ཧི་མ་ཅལ་མངའ་སྡེའི་ཁུ་ནུར་རྫོང་ཁུལ་དུ་ཆར་བ་ཤུགས་ཆེན་བབས་ཏེ་ས་རུད་དང་རྡོ་ཉིལ་གྱི་རང་བྱུང་གོད་ཆག་འོག་མི་རྒྱུ་གཉིས་ལ་དཀའ་ངལ་བཟོས་ཡོད་པ་རེད།
ཁ་སང་རེས་གཟའ་ཉི་མའི་ཉིན་ཧི་མ་ཅལ་མངའ་སྡེའི་ཁུ་ནུར་ ( Kinnaur ) རྫོང་ཁུལ་དུ་ཆར་ཞོད་དྲག་པོ་བབས་པའི་རྐྱེན་གྱིས། སང་ལཱ་( sangla -chitkul ) ལམ་ཆེན་དུ་ས་ནུད་པ་དང་རྦབ་རྡོ་ལྷུང་ནས་མི་ ༩ ཡི་ཚེ་སྲོག་ཤོར་ཡོད་པ་དང་མི་ ༣ ལ་རྨས་སྐྱོན་ཚབས་ཆེན་ཐེབས་ཡོད་པས། ཁུལ་དེར་ཡོད་པའི་ཡུལ་མི་དང་བོད་ཧིན་ས་མཚམས་ཀྱི་དམག་མི་རྣམས་ཀྱིས་རྐྱེན་འདས་སུ་ཕྱིན་པའི་མི་དག་གི་ཕུང་པོ་དབོར་འདྲེན་དང་། རྨས་སྐྱོན་ཐེབས་པའི་མི་དག་སྨན་ཁང་དུ་བསྐྱལ་ནས་མྱུར་སྐྱོབ་བྱས་ཡོད་འདུག
དེའི་ཐད་རྒྱ་གར་གྱི་སྲིད་བློན་མུ་དྷི་ (Narendra modi ) མཆོག་གིས། རྐྱེན་ལམ་དུ་ཕྱིན་པའི་མི་རྣམས་ཀྱི་ཤུལ་ལུས་ནང་མིར་གདུང་སེམས་སྐྱེད་དང་རྨས་སྐྱོན་ཐེབས་པའི་མི་རྣམས་གང་མགྱོགས་དྲག་སྐྱེད་ཡོང་བའི་རེ་སྨོན་ཞུས་པ་དང་འབྲེལ། རྒྱ་གར་སྲིད་བློན་གྱི་ངལ་སེལ་ཐེབས་རྩ་ ( PMNRF ) ནས་རང་བྱུང་གོད་ཆག་དེའི་ཁྲོད་དུ་འདས་གྲོངས་སུ་ཕྱིན་པའི་མི་རྣམས་ཀྱི་ནང་མིར་རོགས་དངུལ་སྒོར་འབུམ་ ༢ རེ་དང་། སྨས་སྐྱོན་ཐེབས་མཁན་ཚོར་སྒོར་ཁྲི་ ༥ རེ་གནང་རྒྱུའི་གསལ་བསྒྲགས་གནང་ཡོད་པ་རེད།
ཧི་མ་ཅལ་མངའ་སྡེའི་སྤྱི་ཁྱན་བློན་ཆེན་ཇའེ་རམ་ཐ་ཀོར་( Jairam Thakur ) ལགས་ཀྱིས། བྲག་རྡོ་ཉིལ་བའི་དོན་རྐྱེན་ཁྲོད་རྐྱེན་འདས་སུ་ཕྱིན་པའི་མི་རྣམས་ཀྱི་ནང་མིར་ཧིན་སྒོར་འབུམ་ ༤ རེ་དང་རྨས་སྐྱོན་ཕོག་པ་རྣམས་ལ་ཧི་མ་ཅལ་མངའ་སྡེ་གཞུང་ནས་རིན་མེད་ངང་སྨན་བཅོས་བྱ་རྒྱུ་ཡིན་སྐོར་དང་། གནོད་སྐྱོན་ཐེབས་ཡུལ་དངོས་ཀྱི་གནས་སྟངས་ལ་རྒྱུས་ལོན་བྱས་ཏེ། དགོས་ངེས་ཅན་གྱི་མི་རྣམས་ལ་མཐུན་རྐྱེན་སྦྱར་རྒྱུ་ཡིན་སྐོར་སོགས་གསུངས་ཡོད་པ་རེད།
