དེ་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཕྱི་ལོ་ ༢༠༢༡ ལོའི་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་གྲུབ་གསལ་བསྒྲགས་གནང་བ་ལྟར་ན། འདི་ལོར་བཙན་བྱོལ་བོད་མིའི་སློབ་གྲྭ་ཁག་གི་ནང་དགའ་ལྡན་ཕོ་བྲང་གི་སློབ་ཡོན་གཟེངས་རྟགས་ཐོབ་མཁན་སློབ་མ་ ༡༠ དང་སྲིད་སྐྱོང་གཟེངས་རྟགས་ཐོབ་མཁན་སློབ་མ་ ༢༧ བྱུང་འདུག
འདི་ལོར་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད། བཙན་བྱོལ་བོད་མིའི་སློབ་གྲྭ་ཁག་ ༡༦ གི་སློབ་མ་གྲངས་ ༡༠༦༠ མཉམ་ཞུགས་བྱས་ཏེ། ཡིག་རྒྱུགས་འཕྲོད་པའི་ཆ་སྙོམས་བརྒྱ་ཆ་ ༧༨།༤༡ ཟིན་ཡོད་པ་དང་། བསྐྱར་རྒྱུགས་གཏོང་དགོས་མཁན་སློབ་མ་ ༢ ཡོད་འདུག ཤེས་རིག་ལས་ཁུངས་ཀྱིས་གསལ་བསྒྲགས་གནང་བ་ལྟར་ན། འདི་ལོའི་མ་སུ་རི་བོད་ཁྱིམ་ནས་སློབ་མ་ ༩ དང་སམ་བྷོ་ཊ་མོན་གྷོ་ཊི་ནས་སློབ་མ་ ༡ བཅས་ཁྱོན་སློབ་མ་ ༡༠ ལ་དགའ་ལྡན་ཕོ་བྲང་གི་གཟེངས་རྟགས་ཐོབ་ཡོད་པ་དང་། དེ་བཞིན་མ་སུ་རི་བོད་ཁྱིམ་ནས་སློབ་ཕྲུག་ ༢༡ དང་མོན་གྷོ་སམ་བྷོ་ཊ་ནས་ ༢ ། བོད་ཁྱིམ་གོ་པལ་པུར་དང་སྤིར་སུ་ཇཱ་བོད་ཁྱིམ། དྷ་སྟེང་བོད་ཁྱིམ། སྤེལ་ཀོབ་སམ་བྷོ་ཊ་བཅས་ནས་སློབ་མ་ ༡ རེ་བཅས་ཁྱོན་སློབ་མ་ ༢༧ ལ་སྲིད་སྐྱོང་གཟེངས་རྟགས་ཐོབ་ཡོད་འདུག
འདི་ལོའི་ཟླ་བ་དྲུག་པའི་ནང་ཏོག་དབྱིབས་རིམས་ནད་ཀྱི་ནད་རླབས་གཉིས་པ་ཁྱབ་གདལ་ཤུགས་ཆེན་ཕྱིན་པའི་རྐྱེན་ཀྱིས། རྒྱ་གར་གཞུང་གིས་འཛིན་རིམ་བཅུ་གཉིས་ཀྱི་ཡིག་རྒྱུགས་གཏང་རྒྱུ་མིན་པའི་གསལ་བསྒྲགས་བཏང་བ་ལྟར། འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་དེ། འཛིན་རིམ་བཅུ་པའི་སློབ་ཚན་གསུམ་ནས་བརྒྱ་ཆ་ ༣༠ དང་། འཛིན་རིམ་བཅུ་གཅིག་གི་བརྒྱ་ཆ་ ༣༠། འཛིན་རིམ་བཅུ་གཉིས་ཀྱི་བརྒྱ་ཆ་ ༤༠ བཅས་ཀྱིས་འཐུས་པར་གནང་ཡོད་འདུག
ཕྱི་ལོ་ ༢༠༢༠ ལོར་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ཆེན་མོའི་ནང་བོད་པའི་སློབ་གྲྭ་ཁག་ ༡༦ ནས་སློབ་ཕྲུག་གྲངས་ ༡༠༡༦ འཛུལ་ཞུགས་བྱས་ཏེ། སློབ་ཕྲུག་གྲངས་ ༩༩༨ ཀྱིས་ཡིག་རྒྱུགས་འཕྲོད་ཡོད་པ་མ་ཟད། དགའ་ལྡན་ཕོ་བྲང་གི་བྱ་དགའ་ཐོབ་མཁན་མ་སུ་རི་བོད་ཁྱིམ་ནས་སློབ་ཕྲུག་ ༨ དང་། ཧ་པུར་གཏན་སློབ་ནས་སློབ་མ་གཅིག་བཅས་སློབ་ཕྲུག་ ༩ དང་། སྲིད་སྐྱོང་སློབ་ཡོན་ཐོབ་མཁན་མ་སུ་རི་བོད་ཁྱིམ་ནས་སློབ་ཕྲུག་ ༡༤ དང་། མོན་གྷོ་སམ་བྷོ་ཊ་གཏན་སློབ་ནས་སློབ་ཕྲུག་ ༢ ། སེ་ལ་ཁུ་བོད་ཁྱིམ་ནས་སློབ་ཕྲུག་ ༡ ། སུ་ཇ་བོད་ཁྱིམ་ནས་སློབ་ཕྲུག་ ༡ ། ཧར་སྤ་པུར་གཏན་ཉིན་སློབ་གྲྭ་ནས་སློབ་ཕྲུག་ ༡ བཅས་སློབ་མ་ ༡༩ བྱུང་ཡོད་པ་རེད།
དཔལ་ལྡན།
ཡག་འདི་་་་་་་མུ་མཐུད་ནས་སློབ་མས་ཤུགས་སྐྱོན
འོན་ཀྱང་འདི་ལོའི་སྲིད་སྐྱོང་གཟེངས་རྟགས་སློབ་ཡོན་སྤྲོད་ཐུབ་ཀྱི་མེད་པ་དུས་བབས་གསར་ཁང་གིས་མཁྱེན་ཡོད་དམ།
འདི་ལོའི་ཡིག་རྒྱུགས་ནང་ལེགས་ཐོན་བྱུང་བའི་སློབ་ཕྲུག་ཕོ་མོ་ཡོངས་ལ་འཚམས་འདྲིའི་བཀྲིས་བདེ་ལེགས་དང་། མ་འོངས་སློབ་སྦྱོང་གང་གི་ཐོག་སྦྱང་ཡང་བོད་སྤྱི་བའི་རྩ་དོན་ཐོག་ཕན་ནུས་ཆེན་པོ་ཡོངས་ཐུབ་པའི་སྨོན་ལམ་ཞུ།
Great ?