དེ་རིང་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་ ༨༦ ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་དང་བསྟུན་ནས་ཀིརྟིའི་བྱེས་པ་གྲྭ་ཚང་གི་ཨ་ལགས་རྗེ་སྤྲུལ་བློ་གྲོས་ཆོས་བཟང་ལགས་ཀྱིས་བརྩམས་པའི་ཨ་རི་བ་བླ་མ་དཀར་པོ་ཞེས་པའི་དཔེ་དེབ་ཅིག་དབུ་འབྱེད་གནང་སོང་།
དཔེ་དེབ་དབུ་འབྱེད་ཐོག་ཨ་ལགས་རྗེ་སྤྲུལ་བློ་གྲོས་ཆོས་བཟང་ལགས་ནས་དཔེ་དེབ་དེ་བརྩམས་པའི་དགོས་དམིགས་སྐོར་ཁོང་གིས། ཨ་རི་བ་བླ་མ་དཀར་པོ་ཞེས་པ་ནི་བོད་དུ་ཕེབས་པའི་ཨ་རི་བ་ཞིག་ཡིན་པ་དང་ཁོང་གི་མཚན་ལ་ཐིའུ་སི་ཁ་སི་མིར་ཧཱ་མཱ་ཊི་བྷེ་ཎེ་ཌ་(Theos Casimir Hamati Bernard) ཟེར་ཞིང་། ཁོང་ཕྱི་ལོ་ ༡༩༠༨ ལོར་འཁྲུངས་པ་དང་ཕྱི་ལོ་ ༡༩༤༧ ལོར་འདས་པ་སོགས་ཀྱི་ལོ་རྒྱུས་སྐོར་ཡོད་པ་རེད། བཙན་བྱོལ་དུ་ཡོད་པའི་ཉམས་ཞིབ་པ་དང་རྩོམ་པ་པོ་རྣམས་ཀྱིས་བོད་ཀྱི་ཆབ་དཔལ་རིག་གསུམ་གྱི་སྐོར་ནས་བོད་ནང་ནས་ལྟ་ཀློག་དང་ཞིབ་འཇུག་གི་རྒྱུ་ཆ་མ་རག་པར་ཆད་པ་དང་མི་གསལ་བ་གང་ཡོད་རྣམས་ཁ་སྐོང་བ་དང་ཇེ་གསལ་གཏོང་དགོས་པའི་ལས་འགན་བཙན་བྱོལ་དུ་ཡོད་པའི་ཉམས་ཞིབ་པ་དང་རྩོམ་པ་པོ་རྣམས་ལ་ཡོད་པ་དང་། ཁོང་གི་དཔེ་དེབ་དེ་ཡང་དང་པོ་ནས་དམིགས་ཡུལ་དེ་ལྟར་བཟུང་བ་མིན་ཡང་། ཉེ་རབས་བོད་ཀྱི་ལོ་རྒྱུས་ཁག་ཅིག་མི་གསལ་བ་རྣམས་ཇེ་གསལ་ཏུ་གཏོང་ཐབས་གནང་ཡོད་ལ། དཔེ་དེབ་དེའི་མི་སྣ་གཙོ་བོ་ཨ་རི་བ་ཐིའུ་སི་བྷེ་ཎེ་ཌ་བླ་མ་དཀར་པོ་་(Theos