རྒྱ་ནག་གཞུང་གིས་ཨ་རིའི་རྒྱལ་སྲིད་དྲུང་ཆེ་མཆོག་གི་ཐུག་འཕྲད་ལ་སྐྱོན་བརྗོད་བྱས་འདུག

རྒྱ་ནག་གི་ཕྱི་སྲིད་མགྲིན་ཚབ་པ་ཀྲའོ་ལི་ཅེན་ཟེར་བ་དེས་ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken)མཆོག་གིས་ལྡི་ལིའི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་དང་ཐུག་འཕྲད་གནང་བ་དེ་རྒྱ་ནག་གཅིག་གི་སྲིད་ཇུས་ལ་རྡོག་རོལ་བཏང་བ་ཞིག་ཡིན་སྐོར་གྱི་སྐྱོན་བརྗོད་བྱས་ཡོད་འདུག

ཁ་སང་ཕྱི་ཚེས་ ༢༩ ཉིན་གྱི་་རྒྱ་ནག་གཞུང་གི་རྒྱུན་ལྡན་གསར་འགོད་གསལ་བསྒྲགས་སྟེང་། རྒྱ་ནག་གཞུང་གི་མགྲིན་ཚབ་པ་ཀྲའོ་ལི་ཅེན་ཟེར་བ་དེས། རྒྱ་ནག་ངོས་ནས་ཕྱིའི་མགོ་འཁྲིད་དང་ཏཱ་ལའི་བླ་མ་བར་ཐུག་འཕྲད་བྱེད་པ་དེར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན། ཨ་རི་དང་ཏཱ་ལའི་རུ་ཚོགས་དབར་འབྲེལ་གཏུག་བྱེད་པ་དེ། ཨ་རིས་བོད་རང་བཙན་དང་རྒྱ་ནག་ཁ་བྲལ་གཏོང་ཐབས་ལ་རྒྱབ་སྐྱོར་མི་བྱ་རྒྱུའི་ཁས་ལེན་དེ་དང་འགལ་ཡོད། ཨ་རིའི་ཕྱོགས་ནས་རང་གི་དམ་བཅའ་ལ་བརྩི་སྲུང་གིས་བོད་དོན་ཁ་ལ་ཁྱེར་ཏེ་རྒྱ་ནག་གི་ནང་སྲིད་ལ་ཐེ་ཇུས་བྱ་རྒྱུ་མཚམས་འཇོག་དགོས་པ་མ་ཟད། བོད་རང་བཙན་ཤོག་ཁག་གི་རྒྱ་ནག་ཁ་བྲལ་གཏོང་བའི་བྱ་འགུལ་ལ་རྒྱབ་སྐྱོར་མི་བྱ་རྒྱུའི་སྐུལ་མ་བྱེད་ཀྱི་ཡོད། ཅེས་བརྗོད་འདུག་ལ། ཏཱ་ལའི་བླ་མ་སྐུ་ཕྲེང་བཅུ་བཞི་པ་ནི་ཆོས་ལུགས་ཀྱི་མི་སྣ་ཙམ་མིན་པར། ཆབ་སྲིད་ཀྱིི་བཙན་བྱོལ་བ་ཞིག་ཡིན་པའི་ཐོག་ནས་འདས་པའི་དུས་ཡུན་རིང་པོ་ནས་བོད་དེ་རྒྱ་ནག་ནས་ཁ་བྲལ་དུ་གཏོང་ཐབས་བྱེད་ཀྱི་ཡོད་པ་རེད། ཅེས་བརྗོད་ཡོད་འདུག

ཁེ་ཉིན་ཕྱི་ཚེས་ ༢༨ ཉིན་ཨ་རིའི་ཕྱི་སྲིད་དྲུང་ཆེ་བྷི་ལིན་ཀན་མཆོག་རྒྱ་གར་གྱི་རྒྱལ་ས་ལྡི་ལིར་འབྱོར་བ་དང་བསྟུན། ལྡི་ལིའི་སྐུ་ཚབ་དོན་གཅོད་འབྲོང་ཆུང་དངོས་གྲུབ་མཆོག་དང་འཁྱུག་ཙམ་རིང་ཐུག་འཕྲད་གནང་ཡོད་སྐོར་གྱི་གནས་ཚུལ་རུ་ཊར་ (Reuters) གྱིས་མཚོན་པའི་རྒྱལ་སྤྱིའི་གསར་ལམ་ཁག་ཏུ་ཐོན་ཡོད་ཅིང་། ཚོར་ཤུགས་སྐྱེན་པའི་ཆབ་སྲིད་ཀྱི་གནས་ཚུལ་ཞིག་ཡིན་པའི་ཆ་ནས་ད་ལྟའི་ཆར་ཨ་རིའི་གཞུང་དང་བོད་མིའི་སྒྲིག་འཛུགས་ངོས་ནས་ཐུག་འཕྲད་སྐོར་གྱི་གནས་ཚུལ་འགྲེལ་བརྗོད་གནང་གི་མེད་པ་རེད།

