ཨ་རི་གཙོ་བོར་གྱུར་བའི་འཛམ་གླིང་གི་གནད་ཡོད་མི་སྣ་ཁག་ཅིག་གིས་༧སྐུའི་འཁྲུངས་སྐར་ལ་འཚམས་འདྲི་ཞུས།

ཨ་རི་དང་རྒྱ་གར། ཐའེ་ཝན་སོགས་ཀྱི་ཆབ་སྲིད་དབུ་འཁྲིད་རྣམས་གཙོ་བོར་གྱུར་བའི་འཛམ་གླིང་གི་གནད་ཡོད་མི་སྣ་ཁག་ཅིག་དང་ནོ་སྦེལ་གཟེངས་རྟགས་ཚོགས་པ་སོགས་ནས་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་ ༨༦ ལ་ཕེབས་པའི་འཁྲུངས་སྐར་ལ་འཚམས་འདྲི་དང་སྦྲགས་ཁོང་སྐུ་ཚེ་བརྟན་ཞིང་རླབས་ཆེན་གྱི་མཛད་པ་གོང་ནས་གོང་དུ་འཕེལ་བའི་སྨོན་འདུན་ཞུས་འདུག

དེ་ཡང་རྒྱ་གར་གྱི་སྲིད་བློན་ནཱ་རེན་དྷར་མུ་དྷི་མཆོག་སྐུ་སྒེར་གྱི་ཊེ་ཝི་ཊུར་ (Twitter) དྲ་བར། ༧གོང་ས་སྐྱབས་མགོན་ཆེན་པོ་མཆོག་ལ་ཞལ་པར་བརྒྱུད་སྐུའི་འཁྲུངས་སྐར་ལ་འཚམས་འདྲི་ཞུས་ཡོད་པ་དང་། མགོན་པོ་གང་ཉིད་སྐུ་ཚེ་བརྟན་ཞིང་སྐུ་གཟུགས་གསལ་ཐང་ཡོང་བའི་འཚམས་འདྲི་ཞུས་ཡོད་ཅེས་བྲིས་གནང་འདུག་ལ།  དེ་བཞིན་རྒྱ་གར་དབུས་གཞུང་གི་རྩེད་རིགས་བློན་ཆེན་ ( Kiren Rijiju)མཆོག་དང་། ལྡི་ལིའི་སྤྱི་ཁྱབ་བློན་ཆེན་ཀེར་ཇི་རི་ཝལ་(Arvind Kejriwal)མཆོག ཨ་རུ་ཎ་ཅལ་མངའ་སྡེའི་བློན་ཆེན་པདྨ་མཁའ་འགྲོ་མཆོག་སོགས་ནས་༧གོང་ས་མཆོག་སྐུ་ཚེ་བརྟན་ཞིང་། བྱམས་དང་སྙིང་རྗེའི་རླབས་ཆེན་གྱི་མཛད་པའི་འོད་སྣང་ཕྱོགས་བཞིར་རྒྱས་པའི་སྨོན་འདུན་ཞུས་འདུག

དེ་བཞིན་ཨ་རིའི་ཕྱི་འབྲེལ་བློན་ཆེན་ཨན་ཐོ་ནི་བྷི་ལན་ཁིན་(Antony Blinken)མཆོག་དང་གྲོས་ཚོགས་འོག་མིའི་དབུ་འཁྲིད་ལྕམ་ནན་སི་པེ་ལོ་སི་མཆོག དེ་བཞིན་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷོ་ཝིན་( Jim MC Govern )མཆོག་གི་དབུས་པའི་གྲོས་ཚོགས་འཐུས་མི་ཁག་ཅིག་ནས་འཚམས་འདྲི་ཞུས་པ་དང་སྦྲགས། ༧གོང་ས་མཆོག་ནས་ང་ཚོ་ཚང་མར་བྱམས་སྙིང་རྗེ་དང་བསམ་ཤེས། ཡ་རབས་བཟང་སྤྱོད་ལྡན་པའི་ཐོག་ནས་འཚོ་གནས་བྱེད་དགོས་པའི་ལམ་སྟོན་གནང་བཞིན་ཡོད་སྐོར་དང་། འཛམ་གླིང་མི་མང་ཚོས་༧གོང་ས་སྐྱབས་མགོན་ཆེན་པོ་མཆོག་ལ་གུས་བཀུར་ཞུ་དོན་ནི། ཁོང་གིས་འཇིག་རྟེན་ཀུན་ཁྱབ་ཀྱི་བདེན་པ་དང་རིན་ཐང་སོགས་ཀྱི་སྐོར་ལ་བཀའ་སློབ་ལམ་སྟོན་གནང་བ་ལ་བརྟེན་ནས་བྱུང་བ་ཡིན་ལ། ༧གོང་ས་མཆོག་ནས་བོད་དོན་བདེན་མཐའ་གསལ་ཐབས་དང་དྲང་བདེན། འཚེ་མེད་ཞི་བདེའི་ཆེད་རླབས་ཆེན་གྱི་མཛད་པ་སྐྱོང་བཞིན་པར་ཡི་རང་བསྔགས་བརྗོད་ཞུས་འདུག

