ལྡི་ལི་སྐུ་ཚབ་དོན་གཅོད་མཆོག་གིས་ཨ་རིའི་གཞུང་ཚབ་མཆོག་ལ་ཐུག་འཕྲད་གནང་།

ཨ་རིའི་གཞུང་ཚབ་གསར་བས་བཀའ་ཟུར་འབྲོང་ཆུང་དངོས་གྲུབ་མཆོག་ནས་ཉེ་ལམ་ཨ་རིའི་རྒྱལ་སྲིད་དྲུང་ཆེ་དང་ཐུག་འཕྲད་གནང་བར་དགའ་མོས་དང་སྦྲགས་ཨ་རིའི་གཞུང་མང་གཉིས་ནས་མུ་མཐུད་བོད་དོན་ལ་རྒྱབ་སྐྱོར་གནང་རྒྱུ་ཡིན་པ་ནན་བརྗོད་བྱས་ཡོད་པ་རེད།

ཁ་སང་ཉིན་རྒྱབ་ཆུ་ཚོད་ ༡༢ ཙམ་ལ་ལྡི་ལིའི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་རྒྱ་གར་རྒྱལ་ས་ལྡི་ལིར་ཡོད་པའི་ཨ་རིའི་གཞུང་ཚབ་ཁང་དུ། ཨ་རིའི་གཞུང་ཚབ་གསར་པ་སྐུ་ཞབས་ཨ་ཏུལ་ཀེ་ཤེབ་(Atul Keshab) མཆོག་ལ་ཐུག་འཕྲད་གནང་ཡོད་པ་དང་། སྐབས་དེར་ཨ་རིའི་གཞུང་ཚབ་ངོས་ནས་ཨ་རིའི་གཞུང་དམངས་གཉིས་ཀྱིས་མུ་མཐུད་བོད་མིར་རྒྱབ་སྐྱོར་དང་རོགས་རམ་གནང་ངེས་ཡིན་སྐོར་གསུངས་ཡོད་འདུག

འདི་གའི་གསར་འགོད་པས་ཞལ་པར་བརྒྱུད་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཐུག་འཕྲད་སྐབས་སུ་ཨ་རིའི་གཞུང་ཚབ་གསར་པའི་ངོས་ནས་བཀའ་མོལ་ཅི་གནང་ཡོད་སྐོར་ནས་བཀའ་འདྲི་ཞུས་པར་ཁོང་གིས། ཨ་རིའི་གཞུང་ཚབ་ཁོང་རང་གསར་པ་རེད། ཁ་སང་ཨ་རིའི་ཕྱི་སྲིད་དྲུང་ཆེ་རྒྱ་གར་ལ་འཚམས་གཟིགས་ཕེབས་པའི་སྒང་ལ་ངེད་གཉིས་མཇལ་བ་རེད་ལ། བཀའ་མོལ་ཡང་བྱུང་བ་རེད། དུས་རྒྱུན་ཨ་རིའི་གཞུང་ཚབ་དང་ང་ཚོའི་དབར་འབྲེལ་བ་ཡག་པོ་རེད། ཁོང་རང་གཞུང་ཚབ་གསར་བ་ཡིན་སྟབས་ཁ་སང་དྲུང་ཆེ་མངགས་ཏེ་འཚམས་ཤོག་ཅིག་ཕུལ་ཏེ་ཡར་སྙན་སེང་ཞུས་པ་རེད། དེ་ནས་ཁོང་རང་དེ་སྔ་ནས་བོད་པའི་ཐོག་ཐུགས་རྒྱུས་ཡོད་དེ་འདྲ་རེད་འདུག

