༧གོང་ས་མཆོག་ནས་ནད་ཡམས་ཞི་བའི་རྗེས་སུ་རྒྱ་གར་གྱི་སྲིད་བློན་མུ་ཌི་མཆོག་དང་འབྲེལ་ཡོད་བློན་ཆེན། སློབ་དཔོན་ཆེན་པོ་སོགས་ལ་མཇུལ་འཕྲད་གནང་སྟེ་དེང་དུས་ཀྱི་ཤེས་ཡོན་དང་རྒྱ་གར་གྱི་རིག་གནའ་རབས་རིག་གཞུང་གཉིས་ཟུང་དུ་སྦྲེལ་བའི་སྐོར་གསུང་གླེང་གནང་རྒྱུ་ཡིན་སྐོར་གསུངས་སོང་།
དེ་རིང་༧གོང་ས་མཆོག་གིས་བཞུགས་སྒར་དྷ་རམ་ས་ལ་ནས་དྲ་ལམ་བརྒྱུད་རྒྱ་གར་ལྷོ་ཕྱོགས་ཀྱི་མངའ་སྡེ་ཌའེ་ལན་གྷ་ནཱ་ཡི་རྒྱལ་ས་ཧེ་ཌི་རཱ་བྷཌ་ནང་ཡོད་པའི་ (Dr. Reddy’s) ནད་རིགས་བརྟག་དཔྱད་ཁང་གི་ཟུང་འབྲེལ་གཙོ་སྐྱོང་དང་འཛིན་སྐྱོང་གཙོ་འཛིན་སྨན་པ་ (G.V. Prasad) དང་ལྷན་དུ་བྱམས་བརྩེ་དང་འཕྲོད་བསྟེན་གྱི་བརྗོད་གཞིའི་ཐོག་གསུང་གླེང་དང་བཀའ་འདྲིར་བཀའ་ལན་གནང་ཡོད་པ་དང་། ༧གོང་ས་མཆོག་ནི་རྒྱ་གར་གྱི་སྐུ་མགྲོན་བཞུགས་ཡུན་རིང་ཤོས་དེ་ཡིན་པའི་སྐོར་ལ་མགོན་པོ་གང་ཉིད་ཀྱིས། ཁྱེད་རང་ཚོས་ངོས་རང་ལ་བཀའ་མོལ་ཞུ་རྒྱུའི་གོ་སྐབས་གནང་བར་ཐུགས་རྗེ་ཆེ་ཞུ་ཡི་ཡིན། རྒྱ་གར་ནི་ངོས་རང་གི་ཕ་ཡུལ་རེད། ངོས་རང་གི་སྐྱེས་ཡུལ་བོད་རེད་དེ་མི་ཚེ་ཕལ་མོ་ཆེ་རྒྱ་གར་ནང་དུ་སྐྱེལ་བ་རེད། ཕྱི་ལོ་ ༡༩༥༩ ལོ་ནས་རྒྱ་གར་དུ་འབྱོར་བ་ནས་བཟུང་རྒྱ་གར་གྱི་ཁོར་ཡུག་ཞི་བདེ་བག་ཕེབས་ཤིག་ཡིན་པ་ངོས་རང་གི་མྱོང་བས་བསྒྲུབས་པ་ཡིན། ཆོས་ལུགས་ཀྱི་འགྲོ་སྟངས་ལ་ཆ་བཞག་ན་རྒྱ་གར་ནང་ཆོས་ལུགས་མི་འདྲ་བ་སྣ་ཚོགས་ཡོད་ཀྱང་ཆོས་ལུགས་མཐུན་སྒྲིལ་ཡག་པོ་འདུག ཕྱོགས་གཅིག་ནས་ཞུས་ན་རྒྱ་གར་ནི་རང་དབང་ལུང་པ་རེད། ངོས་རང་གི་བསམ་བློའི་ནང་གང་ཡོད་པ་རྣམས་འཛེམས་ཟོན་མེད་པར་བཤད་ཐུབ་པ་དང་རྒྱ་གར་ཙམ་མིན་པར་འཛམ་གླིང་ས་ཕྱོགས་གང་སར་ཁྱབ་ཐུབ་པའི་ནུས་པ་ཡོད་པའི་ལུང་པ་ཞིག་ཆགས་ཀྱི་ཡོད་པར་བརྟེན། རྒྱ་གར་གྱི་མགྲོོན་པོ་ཡིན་པ་ལ་སྤོབས་པ་ཡོད་པ་དང་། དེའི་ནང་ནས་རྒྱ་གར་གྱི་སྐུ་མགྲོན་ཡུན་རིང་ཤོས་ཆགས་ཀྱི་ཡོད་རེད། སྐུ་མགྲོན་ཡིན་རུང་སྐུ་མགྲོན་དེས་རྒྱ་གར་ལུང་པ་ལ་དཀའ་ངལ་བཟོས་ཡོད་མ་རེད། ངོས་རང་རྒྱ་གར་ནང་དུ་བསྡད་པར་སྤྲོ་སྣང་ཡོད། ཅེས་གསུངས་སོང་།
