བོད་སྐྱེ་རྒུ་མདོ་ཁུལ་ནས་ཉེན་རྟོག་པས་བོད་མི་རིག་གྲགས་ཞེས་པ་ཞིག་འབྲི་ཆུའི་ནང་གཡུགས་པ་དང་ཤེས་རབ་རྒྱ་མཚོ་ཞེས་པར་མེ་མདའ་བརྒྱབས་ནས་རྨས་སྐྱོན་ཆེན་པོ་བཟོས་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་གནས་ཚུལ་ཁུངས་ལྡན་འབྱོར་བ་ལྟར་ན། ཁ་སང་ཕྱི་ཚེས་༡༥་ཉིན་བོད་ནང་གི་ཉིན་རྒྱབ་ཆུ་ཚོད་༣་པ་ཡས་མས་སུ། བོད་མི་ཤེས་རབ་རྒྱ་མཚོ་དང་། ཁོང་གི་རོགས་པ་རིག་གྲགས་དང་མགུར་སྐྱབས་གསུམ་སྐྱེ་རྒུ་མདོ་ཁུལ་ཐོག་ནས་སྡོམ་མདར་ཡོང་བའི་ལམ་བར་དུ། ཉེན་རྟོག་རླངས་འཁོར་ཨང་གྲངས་སོགས་གང་ཡང་མེད་པའི་མི་བཞི་ཡིས། རླངས་འཁོར་བཀག་སྟེ་བོད་མི་གཅིག་འབྲི་ཆུའི་ནང་དུ་གཡུགས་ཡོད་པ་དང་བོད་མི་གཅིག་ལ་མེ་མདའ་བརྒྱབ་ནས་ད་ལྟ་ཛ་དྲག་ངང་སྨན་ཁང་དུ་བསྐྱལ་ཡོད་འདུག
སྒྲུབ་བརྒྱུད་གྲོང་ཚོ་ཞེས་པ་ནས་སྤྱི་ལེ་ ༦༠ ཡས་མས་ཀྱི་མཚམས་སུ་རླངས་འཁོར་མང་པོ་བཀག་ནས་བསྡད་ཡོད་པ་དང་། ཤེས་རབ་རྒྱ་མཚོ་རླངས་འཁོར་ནས་བབས་ཏེ་ལྟ་རུ་ཕྱིན་སྐབས། རླངས་འཁོར་རྣམས་བང་བསྒྲིགས་ཏུ་བཅུག་ནས་སྔོག་བཤེར་བྱེད་བཞིན་ཡོད་པ་དང་། ཅུང་མ་འགོར་བར་མི་གསུམ་ཡོང་སྟེ། ཤེས་རབ་རྒྱ་མཚོའི་རླངས་འཁོར་ལ་སྔོག་བཤེར་བྱེད་སྐབས། རིག་གྲགས་ཀྱིས་ངེད་གཉིས་ཀྱི་རླངས་འཁོར་ནང་དུ་གང་ཡང་མེད། ག་རེ་བྱས་ནས་སྔོག་བཤེར་བྱེད་བཞིན་ཡོད། ཁྱེད་རང་ཚོ་ལས་ཁུངས་ག་བར་ནས་ཡིན་ཞེས་སྐད་ཆ་འདྲི་སྐབས། ཁྱེད་རང་ཁ་བཙུམ་ནས་བསྡད་ན་ཡག་གི་རེད་ཅེས་རིག་གྲགས་ལ་སྡིགས་ར་བཏང་བ་མ་ཟད། འབུད་རྒྱག་ཤུགས་ཆེན་བཏང་སྟེ་རིག་གྲགས་གཡང་ནས་ཟེགས་ཏེ་འབྲི་ཆུའི་ནང་ལྷུང་ཡོད་པ་དང་། ཤེས་རབ་རྒྱ་མཚོ་ཁོང་ཁྲོ་ཆེན་པོ་ལངས་ནས་ཉེན་རྟོག་པའི་ཐོག་ལ་རྒྱུག་སྐབས། ཉེན་རྟོག་པ་ཞིག་གིས་ཤེས་རབ་རྒྱ་མཚོ་ལ་མེ་མདའ་གཞུས་ཏེ་རྨས་སྐྱོན་ཆེན་པོ་བཟོས་ཡོད་འདུག
དེ་མ་ཐག་འགྲུལ་བ་སོགས་མི་མང་པོ་བསླེབས་ནས་བར་ཕྱེས་ཏེ། མགྱོགས་པོར་ཤེས་རབ་རྒྱ་མཚོ་སྨན་ཁང་དུ་ཁྲིད་དེ་ཛ་དྲག་སྨན་བཅོས་བྱེད་བཞིན་ཡོད་པ་དང་སྲོག་ཉེན་ལས་ཐར་ཙམ་བྱུང་འདུག དོན་རྐྱེན་བྱུང་མ་ཐག་འབྲི་ཆུའི་རྒྱུད་དུ་རིག་གྲགས་ཀྱི་ཕུང་པོ་བཙལ་བར་སོང་ཡོད་ཀྱང་རྙེད་སོན་བྱུང་མེད་འདུག
འདི་གའི་གནས་ཚུལ་མཁོ་སྤྲོད་པས། ད་ལན་མེ་མདའ་རྒྱག་མཁན་ཉེན་རྟོག་པའི་རླངས་འཁོར་དེར་ཨང་གྲངས་སོགས་གང་ཡང་མེད་པ་དང་། མེ་མདའ་རྒྱག་མཁན་ལའང་ཉེན་རྟོག་པའི་འགྲིག་ཆས་དང་ལག་ཁྱེར་སོགས་མེད་མཁན་དེ་འདྲ་ཡིན་སྐོར་བརྗོད་བྱུང་ལ། དེ་བཞིན་སྔོན་དང་མ་འདྲ་བར་ཟླ་གཉིས་གསུམ་རིང་མཚོ་སྔོན་གྱི་སྐྱེ་རྒུ་མདོ་ཁུལ་སོགས་སུ་དམག་མི་དང་ཉེན་རྟོག་པ་མང་པོ་འགྲེམ་འཇོག་བྱས་ནས་སྔོག་བཤེར་ས་ཚུགས་མང་པོ་གསར་འཛུགས་དང་། བོད་མི་རྣམས་ལ་སྔར་ལས་སྡང་ཟུག་ཆེན་པོ་བྱེད་བཞིན་ཡོད་འདུག
རིག་གྲགས་ནི་ཁྲིན་འདུ་རྫོང་ནས་ཡིན་ཞིང་རང་ལོ་༥༠ལྷག ཡིན་པ་དང་། བཟའ་ཟླའི་མིང་ལ་བཟང་མོ་དང་ཤུལ་དུ་བུ་མོ་གཉིས་ཡོད་འདུག ཤེས་རབ་རྒྱ་མཚོ་ནི་ཕ་ཡུལ་སྡོམ་མདའ་དར་དམར་སྡེ་བ་ནས་ཡིན་པ་དང་ལོ་ ༢༦ ཡིན པ་དང་། ཁོང་གི་ཕ་མིང་ལ་ཀརྨ་དང་ཨ་མའི་མིང་ལ་ཚེ་ལྷ་ཡིན་ཟེར་གྱིན་ཡོད་པ་དང་། ནང་མི་ལྔ་ཡོད་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
