ལ་དྭགས་འབྲོག་མིའི་སེམས་ཅན་གྱི་ན་ཚ་ལ་དམིགས་བསལ་བཅོས་ཐབས་མེད་འདུག

ཉེ་ལམ་ལ་དྭགས་འདུད་གཅིག་ཁུལ་གྱི་འབྲོག་མིའི་ར་ལུག་མང་པོར་གློ་བུར་དུ་ན་ཚ་ཞིག་འགོས་ཏེ་ར་ལུག་མང་པོ་སྡེབ་གཅིག་ཏུ་ཤི་ཡོད་པར་བོད་མིའི་སྒྲིག་འཛུགས་ནས་གྱོང་གུད་ཕོག་པའི་འབྲོག་མི་རྣམས་ལ་ངལ་སེལ་རོགས་དངུལ་གནང་ཡོད་འདུག

དེ་རིང་འདི་གའི་གསར་འགོད་པས་ལ་དྭགས་ཀྱི་ཡུལ་མི་སྒྲོལ་མ་ལྷ་མོ་ལགས་སུ་ཁ་པར་བརྒྱུད། ཉེ་སྔོན་ལ་དྭགས་འདུད་གཅིག་ (Duchik) ཁུལ་གྱི་འབྲོག་མིའི་སྒོ་ཕྱུགས་སེམས་ཅན་འཆི་སྐྱོན་གྱི་ད་ལྟའི་གནས་སྟངས་གང་འདྲ་ཡོད་མེད་སྐོར་དྲིས་སྐབས། ད་ལྟའི་ཆར་ལ་དྭགས་བྱང་ཐང་ཁུལ་གྱི་འབྲོག་མིའི་སེམས་ཅན་འཆི་སྐྱོན་གྱི་གནས་སྟངས་ཇེ་ལེགས་སུ་ཕྱིན་ཏེ། སེམས་ཅན་གཟུགས་པོ་ཐང་པོའི་རིགས་དེ་དག་རི་སྒང་ལ་འགྲོ་ཐུབ་པ་དང་སེམས་ཅན་ནད་པ་འགའ་ཤས་རི་གཤམ་དུ་སྡོད་ཀྱི་ཡོད་པ་རེད། ཅེས་བརྗོད་བྱུང་།

ལྷ་མོ་སྒྲོལ་མོ་ལགས་ཀྱིས་གསུངས་པ་ལྟར་ན། ལ་དྭགས་ལུག་ལྟ་སྐྱོང་སྡེ་ཚན་ (Ladakh Sheep Department) ངོས་ནས་ལུག་གི་ཕུང་པོར་བརྟག་དཔྱད་བྱེད་པའི་ཆེད་དུ་ཨོ་ཌི་སའི་བརྟག་དཔྱད་ཁང་དུ་བསྐུར་ནས་ན་ཚ་དེ་ངོས་འཛིན་ཐུབ་ཡོད་པ་དང་། ན་ཚ་དེའི་མིང་ལ་ (Serotype O of Foot and mouth disease) ཟེར་གྱི་ཡོད་ཅིང་། དེ་ལ་དམིགས་བསལ་གྱི་སྨན་བཅོས་གང་ཡང་མེད་པ་རེད་ལ།  ན་ཚ་དེ་འགོས་ནད་ཞིག་ཡིན་པ་དང་ཀེ་ལོ་མེ་ཊར་ ༢༠ ཙམ་གྱི་ནང་ན་ཚ་དེ་འགོས་ཁྱབ་བྱུང་གི་ཡོད་པ་དང་། ད་ལྟའི་ལ་དྭགས་ཀྱི་ལུག་ལྟ་སྐྱོང་གི་སྡེ་ཚན་ངོས་ནས་འགོས་ནད་ཕོག་པའི་ལུག་དེ་དག་ལ་སྨན་བཅོས་བྱེད་བཞིན་ཡོད་འདུག

ཡང་ས་གནས་འབྲོག་མི་ཚོས་བོད་མིའི་སྒྲིག་འཛུགས་ལ་སེམས་ཅན་འཆི་སྐྱོན་གྱི་གནད་དོན་དེའི་སྐོར་ཡར་ཞུ་གནང་ཡོད་སྐོར་ལ་ལྷ་མོ་སྒྲོལ་མ་ལགས་ཀྱིས། ས་གནས་མགོ་འཛིན་ལས་ཁུངས་ནས་ཡུལ་མིའི་སྒོ་ཕྱུགས་མང་པོར་འཆི་སྐྱོན་ཐེབས་པའི་གནད་དོན་བོད་མིའི་སྒྲིག་འཛུགས་ལ་ཞུས་ཡོད་པ་དང་བོད་མིའི་སྒྲིག་འཛུགས་ནང་སྲིད་ལས་ཁུངས་ངོས་ནས་ངལ་སེལ་རོགས་སྐྱོར་གྱི་ཆེད་དུ་སྒོར་འབུམ་གཉིས་ཕུལ་ཡོད་འདུག  ཅེས་བརྗོད་བྱུང་།

དེ་ནས་གསར་འགོད་པས་སྨན་རྩིས་ཁང་གི་སྨན་པ་ཡི་ཤེས་མཁའ་འགྲོ་ལགས་ལ་ན་ཚ་འདི་དང་འབྲེལ་ནས་བོད་སྨན་ཐོག་ནས་སྨན་བཅོས་ཡོད་མེད་སྐོར་དྲིས་པར། ཁོང་གིས། དེའི་ཐོག་ལ་རྒྱུས་མངའ་དམིགས་བསལ་མེད་པ་དང་སྨན་བཅོས་ཡོད་མེད་ཤེས་ཀྱི་མེད། ཅེས་བརྗོད་བྱུང་བ་དང་། ལ་དྭགས་ཀྱི་སྒོ་ཟོག་སེམས་ཅན་ལ་ན་ཚ་འགོས་ཁྱབ་བྱུང་བའི་གནད་དོན་དེ་ཟླ་འདིའི་ཕྱི་ཚེས་ ༤ ནས་བྱུང་མགོ་བརྩམས་ཏེ། ད་བར་དུ་སེམས་ཅན་ ༡༡༠༠ ལྷག་ཙམ་ཤི་ཡོད་འདུག

གསར་འགོད་པ། བསྟན་འཛིན་ཕུར་བུ།