འཛམ་གླིང་མི་མང་ནས་༧གོང་ས་མཆོག་གི་རླབས་ཆེན་མཛད་བཟང་ལ་ཡི་རངས་བསྔགས་བརྗོད་ཞུ་ཡི་ཡོད་པ་དེས་སྐུ་ཚེ་ཡུན་རིང་བརྟན་པར་ཕན་ཐོགས་ཀྱི་ཡོད་སྐོར་ལ་མགོན་པོ་གང་ཉིད་ཀྱིས། ཁ་སང་ངོས་རང་གི་སྐྱེས་སྐར་ཆགས་ཀྱི་ཡོད་པ་རེད། ས་ཁུལ་གང་ས་ནས་སྐྱེས་སྐར་སྲུང་གཙི་བྱས་ནས་འཚམས་འདྲི་གནང་མཁན་མང་པོ་ཡོད་དུས་དེ་རིང་གོ་སྐབས་བཟུང་ནས་འཚམས་འདྲི་གནང་མཁན་གྱི་མི་མང་སྤྱི་དང་ཨ་རིའི་གྲོས་ཚོགས་འོག་མའི་ཚོགས་གཙོ་ (Nancy Polesi) གཙོས་པའི་དབུ་ཁྲིད་ཆ་ཚང་ལ་ཐུགས་རྗེ་ཆེ་ཞུ་ཡི་ཡིན། ཨ་རིའི་གྲོས་ཚོགས་འོག་མའི་ཚོགས་གཙོ་ངོ་ཤེས་པ་ནས་བཟུང་ཁ་ཙམ་མིན་པར་དངོས་སུ་བོད་ལ་ཕྱིན་ཏེ་རྒྱ་མིའི་གནད་ཡོད་དབུ་ཁྲིད་ལ་བཀའ་མོལ་གནང་བ་དང་དྷ་རམ་ས་ལར་ཕེབས་པ་རེད། དེར་བརྟེན་རྒྱུན་རིང་ནས་འགྲོགས་པའི་བོད་དོན་རྒྱབ་སྐྱོར་བ་དང་ངོས་རང་གི་གྲོགས་པོ་ (Nancy Polesi) གཙོས་པའི་གྲོགས་པོ་གཞན་མང་པོ་ལ་ཐུགས་རྗེ་ཆེ་ཞུ་ཡི་ཡིན། དེ་བཞིན་དབུ་ཁྲིད་གཞན་རྒྱ་གར་གྱི་སྲིད་བློན་མོ་ཌི་དང་མངའ་སྡེའི་སྲིད་བློན། ཆབ་སྲིད་པ་མང་པོ་ཞིག་གིས་ཁ་སང་ངོས་རང་གི་སྐྱེས་སྐར་ལ་འཚམས་འདྲི་གནང་གི་འདུག དེ་དག་ཆ་ཚང་ལ་རྗེས་སུ་ཡི་རངས་དང་ཐུགས་རྗེ་ཆེ་ཞུ་ཡི་ཡིན། ངོས་རང་གིས་ངོས་འཛིན་བྱེད་པ་ཞིག་ལ་ཁོང་ཚོས་ངོས་རང་ལ་འཚམས་འདྲི་གནང་བ་དེ་འདྲ་ཆགས་ཆགས་མིན་པར་ཁ་ཞེ་གཉིས་མེད་ཀྱི་འཚམས་འདྲི་ཡིན་པར་ངོས་འཛིན་ཞུ་ཡི་ཡོད། ངོས་རང་གི་མི་ཚེ་བེད་སྤྱོད་ཡོད་པ་ཞིག་གཟིགས་ནས་ཡི་རངས་ཞུ་མཁན་ཡོངས་ལ་ཐུགས་རྗེ་ཆེ་ཞུ་ཡི་ཡིན། ཡི་རངས་བསྔགས་བརྗོད་ཀྱི་ཚིག་བརྗོད་པའི་གནས་ཚུལ་བྱུང་དུས་ངོས་རང་གི་མི་ཚེ་གང་ཐུབ་ཀྱིས་རིང་པོ་བསྡད་དགོས་བསམ་པའི་འདུན་པ་སྐྱེས་ཀྱི་འདུག གཉིད་ལམ་ནང་དུ་རྟགས་མཚན་གཞན་པའི་ཐོག་ནས་དཔྱད་པ་བྱེད་ན་ངོས་རང་གི་མི་ཚེ་འདི་ལོ་ངོ་ ༡༡༠ ཡང་ན་ ༡༡༣ སྡོད་རྒྱུའི་རེ་བ་ཡོད་པ་རེད། མི་གཞན་གྱི་བརྩེ་བའི་སེམས་པ་དང་གུས་བཀུར། རེ་འདོད་བཅངས་པ་དེས་ངོས་རང་ལོ་ངོ་ ༡༡༠ ཙམ་སྡོད་དགོས་བསམ་པའི་སེམས་ཤུགས་དྲག་པོ་ཡོད། ཞེས་གསུངས་སོང་།
ཡང་ཁོང་གིས། རྒྱ་གར་གྱི་སྐུ་མགྲོན་ཡིན་པའི་ཆ་ནས་ངོས་རང་རྒྱ་གར་ནང་དུ་ཞི་བདེ་བག་ཕེབས་ངང་ནས་གནས་ཀྱི་རེད། ཉིན་གཅིག་གི་བྱ་གཞག་དབང་དུ་བྱེད་ན་ཆུ་ཚོད་འགའ་ཤས་ཤིག་སྒོམ་སྒྲུབ་ཀྱི་ཉམས་ལེན་བྱེད་ཀྱི་ཡོད་རེད། ཉམས་ལེན་བྱ་རྒྱུའི་གཞི་རྩ་དེ་རྒྱ་གར་གྱི་གནའ་རབས་རིག་གཞུང་ཆགས་ཀྱི་ཡོད་པ་རེད། གཙོ་བོ་ན་ལེནྜའི་རིག་གཞུང་བཟང་པོ་དང་འབྲེལ་བའི་ཤེས་ཡོན་ཉམས་ལེན་ཆགས་ཀྱི་ཡོད་རེད། ངོས་རང་ལ་ཉེན་རྟོག་པའི་གྲོགས་པོ་ཞིག་ཡོད། ཁོང་གིས་ང་ལ་སྐུ་རྩེད་དང་འབྲེལ་ནས་ན་ལེནྜའི་སློབ་སྤྱི་གསུང་གི་ཡོད་རེད། མིང་འདི་སྙིང་རྗེ་མོ་འདུག དངོས་ཡོད་གནས་ཚུལ་ལ་ངོས་རང་གྲྭ་པ་དཀྱུས་མ་ཞིག་དང་དེའི་ནང་ནས་སྐྱབས་བཅོལ་བ་ཞིག་ཆགས་ཀྱི་ཡོད་པ་རེད། ཡིན་ནའང་ངོས་རང་གི་རྒྱུན་ལྡན་གྱི་ཉམས་ལེན་འདི་དུས་རབས་བརྒྱད་པ་ནས་བཟུང་བོད་ལ་ན་ལེནྜའི་རིག་གཞུང་དར་ནས་དེ་ལ་མུ་མཐུད་ཉམས་ལེན་བྱེད་བཞིན་པ་རེད། དུས་རབས་བརྒྱད་པའི་སྐབས་སུ་ན་ལེནྜའི་མཁས་དབང་ཆེན་པོ་མཁན་ཆེན་ཞི་བ་འཚོ་བོད་ནང་དུ་གདན་འདྲེན་ཞུས་ཏེ་ན་ལེནྜའི་ཆོས་བརྒྱུད་དྲི་མ་མེད་པ་དེ་བོད་ནང་དུ་གཏན་འབེབ་གནང་སྟེ་སངས་རྒྱས་བསྟན་པའི་རྨང་གཞི་བཙུགས་པ་རེད། ཅེས་གསུངས་སོང་།
