༧གོང་ས་རྒྱལ་བ་རིན་པོ་ཆེ་མཆོག་ནས་གདུལ་བྱའི་ཁམས་དང་མོས་པར་མ་རན་པ་ཞིག་ལ་བླ་མའི་ངོས་ནས་ཆོས་ཟབ་པོ་གསུངས་པ་ཡིན་ན་སྐུར་འདེབས་བྱེད་པའི་རྐྱེན་ལ་འགྲོ་རྒྱུ་ཡོང་གི་ཡོད་སྐོར་གསུངས་སོང་།
ལ་དྭགས་ནང་པའི་ཚོགས་པ་དང་ལ་དྭགས་དགོན་པའི་ཚོགས་པ། ཁྲིག་སེ་རིན་པོ་ཆེ་བཅས་ནས་གསོལ་བ་བཏབ་པ་ལྟར། དེ་རིང་སྔ་དྲོའི་ཆུ་ཚོད་ ༩ ནས་ ༡༠ བར་དྲ་ལམ་བརྒྱུད་༧གོང་ས་མཆོག་ནས་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་གྱི་སྒྲོན་མེའི་ཉིན་གྲངས་གཉིས་རིང་གི་གསུང་ཆོས་དབུ་འཛུགས་གནང་སོང་།
གསུང་ཆོས་ཀྱི་ཐོག་མར་༧གོང་ས་མཆོག་གིས། དེ་རིང་ལ་དྭགས་ཀྱིས་སེར་སྐྱ་མི་མང་གི་ཐོག་ནས་ཇོ་བོ་རྗེས་མཛད་པའི་བྱང་ཆུབ་ལམ་སྒྲོན་ཐོག་གསུང་ཆོས་གནང་དགོས་པའི་རེ་སྐུལ་གནང་བ་རེད། དགའ་པོ་བྱུང་། བོད་ལ་བསྟན་པ་སྔ་དར་དང་ཕྱི་དར་ཡོད་པ་རེད། བར་སྐབས་བསྟན་པ་ཉམས་ཆག་ཕྱིན་པའི་དུས་སུ་མངའ་རིས་ཆོས་རྒྱལ་གྱི་རྒྱལ་ཕྲན་ཆུང་ཆུང་ཞིག་ཆགས་ཡོད་པ་རེད། མཐོ་ལྡིང་དུ་བར་སྐབས་སངས་རྒྱས་ཀྱི་བསྟན་པ་གླང་དར་གྱི་སྐབས་ནས་ཉམས་ཆག་ཕྱིན་པ་བདག་པོ་བརྒྱབ་ཐུབ་ན་ཞེས་ཇོ་བོ་རྗེ་དཔལ་ལྡན་ཨ་ཏི་ཤ་གདན་ཞུ་གནང་སྟེ། ཇོ་བོ་རྗེ་མཐོ་ལྡིང་དུ་ཕེབས་ནས་བྱང་ཆུབ་ལམ་སྒྲོན་མཛད་པ་རེད། བཀའ་ཆོས་རྒྱས་པོ་གནང་མི་དགོས། བཀའ་ཆོས་རྒྱས་པོ་གནང་བ་ཡིན་ན་བཀའ་འགྱུར་བསྟན་འགྱུར་མཛད་དགོས་རེད། དེར་བརྟེན་བར་སྐབས་བོད་ལ་བསྟན་པ་ཉམས་ཆག་ཕྱིན་ཡོད་པས་མདོར་བསྡུས་དང་གོ་བདེ་པོ་ཞིག་གསུངས་རོགས་གནང་ཞེས་ཇོ་བོ་རྗེ་ལ་ཞུས་པ་རེད། ཇོ་བོ་རྗེ་མཉེས་པོ་ཞེ་དྲག་བྱུང་སྟེ་ལམ་སྒྲོན་གསུངས་འདུག སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས་གསུངས་པ་དེ་སྐད་གྲགས་ཆེ་བའི་སྐད་ཆ་མ་རེད། དངོས་ཡོད་གནས་ཚུལ་དང་མཐུན་པའི་གསུང་ཆོས་གནང་རོགས་གནང་ཞུས་པའི་རྐྱེན་གྱིས། ཇོ་བོ་རྗེ་ཐུགས་མཉེས་པོ་བྱུང་སྟེ། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས་གསུངས་འདུག