བོད་ཉིང་ཁྲིར་རང་ལོ་ ༨ ནས་ ༡༦ བར་གྱི་བྱིས་པ་ཚོར་དམག་སྦྱོང་སྤྲད།

རྒྱ་ནག་གཞུང་གིས་བོད་ཉིང་ཁྲི་ས་ཁུལ་དུ་གངས་ལྗོངས་ཁྲ་ཕྲུག་དམག་དོན་དབྱར་སྒར་ཟེར་བ་བཙུགས་ཏེ་ལྷ་ས་གྲོང་ཁྱེར་གྱི་སློབ་ཆུང་སློབ་མ་གཙོ་བོར་གྱུར་བའི་རང་ལོ་ ༨ ནས་ ༡༦ བར་གྱི་བྱིས་པ་ཚོར་དམག་སྦྱོང་སྤྲད་ཡོད་འདུག

འདི་ལོའི་ལོ་འགོར་རྒྱ་ནག་གཞུང་གིས་བོད་ལྗོངས་རུང་ཧུའུ་རྒྱལ་སྲུང་སློབ་གསོའི་བློ་འདྲི་ཁང་ཟེར་བ་ཞིག་ཆེད་འཛུགས་བྱས་ཏེ། ཉེ་སྔོན་ཕྱི་ཟླ་ ༧ ཚེས་ ༢༦ ཉིན་བོད་ཉིང་ཁྲི་ས་ཁུལ་བྲག་གསུམ་མཚོ་ཁུལ་དུ་གངས་ལྗོངས་ཁྲ་ཕྲུག་དམག་དོན་དབྱར་སྒར་ཞེས་པ་བཙུགས་ཡོད་པ་དང་། དབྱར་ཁའི་དམག་སྦྱོང་དེའི་ནང་ལྷ་ས་གྲོང་ཁྱེར་གྱི་སློབ་ཆུང་རྣམས་གཙོ་བོར་གྱུར་བའི་རང་ལོ་ ༨ ནས་ ༡༦ བར་གྱི་སློབ་ཕྲུག་གྲངས་ ༡༠༠ ལྷག་བསྡུས་ཏེ་བདུན་ཕྲག་གཅིག་ལྷག་ཙམ་རིང་དམག་སྦྱོང་སྤྲད་ཡོད་འདུག་ལ། དམག་སྦྱོང་དེ་ས་བབ་གནམ་གཤིས་ལ་དཔག་པའི་འཆར་ཅན་གྱི་དབྱར་དགུན་སྦྱོང་བརྡར་ཞིག་ཆགས་ཀྱི་ཡོད་འདུག

རྒྱ་ནག་གི་གཞུང་འབྲེལ་གསར་ལམ་དུ་དེའི་སྐོར་གནས་ཚུལ་སྤེལ་བའི་ནང་། ཉེ་བའི་ལོ་ཤས་ནས་བཟུང་དབྱར་ཁའི་གུང་གསེང་དང་བསྟུན་ནས་བྱིས་པ་ཚོའི་དབྱར་ཁའི་གུང་གསེང་ཕུན་སུམ་ཇེ་ཚོགས་སུ་གཏོང་ཆེད་དམག་སྦྱོང་སྤྲོད་བཞིན་ཡོད་པ་དང་། དམག་སྦྱོང་སྤྲོད་མཁན་ཚོར་རྒྱ་ནག་ཀང་ཏུང་སོགས་ཀྱི་རྒྱལ་སྲུང་སློབ་གསོའི་དམག་སྦྱོང་ལྟེ་གནས་སུ་ཕྱིན་ནས་སྦྱོང་བརྡར་བྱས་ཡོད་པ་མ་ཟད། སྒྲིག་ཆས་དང་དམག་སྦྱོང་གི་ནང་དོན་སོགས་བཀོད་འདོམས་བྱས་ཏེ་རྨང་གཞི་བརྟན་པོ་བཞག་ཡོད་སྐོར་དང་། བྱིས་པ་ཚོར་ཆུང་དུས་ནས་རང་ཉིད་ལ་ཡིད་ཆེས་དང་རང་གཅུན། རང་འབད་བཅས་ཀྱི་བློ་སྟོབས་སྦྱོང་བརྡར་བྱེད་ཀྱི་ཡོད་ཚུལ་དང་། ད་དུང་དཀའ་སྡུག་མྱོང་བ་དང་སྒྲིག་ཁྲིམས་སྲུང་བ། བཀའ་སྲུང་དྭང་ལེན་བྱེད་པ་སོགས་ཀྱི་སྤྱོད་ཚུལ་ཆགས་པར་གདམ་ག་ཡག་ཤོས་ཤིག་ཡིན་སྐོར་བཤད་འདུག