ཡང་དཔྱད་ཞིབ་ལྡན་པའི་བྱམས་སྙིང་རྗེ་ཡི་ཉམས་ལེན་གལ་ཆེན་ཡིན་པའི་སྐོར་ལ་་ཁོང་གིས། བྱམས་པའི་ཉམས་ལེན་བྱེད་པར་ཡིད་ཆེས་ཙམ་མིན་པར་རིག་པའི་སྒོ་ནས་དཔྱད་པ་བྱས་ནས་སྒྲུབ་དགོས་ཀྱི་ཡོད་པ་རེད། བྱམས་སྙིང་རྗེ་ཉམས་ལེན་ཡག་པོ་ཡོད་ན་འཚེ་མེད་ཞི་བ་རང་བཞིན་གྱིས་ཡོང་གི་ཡོད་རེད། བྱམས་སྙིང་རྗེ་དང་འཚེ་མེད་ཞི་བ་ནི་རྒྱ་གར་གྱི་གནའ་རབས་ཀྱི་རིག་གཞུང་བཟང་པོ་རེད། འཚེ་མེད་ཞི་བ་དང་བྱམས་པ་ངེས་པར་དུ་དགོས་ཀྱི་ཡོད་རེད། འཛམ་གླིང་གི་སྤྱི་ཚོགས་ནང་དཀའ་ངལ་མང་པོ་ཡོད་པ་རེད། ཁོར་ཡུག་དང་འབྲེལ་བའི་དཀའ་ངལ་དེ་ཁག་ཁག་རེད། མིས་བཟོས་པའི་དཀའ་ངལ་མང་པོ་ཞིག་བྱམས་སྙིང་རྗེ་མེད་པའི་རྐྱེན་གྱིས་རེད། དེར་བརྟེན་རྒྱ་གར་གཞུང་གི་སྐུ་མགྲོན་ཡིན་པའི་ཆ་ནས་ངོས་རང་གི་བྱ་སྤྱོད་ཡོངས་རྫོགས་འཚེ་མེད་ཞི་བ་དང་བྱམས་སྙིང་རྗེ་གོང་འཕེལ་གཏོང་བར་དམ་བཅའ་བརྟན་པོ་བཟུང་བ་ཡིན། རྒྱ་གར་གྱི་གནའ་རབས་ཀྱི་བཤད་སྲོལ་ཡོད་པ་ལས་ཆོས་ལུགས་ལ་རིས་སུ་མ་ཆད་པའི་ཐབས་ལམ་གྱི་སྒོ་ནས་བྱམས་སྙིང་རྗེ་གོང་འཕེལ་གཏོང་བའི་ལུགས་སྲོལ་ཡོད་པ་རེད། སྤྱིར་བཏང་ཆོས་ལུགས་མང་པོ་ཡོད་རེད་དེ། ཆོས་ལུགས་ཆ་ཚང་ལ་གུས་བཀུར་ཡོད་པ་རེད། ཆོས་ལུགས་ཡོངས་ཀྱིས་བྱམས་བརྩེའི་སྐོར་གཅིག་གྱུར་གསུང་གི་ཡོད་རེད། ལྟ་གྲུབ་ཀྱི་དབང་དུ་བྱེད་ན་འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན་གཉིས་ཀ་ཡོད་པ་རེད། ལྟ་གྲུབ་མི་འདྲ་བ་ཡོད་ནའང་ལྟ་གྲུབ་དེ་དག་གི་གྲུབ་དོན་བསླབ་བྱ་འཚེ་མེད་ཞི་བ་དང་བྱམས་སྙིང་རྗེ་ཆགས་ཀྱི་ཡོད་དུས། ཆོས་ལུགས་མཐུན་སྒྲིལ་ཡོང་བའི་གཞི་རྩ་དེ་རེད། རྒྱ་གར་ནང་དུ་ཆོས་ལུགས་མི་འདྲ་བ་མང་པོ་ཡོད་ཀྱང་ཕན་ཚུན་གུས་བཀུར་དང་མཛའ་བརྩེ་ཡོད་པ་ཡག་པོ་རེད། ངོས་རང་གི་ཉམས་མྱོང་དང་ཤེས་ཡོན་ཡོད་པ་དེ་རྒྱ་གར་གྱི་ཆོས་ལུགས་ལ་མ་བརྟེན་པའི་ཐབས་ལམ་དེ་རེད། འཛམ་གླིང་ནང་གཞན་ལ་འཚེ་བ་དང་འབྲེལ་བའི་དཀའ་ངལ་མང་པོ་ཡོད་དུས། དེ་