Bernard)ལགས་ཐོག་མར་རྒྱ་གར་དུ་ཡོ་གའི་རྣལ་འབྱོར་གྱི་སྐོར་ཞིབ་འཇུག་བྱེད་དུ་ཡོང་བ་དང་། ཕྱིས་སུ་བོད་བརྒྱུད་ནང་བསྟན་ལ་ཡིད་དབང་འཕྲོག་ནས་ནང་ཆོས་དང་བོད་ཡིག་ཀ་སྦུག་ཏུ་བྷ་བྷུ་མཐར་ཕྱིན་ལགས་ཀྱི་མདུན་ནས་སྦྱངས་བ་དང་མཁས་དབང་དགེ་འདུན་ཆོས་འཕེལ་དང་ངོ་ཤེས་སུ་གྱུར་བ། ཕྱི་ལོ་ ༡༩༣༧ ཟླ་ ༥ ཚེས་ ༡༡ ཉིན་ཀ་སྦུག་ནས་ཐོན་ཏེ་རྒྱལ་རྩེར་ཟླ་གཅིག་ལྷག་བསྡད་རྗེས། བོད་གཞུང་ནས་ཁོང་ལ་ལྷ་སའི་ལམ་ཡིག་དམིགས་བསལ་གྱིས་སྤྲད་དེ་ལོ་དེའི་ཕྱི་ཟླ་ ༦ ཚེས་ ༢༥ འབྱོར། ལྷ་སར་ཚ་རོང་གཟིམ་ཤག་ཏུ་ཟླ་ཤས་བསྡད་ཅིང་། རྒྱལ་ཚབ་རྭ་སྒྲེང་རིན་པོ་ཆེར་སྔ་ཕྱི་ཐེངས་གསུམ་མཇལ་བ་དང་། བཀའ་བློན་རྣམ་པ། དགའ་ལྡན་ཁྲི་པ་སོགས་བོད་གཞུང་གི་གནད་ཡོད་མི་སྣ་གང་མང་དང་ཐུག་འཕྲད་གནང་ཡོད་སོགས་བརྗོད་སོང་།
ཡང་ཁོང་གིས། རྒྱལ་ཚབ་རིན་པོ་ཆེས་བོད་དང་ཨ་རིའི་བར་གཞུང་འབྲེལ་གྱི་འབྲེལ་ལམ་འཛུགས་ཆེད་ཨ་རིའི་སྲིད་འཛིན་ (Franklin D.Roosevelt ) མཆོག་ལ་འབུལ་གནང་མཛད་པའི་ཕྱག་ཡིག་ཅིག་ཁོང་གི་ཕྱག་ཏུ་བསྐུར། བོད་ཀྱི་ལོ་རྒྱུས་ཀྱི་ཐོག་ནས་བོད་ཀྱི་སྲིད་སྐྱོང་ཞིག་གིས་ཨ་རིའི་སྲིད་འཛིན་ལ་ཕྱག་ཡིག་ཕུལ་བ་ཐེངས་དང་པོ་ཆགས་ཡོད་པ་དང་། དེར་ལོ་རྒྱུས་ཀྱི་དོན་སྙིང་ཆེན་པོ་ལྡན་ཡོད་ལ། ཕྱག་ཡིག་གི་ནང་དོན་ནི། ནང་བསྟན་ཨ་རི་ལ་དར་སྤེལ་བྱེད་ཆེད་དང་བོད་དང་ཨ་རིའི་བར་འབྲེལ་ལམ་འཛུགས་རྒྱུའི་སྐོར་རེད། ཡིན་ན་ཡང་། རྒྱུ་མཚན་སྣ་ཚོགས་ལ་བརྟེན་ནས་ཕྱག་ཡིག་དེ་ཨ་རིའི་སྲིད་འཛིན་གྱི་ཕྱག་ཏུ་སྤྲོད་མ་ཐུབ་པར་ལྷག་ཡོད་པས། ད་ལྟའི་བོད་ཀྱི་གནས་སྟངས་སྤྱི་དང་། ལྷག་པར་དུ་ཨ་རིས་བོད་དོན་ཆེད། ཕྱི་ལོ་༢༠༠༢ དང་ཕྱི་ལོ་ ༢༠༢༠ ལོའི་རྒྱབ་སྐྱོར་གྱི་ཁྲིམས་ཡིག་དང་། དེ་བཞིན་ཉེ་ཆར་ཨ་རིའི་གྲོས་ཚོགས་འཐུས་མི་ (SCORTT PERRY) སོགས་ནས་ཀྱང་ཨ་རིའི་སྲིད་འཛིན་གྱི་ངོས་ནས་བོད་དེ་ཉིད་ལོ་རྒྱུས་ཀྱི་ཐོག་ནས་རང་བཙན་ཡིན་པའི་ངོས་ལེན་དགོས་པའི་ཁྲིམས་འཆར་སོགས་འདོན་བཞིན་ཡོད་པས། ཆར་པ་ཆུ་གྲོགས། ཉི་མ་མེ་གྲོགས་ཀྱི་དཔེ་ལྟར། བོད་ཀྱི་བདེན་དོན་གསལ་བར་ཕན་ཐོགས་ཆེན་པོ་ཡོད་སྐོར་བརྗོད་སོང་།
དེ་བཞིན་ཁོང་གིས། ཐིའུ་སི་བྷེ་ཎེ་ཌ་བླ་མ་དཀར་པོ་( Theos Bernard ) ལགས་ཀྱིས་ཕྱི་ལོ་ ༡༩༤༡ ལོར་ཨ་རིའི་མངའ་སྡེ་ཁ་ལེ་ཧྥོ་ནེ་ཡའི་གྲོང་ཁྱེར་སན་ཌ་བྷར་བྷ་རཱའི་(Califonia, Santa Barbara)ནང་ས་ཁྱོན་ཆེན་པོ་གཉིས་ཉོས་ཏེ་བོད་ཀྱི་སློབ་གཉེར་ཁང་(Academy Of Tibetan Literataure )དང་། སྒྲ་སྒྱུར་ཁང་སོགས་འཛུགས་རྒྱུའི་འཆར་གཞི་གཏིང་པ་དང་། བཀའ་བསྟན་དབྱིན་བསྒྱུར་ཆེད་དགེ་འདུན་ཆོས་འཕེལ་ཨ་རི་ལ་མགྲོན་འབོད་དང་། དེའི་ཆེད་དུ་ཀ་ལི་ཀ་ཏ་ནས་ཨ་རིར་སྐྱོད་མཁན་གྱི་གྲུ་གཟིངས་ཀྱི་འཛིན་བྱང་ཡང་ཉོས་ཏེ་མཐར་འགྲོ་མ་ཐུབ་པའི་སྔ་ཕྱི་བར་གསུམ་གྱི་བརྒྱུད་རིམ་ལོ་རྒྱུས་ཆ་ཚང་ཡོད། མདོར་ན། དུས་རབས་ཉི་ཤུ་པའི་མགོ་སྟོད་དུ་རྒྱལ་ཚབ་རྭ་སྒྲེང་རིན་པོ་ཆེ་དང་། དགེ་ཆོས། ཨ་རི་བ་བླ་མ་དཀར་པོ་གསུམ་གྱིས་བོད་བརྒྱུད་ནང་བསྟན་ཨ་རིར་དར་སྤེལ་གཏོང་ཐབས་དང་། བོད་དང་ཨ་རིའི་བར་ཆབ་སྲིད་འབྲེལ་ལམ་འཛུགས་ཐབས་བྱེད་པའི་ཉེ་རབས་བོད་ཀྱི་ལོ་རྒྱུས་ཀྱི་དཔེ་དེབ་ཅིག་ཡིན། ཞེས་བརྗོད་སོང་།