ང་རང་ཚོ་བོད་ལ་ས་སྐྱ་ལམ་འབྲས་ལ་ཆ་བཞག་ནའང་ལམ་རིམ་སྐོར་ཕལ་ཆེར་གཅིག་པ་ཡོད་རེད། རྗེ་རིན་པོ་ཆེས་ལམ་རིམ་ཆེ་འབྲིང་ཆུང་གསུམ་ཟེར་ནས་ལམ་རིམ་ཆེན་པོ་རྒྱས་པ་གཅིག་དེ་གཞུང་ཆེན་མོ་དང་འབྲེལ་ནས་གསུངས་བཞག་པ་ཞིག་རྒྱ་ཆེན་པོ་རེད་འདུག ལམ་རིམ་འབྲིང་པོ་དེ་ལས་ཏོག་ཙམ་བསྡུས། དེ་ནས་ཤིན་ཏུ་བསྡུས་པ་དེ་ལམ་རིམ་ཉམས་མགུར་ནི་རྗེ་རིན་པོ་ཆེས་ཉམས་ལེན་མགུར་མའི་ཚུལ་དུ་གསུངས་བཞག་པ་ཞིག་ལ་ལམ་རིམ་ཉམས་མགུར་རེད། བོད་ལ་ས་སྐྱ་བཀའ་བརྒྱུད་རིས་སུ་མ་ཆད་པའི་ཐུན་མོང་ལམ་སྦྱང་གི་ཁུངས་གཏུགས་ས་དེ་ཇོ་བོ་རྗེའི་ལམ་སྒྲོན་རེད། དེ་རིང་ལ་དྭགས་ཀྱི་སེར་སྐྱ་མི་མང་ཚོས་གཙོ་བོ་བྱས་ནས་ལམ་སྒྲོན་གྱི་གསུང་ཆོས་གནང་རོགས་ཟེར་ནས་དེ་རིང་དང་སང་ཉིན་ཆོས་འཁོར་དུས་ཆེན་ཡིན་པས། རྗེ་རིན་པོ་ཆེས་སྟོན་པ་བཅོམ་ལྡན་འདས་ཀྱི་བདེན་བཞིའི་ཆོས་འཁོར་དང་པོ་གསུངས་པ་དེ་དྲུག་པའི་ཚེས་བཞི་ཆགས་ཀྱི་ཡོད་པ་རེད། དུས་ཚིགས་ཁྱད་པར་ཅན་རེད་འདུག དེར་བརྟེན་ང་ཚོས་ཐེག་པ་ཆེ་ཆུང་དང་ལེགས་སྦྱར་གྱི་ཆོས་བརྒྱུད། པྰ་ལིའི་ཆོས་བརྒྱུད་ཀྱི་ཁྱད་པར་མེད་པ་ཚང་མར་ཁྱབ་བསྡད་པ་དེ་བདེན་བཞིའི་ཆོས་འཁོར་རེད། སང་ཉིན་བཅོམ་ལྡན་འདས་ཀྱི་བདེན་བཞིའི་ཆོས་འཁོར་བསྐོར་བའི་དུས་ཆེན་ཆགས་ཀྱི་ཡོད་པ་རེད། དེ་རིང་མགོ་འཛུགས་བྱས་ནས་སང་ཉིན་མཚམས་དེ་ལ་བསླེབ་ཀྱི་རེད་ལ། སེམས་བསྐྱེད་འདོན་ན་ཏག་ཏག་ཆགས་ཀྱི་རེད་དྲན་སོང་། ཞེས་གསུངས་སོང་།
