འཛམ་གླིང་གི་དམངས་གཙོའི་ལས་འགུལ་ལྷན་ཚོགས་ཀྱིས་བོད་རང་བཙན་སློབ་ཕྲུག་ཚོགས་པ་དང་། ཡུ་གུར་ལས་འགུལ་ཁང་། ཧོང་ཀོང་ལྟ་ཞིབ་ཁང་བཅས་ཀྱིས་རྒྱ་ནག་གཞུང་གི་བཙན་གནོན་ལ་ངོ་རྒོལ་དང་དམངས་གཙོའི་རིན་ཐང་གོང་འཕེལ་དུ་གཏོང་ཆེད་མཉམ་འབྲེལ་ལས་འགུལ་བསྟུད་མར་སྤེལ་བཞིན་པར་ཆེ་བསྟོད་གཟེངས་རྟགས་གནང་འདུག
STUDENTS FOR A FREE TIBET AWARDED DEMOCRACY COURAGE TRIBUTE
ཁ་སང་ཕྱི་ཚེས་ ༨ ཉིན་ཨ་རིའི་རྒྱལ་ས་ཝ་ཤིང་ཊོན་ཏུ་རྟེན་གཞི་བྱས་པའི་འཛམ་གླིང་གི་དམངས་གཙོའི་ལས་འགུལ་ལྷན་ཚོགས་ (World Movement for Democracy) ཀྱི་དྲ་ཐོག་ཚོགས་ཆེན་ཐེངས་ ༡༠ པའི་སྟེང་། བོད་རང་བཙན་སློབ་ཕྲུག་ཚོགས་པ་དང་། ཡུ་གུར་ལས་འགུལ་ཁང་། ཧོང་ཀོང་ལྟ་ཞིབ་ཁང་བཅས་རྒྱ་ནག་གཞུང་གི་བཙན་དབང་རིང་ལུགས་ལ་འགོག་རྒོལ་བྱེད་མཁན་གྱི་རང་དབང་དང་དམངས་གཙོ་དོན་གཉེར་བའི་ཚོགས་པ་གསུམ་ལ་ཆེ་བསྟོད་དང་རྒྱབ་སྐྱོར་མཚོན་སླད་དམངས་གཙོའི་སྙིང་སྟོབས་གཟེངས་རྟགས་ཞེས་པ་གནང་ཡོད་འདུག
བོད་རང་བཙན་སློབ་ཕྲུག་ཚོགས་པའི་ལག་བསྟར་འགན་འཛིན་རྡོ་རྗེ་ཚེ་བརྟན་ལགས་ཀྱིས་འདི་གའི་གསར་འགོད་པར་ཐེངས་འདིའི་ཆེ་བསྟོད་གཟེངས་རྟགས་སྐོར་ནས་འགྲེལ་བརྗོད་གནང་དོན། ད་ལན་ལས་འགུལ་ཚོགས་པ་གསུམ་ལ་གཟེངས་རྟགས་འདི་ཕུལ་དགོས་པའི་དམིགས་ཡུལ་གཙོ་བོ་དེ། ང་ཚོའི་འཐབ་རྩོད་ལ་རྒྱབ་སྐྱོར་དང་། ལྷག་པར་དུ་འདས་པའི་ལོ་བཅུ་ཙམ་ནང་འཐབ་རྩོད་པ་རྣམས་ནུས་པ་མཉམ་སྤུང་གི་ལས་འགུལ་སྤེལ་རྒྱུ་ཤུགས་ཆེ་རུ་ཕྱིན་པ་ལྟར། ང་ཚོ་བོད་རང་བཙན་སློབ་ཕྲུག་ཚོགས་པའི་ངོས་ནས་ཚོགས་འདུ་རིམ་པ་ཚོགས་པ་དང་མཉམ་འབྲེལ་གྱི་ལས་འགུལ་སྤེལ་བ་སོགས་ཀྱིས་མཚོན་པའི་ལས་ཀ་ཤུགས་ཆེན་པོ་བྱས་པ་རེད། དེར་བརྟེན་སྤྱི་ཡོངས་ནས་ད་ལན་གྱི་གཟེངས་བསྟོད་དེ་མཉམ་རུབ་ཀྱི་ལས་འགུལ་ལ་ངོས་འཛིན་དང་རྒྱབ་སྐྱོར་བྱས་པ་ཞིག་དང་། གཞན་ཡང་ང་ཚོའི་འཐབ་རྩོད་དང་གཞོན་སྐྱེས་ཀྱི་འཐབ་རྩོད་ལ་རྒྱབ་སྐྱོར་བྱས་པ་ཞིག་ཆགས་ཀྱི་འདུག ཅེས་བརྗོད་བྱུང་།
གཟེངས་བསྟོད་འདིས་བོད་དོན་འཐབ་རྩོད་དང་ཚོགས་པའི་ལས་འགུལ་གྱི་ཐོག་ལ་བཟང་ཕྱོགས་ཀྱི་ཤུགས་རྐྱེན་ཅི་ཡོད་སྐོར་ལ་ཁོང་གིས། སྤྱིར་ལྷན་ཚོགས་འདི་འཛམ་གླིང་གི་རྒྱལ་ཁབ་མང་པོའི་ནང་ཡོད་པའི་ཚོགས་པ་དང་། ལས་འགུལ་བ་བཅས་ཀྱིས་གྲུབ་པའི་ཚོགས་པ་ཞིག་ཡིན་པ་མ་ཟད། ཁ་སང་གི་ཚོགས་འདུའི་སྟེང་ཨ་རིའི་གྲོས་ཚོགས་འཐུས་མི་དང་རྒྱལ་སྤྱིའི་སྟེང་གནད་ཡོད་མི་སྣ་མང་པོ་ཕེབས་ཡོད་པར་བརྟེན། གཟེངས་བསྟོད་ཐོབ་མཁན་གྱི་ཚོགས་པ་རྣམས་ལ་རྒྱལ་སྤྱིའི་སྟེང་ནས་ངོས་འཛིན་དང་རྒྱབ་སྐྱོར་ཐོབ་རྒྱུ་དང་། དེའི་ཐོག་ནས་བོད་རང་བཙན་སློབ་ཕྲུག་ཚོགས་པར་མཚོན་ན་བོད་དོན་དྲིལ་བསྒྲགས་ཤུགས་ཆེ་རུ་བྱེད་ཐབས་དང་། མ་འོངས་པར་ལས་འགུལ་ཚོགས་པའི་དབར་མཉམ་འབྲེལ་གྱི་ལས་འགུལ་སྤེལ་རྒྱུར་རྒྱབ་སྐྱོར་ཤུགས་ཆེ་བ་འཐོབ་རྒྱུའི་རེ་བ་བྱེད་ཀྱི་ཡོད། ཅེས་བརྗོད་བྱུང། བོད་རང་བཙན་སློབ་ཕྲུག་ཚོགས་པའི་དྲ་རྒྱའི་སྟེང་གཟེངས་རྟགས་ངོས་ལེན་གྱི་གསར་འགོད་བསྒྲགས་གཏམ་ཞིག་སྤེལ་བའི་ནང་། བྱ་དགའ་དེས་རྒྱ་ནག་གི་དབང་ཆ་གཅིག་སྡུད་ཀྱི་བྱ་སྤྱོད་ལ་ཁ་གཏད་ཀྱིས། གདུང་སེམས་མཉམ་སྐྱེད་དང་སྙིང་སྟོབས་ཞུམ་པ་མེད་པའི་ཐོག་ནས་ལས་འགུལ་སྤེལ་མཁན་གྱི་ལས་འགུལ་བ་རྣམས་ལ་ཆེ་མཐོང་གནང་བ་ཞིག་ཡིན་སྐོར་འགྲེལ་བརྗོད་བྱས་འདུག