དེ་ནས་ཀིརྟིའི་བྱེས་པ་གྲྭ་ཚང་གི་རྩོམ་སྒྲིག་འགན་འཛིན་ཟུར་པ་དང་ཨ་རི་བ་བླ་མ་དཀར་པོའི་ཞུ་དག་པ་ཚོང་རུ་སེངྒེ་ལགས་ཀྱིས། སྤྱིར་བཏང་ང་ཚོ་མི་རིགས་གང་དང་གང་ཡིན་ཡང་ལོ་རྒྱུས་དེ་རྩ་ཆེན་པོ་ཡིན་ལྟར། རྗེས་རབས་པ་ཚོས་ལོ་རྒྱུས་ཤེས་དགོས་པ་དང་། ལོ་རྒྱུས་ཀྱི་ཐོག་ནས་ལེགས་ཆ་མང་པོ་ཞིག་ལེན་དགོས་པ་མ་ཟད། ཉེ་རབས་ལོ་རྒྱུས་ལ་སྙིགས་དོར་བཅུད་ལེན་གྱིས་ལོ་རྒྱུས་ཀྱི་ཐོག་ནས་གོམ་པ་གསར་པ་ཞིག་སྤོ་དགོས་པ་དེ་གལ་ཆེན་པོ་ཡིན་སྐོར་དང་། ཨ་རི་བ་བླ་མ་དཀར་པོ་ཞེས་པ་དེ་ཕྱི་ལོ་ ༡༩༠༩ ནས་༡༩༤༧ བར་གྱི་མི་ཞིག་ཡིན་པ་དང་། ཁོང་མི་ག་འདྲ་ཞིག་ཡིན་མིན་ལ་མ་ལྟོས་པར་ལྷག་བསམ་རྣམ་དག་གིས་ཨ་རིའི་ནང་ནང་ཆོས་དར་སྤེལ་གཏོང་འདོད་ཡོད་མཁན་ཞིག་ཡིན་ཡང་། བོད་ནང་རྭ་སྟག་དོན་རྐྱེན་བྱུང་རྗེས་ཁོང་བསྐྱར་དུ་བོད་ལ་ཕེབས་ཐུབ་མེད་པ་སོགས་ལོ་རྒྱུས་མང་པོ་ཡོད་ཀྱང་། ཨ་ལགས་རྗེ་སྤྲུལ་བློ་གྲོས་ཆོས་བཟང་ལགས་ཀྱིས་སྙིགས་དོར་བཅུད་ལེན་བྱས་ཏེ་ལོ་རྒྱུས་ཀྱི་དཔེ་དེབ་མང་པོར་ལྟ་མི་དགོས་པ་ཞིག་དང་། ལྷག་པར་དུ་དབྱིན་ཡིག་མི་ཤེས་མཁན་ཞིག་ཡིན་ན་བོད་ཡིག་གི་ཐོག་ནས་ལོ་རྒྱུས་ཀྱི་རྒྱུ་ཆ་མང་པོ་ཞིག་རག་གི་ཡོད། སྐད་ཡིག་གཉིས་པ་ཤེས་མཁན་ཞིག་ཡིན་ན་དེབ་དེར་གཞི་བཅོལ་ནས་དགེ་འདུན་ཆོས་འཕེལ་གྱི་སྐོར་དང་། རྭ་སྟག་དོན་རྐྱེན། ཨ་རིའི་སྲིད་འཛིན་སོ་གཉིས་པར་ཕྱག་ཡིག་བསྐུར་བ་དང་། ཨ་རི་བ་བླ་མ་དཀར་པོས་བོད་ཀྱི་ཐང་ག་དང་རིན་པོ་ཆེ་སོགས་ཧ་ཅང་འབོར་ཆེན་ཨ་རིའི་ནང་གདན་འདྲེན་ཞུས་ཡོད་པ་མ་ཟད། ཕྱིས་སུ་ཐང་ག་སོགས་དངོས་པོ་ཁ་ཤས་རེ་ཕྱིར་འཕྲོད་མེད་པ་སོགས་ལོ་རྒྱུས་ཀྱི་གནད་འགག་མང་པོ་ཞིག་ངོ་སྤྲོད་བྱས་ཡོད་སྟབས། དེབ་དེ་བཀླག་པ་ཡིན་ན་གསར་པ་མང་པོ་ཞིག་ཤེས་རྟོགས་ཡོང་ཐུབ་