ཆབ་མདོ་ངག་ཕུན།
དེ་རིང་ངས་བཤད་འདོད་པ་ནི་དེང་སྐབས་རྒྱ་དམར་སྲིད་གཞུང་བཙུགས་ནས་ལོ་བརྒྱ་འཁོར་ཚུལ་ཟེར་བ་དང་། བོད་ལ་ཞི་བའི་བཅིངས་དགྲོལ་བཏང་ནས་ལོ་ངོ་བདུན་ཅུ་འཁོར་ཟེར་བ་སོགས་ཀྱིས་བོད་ཀྱི་ས་ཁུལ་གང་སར་རྒྱ་དམར་སྲིད་གཞུང་ལ་བསྟོད་གླུ་དང་གཞས་དང་ཞབས་བྲོ་སོགས་བཙན་དབང་གིས་ཁྲབ་བཅུག་གི་འདུག་ཅིང་། གཞིས་ལུས་བོད་མི་རྣམས་སེམས་ནང་དུ་མི་འདོད་བཞིན་དུ་གཞས་དང་ཞབས་བྲོ་མ་ཁྲབ་ཀྱི་ཡོད་པ་ནི་བརྗོད་མ་དགོས་པ་ཞིག་རེད། མི་མང་རྣམས་ཀྱིས་ལབ་འདོད་མེད་ནའང་བོད་ཞི་བའི་བཅིངས་འགྲོལ་བཏང་བ་ནས་བཟུང་སྟེ་བོད་ལ་བདེ་སྐྱིད་ཀྱི་ཉི་མ་ཤར་ཡོད་ཟེར་བ་སོགས་ཁྱབ་བསྒྲགས་གང་སར་བྱེད་འཇུག་གི་འདུག་ཅིང་། དོན་དངོས་ཐོག་ཏུ་ཡག་པོ་ཞིག་ཉམས་ཞིབ་གནང་བ་ཡིན་ན་བོད་ལ་རྒྱ་དམར་དྲག་པོའི་བཙན་འཛུལ་བྱས་པ་ནས་བཟུང་སྟེ་བོད་རྒྱ་ཆེ་མང་ཚོགས་ཀྱི་སེམས་ནང་དུ་ཉིན་མོ་གཅིག་ཀྱང་བདེ་བར་མེད་ལ། བོད་མི་རྣམས་ལ་རང་དབང་གི་སོ་སོའི་ཆོས་ལུགས་དད་མོས་ཙམ་ཡང་བྱེད་འཇུག་གི་མེད། དེ་བཞིན་རང་དབང་གི་འགྲོ་འདུག་ཀྱང་ཚུལ་མཐུན་བྱེད་བཅུག་གི་མེད། དེ་འདྲའི་བོད་མི་རྣམས་ལ་རང་དབང་གི་འགྲོ་འདུག་མི་ཆོག་པ་སོགས་ཀྱིས་བོད་ཡུལ་འདི་ཉིད་བཙོན་ཁང་ཆེན་པོ་ཞིག་དང་ཅི་མི་མཚུངས།
རིག་གཞུང་དང་ཁོར་ཡུག་གཏོར་སྐྱོན།
བོད་ནང་ཕྱི་དངོས་པོའི་ཐོག་ནས་བལྟས་པ་ཡིན་ན་རླངས་འཁོར་འགྲོ་སའི་གཞུང་ལམ་སོགས་བཟོས་ཏེ་ཡར་རྒྱས་ཀྱི་རྣམ་པ་ཕྲན་བུ་མཐོང་རྒྱུ་ཡོད་རུང་། དེ་དག་ཞིབ་འཇུག་ཡག་པོ་ཞིག་གནང་བ་ཡིན་ན་གཞུང་ལམ་དེ་དག་བཟོས་ནས་ཁེ་ཕན་ནི་རྒྱ་དམར་སྲིད་གཞུང་ལ་རག་གི་ཡོད་པ་ལས་བོད་མིའི་མང་ཚོགས་་ལ་ཁེ་