བོད་ཀྱི་ཟློས་གར་ཚོགས་པའི་ཚོགས་ཁང་དུ་རྒྱ་ལུ་རུ་ཁག་དང་རྔོན་པ་རུ་ཁག་གཉིས་ནས་འདི་ལོའི་དབྱར་སྐྱིད་ཀྱི་གཞས་སྣ་འགྲན་སྡུར་བྱས་ཏེ་རྔོན་པ་རུ་ཁག་ལ་རྒྱལ་ཁ་ཐོབ་ཡོད་འདུག
ཁ་སང་རེས་གཟའ་ལྷག་པའི་ཉིན་དྷ་རམ་ས་ལར་ཡོད་པའི་བོད་ཀྱི་ཟློས་གར་ཚོགས་པ་བཙུགས་ནས་མི་ལོ་ ༦༢ འཁོར་བའི་རྗེས་དྲན་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱིང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་ཨ་རུ་ཎ་ཅལ་མངའ་སྡེའི་ཆོས་རིག་ལྷན་ཁང་གི་དབུ་འཛིན་འཇམ་དཔལ་དབང་འདུས་ལགས། དེ་བཞིན་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་ཁྲིམས་ཞིབ་པ་གཞན་གཉིས། དེ་བཞིན་རང་དབང་ཅན་གྱི་ལས་ཁུངས་ཁག་གི་འགན་འཛིན་དང་ལྷན་ཁང་ཁག་ཅིག་དྲུང་ཆེ་རྣམ་པ་སོགས་ལྷན་འཛོམས་ཐོག བོད་ཀྱི་ཟློས་གར་ཁང་གི་རྒྱ་ལུ་རུ་ཁག་དང་། རྔོན་པ་རུ་ཁག་གཉིས་ཀྱི་བར་རྐྱང་གཞས་དང་། འཁྲབ་གཞས། མཉམ་གཞས་བཅས་ཀྱི་འགྲན་སྡུར་གནང་སྟེ་རྔོན་པའི་རུ་ཁག་ལ་༢༠༢༡ ལོའི་རྐང་བྲོ་གླུ་གཞས་ཀྱི་རྒྱལ་ཁ་ཐོབ་ཡོད་འདུག
སྐབས་དེར་དམིགས་བསལ་སྐུ་མགྲོན་འཇམ་དཔལ་དབང་འདུས་ལགས་ཀྱིས། ཨ་རུ་ཎ་ཅལ་གྱི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་གནང་བའི་འཚམས་འདྲིའི་ཡི་གེ་སྒྲོགས་སྦྱང་གནང་བའི་ནང་། ཉེ་ཆར་བོད་ཀྱི་ཟློས་གར་ཁང་དུ་མོན་གྱི་སློབ་མ་མང་པོ་ཞིག་ལ་མོན་གྱི་རིག་གཞུང་མི་ཉམས་སླད་དུ་ཟླ་བ་གསུམ་གྱི་རིང་གླུ་གར་དང་རོལ་མོ་སོགས་ཟབ་སྦྱོང་སྤྲོད་ཀྱི་ཡོད་པར། ང་ཚོས་གོ་སྐབས་བཟང་པོ་ཞིག་ལ་བརྩི་ཡི་ཡོད་པ་དང་། མོན་གྱི་མི་མང་ཚོས་ཀྱང་དེར་བསྔགས་བརྗོད་དང་དགའ་མོས་བྱེད་ཀྱི་ཡོད་པ་རེད། དེ་བཞིན་ཉེ་ལམ་སྲིད་སྐྱོང་སྤེན་པ་ཚེ་རིང་མཆོག་ལ་མཇལ་འཕྲད་སྐབས། ཁོང་གིས་མུ་མཐུད་དུ་ང་ཚོར་རྒྱབ་སྐྱོར་གནང་རྒྱུ་ཞལ་བཞེས་ཐོབ་པར། ངས་ཨ་རུ་ཎ་ཅལ་གྱི་མི་མང་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་ཞུས་པ་ཡིན། ཞེས་སོགས་གསུངས་ཡོད་པ་རེད།
