འདི་ལོར་བཙན་བྱོལ་བོད་མིའི་སློབ་གྲྭ་ཁག་གི་ནང་འཛིན་རིམ་བཅུ་པའི་སྲིད་སྐྱོང་གི་གཟེངས་རྟགས་ཐོབ་མཁན་མ་སུ་རི་བོད་ཁྱིམ་ནས་སློབ་མ་ ༤ དང་སྦེལ་ཀོབ་སམ་བྷོ་ཊ་ནས་ ༢ བཅས་བོད་རིགས་སློབ་མ་ ༦ བྱུང་ཡོད་འདུག
དབུས་བོད་མིའི་སྒྲིག་འཛུགས་ནས་ཕྱི་ལོ་ ༢༠༢༡ ལོའི་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་གྲུབ་འབྲས་གསལ་བསྒྲགས་གནང་བ་ལྟར་ན། འདི་ལོར་རྒྱ་གར་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་ཁྲོད་བཙན་བྱོལ་བོད་མིའི་སློབ་གྲྭ་ཁག་ ༢༧ གྱི་སློབ་མ་གྲངས་ ༡༢༢༦ མཉམ་ཞུགས་བྱས་ཏེ། ཡིག་རྒྱུགས་འཕྲོད་པའི་བརྒྱ་ཆ་ ༦༢། ༨༧ ཟིན་ཡོད་པ་རེད། དེ་བཞིན་སློབ་གྲྭ་ཁག་ ༡༠ ཡི་སློབ་མ་གྲངས་ ༢༩ ཡིས་བརྒྱ་ཆ་ ༩༠ དང་དགུ་བཅུ་ལས་ཡན་བླངས་ཡོད་པ་དང་། སློབ་མ་གྲངས་ ༡༠ ཡིས་བརྒྱ་ཆ་ ༩༥ དང་གོ་ལྔའི་ཡན་བླངས་ཡོད་པའི་ཁྲོད་ནས་མ་སུ་རི་བོད་ཁྱིམ་གྱི་བོད་རིགས་སློབ་མ་ ༤ དང་སྦེལ་ཀོབ་སམ་བྷོ་ཊའི་བོད་རིགས་སློབ་མ་ ༢ བཅས་ཁྱོན་སློབ་མ་ ༦ ལ་སྲིད་སྐྱོང་གཟེངས་རྟགས་ཐོབ་ཡོད་པ་རེད།
འདི་ལོར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་ཕྱིན་པའི་རྐྱེན་གྱིས། ལོ་འཆར་ཅན་ལྟར་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་པ་དང་བཅུ་གཉིས་ཀྱི་ཡིག་རྒྱུགས་དངོས་སུ་བཏང་ཐུབ་མེད་པ་རེད། འདི་ལོའི་འཛིན་རིམ་བཅུ་པའི་ཡིག་རྒྱུགས་ཀྱི་གྲུབ་འབྲས་དེ། རྒྱ་གར་ཤེས་ཡོོན་ལྷན་ཁང་གི་ལམ་སྟོན་འོག འཛིན་བཅུ་པའི་ཡིག་ཚད་ཁག་ལས་བརྒྱ་ཆ་ ༡༠། ལོ་ཕྱེད་ཀྱི་ཡིག་རྒྱུགས་ནས་བརྒྱ་ཆ་ ༣༠། འཛིན་རིམ་བཅུ་པའི་རྒྱལ་ཡོངས་ཀྱི་སྔོན་འགྲོའི་ཡིག་རྒྱུགས་ནས་བརྒྱ་ཆ་ ༤༠ དང་། ནང་ལས་སོགས་ཀྱི་བརྒྱ་ཆ་ ༢༠ ཡིས་འཐུས་པར་བྱས་ཡོད་པ་རེད།
