སྦེལ་ཇམ་སྐུ་ཚབ་དོན་གཅོད་ཁང་གིས་སྣེ་འཁྲིད་དེ་སྦེལ་ཇམ་དང་ཧྥ་རན་སི། ནེ་ཌར་ལན་ཌ། སི་པིན་བཅས་ཀྱི་བོད་མི་ཚོས་རྒྱ་བལ་གཉིས་ཀྱི་ནང་ཡོད་པའི་བོད་མི་ཚོར་ནད་ཡམས་ཀྱི་དཀའ་ངལ་སེལ་ཆེད་ཡུ་སྒོར ༡༨༧༥༤ ལྷག་ཞལ་འདེབས་སུ་ཕུལ་ཡོད་འདུག
དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་འཕྲེད་བསྟེན་ལས་ཁུངས་ཀྱི་དྲུང་ཆེ་དང་ཏོག་དབྱིབས་ལས་དོན་ཚོགས་ཆུང་གི་ཚོགས་གཙོ་དཔལ་ལྡན་དོན་གྲུབ་ལགས་སུ་ཞལ་པར་བརྒྱུད་དེའི་སྐོར་ལ་བཀའ་འདྲི་ཞུས་པར་ཁོང་གིས། ཡུ་རོབ་ཁུལ་གྱི་བོད་མི་ཚོས་ཞལ་འདེབས་རོགས་དངུལ་བསྡུས་ཡོད་ཅིང་གང་མགྱོགས་དབུལ་འཆར་ཡོད་པའི་བརྡ་ལན་འབྱོར་བྱུང་། ཞེས་གསུངས་བྱུང་ལ། བོད་མིའི་སྒྲིག་འཛུགས་ཀྱི་དྲ་བའི་ནང་དེའི་སྐོར་གནས་ཚུལ་སྤེལ་བའི་ནང་། འདི་ལོའི་ཕྱི་ཟླ་ ༥ ཚེས་ ༢༩ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་བལ་གཉིས་ཀྱི་བོད་མིའི་གཞིས་ཆགས་ཁག་ཏུ་ཏོག་དབྱིབས་གཉན་རིམས་ཀྱི་ངལ་སེལ་དང་འབྲེལ་བའི་ཐད་འཛམ་གླིང་ས་ཕྱོགས་གང་སར་བཞུགས་པའི་བོད་མི་རྣམས་མཉམ་ཞུགས་ཡོང་བའི་འབོད་སྐུལ་ཞུས་གནང་ཡོད་པ་བཞིན། སྦེལ་ཇམ་སྐུ་ཚབ་དོན་ཁང་གི་སྣེ་ཁྲིད་འོག་ནུབ་ཡུ་རོབ་ཁུལ་གྱི་བོད་མི་རྣམས་ཀྱིས་ཏོག་དབྱིབས་གཉན་རིམས་ཀྱི་ངལ་སེལ་ཐད་ད་རེས་སླར་ཡང་ཆིག་སྒྲིལ་གྱི་ནུས་པ་བཏོན་ཡོད། ཅེས་བཀོད་འདུག
སྦེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས། ངས་སྦེལ་ཇམ་དང་པེ་རི་སིར་ཡོད་པའི་སྐུ་ཚབ་དོན་ཁང་གི་ལས་བྱེད་རྣམ་པ་དང་། ཡུ་རོབ་ཁུལ་གྱི་བོད་པའི་ཚོགས་སྡེ་ཁག་གི་འགོ་ཁྲིད་རྣམ་པ། དེ་བཞིན་ཚོགས་པ་སྐྱིད་སྡུག་ཁག་དང་མི་སྒེར་ཚང་མས་འབད་བརྩོན་ཆེན་པོས་ཞལ་འདེབས་ཕུལ་བར་ཐུགས་རྗེ་ཆེ་ཞུ་རྒྱུ་ཡིན། ཡུ་སྒོར་ཧ་ལམ་ ༡༩༠༠༠།༠༠ ལྷག་ཞལ་འདེབས་སུ་ཕུལ་བ་ནི་གདུང་སེམས་མཉམ་སྐྱེའི་རྣམ་པ་ཧ་ཅང་ཆེན་པོ་ཞིག་ཡིན་པར་ཡིད་ཆེས་ཡོད་བཅས་གསུངས་འདུག
ཐེངས་འདིའི་རོགས་དངུལ་ནང་སྦེལ་ཇམ་དུ་གནས་སྡོད་བོད་མི་ཚོས་ཡུ་སྒོར་ ༡༢༩༠༦།༠༠ དང་། ཧྥ་རན་སི་ནས་ཡུ་སྒོར་ ༤༡༧༠།༩༠། ནེ་ཌར་ལན་ཌ་ནས་ཡུ་སྒོར་༥༡༠།༠༠། སི་པིན་ནས་ཡུ་སྒོར་༡༡༦༨།༠༠ བཅས་ཁྱོན་ཡུ་སྒོར་༡༨༧༥༤།༩༠ ཐམ་པ་གནང་འདུག མི་འགྱང་བར་ཞལ་འདེབས་དེ་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་དབུལ་རྒྱུ་ཡིན་འདུག
དཔལ་ལྡན།