ཕྱི་ལོ་ ༢༠༡༦ ལོར་༧གོང་ས་རྒྱལ་བ་རིན་པོ་ཆེ་མཆོག་གིས་ཨ་རིའི་སྲིད་འཛིན་ལས་ཐོག་ཨོ་བྷ་མ་ལ་མཇལ་འཕྲད་གནང་བ་དང་། ཡང་འདས་ལོའི་ཕྱི་ཟླ་ ༡༡ ནང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཨ་རིའི་ཕོ་བྲང་དཀར་པོའི་ནང་ཕེབས་ཏེ་ཨ་རིའི་ཆེས་མཐོའི་མགོ་འཁྲིད་རྣམས་དང་ཐུག་འཕྲད་གནང་བའི་རྗེས། ད་ལན་གྱི་ཐུག་འཕྲད་དེ་ནི་ཆབ་སྲིད་ཀྱི་ཐོག་ནས་གནད་འགག་ཆེན་པོ་ཞིག་ཏུ་ངོས་འཛིན་བྱེད་ཀྱིན་ཡོད་པ་རེད། ད་དུང་ཨ་རིའི་རྒྱལ་སྲིད་དྲུང་ཆེ་བྷི་ལིན་ཀན་མཆོག་གི་རྒྱ་གར་གྱི་འཚམས་གཟིགས་དང་པོ་དེའི་སྐབས། ཆོས་ལུགས་ཀྱི་སྐུ་ཚབ་རྣམ་པའི་ལྷན་འཛོམས་དང་འབྲེལ་ནས་ལྡི་ལི་བོད་ཁང་གི་འགན་འཛིན་དགེ་བཤེས་རྡོ་རྗེ་དགྲ་འདུལ་ལགས་དང་ལྷན་དུའང་ཐུག་འཕྲད་གནང་ཡོད་པ་རེད།

ཐེངས་འདིའི་ཕྱི་སྲིད་དྲུང་ཆེ་མཆོག་གི་རྒྱ་གར་ནང་གི་གཟིགས་སྐོར་དང་ལྡི་ལི་སྐུ་ཚབ་དོན་གཅོད་མཆོག་ལ་ཐུག་འཕྲད་གནང་བ་དེའི་ཐོག་ནས་སྲིད་འཛིན་བྷའེ་ཌིན་གཞུང་ནས་རྒྱ་ནག་ལ་ཁ་གཏད་གཅོག་པའི་སྲིད་ཇུས་མཁྲེགས་པོ་འཛིན་གྱི་ཡོད་པ་གསལ་པོ་ཆགས་ཀྱི་ཡོད་པ་མ་ཟད། ཨ་རིའི་གཞུང་ངོས་ནས་སྔར་བཞིན་བོད་དོན་ལ་རྒྱབ་སྐྱོར་དང་། རྒྱ་དཀར་ནག་གི་རྩོད་རྙོག་རྒྱུན་མཐུད་བཞིན་པའི་སྐབས་འདིར་ཨ་རི་དང་རྒྱ་གར་བར་གྱི་འབྲེལ་བ་དམ་ཟབ་ཏུ་གཏོང་བའི་སྲིད་ཇུས་འཛིན་བཞིན་ཡོད་པ་ཞིག་ཏུ་ངོས་འཛིན་བྱེད་བཞིན་འདུག

འདས་པའི་བདུན་ཕྲག་འགའ་ཤས་ནང་བོད་དོན་དང་འབྲེལ་བའི་གནས་ཚུལ་བསྟུད་མར་བྱུང་བའི་ཁྲོད་ནས། ཟླ་འདིའི་ཕྱི་ཚེས་ ༧ ཉིན་རྒྱ་གར་གྱི་སྲིད་བློན་མོ་དྷི་མཆོག་གིས་སྲིད་བློན་གྱི་ལས་ཡུན་རིང་ཐེངས་དང་པོར་སྐུའི་འཁྲུངས་སྐར་ལ་ཡོངས་ཁྱབ་ཀྱི་ཐོག་ནས་འཚམས་འདྲི་ཞུས་པ་དང་། ཡང་ཟླ་འདིའི་ཕྱི་ཚེས་ ༢༡ ཉིན་རྒྱ་ནག་གི་སྲིད་འཛིན་ཞི་ཅིན་ཕིང་གིས་གསལ་བསྒྲགས་སོགས་གང་ཡང་མེད་པར་བོད་ཀྱི་རྒྱལ་ས་ལྷ་ས་དང་། བོད་འཕགས་ཀྱི་ས་མཚམས་ཉིང་ཁྲིའི་ཁུལ་དུ་སྐོར་སྐྱོད་བྱས་པ་། དེ་བཞིན་ཉེ་ཆར་ཨ་རིའི་ཕྱི་སྲིད་དྲུང་ཆེ་གཞོན་པ་ཝེན་ཌི་ཤེར་མན་ (Wendy Sherman) ལགས་ཀྱིས་རྒྱ་ནག་གི་ཕྱི་སྲིད་བློན་ཆེན་ཝང་དབྱི་དང་ཐུག་འཕྲད་བྱེད་སྐབས་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་གླེང་སློང་གནང་བ་བཅས་ནི། ཆབ་སྲིད་དབྱེ་ཞིབ་པ་རྣམས་ཀྱིས་བོད་དོན་དང་འབྲེལ་བའི་གནས་དོན་གནད་འགག་ཅན་དུ་རྩི་བཞིན་ཡོད་འདུག

གསར་འགོད་པ། པ་སངས་ཚེ་རིང་།