ཕན་རག་གི་མེད། དེ་ཡང་བོད་ནས་རིན་ཆེན་གཏེར་ཁ་བསྔོག་འདོན་དང་། ཤིང་ནགས་བཅོད་བྲེག་སོགས་ཀྱིས་དེ་དག་རྒྱ་ནག་ཏུ་འུར་འདྲེན་བྱ་སའི་ཆེད་དུ་དམིགས་ཡུལ་འཛིན་ནས་གཞུང་ལམ་བཟོས་པ་ལྟར་རྒྱ་ནག་གཞུང་ལ་ཁེ་ཕན་རག་གི་ཡོད་པ་རེད། མཐོ་སྒང་དུ་བཟོ་གྲྭ་དང་། འཕྲུལ་འཁོར་སོགས་མང་དུ་ཕྱིན་པའི་དབང་གིས་དུ་རླངས་སོགས་ཀྱིས་བོད་ཀྱི་རང་བྱུང་ཁོར་ཡུག་ལ་གནོད་སྐྱོན་ཆེན་པོ་འཐེབ་ཀྱི་ཡོད་ལ། བོད་ལ་ཉིན་རེ་བཞིན་ཚ་དྲོད་ཆེ་རུ་ཕྱིན་ནས་སྲིད་པ་ཆགས་པའི་གངས་རི་རྣམས་རིམ་པས་བཞུ་འགྲོ་ཡི་ཡོད། གླིང་ཆེན་ཨེ་ཤ་ཡའི་ཆུའི་འབྱུང་ཁུངས་བོད་ཡིན་པས། ཨ་ཤ་ཡའི་གླིང་ཕྲན་ལ་མ་འོངས་པ་ཆུའི་དཀའ་ངལ་འཕྲད་སྲིད་པས་དཔྱད་ཞིབ་པ་ཚོས་སེམས་ཁྲལ་གནང་གི་ཡོད། ད་ལྟ་ནས་ཁོར་ཡུག་ལ་དོ་སྣང་བྱེད་དགོས་པའི་བསམ་ཚུལ་བཤད་ཀྱི་ཡོད། དམར་གཞུང་གིས་དེ་དག་ལ་དོ་སྣང་ཙམ་ཡང་བྱེད་ཀྱི་མེད་པས་བོད་ཀྱི་ཁོར་ཡུག་ཉེན་ཁ་ཆེན་པོ་སླེབས་ཡོད།
ལྷག་དོན་དོན་བོད་ཆོས་ལྡན་གྱི་ཞིང་ཁམས་སུ་རྒྱ་དམར་བཙན་འཛུལ་བྱས་པ་ནས་བཟུང་སྟེ་བོད་མི་རིགས་ཀྱི་སྲོག་ལས་གཅེས་པའི་ཆོས་དང་རིག་གཞུང་གཏོར་བཤིག་ཚད་མེད་བཏང་ཡོད་པ་དང་། བོད་རིགས་རྒྱལ་ཞེན་ཅན་དུ་མ་ཞིག་དམར་བསད་བཏང་བ་དང་། ཉེས་མེད་བཙོན་འཇུག་གིས་སྡུག་སྦྱོང་ཚད་མེད་བཏང་བ། ཉིན་མོ་ངལ་རྩོལ་དང་། དགོང་ལྟར་ཏང་གི་སློབ་གསོ་སྤྲོད་ཀྱི་ཡོད་ཚུལ་བརྗོད་ནས་བཙོན་པ་རྣམས་མང་ཚོགས་ཚོགས་འདུ་འཚོགས་སའི་མདུན་དུ་ཁྲིད་ནས་བཙན་པོས་འཐབ་འཛིང་བཏང་བཅུག་པ་སོགས་བྱས་ཡོད། དེ་བཞིན་རྒྱ་ཆེ་ཞིང་འབྲོག་མི་དམངས་རྣམས་ལའང་སློབ་གསོ་སྤྲོད་ཀྱི་ཡོད་ཚུལ་གྱི་དགོང་ལྟར་ཚོགས་འདུ་ཚོགས་ནས་བོད་མི་ནང་ཁུལ་ཕན་ཚུན་འཐབ་འཛིང་བཏང་རེས་བྱེད་བཅུག་པ་སོགས་ལས་འགུལ་ཐབས་སྡུག་སྣ་ཚོགས་ཤིག་སྤེལ་ཡོད། བོད་མི་རྣམས་ལ་ཞལ་ནས་ཡིག་དྲུག་ཚིག་ཅིག་ཀྱང་འདོན་མི་ཆོག་པ་བཟོས་པ་དང་། གལ་སྲིད་བོད་མིའི་སུ་ཞིག་གིས་ཡིག་དྲུག་འདོན་པ་མཐོང་ཚེ་འཐབ་འཛིང་བཏང་གི་ཡོད། བོད་ཀྱི་རྒྱ་ཆེ་མང་ཚོགས་རྣམས་ལ་ཉིན་མོ་གཅིག་ཀྱང་སེམས་ནང་བདེ་སྐྱིད་མེད་བརྗོད་ན་མི་ཆོག་པ་གང་ཡང་མེད། དེ་འདྲའི་དཀའ་སྡུག་ཁྲོད་དུ་མི་ཚེའི་ཚོར་བ་རོལ་དགོས་ཐུག་གི་ཡོད།
དཔལ་འབྱོར་གྱི་བསླུ་ཁྲིད་ལ་མགོ་བོ་མ་འཁོར་ནས་བདེན་པའི་གད་རྒྱངས།
རིམ་པས་འཛམ་གླིང་ཆབ་སྲིད་འཕོ་འགྱུར་ཕྱིན་པ་དང་བསྟུན་བོད་ནང་ཆབ་སྲིད་ཕྲན་བུ་གུ་ཡངས་ཕྱིན་པ་དང་། གཞིས་བྱེས་ཕན་ཚུན་ཉེ་འཕྲད་འགྲོ་འོང་ཆོག་པའི་གོ་སྐབས་བཟང་པོ་ཞིག་ཤར། དུས་སྐབས་དེར་རྒྱ་དམར་སྲིད་གཞུང་གིས་གཡོ་སྒྱུ་ངན་པ་ཞིག་བཤམས་ནས་བོད་དུ་ཡར་རྒྱས་ཀྱི་ཁ་གཡང་འཁྱེར་ནས་རྒྱ་རིགས་ལས་མི་འབོར་ཆེན་ཞིག་བོད་དུ་གནས་སྤོ་བྱས་དང་བྱེད་བཞིན་ཡོད་ལ། བོད་འདི་ཉིད་གྲངས་ཉུང་མི་རིགས་ཤིག་ཏུ་སྒྱུར་བཞིན་ཡོད། རྒྱ་དམར་གྱིས་ཆབ་སྲིད་ཀྱི་བྱེད་སྟངས་གཡོ་སྒྱུ་ངན་པ་དེ་དག་མ་བཟོད་ནས་གཞིས་ལུས་རྒྱ་ཆེ་མི་མང་གིས་སྙིང་སྟོབས་ཆེན་པོའི་ཐོག་ནས་གཞན་ལ་གནོད་འཚེ་མེད་པར་ཞི་བའི་ཐོག་ནས་རང་ལུས་མཆོད་མེ་སྒྲོན་ཡོད། ད་དུང་རྒྱ་དམར་གྱིས་བསམ་ཤེས་སྤུ་ཙམ་མེད་པས་མཁྲེགས་འཛིན་གྱིས་ལྟ་བ་ངན་པ་བཟུང་ནས་བོད་མིའི་ཉམ་ཆུང་ཐོག་ཏུ་དྲག་གནོད་མུ་མཐུད་དེ་བྱེད་བཞིན་ཡོད། འཛམ་གླིང་ནང་དུ་བོད་ནི་ཆེས་ཡ་ང་བའི་གནས་སྟངས་ཛ་དྲག་ཅན་ཞིག་ཏུ་གྱུར་དང་འགྱུར་བཞིན་ཡོད་ལ། བོད་ནང་གི་ཤེས་ཡོན་པ་དང་། སྒྲུ་རྩལ་པ། རྒྱལ་ཞེན་ལྷག་བསམ་ཅན་རྣམས་ལ་ཉེས་མིང་སྣ་ཚོགས་ཤིག་བཏགས་ནས་མེད་པ་བཟོ་བཞིན་ཡོད། དེ་དག་འཛམ་གླིང་མི་རྣམས་ཀྱི་ངེས་པར་མཁྱེན་དགོས་ཀྱི་འདུག །བོད་འདི་དྲག་པོའི་བཙན་བཟུང་བྱས་ནས་མི་ལོ་བདུན་ཅུ་འགྲོ་བཞིན་ཡོད།
རྒྱ་དམར་སྲིད་གཞུང་གིས་གཞིས་ལུས་རྒྱ་ཆེ་མང་ཚོགས་རྣམས་དཔལ་འབྱོར་གྱི་བསླུ་ཁྲིད་བྱ་སེམས་བྱས་རུང་། གཞིས་ལུས་རྒྱ་ཆེའི་མང་ཚོགས་རྣམས་ངན་གཡོ་དེ་དག་འོག་ཏུ་མགོ་བོ་མ་སྒུར་བའི་ཐོག་སྔ་རྗེས་ཡོད་ཚད་བློས་བཏང་གིས་ལས་འགུལ་རབ་དང་རིམ་པ་སྤེལ་བཞིན་ཡོད་ལ། གཞིས་ལུས་བོད་མི་རྣམས་བློ་སེམས་འགྱུར་མེད་ཀྱིས་གནས་ཡོད། བོད་ཀྱི་དཀའ་རྙོག་དེ་ཙམ་ལོ་ངོ་མང་བ་འགོར་ན་དེ་ཙམ་གྱིས་རྒྱ་གཞུང་ལ་དཀའ་ངལ་ཆེ་རུ་འགྲོ་བ་ལས་ཆུང་དུ་དུས་ནམ་ཡང་འགྲོ་མི་སྲིད། དེ་དག་རྒྱ་གཞུང་གི་གནད་ཡོད་མི་སྣ་ཚོས་ངེས་པ་ཤེས་པར་བྱེད་དགོས་པའི་གནས་སྟངས་ཤིག་རེད།
ཆིག་བསྒྲིལ་གྱིས་མདུན་བསྐྱོད་གནང་དགོས།
ད་ནི་རང་དབང་ལུང་པར་ཡོད་མཁན་བོད་པ་འགོ་འོག་ཚང་མས་རྣམ་རིག་བསྒྲིམ་ནས་བོད་དོན་བདེན་མཐའ་སེལ་ཐབས་སུ་ལས་་འགུལ་སྤེལ་དགོས་པ་ཞིག་ལས་ང་ཚོ་ནང་ཁུལ་ལ་ང་དང་ཁྱོད་ཅེས་རྩོད་ནས་བསྡད་ན་ཕན་ཐོགས་གང་ཡང་མེད། ད་སྐབས་རྒྱལ་སྤྱིའི་ཆབ་སྲིད་འཕོ་འགྱུར་དང་བསྟུན་ནས་ང་ཚོ་ཚང་མས་ལས་འགུལ་གྱི་མདུང་སོ་དེ་གཅེས་པའི་ཕ་ས་འཕྲོག་མཁན་གྱི་དགྲ་བོའི་མདུན་དུ་སྟོན་དགོས་པ་ལས་ང་ཚོ་ནང་ཁུལ་དུ་མདུང་སོ་ཚུར་བསྟན་མི་ཉན་སྙམ། ང་ཚོའི་ཕ་ས་འཕྲོག་མཁན་དེ་སྣང་མེད་ལྟ་བུ་བཞག་ནས་ནང་ཁུལ་ཚིག་སྐམ་པོ་བཤད་རེས་གནང་བསྡད་ན་ཕན་ཐོགས་གང་ཡང་མེད། ང་ཚོ་མི་ཡུལ་