རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ནང་ཏོག་དབྱིབས་ནད་པ་ ༡༤༣ བྱུང་སྟེ་འགྲོ་སྐྱོད་བཀག་སྡོམ་བྱེད་མུས་རེད་འདུག་ལ་ནད་པ་མང་ཆེ་བ་ཏོག་དབྱིབས་འགོག་ཁབ་དང་པོ་དང་ཡང་ན་འགོག་ཁབ་གཉིས་ཀ་བརྒྱབ་ཚར་བ་་ཤ་སྟག་ཡིན་འདུག
འདི་གའི་གསར་འགོད་པས་སྦེལ་ཀོབ་གཞིས་ཆགས་ཀྱི་ས་གནས་མགོ་འཛིན་དོན་གྲུབ་རྒྱལ་པོ་ལགས་ལ་ཁ་པར་བརྒྱུད་གཞིས་ཆགས་ཀྱི་གནས་སྟངས་སྐོར་དྲིས་པར་ཁོང་གིས། དེ་སྔོན་འགྲོ་སྐྱོད་བཀག་སྡོམ་ཡོད་པའི་སྐབས་སུ། ལུགས་བསམ་ལ་བོད་མི་ཏོག་དབྱིབས་ནད་རྟགས་ཐོན་པ་ ༤༠ བྱུང་བ་རེད། ད་ལྟ་སྦེལ་ཀོབ་གཞིས་ཆགས་སུ་ཏོག་དབྱིབས་ནད་རྟགས་ཐོན་པའི་བོད་མིའི་གྲངས་ ༡༤༣ ཡོད་པ་རེད། རྒྱུ་མཚན་ནི་ཟླ་འདིའི་ཕྱི་ཚེས་ ༥ ཉིན་འགྲོ་སྐྱོད་བཀག་སྡོམ་ཀློད་པའི་བཀའ་རྒྱ་བཏང་བ་ནས་བཟུང་ལྷོད་གཡེང་ཕྱིན་པའི་རྐྱེན་གྱིས་མི་མང་པོ་ཕྱི་ལ་བསྐྱོད་པ་དང་འཛོམས་འཛོམས་བྱས་པའི་རྐྱེན་གྱིས་ནད་པ་མང་པོ་བྱུང་སོང་། ཟླ་འདིའི་ཕྱི་ཚེས་ ༡༥ ནས་སྦེལ་ཀོབ་གཞིས་ཆགས་སུ་ཉིན་བཅུའི་རིང་ཚལ་གྱི་ཚོང་ཁང་དང་སྨན་ཁང་སོགས་དགོས་ངེས་ཅན་མ་གཏོགས་གཞན་ཟ་ཁང་དང་ཚོང་ཁང་རྣམས་སྒོ་བརྒྱབ་ནས་བསྡད་ཡོད་པ་རེད། ཅེས་བརྗོད་བྱུང་།
ད་ལྟ་ནད་པའི་གནས་སྟངས་ག་འདྲ་ཡོད་དྲིས་པར་ཁོང་གིས། ཏོག་དབྱིབས་ནད་པ་དྲག་སྐྱེད་སོང་བ་མང་པོ་བྱུང་གི་འདུག ཁ་སང་མི་གྲངས་ ༡༦ དྲག་སྐྱེད་ཕྱིན་ཡོད་རེད། ད་ེཡང་ཉིན་རེ་ཉིན་རེ་ནས་མི་གྲངས་ ༡༠ དྲག་སྐྱེད་བྱུང་བ་དང་། སྐབས་རེར་མི་གྲངས་ ༢༤ ལ་སོགས་པ་དྲག་སྐྱེད་བྱུང་སྟེ་སྨན་ཁང་ནས་རང་ཁྱིམ་དུ་གཏོང་གི་ཡོད། རྒྱ་གར་གྱི་མི་དང་བོད་མི་ལ་སོགས་པ་ཕྱི་ནས་ཡོང་སྟེ་ཏོག་དབྱིབས་ནད་པ་བྱུང་མགོ་བཙུགས་ཏེ། སྦེལ་ཀོབ་ལུགས་བསམ་གྱི་གཞིས་ཆགས་ནང་དུ་ཁྱབ་པ་རེད། སྤྱིར་བཏང་ཕྱི་ནས་ཡོང་མཁན་རྣམས་ཟུར་བཀག་ཏུ་བཞག་གི་ཡོད་ཀྱང་། འགྲོ་སྐྱོད་བཀག་སྡོམ་མེད་པ་ཆགས་པ་ནས་བཟུང་ཕྱི་ནས་ནང་དུ་ཡོང་བ་མང་པོ་བྱུང་སྟེ་ན་ཚ་དེ་ཡོང་བ་རེད། དེ་ནས་མི་གཞན་དང་འཛོམས་པའི་རྐྱེན་གྱིས་ཁྱབ་པ་རེད་དྲན་གྱི་འདུག ཅེས་དང་། ནད་པ་མང་ཆེ་བ་ཏོག་དབྱིབས་འགོག་ཁབ་དང་པོ་དང་ཡང་ན་འགོག་ཁབ་གཉིས་ཀ་བརྒྱབ་ཚར་བ་ཤ་སྟག་ཡིན་ལ། ཁོང་ཚོའི་ནད་རྟགས་ཛ་དྲག་པོ་མེད་ཀྱང་། འགོག་ཁབ་གཅིག་ཐོབ་པ་དང་འགོག་ཁབ་གཉིས་ཀ་ཐོབ་རུང་ཏོག་དབྱིབས་ན་མཁན་བྱུང་གི་འདུག ཅེས་བརྗོད་བྱུང་།
དེ་རིང་གི་བཙན་བྱོལ་བོད་མིའི་ཏོག་དབྱིབས་ལས་དོན་ཚོགས་ཆུང་གི་གྲངས་ཐོ་ལྟར་ན། རྒྱ་གར་དང་བལ་ཡུལ་ནང་བོད་མི་ཏོག་ནད་ཅན་ ༥༣༥༦ བྱུང་བའི་ཁྲོད་དྲག་སྐྱེད་སོང་བ་ ༤༨༩༧དང་། རྐྱེན་འདས་སུ་ཕྱིན་པ་ ༡༣༢། ན་བཞིན་པ་ ༣༢༧ འདུག ཕྱི་རྒྱལ་དུ་བོད་མི་ཁྱོན་ ༢༡༣ ལ་ཏོག་དབྱིབས་ན་བའི་ཁྲོད་ནས་དྲག་སྐྱེད་སོང་བ་ ༡༦༥། རྐྱེན་འདས་སུ་ཕྱིན་པ་མི་གྲངས་ ༩། ན་བཞིན་པ་ ༣༩ ཡོད་འདུག
གསར་འགོད་པ། བསྟན་འཛིན་ཕུར་བུ།
