའི་སྡིངས་ཆར་བོད་དོན་དྲིལ་བསྒྲགས་མང་ཙམ་བྱ་དགོས་སྐོར་དང་། བོད་མིའི་སྒྲིག་འཛུགས་ཀྱི་ལྷན་ཁང་སོ་སོའི་ལས་དོན་དང་། ཚོགས་སྡེ་ཁག་གི་ལས་དོན་རྣམས་གལ་ཆེན་ཡིན་ནའང་། གཙོ་བོ་ཚང་མས་ནུས་པ་མཉམ་སྤུང་གི་ཐོག་ནས་བོད་དོན་བདེན་མཐའ་གསལ་ཐབས་བྱ་རྒྱུ་དེ་ཡིན་པས། སྐབས་བཅུ་དྲུག་པའི་བཀའ་ཤག་གིས་བོད་རྒྱའི་དཀའ་རྙོག་སེལ་ཐབས་ལ་ཤུགས་རྒྱག་འཆར་ཡོད་པ་དང་། བོད་རྒྱའི་དཀའ་རྙོག་དེ་ཕྱི་རྒྱལ་བ་རྣམས་ལ་འགྲེལ་བཤད་གང་མང་མང་རྒྱག་རྒྱུ་ནི་བོད་མི་ཡོངས་ཀྱི་འགན་འཁྲི་ཡིན་སྐོར་གསུངས་སོང་།
བོད་ལུགས་གསོ་བ་རིག་པ་དེང་དུས་དང་མཐུན་པའི་ཐོག་ནས་ཡར་རྒྱས་གཏོང་གལ་ཆེ་བའི་སྐོར་ལ་སྲིད་སྐྱོང་མཆོག་གིས། ད་ལྟ་ནས་སྨན་རྩིས་ཁང་གིས་སྨན་རྩྭ་འདེབས་པའི་ལས་གཞི་མང་པོ་ཞིག་ལ་འབད་བརྩོན་བྱེད་དགོས་ཀྱི་འདུག དེང་སང་ཚན་རིག་དང་མཐུན་པའི་ཉམས་ཞིབ་བྱ་རྒྱུ་གལ་ཆེན་པོ་རེད་འདུག རྒྱལ་ཁབ་མང་པོའི་ནང་ཤེས་རྟོགས་ཐུབ་པའི་ཆེད་དུ་ཚན་རིག་དང་མཐུན་པའི་ཐོག་ལ་འབད་བརྩོན་བྱེད་གལ་ཆེ་བ་དང་། སྨན་རྩྭ་འདེབས་ལས་ཆེད་བོད་མིའི་སྒྲིག་འཛུགས་ནས་དཔེར་ན་རྒྱ་གར་ལྷོ་ཕྱོགས་སོགས་ནས་ས་ཆའི་མཐུན་རྐྱེན་སྦྱོར་སྤྲོད་གནང་རྒྱུ་ཡོད་སྐོར་དང་། འཛམ་གླིང་རྒྱལ་ཁབ་ཁག་གི་ནང་ཏོག་དབྱིབས་འགོག་ཁབ་བརྒྱབ་དང་རྒྱག་བཞིན་པའི་གནས་སྟངས་ཆགས་ཀྱི་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ཁྲོད་ད་ལྟའི་ཆར་ཏོག་དབྱིབས་འགོག་ཁབ་དང་པོ་བརྒྱབ་ཟིན་པ་བརྒྱ་ཆ་ ༨༢ ཆགས་ཡོད་པ་དེ་ཡར་ཐོན་ཅན་གྱི་རྒྱལ་ཁབ་ཀྱི་གནས་བབ་དང་མཚུངས་ཀྱི་ཡོད་སྐོར་གསུངས་སོང་།
ཁོང་གིས། ད་ལྟ་བར་དུ་སྨན་རྩིས་ཁང་མགོ་བཙུགས་པ་ནས་བཟུང་འགན་འཛིན་མང་པོ་ཕེབས་ཡོད་པ་རེད། སྨན་རྩིས་ཁང་གི་འཛིན་སྐྱོང་གི་འགྲོ་སྟངས་དེ་དག་ཡག་པོ་ཡོད་པའི་རྣམ་པ་འདུག མི་སྒེར་གྱི་མི་ཚེའི་ནང་དཀའ་ངལ་འཕྲད་ཀྱི་རེད། དེ་ལ་ང་ཚོས་གདོང་ལེན་བྱེད་བཞིན་འགྲོ་དགོས་ཀྱི་ཡོད་པ་རེད། དེ་བཞིན་སྒྲིག་འཛུགས་ལའང་དཀའ་ངལ་འཕྲད་ཀྱི་རེད། ང་ཚོའི་སྤྱི་ཚོགས་ནང་དཀའ་ངལ་ཉུང་དུ་གཏང་དགོས་ཀྱི་ཡོད་ན། མང་ཚོགས་ནང་དུ་གོ་རྟོགས་ཤུགས་ཆེན་པོ་འགྲོ་དགོས་ཀྱི་རེད། ང་ཚོ་དམངས་གཙོའི་ལམ་ལུགས་ཀྱི་ཐོག་ནས་འགྲོ་ཡི་ཡོད་དུས། ཁྲིམས་དང་སྒྲིག་གཞིའི་དབང་བསྒྱུར་འོག་ནས་འགྲོ་དགོས་ཀྱི་རེད། ཁྲིམས་དང་སྒྲིག་གཞིའི་དབང་བསྒྱུར་འགྲོ་དགོས་ཀྱི་ཡོད་ན་ཁྲིམས་དང་སྒྲིག་གཞིའི་ནང་གང་གསལ་བ་དེ་ལ་བལྟ་དགོས་ཀྱི་རེད། ཅེས་སོགས་གསུངས་སོང་།
གསར་འགོད་པ། བསྟན་འཛིན་ཕུར་བུ། དཔལ་ལྡན།