ལ་རྒྱ་གར་གྱི་ལོ་ངོ་སྟོང་ཕྲག་སྔོན་ནས་ཡོད་པའི་རིག་གཞུང་བཟང་པོ་དེ་ཕན་ཐོགས་ཡོད་པ་རེད། དེང་དུས་ཤེས་ཡོན་དང་རྒྱ་གར་གྱི་གནའ་རབས་ཀྱི་ཤེས་ཡོན་ཟུང་དུ་སྦྲེལ་ནས་སྤེལ་རྒྱུའི་དམ་བཅའ་ཡོད། ནད་ཡམས་ཞི་བའི་རྗེས་སུ་རྒྱ་གར་གྱི་སྲིད་བློན་མོ་ཌི་དང་འབྲེལ་ཡོད་བློན་ཆེན། སློབ་དཔོན་ཆེན་པོ་སོགས་ལ་ཐུག་འཕྲད་བྱས་ཏེ་དེང་དུས་ཀྱི་ཤེས་ཡོན་དང་རྒྱ་གར་གྱི་རིག་གནའ་རབས་རིག་གཞུང་གཉིས་ཟུང་དུ་སྦྲེལ་བའི་སྐོར་གྲོས་མོལ་བྱ་རྒྱུ་ཡིན། ཞེས་གསུངས་སོང་།
དེ་ནས་བཀའ་འདྲི་བཀའ་ལན་གྱི་ལས་རིམ་ནང་བརྟག་དཔྱད་ཁང་དེའི་ཆེད་ལས་པ་ཨེ་མི་རཱ་ཤཱ་(Ameera Shah)ལགས་ཀྱིས། ང་ཚོའི་སྤྱི་ཚོགས་ནང་རྒྱུ་དང་དཔལ་འབྱོར་གསོག་སྒྲུབ་མང་པོ་གནང་གི་ཡོད་པ་རེད། གཞན་ལ་སྦྱིན་པ་གཏོང་བའི་སྐབས་སུ་སོ་སོ་ལ་འདང་གི་མེད་པའི་དཀའ་ངལ་འཕྲད་པ་དེ་ལ་གདོང་ལེན་གང་འདྲ་གནང་དགོས་སྐོར་བཀའ་འདྲི་ཞུས་པར་༧གོང་ས་མཆོག་གིས། བྱ་བ་བཟང་ངན་གང་ཡིན་རུང་ཤེས་རབ་དང་འབྲེལ་ནས་ཡོང་གི་ཡོད་པ་རེད། ལས་ཀ་གང་འདྲ་བྱེད་རུང་རིག་པའི་སྒོ་ནས་དཔྱད་པ་བྱ་རྒྱུ་གལ་ཆེན་པོ་རེད། གཞན་ལ་སྦྱིན་པ་བཏང་བ་ཡིན་རུང་སྦྱིན་པ་གཏོང་སའི་ཡུལ་དེ་ཨ་རག་མང་པོ་འཐུང་མཁན་ཡིན་ན། དེ་ལ་དངུལ་མང་པོ་སྤྲད་པ་དེས་ཁོ་རང་ལ་སྡུག་བསྔལ་ཆེ་རུ་འགྲོ་ཡི་ཡོད་པ་དེས་ཕན་ཐོགས་ཡོང་གི་མེད་པ་རེད། དངུལ་སྦྱིན་པ་གཏོང་བའི་སྐབས་སུ་ཚོད་བྱེད་དགོས་ཀྱི་ཡོད་པ་རེད། གཞན་ལ་སྦྱིན་པ་གཏོང་བའི་སྐབས་སུ་ཕུགས་ལ་ཕན་གྱི་ཡོད་མེད་དཔྱད་པ་བྱ་རྒྱུ་གལ་ཆེན་པོ་རེད། བཟང་པོའི་ལས་ཡིན་རུང་ལས་ཀ་གང་འདྲ་བྱེད་དགོས་མིན་སོ་སོས་དཔྱད་པ་བྱེད་དགོས་ཀྱི་ཡོད་པ་རེད། བྱམས་སྙིང་རྗེ་ཉམས་ལེན་གང་འདྲ་བྱས་རུང་རིག་པས་དཔྱད་པ་བྱ་རྒྱུ་གལ་ཆེན་པོ་རེད། ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