ལུང་པ་ལ་ས་ཆ་ལག་མཐིལ་ཙམ་ཡང་མེད་ཅིང་། མིའི་ལུང་པར་གནས་ཚང་གཡར་ནས་བསྡད་ཡོད་པ་ཤེས་དགོས་པ་ཞིག་ལས་རྒྱལ་ཁབ་ཡོད་པའི་མང་གཙོ་ནང་བཞིན་ཡིན་སྙམ་པའི་ལྟ་བ་འཁྱེར་ནས་ནང་ཁུལ་རྩོད་གླེང་གནང་ནས་བསྡད་ན་དགེ་ལས་སྐྱོན་ཆེ་བ་ཞིག་ཏུ་མཐོང་། རྒྱལ་ཁབ་ཡོད་པའི་མང་གཙོ་ལ་གཤིབ་བསྡུར་ནམ་ཡང་བྱེད་མི་རུང་སྙམ། རྒྱུ་མཚན་ནི་རྒྱལ་ཁབ་ཡོད་པའི་ལུང་པར་ཆབ་དཔལ་རིག་གསུམ་ཕུན་སུམ་ཚོགས་པ་ཡོད་ལ། ལས་དོན་གང་ཞིག་གནང་ནའང་དཀའ་ངལ་མེད། ང་ཚོ་ནི་རྒྱལ་ཁབ་མེད་པའི་མིའི་ལུང་པར་མགྲོན་པོ་ནང་བཞིན་གནས་ཚང་གཡར་ནས་བསྡད་ཡོད། དེ་དག་ང་ཚོས་ངེས་པར་ཤེས་དགོས་ཀྱི་འདུག །ང་ཚོ་ཚང་མ་རྒྱལ་ཁབ་གང་དུ་གནས་ཡོད་རུང་ང་ཚོ་སྐྱབས་བཅོལ་ཡིན་བསམ་པའི་འདུ་ཤེས་དེ་འཛིན་ནས་བོད་དོན་ལས་འགུལ་སྤེལ་དགོས་རྒྱུ་དེ་ནི་རང་བཞིན་གྱིས་གལ་ཆེའི་གནད་དོན་ཞིག་ཏུ་མཐོང་།
སྤྱི་ཡོངས་ནས་ད་ལྟའི་དུས་སྐབས་འདིར་འཛམ་གླིང་རྒྱལ་ཁབ་མང་པོས་རྒྱ་ནག་དམར་ཤོག་ཚོགས་པ་ལ་ལྟ་སྟངས་ཡག་པོ་མེད་པའི་དུས་སྐབས་འདིར་ང་ཚོའི་གོ་སྐབས་འདི་ཉིད་དམ་འཛིན་གྱིས་བོད་དོན་ལས་འགུལ་སྤེལ་དགོས་པའི་དུས་སྐབས་ཤིག་ཏུ་སླེབས་འདུག་སྙམ། གོ་སྐབས་དེ་ཉིད་འཐུས་ཤོར་ཕྱིན་ཚེ་རྗེས་ཕྱོགས་ང་ཚོ་ཚང་མ་གནོང་འགྱོད་བྱེད་དགོས་པའི་དུས་སྐབས་ཤིག་ཤར་དུས་དེ་དུས་བློ་འགྱོད་སྐྱེ་རུང་ཕན་ཐོགས་གང་ཡང་མེད། ད་སྐབས་ནས་གོ་སྐབས་དེ་དག་དམ་འཛིན་གནང་དགོས་པ་ཞིག་ཏུ་མཐོང་། ལྷག་དོན་ལས་ཀྱི་སྣེ་མོ་བ་ཚོས་ད་དུང་བཅའ་ཁྲིམས་དང་མཐུན་མིན་གྱི་རྩོད་གླེང་གནང་བསྡད་ཚེ་ཆབ་སྲིད་ཀྱི་གོ་སྐབས་བཟང་པོ་དེ་དག་ཉིན་རེ་བཞིན་ཤོར་བཞིན་འདུག་ཅིང་། ད་ནི་ལས་ཀྱི