ཁ་སང་ཆུ་ཚོད་ ༡༢།༣༠ ནས་ ༡།༣༠ བར་ཕལ་ཆེར་ཆུ་ཚོད་གཅིག་ཙམ་རིང་མཇལ་འཕྲད་ལྷོད་པོ་དང་ལྷུག་པོ་བྱུང་སོང་། སྐབས་དེར་ཁོང་གིས་ང་ལ། ཁ་སང་སྔོན་མ་ཁྱེད་རང་གིས་ཕྱི་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinks)དང་ཐུག་འཕྲད་བྱས་པ་ཡག་པོ་ཞེ་དྲགས་བྱུང་སོང་། ཕྱི་སྲིད་དྲུང་ཆེ་ལ་༧སྐྱབས་མགོན་པོ་རིན་པོ་ཆེའི་མཇལ་དར་དང་བཀའ་ཡིག་སོགས་གསོལ་རས་གནང་བ་དེར་ཧ་ཅང་དགའ་པོ་བྱུང་འདུག་གསུངས་བྱུང་། དེ་དང་མཉམ་དུ་ཨ་རིའི་མི་མང་དང་། ཨ་རིའི་གཞུང་། ལྷག་པར་དུ་ཨ་རིའི་གྲོས་ཚོགས་གོང་འོག་གཉིས་ཀས་མུ་མཐུད་ནས་བོད་པའི་ཐོག་ལ་རྒྱབ་སྐྱོར་ཞུ་རྒྱུ་ཡིན། ཞེས་གསུངས་སོང་།

དེ་བཞིན་ཁོང་གིས་འགྲེལ་བརྗོད་གནང་བ་ལྟར་ན། ད་ཐེངས་ཀྱི་ཐུག་འཕྲད་དེ་ཨ་རིའི་གཞུང་ཚབ་ཁང་གི་ལས་ཁུངས་སུ་བྱུང་ཡོད་པ་དང་། ཐུག་འཕྲད་ཆེད་དོན་གཅོད་མཆོག་དང་དྲུང་ཆེ་རྣམ་གཉིས་བཅར་ཡོད་ཅིང་། དོན་གཅོད་མཆོག་ནས་ཨ་རིའི་གཞུང་ཚབ་ཆེན་མོར་འཚམས་འདྲི་དང་སྦྲགས། བོད་པའི་གནས་སྟངས་སྤྱི་དང་། ཨ་རི་དང་རྒྱ་ནག དེ་བཞིན་རྒྱ་གར་བཅས་ཀྱི་གནས་སྟངས་སྐོར་དང་། གཞན་ཡང་ཉེ་ཆར་རྒྱ་ནག་དམར་ཤོག་ཚོགས་པའི་མགོ་ཁྲིད་ཞི་ཅིན་ཕིན་བོད་ལ་ཕེབས་པ་སོགས་ཀྱི་སྐོར་ནས་བཀའ་མོལ་གནང་ཡོད་པ་དང་། ལྷག་པར་དུ་དོན་གཅོད་མཆོག་གིས་ཨ་རིའི་གཞུང་ངོས་ནས་བལ་ཡུལ་ནང་ཡོད་པའི་བོད་མི་ཚོར་རོགས་རམ་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་འབྲེལ། བལ་ཡུལ་ནང་གི་བོད་མི་ཚོའི་གནས་སྟངས་སྐོར་ནས་གླེང་སློང་ཡུན་རིང་གནང་ཐུབ་ཡོད་འདུག

ཁ་སང་ཨ་རིའི་གཞུང་ཚབ་ཆེན་མོས་རང་གིི་ཊུ་ཝི་ཊར་དྲ་ལམ་སྟེང་ལྡི་ལིའི་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་དང་ལྷན་དུ་བསྒྲོན་པའི་སྐུ་པར་ཞིག་སྤེལ་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་འབྲོང་ཆུང་དངོས་གྲུབ་ལགས་དང་ཐུག་འཕྲད་བྱུང་བར་དགའ་པོ་བྱུང་། ཨ་རིའི་ངོས་ནས་ཆོས་དད་རང་དབང་དང་བོད་མིའི་ཐུན་མོང་མ་ཡིན་པའི་རིག་གཞུང་དང་སྐད་ཡིག་གི་ངོ་བོ་བཅས་པར་ཉར་ཚགས་བྱ་རྒྱུ་དང་། ༧གོང་ས་མཆོག་གི་མིའི་རིགས་ཀུན་ལ་ཐོབ་ཐང་འདྲ་མཉམ་དགོས་པའི་དགོངས་བཞེད་ལ་རྒྱབ་སྐྱོར་བྱེད་ཀྱི་ཡོད། ཅེས་བཀོད་གནང་ཡོད་འདུག

གསར་འགོད་པ། པ་སངས་ཚེ་རིང་།