རྒྱ་ནག་ཧེ་ནན་ཞིང་ཆེན་ནང་ཆར་པ་ཤུགས་ཆེན་བབས་པའི་རྐྱེན་གྱིས་ཆུ་ལོག་རྒྱུགས་ཏེ་མི་རྒྱུ་གཉིས་ལ་གནོད་སྐྱོན་ཐེབས་པ་དང་རྒྱ་ནག་གི་གྲོང་ཁྱེར་བཅུ་གཉིས་ལྷག་དང་མི་གྲངས་ས་ཡ་གཉིས་མ་ཟིན་ཙམ་གྱི་འཚོ་བར་དོ་ཕོག་བཟོས་ཡོད་འདུག
ཉེ་ལམ་གཟའ་འཁོར་གཅིག་གི་གོང་དུ་རྒྱལ་ཁབ་ལྷག་ ༥༥ ཡི་ནང་ཡོད་པའི་གཞུང་འབྲེལ་མ་ཡིན་པའི་ཁོར་ཡུག་ལྷན་ཚོགས་( New Green Peace )ཀྱིས་གནམ་གཤིས་འགྱུར་ལྡོག་ཤུགས་ཆེན་ཕྱིན་པའི་རྐྱེན་གྱིས་རྒྱ་ནག་གི་རྒྱལ་ས་པེ་ཅིན་དང་། ཧྲང་ཧེ་སོགས་སུ་དབྱར་ཁ་ཚ་བ་ཆེ་བ་དང་ཆར་པ་འབབ་ཞོད་ཆེ་བ་ཡོང་རྒྱུའི་་ཉེན་བརྡ་བཏང་ཡོད་པ་ལྟར། ཟླ་འདིའི་ཕྱི་ཚེས་ ༡༧ ཉིན་ནས་རྒྱ་ནག་གི་ཧཱེ་ནན་ (Henan ) ཞིང་ཆེན་ཁུལ་དུ་ཆར་པ་ཤུགས་ཆེན་བབས་པའི་རྐྱེན་གྱིས། རྒྱ་མི་ཆེས་གནས་སྡོད་མང་སའི་གྲོང་ཁྱེར་ཀྲང་ཀྲའོ་ ( Zhengzhou ) ཁུལ་དུ་ཆུ་ལོག་ཆེན་པོ་ཞིག་བརྒྱུགས་ཏེ། ཉུང་མཐར་མི་གྲངས་ ༢༥ ལྷག་འདས་གྲོངས་སུ་ཕྱིན་པ་དང་མི ༧ བོར་བརླག་དང་མི་ ༥ ལ་གནོད་སྐྱོན་ཐེབས་ཡོད་པ། དེ་བཞིན་མི་གྲངས་འབུམ་ ༢ ལྷག་ཆུ་ལོག་གི་ཛ་དྲག་གནས་སྟངས་འོག་ས་གནས་གཞན་ལ་གནས་སྤོས་བྱེད་དགོས་བྱུང་ཡོད་འདུག་ལ། ཆུ་ལོག་གི་རྐྱེན་པས་ཧེ་ནན་གྱི་ཆུ་མཛོད་ཅིག་ཡོད་པ་དེ་གད་འཐོར་འབྱུང་སྲིད་པའི་ཉེན་ཁའང་འཕྲད་ཀྱི་ཡོད་འདུག
ད་ལན་ཧེ་ནན་དུ་ཆུ་ལོག་བྱུང་བ་ལ་བརྟེན་ནས་མི་མང་གི་འགྲོ་འདུག་ལ་དཀའ་ངལ་ཚབས་ཆེན་ཐེབས་ཡོད་པ་མ་ཟད། ས་འོག་གི་གཞུང་ལམ་ཡོངས་སུ་གནོད་སྐྱོན་ཐེབས་ཏེ། ས་འོག་མྱུར་བསྐྱོད་མེ་འཁོར་ནང་དུ་ཆུ་ཡིས་ཁེངས་ནས་མེ་འཁོར་ ༡༦༠ ལྷག་འགྲོ་སྐྱོད་བྱེད་ཐུབ་ཀྱི་མེད་པ་དང། དེ་བཞིན་ད་ལྟ་བཟོ་བསྐྲུན་བྱེད་མུས་ཡིན་པའི་རྒྱ་ནག་ཤར་ཕྱོགས་གྱི་ས་འོག་ཕུག་ལམ་ ( Shijinshan tunnel ) དུའང་ཆུ་ལོག་རྒྱུག་ནས་ལས་མི་བཅུ་བཞི་ལས་གསུམ་ལ་འཆི་སྐྱོན་བྱུང་ཡོད་པ་དང་། མྱུར་སྐྱོབ་པ་མི་གྲངས་ ༢༠༠༠ ཙམ་གྱིས་ཕུག་ལམ་ལས་བཟོ་བ་རྣམས་འཚོལ་ཐབས་བྱེད་མུས་ཡིན་ཡང་། ད་ལྟ་བར་རྐྱེན་ལམ་དུ་ཕྱིན་པའི་ཕུག་ལམ་ལས་བཟོ་བ་གསུམ་གྱི་ཕུང་པོ་ལག་སོན་བྱུང་ཡོད་པ་ལས། ད་དུང་ལས་མི་བཅུ་གཅིག་གི་གནས་ཚུལ་གང་ཡང་གོ་ཐོས་བྱུང་མེད་པ་རེད།
འབྱུང་བའི་གོད་ཆག་གི་དོན་རྐྱེན་འདིའི་ཐད་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། གོད་ཆག་བྱུང་སའི་ཡུལ་དངོས་ཀྱི་གནས་བབ་གང་མགྱོགས་སླར་གསོ་བྱེད་དགོས་པའི་བཀའ་བཏང་བ་དང་འབྲེལ། རིན་ཐང་ཆེ་བའི་ཚེ་སྲོག་དང་རྒྱུ་ནོར་ལ་གྱོང་གུད་ཐེབས་ཡོད། ཅེས་བརྗོད་ཡོད་པ་རེད།
གཞན་ཡང་ད་རེས་ཧེ་ནན་གྱི་ཆུ་ལོག་དེ་རྒྱ་ནག་གི་གྲོང་ཁྱེར་གཞན་བཅུ་གཉིས་ལྷག་གི་ནང་རྒྱུགས་ཏེ་འགྲིམས་འགྲུལ་གྱི་ལས་དོན་ཁག་མཚམས་འཇོག་བྱེད་དགོས་ཁེལ་ཡོད་པ་དང་། ཆུ་ལོག་དང་འབྲེལ་བའི་གནས་ཚུལ་མང་པོ་ཞིག་བརྙན་རིས་གཉིས་ཀྱི་ཐོག་ནས་དྲ་ལམ་དུ་ཐོན་ཞིང་། བརྙན་ཐུང་ཞིག་ཏུ་ས་འོག་གི་མྱུར་བསྐྱོད་མེ་འཁོར་འབབ་ཚུགས་ཀྱི་ལམ་ཁ་དག་ཆུ་ཡིས་ཁེངས་ནས་ཡོད་པ་དང་། མེ་འཁོར་ནང་དུའང་ཆུ་ཡིས་ཁེངས་ནས་འགྲོ་ཐུབ་ཀྱི་མེད་པ། དེ་བཞིན་མི་མང་ཕལ་མོ་ཆེའི་ཁོག་སྨད་ཆུའི་ནང་དུ་ནུབ་ཡོད་པ་སོགས་མཐོང་གི་འདུག དེ་བཞིན་གཞུང་ལམ་དུ་སྒེར་འཁོར་མང་པོ་ཞིག་ཆུ་ཡིས་ཁུར་བ་དང་། མི་རྣམས་ཀྱིས་ལག་པ་དང་ལག་པ་སྦྲེལ་ནས་ཕན་ཚུན་ལ་རོགས་འདེགས་བྱེད་བཞིན་པ་སོགས་བརྙན་རིས་བརྒྱུད་མཐོང་རྒྱུ་འདུག
ནན་ཞིང་ཆེན་གྱི་གྲོང་ཁྱེར་ཀྲང་ཀྲའོ་ནི་རྒྱ་ནག་མི་མང་ས་ཡ་བཅུ་གཉིས་ལྷག་གི་གནས་སྡོད་བྱེད་ས་ཞིག་ཡིན་པ་དང། རྒྱ་ནག་ནང་གི་འདུ་འཛི་ཆེས་རྒོད་སའི་གྲོང་ཁྱེར་གྱི་གྲས་སུ་གཏོགས་ཀྱི་ཡོད་པ་ལྟར། ད་རེས་ཆུ་ལོག་གི་རྐྱེན་བྱས་ཏེ་རྒྱ་རིགས་ཁྱོན་ས་ཡ་གཅིག་དང་ཕྱེད་ཀ་ཙམ་གྱི་འཚོ་བར་དོ་ཕོག་བྱུང་ཡོད་པ་རེད།
དཔལ་ལྡན།
འབྱུང་བའི་གནོད་སྐྱོན་ནི་མི་གི་བྱེད་ལས་འོག་ནས་ཡོང་གི་ཡོད་ན་མི་ཚང་མས་འདོད་ཆུང་ཆོག་ཤེས་ལ་བསྟེན་རྒྱུ་ནི་འབྱུང་བའི་གནོད་འཚེ་མི་ཕོག་པའི་ཐབས་ལམ་བཟང་ཤོས་དེ་ཡིན་པའི་ངོས་འཛིན་ཡང་ཞུ་གི་ཡོད་།