དབྱར་ཁའི་དམག་སྦྱོང་དེའི་ནང་ལོ་ཚད་རན་པའི་བྱིས་པ་རྣམས་ངེས་པར་དུ་ཞུགས་དགོས་ཀྱི་ཡོད་འདུག་ལ། དམག་སྦྱོང་སྤྲོད་རིན་ཡང་ལེན་གྱི་ཡོད་ཀྱང་དངུལ་གྱི་གྲངས་ཚད་ཁ་གསལ་མི་འདུག དེའི་སྐོར་ལ་བོད་ཁུལ་གྱི་གཞུང་འབྲེལ་གསར་ལམ་ནང་། ཐེངས་འདིའི་དབྱར་ཁའི་དམག་སྦྱོང་ནང་བྱིས་པ་ཁག་ཅིག་ཁྱིམ་ཚང་གི་ཆ་རྐྱེན་སོགས་ཀྱིས་ཞུགས་ཐུབ་མེད་སྟབས། བྱིས་པ་དེ་ཚོར་དམིགས་བསལ་གྱི་གཟིགས་སྐྱོང་དམག་སྦྱོང་ཟེར་བ་སྤྲོད་པའི་ཐབས་ལམ་སྤྱད་དེ། དམག་སྦྱོང་སྤྲོད་རིན་ཆག་ཡང་གཏོང་རྒྱུ་ཡིན་ཚུལ་བརྗོད་འདུག

འདི་ལོར་བཙུགས་པའི་བོད་ལྗོངས་རུང་ཧུའུ་རྒྱལ་སྲུང་སློབ་གསོའི་བློ་འདྲི་ཁང་ཟེར་བ་དེའི་ནང་དམག་སྒྱུར་ལས་བྱེད་པ་དང་དམག་ཞབས་སོགས་སུ་མི་གྲངས ༡༨ ཡོད་འདུག་ལ། བློ་འདྲི་ཁང་དེའི་དམིགས་ཡུལ་གཙོ་བོ་ནི་གཞོན་ནུ་ལོ་ཆུང་གི་རྒྱལ་གཅེས་འདུ་ཤེས་དང་རྒྱལ་སྲུང་འདུ་ཤེས་ཟེར་བ་མཐོ་རུ་གཏོང་རྒྱུ་དང་། གཞོན་ནུ་ལོ་ཆུང་གི་གཟུགས་པོའི་བྱང་ཚད་མཐོ་རུ་གཏོང་རྒྱུ། དཀའ་སྤྱད་འབད་བརྩོན་གྱི་བསམ་བློ་དང་། མཐུན་སྒྲིལ་འདུ་ཤེས་སོགས་མཐོ་རུ་གཏོང་བ་སོགས་སྤྱི་ཚོགས་ཀྱི་འགན་འཁྲི་དྭང་དུ་ལེན་པའི་བསམ་བློ་ཡར་སྐུལ་སོགས་ཕན་སྐོར་དང་། ལྷག་པར་དུ་སློབ་གྲྭ་དང་ཁྱིམ་བདག་སོགས་ལ་ཞབས་འདེགས་ཞུ་ཐུབ་ཚུལ་སོགས་བསྒྲགས་འདུག

སྤྱིར་བཏང་རྒྱ་ནག་གཞུང་གིས་སློབ་འབྲིང་ཁག་གི་ནང་དུས་ཐུང་དམག་སྦྱོང་སྔོན་ཆད་ནས་སྤྲོད་བཞིན་ཡོད་ཀྱང་། ཕྱི་ལོ་ ༢༠༠༨ ལོའི་རྒྱལ་ཡོངས་ཚོགས་ཆེན་བཅོ་བརྒྱད་པའི་ཐོག་དབྱར་དགུན་གྱི་གཞོན་ནུ་ལོ་ཆུང་གི་གྲ་སྒྲིག་སྦྱོང་བརྡར་དམག་སྒར་ཟེར་བ་ཆེད་འཛུགས་བྱས་ཏེ། ས་གནས་ཀྱི་གནས་བབ་ལ་གཞིགས་པའི་བདུན་ཕྲག་གཅིག་དང་ཟླ་ཕྱེད། ཟླ་གཅིག་སོགས་ལ་རྒྱལ་ཡོངས་ཀྱི་ན་གཞོན་ཁྲི་ ༣༠ ལ་ཉེ་བ་དང་། རང་ལོ་ ༦ ནས་ ༡༧ བར་གྱི་སློབ་གྲྭ་ཆུང་འབྲིང་གི་སློབ་མ་ཁྲི་ ༡༢༥ ཙམ་ལ་དམག་སྦྱོང་དེ་སྤྲོད་ཀྱི་ཡོད་འདུག