༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་དང་འབྲེལ་ནས་མགོ་ལོག་དང་གསེར་རྟ་སོགས་ནས་བོད་མི་ཁྱོན་སུམ་ཅུ་ཡས་མས་འཛིན་བཟུང་བྱས་ཏེ་འདྲི་རྩད་གཅོད་པ་དང་སློབ་གསོ་གཏོང་གི་ཡོད་འདུག
འདི་གའི་གསར་འགོད་པར་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཉེ་ལམ་ཕྱི་ཟླ་ ༧ ཚེས་ ༦ ཉིན་༧གོང་ས་མཆོག་གི་སྐུའི་འཁྲུངས་སྐར་སྲུང་གཙི་གནང་བ་དང་བསྟུན། རྒྱ་ནག་གཞུང་གིས་སྔ་གཞུག་ཏུ་བོད་མི་ཁྱོན་ ༣༠ ཡས་མས་ཙམ་འཛིན་བཟུང་བྱས་ཏེ། བོད་མི་ཁག་ཅིག་མ་གཏོགས་གཞན་ཚང་མའི་མིང་དང་ད་ལྟའི་གནས་བབ་ཅི་ཆགས་སོགས་གང་ཡང་ཤེས་རྟོགས་ཐུབ་ཀྱི་མེད་པ་རེད།
གནས་ཚུལ་མཁོ་སྤྲོད་པས། བོད་གསེར་རྟ་རྫོང་གེ་སར་ཤང་ལམ་གྱི་སྒོ་རྟགས་ ༢ པའི་ཐོག་ཁང་ཟ་ཁང་ཞིག་ཏུ་མི་བཞི་འཛིན་བཟུང་བྱས་ཡོད་པ་དང་ཁོ་ཚོ་ནི་རིན་ཆེན་བཟང་པོ་དང་བློ་དགའ། དག་ཐེར་དང་དབང་ཕྱུག་སྐྱིད་བཅས་ཡིན་པ་དང་། ས་གནས་རང་གི་རྫོང་མི་རིགས་སློབ་འབྲིང་གི་སློབ་མ་རེད། ཉེན་རྟོག་པས་ཁོ་ཚོའི་ཁ་པར་སྔོག་བཤེར་བྱས་རྗེས་འཛིན་བཟུང་བཙན་འཁྲིད་བྱས་པ་རེད། ཅེས་བརྗོད་བྱུང་བ་དང་། ༧གོང་ས་མཆོག་གི་སྐུའི་འཁྲུངས་སྐར་གྱི་སྔ་གཞུག་ཏུ། རྒྱ་གཞུང་ཉེན་རྟོག་པས་བོད་ཀྱི་ས་ཁུལ་ཁག་ཅིག་ཏུ་རྫོང་དང་བྱང་གྲོང་གི་བོད་མི་ཐུག་ཚད་ཀྱི་ཁ་པར་སྔོག་བཤེར་བྱེད་པའི་སྲིད་ཇུས་ཤིག་ལག་བསྟར་གྱིས། བོད་མི་མང་པོར་འདྲི་རྩད་བཅད་པ་དང་ཁག་ཅིག་ཐད་ཀར་འཛིན་བཟུང་བྱེད་ཀྱི་ཡོད་འདུག
ཡང་འདི་གའི་གསར་འགོད་པར་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་ལགས་ཀྱིས། རྒྱ་ནག་གིས་བཅད་བགོ་བྱས་པའི་སི་ཁྲོན་ཞིང་ཆེན་དཀར་མཛེས་ཁུལ་དཀར་མཛེས་རྫོང་གི་འཁྱག་ལུང་ཡུལ་ཚོའི་ཧ་ཤུལ་ནས་ཡིན་ཞིང་རང་ལོ་ ༤༠ ཙམ་སོན་པའི་སྐྱེས་པ་དཀོན་མཆོག་བཀྲ་ཤིས་ཟེར་བ་ཞིག་དང་བུད་མེད་རྫ་པོ་ཞུ་བ་གཉིས་འཛིན་བཟུང་བྱས་ཏེ། ད་ལྟ་ཁོ་གཉིས་ཀྱི་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་དང་། ཁོ་གཉིས་འཛིན་བཟུང་བྱེད་དོན་ནི་༧སྐུའི་འཁྲུངས་སྐར་ཉིན་སྐད་འཕྲིན་ཚོགས་པ་ཞིག་གི་ནང་མ་ཎི་བགྲང་དགོས་པ་དང་པར་རིས་སོགས་བརྒྱུད་སྐུར་བྱས་པས་ཡིན་པ་རེད། ཅེས་བརྗོད་བྱུང་།
ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་གསུངས་པ་ལྟར་ན། ༧གོང་ས་མཆོག་གི་སྐུའི་འཁྲུངས་སྐར་མ་བསླེབས་གོང་དུ་རྒྱ་ནག་གཞུང་གིས་མགོ་ལོག་དང་དཀར་མཛེས་ཁུལ་དུ་བསང་གསོལ་དང་རླུང་རྟ། རྒྱལ་མཚན་རྩེ་མོ་འདོགས་པ་སོགས་ཆོས་ལུགས་ཀྱི་བྱེད་སྒོ་གཅིག་ཀྱང་སྤེལ་མི་ཆོག་པའི་བཀའ་རྒྱ་བཏང་ཡོད་སྟབས། དཀར་མཛེས་རྫོང་ཁོངས་ནས་༧སྐུའི་འཁྲུངས་སྐར་སྲུང་གཙི་དང་འབྲེལ་ནས་བོད་མི་ ༢༠ ནས་ ༣༠ ཡས་མས་ཙམ་འཛིན་བཟུང་བྱས་ཡོད་ནའང་། རྒྱ་ནག་གི་དམ་དྲག་རྐྱེན་པས་ཁོ་ཚོའི་གནས་སྟངས་ཅི་ཆགས་སོགས་ཤེས་རྟོགས་ཐུབ་ཀྱི་མེད་པ་རེད།
ཡང་བོད་ནང་གི་གནས་ཚུལ་མཁོ་སྤྲོད་པ་དེས། ཁ་སང་ཕྱི་ཚེས་ ༡༤ ཉིན་རྔ་བ་ཀིརྟི་དགོན་པའི་མགྲོན་ཁང་ནང་ནས་བོད་པ་ཞིག་འཛིན་བཟུང་བྱས་ཏེ་བཀག་ཉར་ཁང་དུ་འཁྲིད་ཡོད་པ་རེད། ཡང་ཟླ་འདིའི་ཕྱི་ཚེས་ ༣ ཉིན་གྱི་ཞོགས་པར་རྔ་བ་རྫོང་སྤྲོ་སྐྱིད་ཚོང་རའི་ནང་ནས་བོད་མི་ཞིག་འཛིན་བཟུང་བྱས་ཡོད་འདུག
གསར་འགོད་པ། སྐལ་བཟང་སྦྱིན་པ།