དེའི་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ཀྱི་ཟློས་གར་ཚོགས་པའི་རྩ་འཛིན་བསླབ་གཞི་དེབ་ཕྲེང་གསུམ་དང་ཆོས་རྒྱལ་ཁྲི་རལ་བ་ཅན་གྱི་མཛད་རྣམ་འཁྲབ་གཞུང་གི་དཔེ་དེབ་ཅིག་དབུ་འབྱེད་གནང་བ་དང་། དེ་བཞིན་རྔོན་པའི་རུ་ཁག་ལ་རྒྱལ་ཁ་ཐོབ་པར་བྱ་དགའ་གནང་ཡོད་པ་དང་སྦྲགས། བོད་དང་ཧི་མ་ལ་ཡའི་ཆོས་རིག་དང་། སྨན་གཞུང་སོགས་ལ་འབྲེལ་བ་དམ་ཟབ་ཡོད་པ་དང་འབྲེལ་ལམ་གསར་དུ་འཛུགས་རྒྱུའི་གནས་སྟངས་ཀྱང་མང་པོ་ཞིག་ཆགས་ཡོད་པ་རེད། ལྷག་པར་༧ སྤྱི་ནོར་༧གོང་ས་མཆོག་དང་རིས་མེད་ཆོས་བརྒྱུད་ཁག་གི་བླ་ཆེན་རྣམས་ཀྱི་བཀའ་དྲིན་ལས། བྱེས་ཀྱི་བོད་དགོན་མང་པོ་ཞིག་ལ་ཧི་མ་ལ་ཡའི་གྲྭ་བཙུན་མང་པོ་ཞིག་ལ་བསླབ་པ་སློབ་གཉེར་གྱི་གོ་སྐབས་ཐོབ་ཀྱི་ཡོད་པ་ལྟར། ཚང་མས་མགོན་པོ་གང་གི་བཀའ་དྲིན་དྲན་དགོས་སྐོར་གསུངས་འདུག
ཡང་སྲིད་སྐྱོང་མཆོག་གིས། གྲོས་ཚོགས་འཚོགས་མ་ཐུབ་པའི་རྐྱེན་གྱིས་རྒྱལ་སྤྱིའི་མཐུན་ཕྱོགས་རྒྱལ་ཁབ་མང་དག་ཅིག་གིས་སེམས་འཚབ་གནང་བཞིན་ཡོད་པ་དང་། གཞིས་བཞུགས་བོད་མི་ཚོས་ཀྱང་སེམས་འཚབ་ཆེན་པོ་བྱེད་ཀྱི་འདུག རྒྱ་ནག་གཞུང་གི་ངོས་ནས་གནས་སྟངས་འདི་དག་གཞི་ལ་བཞག་ནས་བེད་སྤྱོད་ལོག་པ་གཏོང་མུས་ཡིན་པ་རེད། དེ་བཞིན་ང་ཚོར་ལུང་པ་མེད་པ་དང་། ས་ལག་མཐིལ་ཙམ་ཡང་མེད་ཀྱང་། ང་ཚོས་ཕན་ཚུན་མ་མཐུན་པར་ནང་འཁྲུག་བྱེད་མུས་ཡིན་པ་མ་ཟད། ང་ཚོའི་ཁ་གཏད་ཀྱི་དགྲ་བོ་ནི་རྒྱ་ནག་ཆགས་བསྡད་ཡོད་པ་རེད། གནས་སྟངས་དེ་འདྲ་ཞིག་གི་སྐབས་སུ་ང་ཚོས་སྔར་ལས་ལྷག་པའི་གོང་བུ་གཅིག་ཏུ་སྒྲིལ་དགོས་ཀྱང་། འདི་འདྲའི་གནས་སྟངས་ཤིག་གི་འོག་ཏུ་ལྷུང་ཡོད་པས་ང་ཚོར་སེམས་ཚབས་ཡོད། ཅེས་སོགས་གསུངས་འདུག
དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