འཛམ་གླིང་གི་དམངས་གཙོའི་ལས་འགུལ་ལྷན་ཚོགས་ཀྱི་བསྒྲགས་གཏམ་ནང་། བོད་རང་བཙན་སློབ་ཕྲུག་ཚོགས་པ་དང་། ཧོང་ཀོང་ལྟ་ཞིབ་ཁང་། ཡུ་གུར་ལས་འགུལ་ཁང་བཅས་ཚོགས་པ་གསུམ་གྱིས། དྲག་གནོན་ལ་ཁ་གཏད་གཅོག་ཆེད་དམངས་གཙོའི་ལས་འགུལ་བ་ཚོར་དགོས་པའི་སེམས་ཤུགས་ཀྱི་མིག་དཔེ་མཚོན་ཐུབ་ཀྱི་ཡོད། ཚོགས་པ་དེ་དག་གི་ཚོགས་མི་ཚོས་མི་རིགས་དང་ཚོགས་སྡེ་འདྲ་མིན་མཉམ་དུ་འབྲེལ་ལམ་བཙུགས་ཏེ། ན་གཞོན་ནུས་སྟོབས་གོང་འཕེལ་དང་དྲ་ལམ་གྱི་ཐོག་ནས་མཉམ་འབྲེལ་ལས་འགུལ་སྤེལ་བ་བརྒྱུད། རང་དབང་མེད་པའི་རྒྱལ་ཁབ་ཁག་གི་ནང་དུ་འབྱུང་བཞིན་པའི་འགྲོ་བ་མིའི་ཐོབ་ཐང་རྡོག་རོལ་གྱི་གནས་ཚུལ་ཁྱབ་སྤེལ་དང་། དམངས་གཙོའི་ལས་འགུལ་ལ་རྒྱབ་སྐྱོར་བྱེད་ཀྱི་ཡོད་པ་རེད། ཅེས་བཀོད་འདུག
འཛམ་གླིང་གི་དམངས་གཙོའི་ལས་འགུལ་ལྷན་ཚོགས་འདི་ནི། ཕྱི་ལོ་ ༡༩༩༩ ལོར་ཨ་རིའི་གཞུང་གི་དམངས་གཙོ་གོང་སྤེལ་བསྟི་གནས་ཁང་དང་གཞུང་འབྲེལ་མ་ཡིན་པའི་ཚོགས་པ་གཉིས་ཀྱིས་མཉམ་འབྲེལ་གྱི་ཐོག་ནས་རྒྱ་གར་གྱི་རྒྱལ་ས་ལྡི་ལིར་བསྡུས་པའི་ཚོགས་ཆེན་གྱི་གྲོས་ཆོད་འོག་གསར་འཛུགས་བྱས་པ་ཞིག་དང་། ལྷན་ཚོགས་འདིས་འདས་པའི་ལོ་ངོ་ ༢༠ ལྷག་གི་རིང་འཛམ་གླིང་གི་དམངས་གཙོ་དང་རང་དབང་འཐབ་རྩོད་ཀྱི་ལས་འགུལ་ཚོགས་པ་དང་། མི་སྒེར་། ཆེད་མཁས་པ་སོགས་ཀྱི་དབར་འབྲེལ་མཐུད་དང་རྒྱབ་སྐྱོར་གྱི་ལས་དོན་སྤེལ་གྱི་ཡོད་ཅིང་། ལྷན་ཚོགས་འདིའི་ཐོག་མའི་དམིགས་ཡུལ་ནི་དམངས་གཙོ་ཉམས་དམའ་བོ་ཡོད་སར་དམངས་གཙོ་གོང་སྤེལ་དང་། དམངས་གཙོ་ཡུན་རིང་ལག་བསྟར་བྱ་སའི་ཁུལ་དུ་དམངས་གཙོར་བཅོས་བསྒྱུར་དང་སྔར་བས་ཚགས་ཚུད་བཟོ་རྒྱུ། དེ་བཞིན་དམངས་གཙོའི་ལམ་དུ་ཞུགས་མེད་པའི་རྒྱལ་ཁབ་ནང་གི་དམངས་གཙོའི་ལས་འགུལ་བ་རྣམས་ལ་རམ་འདེགས་དང་ཁོང་ཚོའི་ནུས་པ་མཐོར་འདེགས་བྱ་རྒྱུ་བཅས་ཡིན་འདུག
གསར་འགོད་པ། པ་སངས་ཚེ་རིང་།