དེ་ནས་བཀའ་འདྲི་བཀའ་ལན་གྱི་ལས་རིམ་ནང་ལམ་སྒྲོན་སློབ་གྲྭའི་བསྟན་འཛིན་ཚེ་འཕེལ་གྱིས། གཞན་ཕན་སྒྲུབ་པའི་དོན་དུ་མངོན་ཤེས་ལ་སོགས་པ་རྟོགས་དགོས་པའི་རྒྱུ་མཚན་ཅི་ཡིན་སྐོར་བཀའ་འདྲི་ཞུས་པར་༧གོང་ས་མཆོག་གིས། གཞན་དོན་སྒྲུབ་པ་ལ་ཆོས་བཤད་སའི་སེམས་ཅན་གཞན་གང་འདྲ་ཡོད་པ་ཤེས་པའི་ཐོག་ནས་ཁམས་དང་མོས་པར་འཚམ་པའི་ཆོས་བཤད་དགོས་ཡོད་རེད། དཔེར་ན་སངས་རྒྱས་ཀྱི་ཆོས་ནང་ཆོས་ཐམས་ཅད་སྟོང་པ་ཉིད་རེད། གང་ཡང་ཡོད་མ་རེད་གསུངས་ཀྱི་ཡོད་རེད། གང་ཡང་ཡོད་མ་རེད་བཤད་མཁན་ཡོང་གི་འདུག སངས་རྒྱས་པའི་ཆོས་ཀྱི་འགྲོ་སྟངས་གཞི་ལམ་འབྲས་གསུམ་གྱི་རྣམ་གཞག་དེ་ཚོ་ཞིབ་ཚགས་པོ་མ་ཤེས་དུས། གཟུགས་སྟོང་པའོ། སྟོང་པ་ཉིད་གཟུགས་སོ་གསུངས་པའི་སྐབས་སུ་མངོན་སུམ་ལ་བསྙོན་པ་ལྟ་བུ་གཟུགས་ང་ཚོས་མཐོང་བསྡད་པ་ཡོད་རེད། ལག་པས་རེག་རྒྱུ་ཡོད་རེད། འདི་རང་བཞིན་སྟོང་པ་ཉིད་རེད་ལབ་ན་དཔེ་སྲིད་ཀྱི་མ་རེད་བསམ་བསམ་ཡོང་གི་འདུག དེར་བརྟེན་ཆ་རྐྱེན་འཛོམས་པ་ཞིག་གིས་སེམས་ཅན་གྱི་ཁམས་དང་མོས་པ་ཤེས་པའི་ཐོག་ནས་བཅོམ་ལྡན་འདས་ཀྱིས་མངོན་པར་རྫོགས་པ་སངས་རྒྱས་མ་ཐག་ཏུ་ལམ་སེང་ཤེར་ཕྱིན་གྱི་ཆོས་སྐོར་གསུངས་མི་འདུག སྔོན་ལ་བདེན་བཞིའི་ཆོས་འཁོར་གསུངས། སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་འདི་ཚོ་གསུངས། དེ་ནས་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་བསྒོམ་པར་བྱ། དེ་ནས་ཏོག་ཙམ་ཟབ་ཏུ་ཕྱིན་ནས་སྡུག་བསྔལ་ཤེས་པར་བྱ་སྟེ་ཤེས་པར་བྱར་མེད། ཀུན་འབྱུང་སྤང་བར་བྱ་སྟེ་སྤང་བར་བྱར་མེད། འགོག་པ་མངོན་དུ་བྱ་སྟེ་མངོན་དུ་བྱར་མེད། ལམ་བསྒོམ་པར་བྱ་སྟེ་བསྒོམ་པར་བྱར་མེད་ཅེས་ཀུན་ལ་རིགས་བསྒྲེ་ཡོང་གི་འདུག་ཅེས་དང་། བཅོམ་ལྡན་འདས་ཀྱིས་གདུལ་བྱའི་ཁམས་དང་བསྟུན་ནས་ཆོས་གསུངས་ཡོད་ལ། ཁམས་དང་མོས་པར་མ་རན་པ་ཞིག་ལ་བླ་མའི་ངོས་ནས་ཆོས་ཟབ་པོ་གསུངས་པ་ཡིན་ན་སྐུར་འདེབས་བྱེད་པའི་རྐྱེན་ལ་འགྲོ་རྒྱུ་ཡོང་གི་ཡོད་སྐོར་གསུངས་སོང་།
གསར་འགོད་པ། བསྟན་འཛིན་ཕུར་བུ།