ཨ་རིའི་གྲོས་ཚོགས་འོག་མའི་དབུ་འཁྲིད་དང་བོད་དོན་རྒྱབ་སྐྱོར་བ་ལྕམ་ནན་སི་པེ་ལོ་སི་མཆོག་གི་འཚམས་འདྲིའི་ནང་། ཨ་རིིའི་གྲོས་ཚོགས་འོག་མའི་དབུ་འཛིན་གྱི་ངོས་ཐོག་ནས། ཨ་རིའི་གྲོས་ཚོགས་འོག་མའི་མགྲིན་ཚབ་པ་བྱས་ཏེ།   བོད་མི་དང་བོད་ཀྱི་གྲོགས་པོ་ཚོ་དང་ལྷན་དུ་༧གོང་ས་སྐྱབས་མགོན་ཆེན་པོ་མཆོག་གི་འཁྲུངས་སྐར་ལ་འཚམས་འདྲི་ཞུ་རྒྱུ་བྱུང་བར་ཧ་ཅང་དགའ་བོ་བྱུང་།  འཁྲུངས་སྐར་ཉིན་༧གོང་ས་སྐྱབས་མགོན་ཆེན་པོ་མཆོག་གི་ཐུགས་རེ་དང་ཆོས་ཕྱོགས་ཀྱི་མཛད་པར་དྲན་གསོ་ཞུ་བའི་གོ་སྐབས་ཤིག་ཡིན་ལ།  དེ་ནི་ཞི་བདེ་ལ་དགའ་བའི་མི་རྣམས་ཀྱིས་རྒྱ་ནག་གཞུང་ནས་འཇིགས་སྐུལ་དང་དམ་དྲག་སོགས་གང་ཡང་མེད་པར། བོད་མི་ཚོས་རང་དབང་གི་ཐོག་ནས་ཆོས་ལུགས་བྱེད་སྒོ་ཁག་སྤེལ་ཆོག་པ་དང་། བོད་ཀྱི་སྐད་ཡིག་དང་རིག་གཞུང་སུང་སྐྱོབ་བྱེད་པར་རྒྱབ་སྐྱོར་དང་རོགས་འདེགས་བྱ་རྒྱུའི་ཆོད་སེམས་ཇེ་བརྟན་དུ་གཏོང་དགོས་པའི་ཉིན་མོ་ཞིག་ཀྱང་ཡིན། དེ་འབྲེལ་བོད་དོན་རྒྱབ་སྐྱོར་གྱི་ཁྲིམས་ཡིག་གཏན་འབེབ་ཟིན་པ་བཞིན། ཨ་རིས་གྲོས་ཚོགས་གོང་འོག་གཉི་ཀས་མུ་མཐུད་དུ་ལས་འགུལ་མང་ཙམ་སྤེལ་རྒྱུ་ཡིན་སྐོར་སོགས་གསུངས་འདུག