་སྣེ་བ་ཚོས་ངེས་པར་དགོངས་པ་བཞེས་དགོས་པའི་དུས་ལ་སླེབས་འདུག་སྙམ། ད་དུང་ང་དང་ཁྱོད་ཅེས་རྩོད་ནས་ཁྱུ་གཡག་ར་འཛིང་ཐུག་པ་ནང་བཞིན་བསྡད་ན་ཕན་པ་ལས་གནོད་ཚབ་ཆེ་བ་ཞིག་ལས་དགེ་མཚན་ཡོད་པ་ཞིག་ཏུ་མ་མཐོང་། ང་ཚོར་བོད་རྒྱ་ཞི་གྲོས་མོས་བྱེད་པའི་བློ་སྟོབས་དང་ནུས་ཤུགས་ཡོད་ན་ང་ཚོའི་ནང་ཁུལ་གྱི་དཀའ་ངལ་གྲོས་མོས་ལམ་ནས་ཐག་གཅོད་མི་ནུས་པ་ཞིག་ག་ལ་ཡོད།
ན་གཞོན་ནི་ང་ཚོའི་མི་རིགས་ཀྱི་མ་འོངས་པའི་སོན་རྩ་ཡིན།
རྒྱལ་ཁབ་དང་མི་རིགས་ཡར་རྒྱས་འགྲོ་མིན་ནི་ཤེས་ཡོན་ལ་ཐུག་ཡོད་ཟེར་བ་ལྟར་གོང་འོག་ཚང་མས་ཤེས་ཡོན་ཐོག་ཏུ་ནུས་པ་གཅིག་ཏུ་སྤུངས་ནས་ལས་དོན་གནང་བའི་གྲུབ་འབྲས་སུ་གཟེངས་སུ་ཐོན་པ་བྱུང་ཡོད། དེ་དག་དགའ་འོས་པའི་གཏམ་བཟང་ཞིག་རེད། ལོ་འདི་དག་ནང་དུ་རྒྱ་ནག་ཝུ་ཧན་ནས་ཏོག་དབྱིབས་ནད་དུག་བཅུ་དགུ་པ་ཁྱབ་གདབ་ཏུ་བྱུང་ནས་ནད་ཡམས་ངན་པས་འཛམ་གླིང་གི་ས་ཁུལ་ཡོངས་སུ་ཆབ་དཔལ་རིག་གསུམ་ལ་གྱོང་གུད་ཚད་མེད་འཐེབ་པའི་སྐབས་དེར་ང་ཚོའི་བོད་ཕྲུག་ཚོས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཡིག་ཚད་གཟེངས་སུ་ཐོན་པ་བྱུང་ཡོད། སྲིད་སྐྱོང་གི་གཟེངས་རྟགས་བཞེས་མཁན་སློབ་མ་ཉེར་བདུན་བྱུང་ཡོད་པ་དང་། དེའི་ནང་ནས་མ་སུ་རིའི་བོད་ཁྱིམ་སློབ་གྲྭ་ནས་སློབ་མ་ཉེར་གསུམ་བྱུང་ཡོད་ཅིང་། དེ་དག་ནི་དགའ་འོས་པའི་གཏམ་བཟང་གི་གནས་སྟངས་ཤིག་ཀྱང་ལོས་ཡིན། མ་སུ་རིའི་འབྲེལ་ཡོད་དགེ་ལས་ཡོངས་ལ་རྗེས་སུ་ཡི་རངས་ཞུ་དགོས་པ་དང་ཞུ་འདོད་པ་ཞིག་ཀྱང་བྱུང་། རྒྱུ་མཚན་ནི་དགེ་ལས་རྣམ་པས་སྐུ་ལས་ཚད་མེད་སྐྱོན་ནས་སློབ་མར་སློབ་ཁྲིད་གནད་ལ་འཁེལ་བ་གནང་བར་བརྟེན་འགