འཛམ་གླིང་ནགས་ཚལ་ཉིན་དང་བསྟུན་ཌལ་ཧོར་ས་གནས་མང་ཚོགས་ཀྱིས་ཤིང་སྡོང་བརྒྱ་ལྷག་བཙུགས་ཏེ་༧གོང་ས་མཆོག་སྐུ་ཚེ་ཡུན་རིང་བརྟན་པ་དང་ཁོར་ཡུག་སྲུང་སྐྱོབ་ཀྱི་༧སྐུའི་ཐུགས་སྐྱེད་དམ་བཅའ་ལེགས་འགྲུབ་ཡོང་བའི་སྨོན་འདུན་ཞུས་ཡོད་པ་རེད།
ཁ་སང་འཛམ་གླིང་ནགས་ཚལ་སྲུང་སྐྱོབ་ཀྱི་ཉིན་མོ་ཡིན་པ་ལྟར། བཞུགས་སྒར་དྷ་སའི་ནུབ་རྒྱུད་དུ་ཆགས་པའི་ཌལ་ཧོར་ས་གནས་སུ། སྨན་པ་བཟོད་པ་ལགས་ཀྱི་མཐུན་སྦྱོར་འོག ས་གནས་རྒྱ་གར་ནགས་ཚལ་ལས་ཁུངས་ཀྱི་བཀའ་འཁྲོལ་འཐོབ་པ་བརྒྱུད། ཌལ་ཧོར་ས་གནས་མི་མང་ནས་ཤིང་སྡོང་ཁྱོན་ ༡༢༥ བཙུགས་ཏེ། ༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་ཞལ་པར་བརྟན་པ་དང་༧སྐུའི་ཐུགས་སྐྱེད་དམ་བཅའ་བཞིའི་ནང་གི་ཁོར་ཡུག་སྲུང་སྐྱོབ་ཀྱི་བཀའ་དགོངས་འགྲུབ་པའི་སྨོན་འདུན་འོག འཛམ་གླིང་ནགས་ཚལ་སྲུང་སྐྱོབ་ཉིན་མོ་སྲུང་གཙི་ཞུས་གནང་ཡོད་པ་རེད།
འདི་གའི་གསར་འགོད་པར་ཌལ་ཧོར་ས་འཐུས་བསྟན་འཛིན་བྱམས་ཆེན་ལགས་ཀྱིས། ཁ་སང་ང་ཚོ་ཌལ་ཧོར་ནས་ཅམ་པ་ཕྱོགས་ཀྱི་ཀེ་ལོ་མེ་ཊར་ ༢༥ ཙམ་གྱི་སར་བོད་ཀྱི་སྨན་རྩིས་ཁང་གི་སྨན་པ་བཟོད་པ་ལགས་སྒེར་གྱི་མཐུན་སྦྱོར་འོག ཌལ་ཧོར་ཕུན་ཚོགས་གླིང་གཞིས་ཆགས་ཀྱི་གྲོང་མི་ ༣༠ ཙམ་ནས་འཛམ་གླིང་ནགས་ཚལ་ཉིན་མོ་དང་བསྟུན། ༧གོང་ས་མཆོག་སྐུ་ཚེ་ཡུན་རིང་བརྟན་པ་དང་༧སྐུའི་ཐུགས་སྐྱེད་དམ་བཅའ་བཞིའི་ནང་གི་ཁོར་ཡུག་སྲུང་སྐྱོབ་ཀྱི་དགོངས་དོན་ལེགས་འགྲུབ་ཡོང་སླད། ཤིང་སྡོང་ ༡༢༥ བཙུགས་ཏེ་འཛམ་གླིང་ནགས་ཚལ་ཉིན་མོ་སྲུང་གཙི་ཞུས་ཡོད། ཅེས་བརྗོད་བྱུང་།
འཛམ་གླིང་ནགས་ཚལ་ཉིན་མོ་ནི་ཕྱི་ལོ་ ༡༩༧༡ ཟླ་ ༡༡ པའི་ནང་འཛམ་གླིང་གི་ཟས་རིགས་དང་ཞིང་ལས་ཚོགས་པའི་ལྷན་ཚོགས་ཐེངས་ ༡༦ སྟེང་གཏན་འབེབས་བྱས་ཡོད་ཅིང་། ཕྱི་ལོ་ ༢༠༠༧ ནས་ ༢༠༡༢ བར་རྒྱལ་སྤྱིའི་ནགས་ཚལ་ཞིབ་འཇུག་ལྟེ་གནས་ཁང་གིས་མཉམ་འབྲེལ་རྒྱལ་ཚོགས་དང་མཉམ་འབྲེལ་གྱིས། ནགས་ཚལ་སྲུང་སྐྱོབ་དང་འབྲེལ་བའི་ཚོགས་ཆེན་སྐབས་དྲུག་རིང་བསྡུས་ཏེ། ཕྱི་ལོ་ ༢༠༡༢ ཟླ་ ༡༡ ཚེས་ ༢༨ ཉིན་རྒྱལ་ཚོགས་ཀྱི་ལྷན་ཚོགས་ཐོག་ཕྱི་ཟླ་ ༧ ཚེས་ ༢༡ ཉིན་འཛམ་གླིང་གི་ནགས་ཚལ་ཉིན་མོར་གཏན་འབེབས་བྱས།
གསར་འགོད་པ། སྐལ་བཟང་སྦྱིན་པ།