སྐོར་དང་། ཁོང་ནས་དུས་རྒྱུན་བོད་མི་རིགས་འདི་ག་འདྲ་ཞིག་ཡིན་མིན་མཐོང་དགོས་ན། བོད་སྐད་ཡིག་དང་རིག་གཞུང་། བོད་ཀྱི་ཁོར་ཡུག་ཅིག་ནས་མཐོང་དགོས་པ་རེད་མ་གཏོགས་སྐད་ཡིག་གཞན་ཞིག་གི་ཐོག་ནས་བོད་ཆ་ཚང་བ་ཞིག་མཐོང་ཐུབ་ཁག་པོ་རེད་བསམ་གྱི་ཡོད་སྐོར་བརྗོད་སོང་།
དེའི་རྗེས་སྐུ་མགྲོན་གཙོ་བོ་ཉམས་ཞིབ་པ་དང་རྩོམ་པ་པོ་ཤེས་རབ་དར་རྒྱས་ལགས་ཀྱིས། ཕྱི་ལོ་ ༡༩༨༠ དང་ ༡༩༩༠ ནང་བཙན་བྱོལ་ནང་རྩོམ་རིག་གི་ཐད་ནས་མི་མང་པོ་ཞིག་ལ་བསམ་ཚུལ་ཡོད་པ་རེད་ལ། ང་རང་ཚོ་དངོས་དོན་གྱི་ཆ་ནས་ཀྱང་རྒྱུས་མངའ་གང་ལ་གང་ཙམ་ཡོད་བསྡད་པ་ཞིག་ཆགས་ཡོད་པ་རེད། དང་ཐོག་ང་ཚོ་བཙན་བྱོལ་ནང་དུ་རྩོམ་པ་པོ་རྒན་གྲས་ཁག་ཅིག་ཡོད་པ་དང་། དེ་ནས་དུས་ཚོད་ཀྱི་འགྱུར་བ་དང་བསྟུན་ནས་རྩོམ་པ་པོ་ལའང་རིམ་གྱིས་འགྱུར་བ་ཕྱིན་ཏེ་རྩོམ་ཆོས་ཀྱི་སྤུས་ཀ་དང་རྣམ་པའང་འགྱུར་ནས་ཡོང་བ་རེད། བར་ལམ་ནས་རྩོམ་པ་པོ་རྒན་པ་མང་ཆེ་བ་ཞིག་གི་བརྩམས་ཆོས་ཞེ་དྲག་མཇལ་རྒྱུ་མེད་པའི་གནས་སྟངས་ཆགས་ཡོད་པ་དང་། རྩོམ་པ་པོ་དང་ཉམས་ཞིབ་པ་གསར་པ་མང་པོ་ཞིག་ཡར་ཕེབས་ནས་རྩོམ་ཡིག་གི་སྤུས་ཀ་སོགས་གང་ཅིའི་ཆ་ནས་གནའ་སྔ་མོ་ལས་འཐུས་སྒོ་ཚང་བ་དང་། སྤུས་ཀ་དག་པ་དེ་འདྲ་རིགས་ཤིག་ཡོང་གི་ཡོད་པ་རེད། དེ་འདྲ་ཡོང་དགོས་པའི་རྒྱུ་མཚན་ག་རེ་རེད་ཟེར་ན། སྔོན་མའི་རྩོམ་པ་པོ་ཚོས་བརྩམས་བཞག་པའི་དེབ་དེ་ཚོ་རྨང་གཞི་བྱས་པའི་ཐོག་ནས་རྩོམ་པ་པོ་ཕྱི་མ་རྣམས་ཀྱིས་ཡར་གོམ་པ་སྤོ་ཡོང་དུས། སྔ་མ་ལས་ཕྱི་མ་འཐུས་སྒོ་ཚང་བ་དང་རྣམ་པ་མ་འདྲ་བ། སྤུས་ཀ་དག་པ་ཡོང་གི་ཡོད་པ་དེ་ཆོས་ཉིད་ལྟ་བུ་ཞིག་ཏུ་མཐོང་གི་ཡོད། དེའི་ཁྲོད་ནས་གཅིག་རྩོམ་པ་པོ་ཨ་ལགས་རྗེ་སྤྲུལ་ཚང་རེད། ཁོང་གི་བརྩམས་ཆོས་རེ་རེ་བཞིན་ཀློག་རྒྱུ་བྱུང་མེད་ཀྱང་རེ་ཟུང་བཀླགས་པའི་ཁྲོད་ནས་རྣམ་པ་མ་འདྲ་བ་དང་དེའི་ནང་ནས་ལེགས་ཆ་ལེན་དགོས་པ་མང་པོ་ཞིག་མཐོང་གི་ཡོད་སྟབས། གཞོན་སྐྱེས་རྩོམ་པ་པོ་ཁོང་ལ་རྒྱབ་སྐྱོར་དང་སྐུལ་འདེད་ཀྱི་ཆེད་དུ་བཅར་ཡོད་པ་དང་། དེ་རིང་དཔེ་དེབ་དབུ་འབྱེད་ལ་བཅར་དགོས་པའི་རྒྱུ་མཚན་གཙོ་བོ་གཉིས་པ་དེ་ནི། ང་ཚོ་བཙན་བྱོལ་ནང་ག་དུས་ཡིན་ནའང་བོད་ཡིག་བརྩམས་ཆོས་ཕྱི་ལོག་ལ་བཏོན་ཡོང་དུས། ཀིརྟིའི་བྱེས་པ་གྲྭ་ཚང་དེ་བོད་ཡིག་གི་བརྩམས་ཆོས་ཀློག་མཁན་མང་ཤོས་གྲས་ཤིག་ཆགས་བསྡད་ཡོད་དུས། རྩོམ་པ་པོ་ཞིག་དང་ཀློག་མཁན་ཞིག་གི་ངོས་ནས་ཕར་བལྟས་ཡོང་དུས་གལ་ཆེན་པོ་མཐོང་བ་དང་། སོ་སོའི་ངོས་ནས་ཀྱང་གང་ཐུབ་ཅི་ཐུབ་ཀྱིས་གལ་ཆེན་པོར་བརྩི་བའི་ཐབས་ཤེས་རིམ་པར་བསྟེན་དགོས་ཀྱི་ཡོད་སྟབས། དེ་རིང་གི་དུས་ཚོད་དེ་རང་ལ་ཉེ་སྔོན་ཁོང་དང་རོགས་པ་འགས་འགྲེམ་སྤེལ་བྱས་པའི་དཔེ་དེབ་<<ཡོ་བ་བསྲངས་ཤིང་གབ་པ་ཕྱུང་བའི་ཉེ་རབས་བོད་ཀྱི་སྲིད་དོན་ལོ་རྒྱུས་དང་ལྷ་སྲས་རྒྱལ་ལོ་དོན་གྲུབ>>སྟོད་སྨད་གཉིས་ཀྱི་འཕྲུལ་དེབ་སྒོ་འབྱེད་ཀྱི་དྲ་ལམ་ཚོགས་འདུར་མཉམ་ཞུགས་མ་བྱས་པར་དཔེ་དེབ་སྒོ་འབྱེད་འདི་ལ་བཅར་ཡོད་སྐོར་སོགས་བརྗོད་སོང་།
ཡང་བཙན་བྱོལ་ནང་གི་ཉམས་ཞིབ་རྩོམ་པ་པོ་རྣམསལ་ལོ་རྒྱུས་ཀྱི་རྒྱུ་ཆ་རག་དཀའ་བའི་སྐོར་ཁོང་གིས། ཞིབ་འཇུག་གི་ལམ་ནས་བརྩམས་ཆོས་སྤེལ་མཁན་ཞིག་ལ་མཚོན་ན། ལས་དོན་གལ་ཆེན་ཞིག་ནི་དཔྱད་གཞིའི་རྒྱུ་ཆ་འཚོལ་སྒྲུབ་བྱ་རྒྱུ་དེ་རེད། རྒྱལ་ཁབ་གཞན་དག་གི་གནས་བབ་མི་ཤེས་ཀྱང་། ཨ་རིའི་མི་དམངས་དཔེ་མཛོད་ཁང་ལ་མཚོན་ན། རྒྱུ་ཆ་ཕལ་མོ་ཆེ་གཡར་རྒྱུ་ཡོད་ལ། གལ་ཏེ་ཀློག་མཁན་གྱིས་འཚོལ་བཞིན་པའི་དཔེ་དེབ་གང་ཞིག་དཔེ་མཛོད་ཁང་དེར་མེད་ན། དཔེ་མཛོད་ཁང་གིས་འཛམ་གླིང་གི་ས་ཆ་གང་དུ་འཚོལ་དགོས་ཀྱང་བཙལ་ནས་མཁོ་སྤྲོད་གནང་བ་ཡིན། དེ་ལ་ཀློག་མཁན་གྱིས་སྦྲག་གླ་ཙམ་ལས་སྤྲོད་མི་དགོས། འགྲོ་ལུགས་འདིས་ངའི་ཡིད་དབང་འཕྲོག་མྱོང་ཡོད། བཙན་བྱོལ་དུ་དཔེ་མཛོད་ཁང་ཆེ་ཆུང་ཧ་ཅང་མང་ཡང་། དེ་དག་གིས་ཀློག་མཁན་གྱི་དགོས་མཁོ་བརྒྱ་ཆའི་ཅི་ཙམ་ཞིག་སྐོང་ཐུབ་མིན་མི་ཤེས། གང་ལྟར། བཞུགས་སྒར་རྡ་རམ་ས་ལར་བསྡད་དེ་ཉམས་ཞིབ་བྱེད་མཁན་ཞིག་ཡིན་ན། དབྱིན་ཡིག་གི་དཔེ་དེབ་མང་པོ་ཞིག་ལ་གོང་ཆེན་སྤྲད་ནས་ཉོ་དགོས་ཀྱི་འདུག རྒྱུ་མཚན་ནི་དབྱིན་སྐད་ཀྱི་དཔེ་ཆ་འཛོམས་པའི་དཔེ་མཛོད་ཁང་ཞིག་མེད་པའི་རྐྱེན་གྱིས་རེད། ཉེ་ལམ་དབྱིན་ཡིག་གི་དཔྱད་རྩོམ་ཞིག་དྲ་ཐོག་ནས་རྙེད་ཀྱང་། དེ་ཉིད་ཕབ་ལེན་བྱེད་ཆོག་པ་ཙམ་ལ་ཡང་ཨ་སྒོར་ ༣༤ སྤྲོད་དགོས་ཟེར། དབྱིན་ཡིག་གི་དཔེ་དེབ་དང་རྩོམ་ཡིག་ལ་རིན་གོང་ཆེ་བ་ཉམས་ཞིབ་རྩོམ་པ་པོ་ཚོས་སྔར་ནས་ཤེས་ཀྱང་། ཀློག་མཁན་སྤྱིར་བཏང་བ་སོགས་ཀྱིས་མི་མཁྱེན། སྤྱིར་བོད་དབྱིན་གྱི་དཔྱད་གཞིའི་རྒྱུ་ཆ་འཚོལ་སྒྲུབ་དང་དཔེ་དེབ་ཉོ་བ་དང་འབྲེལ་ནས་བོད་ཀྱི་དཔེ་མཛོད་ཁང་རྣམས་ཀྱི་གནས་བབ་དང་། ཉམས་ཞིབ་རྩོམ་པ་པོ་དག་གི་དཀའ་ངལ་སོགས་ལ་གླེང་དགོས་པ་དང་ཤེས་དགོས་པ་མང་ཡང་། མི་ཕལ་མོ་ཆེས་ཤེས་ཀྱི་མེད་པ་རེད། ཅེས་བརྗོད་སོང་།
གསར་འགོད་པ། བསྟན་འཛིན་ཕུར་བུ།
