སང་ཉིན་ཕྱི་ཚེས་ ༢༣ ནས་འདི་ལོའི་ཕྱི་ཟླ་ ༨ ཚེས་ ༨ ཉིན་བར་འཚོག་གཏན་འཁེལ་བའི་ཉི་ཧོང་ཨོ་རྩལ་འགྲན་ཚོགས་ནང་བོད་རིགས་ཨོ་རྩལ་བ་གྲགས་ཅན་ཆོས་དབྱིངས་སྐྱིད་ལགས་མཉམ་ཞུགས་གནང་འདུག
རྒྱ་ནག་གཞུང་གིས་འདི་ལོའི་ཉི་ཧོང་གི་ཨོ་རྩལ་འགྲན་ཚོགས་ནང་ཞུགས་མཁན་ལུས་རྩལ་པ་རྣམས་ཀྱི་མིང་གཞུང་ཡོངས་བསྒྲགས་བྱས་པ་ལྟར་ན། འདི་ལོའི་རྒྱ་ནག་གི་ཨོ་རྩལ་བ་ཁྱོན་ ༧༧༧ ཁྲོད་བོད་རིགས་ཨོ་རྩལ་བ་ཆོས་དབྱིངས་སྐྱིད་ལགས་ཚུད་ཡོད་པ་དང་། ཁོང་མོ་ཨོ་རྩལ་འགྲན་ཚོགས་ནང་ཞུགས་པ་ཐེངས་གསུམ་པ་དེ་ཆགས་འདུག ཁོང་མོ་མ་གཏོགས་བོད་རིགས་ལུས་རྩལ་བ་གཞན་ཚུད་ཡོད་མེད་གསལ་ཆ་མི་འདུག
མཚོ་སྔོན་ཞིང་ཆེན་ལུས་རྩལ་ཁང་གིས། ཆོས་དབྱིངས་སྐྱིད་ལགས་ཀྱིས་ལུས་སྦྱོང་བྱ་རྒྱུ་རྒྱུན་འཁྱོངས་བྱས་ཏེ། རང་ཉིད་ཀྱི་ལུས་རྩལ་ཡར་སྐྱེད་ལ་དམིགས་ནས་ནན་ཏན་གྱི་སྒོ་ནས་ལུས་སྦྱོང་བྱས་པར་བརྟེན། ད་བར་ཕུལ་བྱུང་གི་བྱ་དགའ་མང་པོ་ཞིག་ཐོབ་ཡོད་པ་དེར། མཚོ་སྔོན་ཞིང་ཆེན་གྱི་ལུས་རྩལ་བ་ཚང་མས་ཁ་མིག་ཡར་ལྟ་དགོས་སྐོར་དང་། བོད་མཐོ་སྒང་གི་ལུས་རྩལ་བ་ཞིག་ཡིན་པའི་ཆ་ནས། ཁོང་མོའི་དཀའ་དཔྱད་ཀྱི་ངལ་རྩོལ་དང་གཡུལ་ཟའི་འབྲས་བཟང་གིས། བོད་མཐོ་སྒང་གི་ལུས་རྩལ་བ་ཞིག་གི་ནམ་ཡང་ཞུམ་པ་མེད་པའི་སྙིང་སྟོབས་མཚོན་ཡོད་སྐོར་བརྗོད་འདུག
བོད་རིགས་ཨོ་རྩལ་བ་ཆོས་དབྱིངས་སྐྱིད་ལགས་ཀྱིས་ ༢༠༡༢ ལོར་ལོན་ཌོན་ ( London ) དུ་འཚོགས་པའི་ཨོ་རྩལ་འགྲན་ཚོགས་ཐོག་ཨང་གཉིས་པའི་བྱ་དགའ་བླངས་པ་དང་། སྐབས་དེར་ཨེ་ཤ་ཡའི་བུད་མེད་འདུར་རྒྱུག་མཁན་ཆེས་མགྱོགས་ཤོས་ཀྱི་ཟིན་ཐོ་གསར་པ་བསྐྲུན་ཡོད་འདུག ༢༠༡༦ ལོར་བྷི་ར་ཛར (Brazil ) དུ་འཚོགས་པའི་ཨོ་རྩལ་འགྲན་ཚོགས་ནང་ཞུགས་ཏེ་ཨང་ལྔ་པ་བླངས། དེ་བཞིན་ ༢༠༡༨ ལོའི་ཨེ་ཤ་ཡའི་ལུས་རྩལ་འགྲན་ཚོགས་དང་། ༢༠༡༩ ལོའི་ཁོ་ཌར (Qatar) འཚོགས་པའི་འཛམ་གླིང་རྒྱུག་མཆོང་འཕེན་གསུམ་གྱི་འགྲན་སྡུར་ཁྲོད་ཨང་གཉིས་པའི་བྱ་དགའ་ཐོབ་ཅིང་། དེའི་ཁོངས་ནས་བུད་མེད་རུ་ཁག་གི་ལོ་འཁོར་བྱ་དགའ་ཨང་དང་པོ་ཐོབ་པ་སོགས་ད་ལྟ་བར་དུ་ཁོང་མོ་རྒྱལ་སྤྱིའི་རང་བཞིན་གྱི་འགྲན་ཚོགས་ ༡༣ ཙམ་གྱི་ནང་ཞུགས་ཡོད་འདུག
བོད་རིགས་ཨོ་རྩལ་བ་ཆོས་དབྱིངས་སྐྱིད་ལགས་ནི། ཕྱི་ལོ་ ༡༩༩༠ ཟླ་ ༡༡ ཚེས་ ༡༡ ཉིན་མཚོ་སྔོན་མཚོ་བྱང་ཁུལ་མདའ་བཞི་རྫོང་ཝ་མགྱོགས་སྡེ་བ་རུ་སྐྱེས་ཤིང༌། ཆུང་དུས་ནས་ཡུལ་ཚོའི་སློབ་གྲྭར་ཞུགས་ཡོད་པ་དང་། ཕྱི་ལོ་ ༢༠༡༢ ལོར་ལོན་ཏོན་ཨོ་རྩལ་ཐོག་ཨང་གཉིས་པའི་དངུལ་གྱི་རྟགས་མ་ཐོབ་པའི་གཟེངས་སུ་ཐོན་པའི་གྲུབ་འབྲས་ཀྱིས། བོད་ཁུལ་གྱི་ན་གཞོན་མང་པོར་ལུས་རྩལ་ཐད་རྨི་ལམ་གསར་པ་ཞིག་སྐྲུན་ཡོད་པས། འདས་པའི་ལོ་བཅུ་ཙམ་ནང་བོད་ཀྱི་ན་གཞོན་མང་པོ་ཞིག་རྒྱ་ནག་དང་རྒྱལ་སྤྱིའི་རྩེད་འགྲན་སྣ་མང་ནང་མཉམ་ཞུགས་བྱས་ཏེ་བྱ་དགའ་ཐོབ་ཡོད་པའི་ཁྲོད། བོད་རིགས་ཨོ་རྩལ་རྒྱང་རྒྱུག་པ་སྟོབས་རྒྱལ་ལགས་ལ་ཕྱི་ལོ་ ༢༠༠༨ ལོའི་ཡ་གླིང་ལུས་རྩལ་འགྲན་ཚོགས་ཐོག་སྨི་ཆིག་ཁྲིའི་སྐྱེས་པའི་རྒྱང་རྒྱུག་ཁྲོད་ཨང་དང་པོ་ཐོབ། དེ་བཞིན་ ༢༠༡༡ ལོའི་ཊོར་ཀེ་རྒྱལ་སྤྱིའི་འགྲན་ཚོགས་ཐོག་འཇུ་རེས་ཤེད་རྩལ་འགྲན་སྡུར་ཁྲོད་ཨང་དང་པོ་བླངས་བའི་ཤི་ལོག་སྒྲོལ་མ་ལགས། ཕྱི་ལོ་ ༢༠༡༣ ལོའི་སྐབས་ ༢༡ པའི་ཡ་གླིང་གི་འགྲན་ཚོགས་མཐོར་འཛེག་འགྲན་སྡུར་ཁྲོད་བོད་རིགས་བུ་མོ་རིན་ཆེན་ལྷ་མོ་ལགས་ལ་ཨང་དང་པོ་ཐོབ་ཡོད་པ་རེད།