དེ་བཞིན་ནོ་སྦེལ་གཟེངས་རྟགས་ལྷན་ཚོགས་ཀྱི་སྤྱི་ཚོགས་དྲ་ལམ་དུ་གོང་ས་མཆོག་ནས་འགྲོ་བ་མི་ཚང་མ་གཅིག་མཚུངས་ཀྱི་འདུ་ཤེས་འཛིན་དགོས་པའི་སྐོར་གྱི་བཀའ་སློབ་ཅིག་ལུང་འདྲེན་གནང་བ་དང་འབྲེལ་སྐུའི་འཁྲུངས་སྐར་ལ་འཚམས་འདྲི་ཞུས་འདུག དེ་བཞིན་གྱི་ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝུན་མཆོག་ནས་སྒེར་གྱི་སྤྱི་ཚོགས་དྲ་ལམ་བརྒྱུད་སྐུའི་འཁྲུངས་སྐར་ལ་འཚམས་འདྲི་ཞུས་པའི་ནང་། ༧གོང་ས་མཆོག་གི་སྐུ་ཚེ་བརྟན་ཞིང་སྐུ་གཟུགས་གསལ་ཐང་ཡོང་བའི་སྨོན་འདུན་ཞུས་པ་དང་སྦྲགས། ༧གོང་ས་མཆོག་ནས་ཏོག་དབྱིབས་གཉན་རིམས་རྒྱ་ཁབ་ཀྱི་དཀའ་ངལ་ཁྲོད་ང་ཚོ་ཚང་མ་མཉམ་རུབ་ཀྱི་ཐོག་ནས་གཅིག་ཕན་གཅིག་གྲོགས་བྱེད་དགོས་པའི་གལ་ཆེའི་རང་བཞིན་སྐོར་ལམ་སྟོན་གནང་བར་ཐུགས་རྗེ་ཆེ་ཞེས་ཞུས་འདུག

༧གོང་ས་སྐྱབས་མགོན་ཆེན་པོ་མཆོག་ནས་སྩལ་བའི་ཡོངས་ཁྱབ་གསུང་འཕྲིན་ནང་དུ། བོད་མི་གཙོས་༧གོང་ས་མཆོག་ལ་བློ་ཐག་ཉེ་བའི་མི་རྣམས་ནས་སངས་རྒྱས་ཀྱི་བསྟན་པ་སྤྱི་དང་། ཡང་དགོས་མདོ་སྔགས་ཟུང་དུ་འབྲེལ་བའི་རྗེ་ཙོང་ཁ་བའི་བསྟན་པ་རིན་པོ་ཆེར་ཐོས་བསམ་སྒོམ་གསུམ་གྱི་སྒོ་ནས་སློབ་དགོས་སྐོར་དང་། དེ་ནི་ཁོང་ནས་མི་མང་ལ་གནང་བའི་སྐྱེས་སྐར་གྱི་ལེགས་སྐྱེས་ཡིན་སྐོར་གསུངས་འདུག་ལ། དེེ་བཞིན་མགོན་པོ་མཆོག་འགྲོ་བ་མི་ཞིག་ཡིན་པའི་ཆ་ནས་མི་མང་པོས་དགའ་མོས་དང་བརྩེ་བ་ཆེན་པོ་གནང་གི་ཡོད་པ་དང་། ལྷག་པར་དུ་མགོན་པོ་གང་གི་དགྱེས་པའི་བཞད་མོ་ལ་དགའ་མོས་ཆེན་པོ་གནང་བཞིན་ཡོད་པར་ཐུགས་རྗེ་ཆེ་ཞེས་གསུངས་པ་དང་། ཁོང་གི་༸སྐུ་ཚེ་ཧྲིལ་པོ་འགྲོ་བ་སྤྱི་དང་ཁོར་ཡུག་སྲུང་སྐྱོབ་ཆེད་གཏོང་གནང་རྒྱུ་དང་། དེ་བཞིན་རྒྱ་གར་ནང་བཙན་བྱོལ་དུ་ཕེབས་ཡོད་ཀྱང་རང་དབང་ལུང་པ་འདིའི་རང་དབང་རྣམས་སྤྱད་དེ་རྒྱ་གར་གྱི་གནའ་བོའི་རིག་གནས་དང་ཆོས་ལུགས་མཐུན་སྒྲིལ་སོགས་གོང་སྤེལ་མཛད་བཞིན་པ་ནི། ༸སྐུའི་འཁྲུངས་སྐར་གྱི་ཕྱག་རྟགས་ཡིན་སྐོར་གསུངས་འདུག་པ་མ་ཟད། འཛམ་གླིང་མི་མང་གིས་ཁོང་གི་རླབས་ཆེན་གྱི་མཛད་པར་ངོས་འཛིན་དང་ཡི་རང་བསྔགས་བརྗོད་ཞུ་བཞིན་པ་དེས་དགུང་གྲངས་ ༡༡༠ ལ་བཞུགས་པར་སྐུལ་མ་ཆགས་ཀྱི་ཡོད་སྐོར་གསུངས་འདུག

དཔལ་ལྡན།