དེ་སྔོན་འབར་མའི་དམག་གཞུང་གིས་ལོ་གཅིག་ཙམ་གྱི་རྗེས་ནས་བསྐྱར་དུ་རྒྱལ་ཡོངས་འོས་བསྡུ་བྱ་རྒྱུ་ཡིན་སྐོར་བཤད་ཡོད་ཀྱང་ད་ལྟ་ཕྱི་ལོ་ ༢༠༢༣ ལོའི་ལོ་མཇུག་བར་དུ་སྲིད་དབང་བཙན་བཟུང་བྱས་ནས་འདུག་རྒྱུ་ཡིན་སྐོར་བསྒྲགས་འདུག
དེ་རིང་རའོ་ཊར་ (Reuter)གསར་ཁང་གིས་གནས་ཚུལ་སྤེལ་བ་ལྟར་ན། འབར་མའི་དམག་དཔོན་མིན་ཨང་ལིན་ (Gen. Min Aung Hlaing)གྱིས། ཁོ་རང་གིས་སྲིད་བློན་གྱི་ལས་འགན་འཁུར་ཏེ་རྒྱལ་ཁབ་ཛ་དྲག་གནས་སྟངས་ལས་སྐྱོབ་ཆེད་ཕྱི་ལོ་ ༢༠༢༣ ཟླ་ ༨ བར་གོ་དབང་རྒྱུན་སྐྱོང་བྱ་རྒྱུ་ཡིན། དེའི་རྗེས་སུ་ཚོགས་སྡེ་ཁག་ནས་འོས་བླུགས་ཆོག་སྐོར་བསྒྲགས་ཡོད་པ་མ་ཟད། ད་ལྟའི་ཆར་འབར་མ་རྒྱལ་ཡོངས་ཀྱི་གནས་སྟངས་ལེགས་པོ་ཆགས་ཡོད་ཀྱང་། དམངས་གཙོ་ཚོགས་པའི་དྲག་སྤྱོད་པ་འགས་འཐབ་རྒོལ་བྱེད་ཀྱི་ཡོད་སྐོར་བརྗོད་འདུག
གཞན་ཡང་། མིན་ཨང་ལིན་གྱིས། ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་མཐུན་ཚོགས་(Association of Southeast Asian Nations) ནས་དམིགས་བསལ་སྐུ་ཚབ་གཏང་བ་ཡིན་ན། དྲག་དམག་གཞུང་ནས་འབར་མའི་ནང་དྲག་སྤྱོད་རིགས་མེད་པ་བཟོས་ཏེ། ངོ་རྒོལ་བ་དང་དམག་མི་གཉིས་དབར་ལ་མཐུན་རྐྱེན་སྦྱར་ནས་དཀའ་ངལ་སེལ་ཐབས་བྱ་རྒྱུ་ཡིན་སྐོར་བརྗོད་འདུག
འདི་ལོའི་ཕྱི་ཟླ་ ༢ ཚེས་༡ ཉིན་འབར་མའི་དྲག་པོའི་དམག་དཔུང་གིས་སྤྱི་མང་ཚོགས་པའི་ལག་ནས་སྲིད་དབང་བཙན་འཕྲོག་བྱས་ཡོད་པ་མ་ཟད། འདས་ལོའི་འབར་མ་རྒྱལ་ཡོངས་ཀྱི་འོས་བསྡུའི་ཁྲོད་དམངས་གཙོ་ཚོགས་པར་རྒྱལ་ཁ་ཐོབ་པའི་གྲུབ་འབྲས་དེ་དྲང་བདེན་མིན་པའི་ནག་ཉེས་བཙུགས་བྱས། དམག་དཔོན་མིན་ཨང་ལིན་གྱིས་སྲིད་བློན་གྱི་གོ་དབང་འཛིན་སྐབས། ལོ་གཅིག་རིང་རྒྱལ་ཁབ་ཛ་དྲག་གནས་སྟངས་ལས་ཐར་རྗེས་འཇིགས་སྣང་མེད་པའི་ཐོག་ནས་ཚོགས་སྡེ་ཁག་སྣ་མང་གི་འོས་འདེམས་མགོ་འཛུགས་བྱ་རྒྱུ་ཡིན་སྐོར་བསྒྲགས་ཡོད་ཀྱང་། སྐད་ཆ་དེ་མི་མང་ལ་མགོ་སྐོར་བཏང་བ་ཙམ་ལས་དོན་འབྲས་མེད་པ་ཞིག་ཏུ་གྱུར་ཡོད་འདུག
ཨ་རིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་བརྗོད་པ་ལྟར་ན། འདི་ལོའི་ཕྱི་ཟླ་ ༢ པའི་ནང་འབར་མའི་དྲག་པོའི་དམག་དཔུང་གིས་སྲིད་དབང་བཙན་བཟུང་བྱས་རྗེས་མི་གྲངས་ ༩༠༠ ཙམ་དམག་མིས་བསད་ཡོད་པ་དང་། དེ་བཞིན་ངོ་རྒོལ་ལས་འགུལ་བ་དང་ཆབ་སྲིད་པ། གསར་འགོད་པ་བཅས་མི་གྲངས་ ༥༣༠༠ ལྷག་འཛིན་བཟུང་བཀག་ཉར་བྱས་པ་ཡོད་པ་དང་༔ མི་གྲངས་ ༦༥ ལ་སྲོག་ཁྲིམས་གཅོད་པའི་ཐག་གཅོད་བྱས་ཡོད་འདུག
གསར་འགོད་པ། བསྟན་འཛིན་ཕུར་བུ།