རྒྱ་ནག་གཞུང་ཕྱོགས་ནས་ཕྱོགས་སྒྲིག་བྱས་པའི་རྒྱལ་སྤྱིའི་རང་བཞིན་གྱི་བོད་རིགས་ལུས་རྩལ་བའི་ལོ་རྒྱུས་ལྟར་ན། བོད་ཉིང་ཁྲི་ས་ཁུལ་ནས་ཡིན་ཞིང་སྐབས་དེར་དམའ་འབྲིང་སློབ་མ་ཞིག་ཡིན་པའི་བོད་རིགས་ཕུར་བུ་ཚེ་རིང་ལགས། ཕྱི་ལོ་ ༡༩༧༤ ལོར་རྒྱ་ནག་རྒྱལ་ཡོངས་སྐབས་གསུམ་པའི་ལུས་རྩལ་འགྲན་ཚོགས་ཐོག་ཞུགས་ཏེ། ལྕགས་རིལ་དང་ལག་དབྱུག་རྒྱང་འཕེན་ཁྲོད་ཨང་དང་པོ་ཐོབ་ཡོད་པ་དང་། ཕྱིས་སུ་རྒྱལ་ཡོངས་རང་བཞིན་གྱི་འགྲན་ཚོགས་ཐེངས་བཞིར་མཉམ་ཞུགས་གནང་སྟེ། ཁོང་ལ་ཨང་དང་པོ་གཅིག་དང་གཉིས་པའི་གཟེངས་རྟགས་གཉིས་ཐོབ་ཡོད་པ་མ་ཟད། སྔ་གཞུག་ཏུ་སྐབས་གཉིས་པའི་ཡ་གླིང་ལུས་རྩལ་འགྲན་ཚོགས་དང་། ཡུ་རོབ་དང་ཨ་ཧྥེ་རི་ཁ། ཨོ་སི་ཊོ་ཡ་བཅས་ཀྱི་ནང་བསྡུས་པའི་རྒྱལ་སྤྱིའི་རང་བཞིན་གྱི་འགྲན་ཚོགས་ནང་དུའང་ཞུགས་ཡོད་འདུག ཁོང་ནི་རྒྱ་ནག་རྒྱལ་ཡོངས་ལུས་རྩལ་མཐུན་ཚོགས་ནང་ཚུད་པའི་བོད་རིགས་ལུས་རྩལ་བ་ཐོག་མ་དང་། རྒྱལ་སྤྱིའི་རང་བཞིན་གྱི་ལུས་རྩལ་འགྲན་ཚོགས་ནང་ཞུགས་མཁན་བོད་རིགས་ཐོག་མ་དེ་ཡིན་འདུག
གཞན་ཡང་། ཕྱི་ལོ་ ༡༩༨༧ ལོར་རྒྱ་ནག་ཀང་ཀྲུའུ་གྲོང་ཁྱེར་དུ་བསྡུས་པའི་རྒྱལ་ཡོངས་སྐབས་དྲུག་པའི་ལུས་རྩལ་འགྲན་ཚོགས་ཐོག བོད་ཀྱི་མདའ་རྩལ་བ་རྡོ་རྗེ་ཆོས་དབྱིངས་ལགས་ནས་ཨང་དང་པོ་བླངས་ཏེ། ཕྱི་ལོ་ ༡༩༨༨ ལོར་ལྷོ་ཀོ་རི་ཡའི་རྒྱལ་སར་བསྡུས་པའི་སྐབས་ ༢༤ པའི་དགུན་དུས་ཨོ་རྩལ་འགྲན་ཚོགས་ཐོག་མཉམ་ཞུགས་གནང་ཡོད་པ་དང་། ཁོང་ནི་བོད་རིགས་ཨོ་རྩལ་བ་དང་པོ་དེ་ཆགས་ཡོད་འདུག
ཕྱི་ལོ་ ༡༩༣༨ ལོར་བོད་སྡེ་དགེ་རུ་སྐྱེས་ཤིང་། རང་ལོ་ ༣༥ སྟེ་ཕྲུ་གུ་གསུམ་གྱི་ཨ་མར་གྱུར་བའི་བོད་རིགས་བུད་མེད་རི་འཛེག་པ་ཕན་ཐོགས(潘多)ལགས། ཕྱི་ལོ་ ༡༩༧༥ ཟླ་ ༥ ཚེས་ ༢༧ ཉིན་སྐྱེས་པའི་རུ་ཁག་ཅིག་དང་ལྷན་དུ་སྨི་ ༨༨༤༨ ཡིན་པའི་ཇོ་མོ་གླང་མའི་དབུ་རྩེར་འཛེགས་ཡོད་པ་དང་། ཁོང་མོ་ནི་འཛམ་གླིང་སྟེང་གི་ཇོ་མོ་གླང་མའི་དབུ་རྩེར་འཛེག་མཁན་བུད་མེད་གཉིས་པ་དེར་ངོས་འཛིན་བྱས་འདུག
དཔལ་ལྡན།