རང་བྱུང་གོད་ཆག་ཁྲོད་རྐྱེན་འདས་སུ་ཕྱིན་པའི་ཌི་པག་ཤཱར་མ་ Deepa Sharma) ཞེས་པའི་བུད་མེད་ཅིག་གིས། ཊུ་ཝི་ཊར་སྟེང་རང་ཉིད་ཀྱི་པར་ཞིག་སྤེལ་ཏེ། ད་ལྟ་ང་ལངས་འདུག་ས་འདི་ནི་རྒྱ་གར་མི་མང་འགྲོ་སྐྱོད་ཆོག་སའི་ལམ་གྱི་མཐའ་མ་དེ་ཡིན། འདི་ནས་ཕར་ཀེ་ལོ་མེ་ཊར་ ༨༠ ཙམ་མདུན་སྐྱོད་བྱས་ཚེ། དེ་ནི་ང་ཚོ་དང་བོད་ཀྱི་ས་མཚམས་ཡིན། བོད་དེ་རྒྱ་ནག་གིས་བཙན་བཟུང་བྱས་ཡོད། ཅེས་བཀོད་ཡོད་པ་རེད།
ད་ལོ་རྒྱ་གར་ནང་ཆར་པ་ཤུགས་ཆེན་འབབ་བཞིན་ཡོད་པའི་རྐྱེན་གྱིས། རྒྱ་གར་གྱི་ས་ཕྱོགས་མང་པོར་རི་ཉིལ་བ་དང་ཆུ་ལོག་རྒྱུག་པ་སོགས་ཀྱི་དཀའ་ངལ་འཕྲད་མུས་ཡིན་པ་ལྟར། ད་རེས་བྲག་རྡོ་ཉིལ་ནས་ཁུ་ནུར་གྱི་ཟམ་ཆེན་དེ་གཏོར་ཡོད་པར་བརྟེན། ཁུལ་དེའི་ཡུལ་མི་རྣམས་ལ་འགྲོ་འོང་ཐད་དཀའ་ངལ་འཕྲད་ཀྱི་ཡོད་པ་དང་། ལྷག་པར་ཁུ་ནུར་བརྒྱུད་ནས་ཧི་མ་ཅལ་ནང་དུ་ཡོང་མཁན་ཚོར་ལམ་འགག་པའི་དཀའ་ངལ་འཕྲད་ཀྱི་ཡོད་འདུག
ས་ཉིལ་དང་འབྲེལ་བའི་གནས་ཚུལ་སྐོར་ལ་བརྙན་ཐུང་གཉིས་སྤྱི་ཚོགས་དྲ་ལམ་དུ་ཐོན་པའི་ནང་རྦབ་རྡོ་ཡིས་ལྕགས་ཟམ་དང་། གཞུང་ལམ་གྱི་རླངས་འཁོར་སོགས་གཏོར་བཅོམ་བཏང་བ་དང་། དམག་མི་མང་པོ་ཞིག་གིས་ཕུང་པོ་དང་རྨས་མ་རྣམས་དབོར་འདྲེན་བྱེད་བཞིན་ཡོད་པ་སོགས་མཐོང་རྒྱུ་འདུག
ཁུ་ནུར་རྫོང་ནི་རྒྱ་གར་བྱང་ཕྱོགས་ཀྱི་ཧི་མ་ཅལ་མངའ་སྡེའི་ཁོངས་སུ་གཏོགས་པའི་རྫོང་སྡེ་ཞིག་ཡིན་པ་དང་། དེ་ནི་རྒྱ་གར་ནང་གི་མི་ཆེས་འདུ་སྡོད་ཉུང་སའི་ས་ཆ་ཞིག་ཡིན་པ་རེད་ལ། བོད་དང་ས་འབྲེལ་ཡོད་པའི་རྒྱ་གར་གྱི་རྫོང་ཁུལ་ཞིག་ཀྱང་ཡིན་པ་རེད།
དཔལ་ལྡན།
