རྒྱ་གར་རང་བཙན་ཉིན་མོར་དྲག་སྤྱོད་སྤེལ་སྲིད་པའི་ཉེན་བརྡ་བཏང་།

པཱ་ཀི་སི་ཐན་གྱི་འཇིགས་སྐུལ་དྲག་སྤྱོད་ཚོགས་པ་ཞིག་གིས་བསླེབ་ལ་ཉེ་བའི་རྒྱ་གར་གྱི་རང་བཙན་ཉིན་མོ་སྲུང་གཙི་གནང་སྐབས་མཁའ་སྤྱོད་འཕྲུལ་ཆས་བཏང་ནས་དྲག་སྤྱོད་སྤེལ་སྲིད་པའི་ཉེན་བརྡ་བཏང་ཡོད་པས་ད་ལྟ་ནས་འགོག་སྲུང་ནན་པོ་བྱེད་ཀྱི་འདུག

ཁ་སང་ཕྱི་ཚེས་ ༢༠ ཉིན་དེ་རིང་གི་རྒྱ་གར་(India Today)ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གྱི་གསང་བའི་ལས་ཁུངས་ངོས་ནས་ཁྱིམ་མཚེས་རྒྱལ་ཁབ་པཱ་ཀི་སི་ཐན་དང་ས་འབྲེལ་ཡིན་པའི་བྱང་ཕྱོགས་མངའ་སྡེ་ཇ་མུ་ཀཱ་ཤི་མིར་གྱི་མངའ་སྡེའི་གནས་བབ་ཕྱིར་བསྡུ་བྱས་ཏེ་ལོ་གཅིག་འཁོར་བའི་ཉིན་མོ་སྟེ། ཡོང་ལ་ཉེ་བའི་ཕྱི་ཟླ་ ༨ ཚེས་ ༥ ཉིན་རྒྱལ་ས་ལྡི་ལིར་འཇིགས་སྐུལ་བས་དྲག་སྤྱོད་སྤེལ་སྲིད་པའི་ཉེན་བརྡ་བཏང་བར་བརྟེན། ད་ལྟའི་ཆར་ལྡི་ལི་ཁུལ་དུ་གསང་བའི་ལས་ཁུངས་ཀྱི་མི་སྣ་དང་ཉེན་རྟོག་པ་རྣམས་ཀྱིས་གནས་སྟངས་ལ་རྒྱུས་ལོན་དང་རྟོག་ཞིབ་དོ་ནན་བྱེད་ཀྱིན་ཡོད་འདུག

རྒྱ་གར་གྱི་གསར་ཁང་དེའི་གནས་ཚུལ་ནང་། རྒྱ་གར་གྱི་གསང་བའི་མི་སྣས་གནས་ཚུལ་མཁོ་སྤྲོད་བྱས་པ་ལྟར་ན། པཱ་ཀི་སི་ཐན་ནང་རྟེན་གཞི་བྱས་པའི་འཇིགས་སྐུལ་དྲག་སྤྱོད་པའི་ཚོགས་པ་ཞིག་གིས་མཁའ་སྐྱོད་འཕྲུལ་ཆས་ (Drone) བཀོལ་སྤྱོད་བྱས་ཏེ་རྒྱལ་ས་ལྡི་ལིར་དྲག་སྤྱོད་བྱ་འགུལ་སྤེལ་རྒྱུའི་འཆར་གཞི་འཐེན་གྱི་ཡོད་སྐོར་དང་། དྲག་སྤྱོད་བྱ་འགུལ་དེ་ཕྱི་ཟླ་ ༨ ཚེས་ ༡༥ རྒྱ་གར་གྱི་རང་བཙན་ཉིན་མོའི་སྔ་རོལ་དུ་སྤེལ་སྲིད་པ་ཞིག་ཡིན་སྐོར་ཡང་བརྗོད་ཡོད་འདུག

ད་ཐེངས་ཀྱི་གསང་བའི་གནས་ཚུལ་དང་འབྲེལ་ཏེ། ལྡི་ལིའི་ཉེན་རྟོག་པས་དྲག་སྤྱོད་པར་འགོག་རྒོལ་ཆེད་རྟོག་ཞིབ་ཁང་ཞིག་ལོགས་སུ་བཙུགས་འདུག་པ་མ་ཟད། རྒྱ་གར་གྱི་རང་བཙན་ཉིན་མོ་སྲུང་གཙིའི་གཞུང་འབྲེལ་མཛད་སྒོ་འཚོག་ཡུལ་ཕོ་བྲང་དམར་པོ་(Red Fort) དེ་ཉིད་ཕྱི་ཟླ་ ༨ ཚེས་ ༡༥ བར་སྒོ་བརྒྱབ་འདུག་ལ། སྔར་ལོ་དང་མི་འདྲ་བར་ཕོ་བྲང་དམར་པོར་ཉེན་སྲུང་ཆེད་མཁའ་སྐྱོད་འཕྲུལ་ཆས་ལ་འགོག་རྒོལ་གྱི་མ་ལག་(anti-drone system) གཉིས་ཁ་སྣོན་བྱས་ཏེ་ཁྱོན་བསྡོམས་མ་ལག་བཞི་བཙུགས་ཡོད་འདུག

ཉེ་ཆར་ཕྱི་ཟླ་ ༦ ཚེས་ ༢༧ ཉིན་ཇ་མུར་ཡོད་པའི་རྒྱ་གར་གྱི་མཁའ་དམག་ས་ཚིགས་སུ་མཁའ་སྐྱོད་འཕྲུལ་ཆས་འབར་མདེལ་གཡུགས་ཏེ་དམག་མི་གཉིས་ལ་རྨས་སྐྱོན་ཐེབས་ཡོད་ཅིང་། དོན་རྐྱེན་དེའི་རྗེས་སུ་ཇ་མུའི་ཁུལ་དུ་མཁའ་སྐྱོད་འཕྲུལ་ཆས་རྩ་ནས་འཕུར་སྐྱོད་མི་ཆོག་པའི་བཀའ་བཏང་ཡོད་འདུག ལྡི་ལིའི་ནང་མཚོན་ནའང་མཁའ་སྤྱོད་འཕྲུལ་ཆའི་ཉེན་ཁར་དོ་ནན་གྱིས་རྟོག་ཞིབ་བྱེད་མགོ་བརྩམས་ཟིན་པ་མ་ཟད། སྔར་དང་མི་འདྲ་བར་འདི་ལོའི་རྒྱ་གར་རང་བཙན་ཉིན་མོར་ལྡི་ལི་ཁུལ་དུ་ཉེན་རྟོག་པ་དང་དབུས་གཞུང་གི་དྲག་ཆས་དམག་དཔུང་ཇེ་མང་དུ་གཏོང་རྒྱུ་ཡིན་འདུག

གསར་འགོད་པ། པ་སངས་ཚེ་རིང་།