སྤྱི་ལོ་ ༢༠༢༠ ལོར་རྒྱ་གར་རྒྱལ་ཡོངས་འཛིན་རིམ་བཅུ་པའི་ཡིག་རྒྱུགས་ནང་བོད་པའི་སློབ་གྲྭ་ཁག ༢༧ གྱི་སློབ་མ་གྲངས་ ༡༡༥༤ ཡིས་འཛུལ་ཞུགས་བྱས་ཏེ། སློབ་མ་གྲངས་ ༡༠༨༡ གིས་ཡིག་རྒྱུགས་འཕྲོད་ཡོད་པ་དང་། ཡིག་རྒྱུགས་འཕྲོད་པའི་བརྒྱ་ཆ་ ༩༣ ། ༦༧ ཡིན་འདུག ༢༠༢༠ དང་ ༢༠༢༡ གཉིས་བསྡུར་ན་འདི་ལོར་རྒྱུགས་ཞུགས་སློབ་མ་ཅུང་མང་བ་ཡོད་པ་དང་། འདི་ལོར་བརྒྱ་ཆ་ ༩༠ དང་དེའི་བརྒལ་བ་ལེན་མཁན་སློབ་མ་བཅུ་ཇེ་མང་དུ་ཕྱིན་ཡོད་འདུག
འདི་ལོར་འཛིན་རིམ་ ༡༢ པའི་ནང་སྲིད་སྐྱོང་གཟེངས་རྟགས་ཐོབ་མཁན་སློབ་མ་ ༢༧ དང་འཛིན་རིམ་བཅུ་པའི་ནང་སྲིད་སྐྱོང་གཟེངས་རྟགས་ཐོབ་མཁན་སློབ་མ་ ༦ བཅས་སྲིད་སྐྱོང་གཟེངས་རྟགས་ཐོབ་མཁན་མང་ཤོས་ཆགས་ཡོད་པ་དང་། སྤྱི་ཚོགས་ནང་སྲིད་སྐྱོང་གཟེངས་རྟགས་ཐོབ་མཁན་རྣམས་ལ་སྔར་རྒྱུན་ལྟར་གཟེངས་རྟགས་གནང་རྒྱུ་མིན་ཐོག་གླེང་སློང་བྱེད་མཁན་གང་ཙམ་ཡོད་སྟབས། ཁ་སང་བོད་མིའི་སྒྲིག་འཛུགས་ཀྱི་གསར་འགོད་ལྷན་ཚོགས་ཐོག་སྲིད་སྐྱོང་མཆོག་གིས། སྲིད་སྐྱོང་གཟེངས་རྟགས་ཆེད་ད་ལྟའི་ཆར་སྔོན་རྩིས་བཀའ་འཁྲོལ་འབུམ་ ༡༠ ཡས་མས་མ་གཏོགས་མེད་ཀྱང་། སྒྲིག་གཞི་གཞིར་བཟུང་སློབ་མ་རེར་ཧིན་སྒོར་འབུམ་གཅིག་རེ་སྤྲོད་དགོས་ཀྱི་ཡོད་སྟབས་འདང་གི་མེད་པ་རེད། དེར་བརྟེན་རོགས་ཚོགས་གསར་པ་དེ་འདྲ་རག་གི་ཡོད་ན། སྔོན་རྩིས་བཀའ་འཁྲོལ་གྱི་སྒྲིག་གཞི་དོན་ཚན་ ༧ པའི་ལྔ་པ་གཞིར་བཟུང་བཀའ་འཁྲོལ་ཞུ་རྒྱུ་ཡོད་པ་རེད། དེར་བརྟེན་ད་ལྟའི་ཆར་ཁྲིམས་སྒྲིག་དང་མཐུན་གྱི་ཡོད་ན་མ་དངུལ་འབུམ་ ༡༠ ཡས་མས་ཡོད་པ་དེ་སློབ་ཕྲུག་རྣམས་ལ་བགོ་བཤའ་བརྒྱབ་རྒྱུ་དང་། གལ་ཏེ་དེ་ལྟར་མེད་ཚེ་གྲོས་ཚོགས་མ་འཚོག་བར་དུ་སྒུག་སྟེ་གཟེངས་ཐོན་སློབ་མ་རྣམས་ལ་གཟེངས་རྟགས་འབུལ་འཆར་ཡོད་སྐོར་གསུངས་སོང་།
དཔལ་ལྡན།
སྲིད་ཟུར་མེད་ན་ཚར་རེད།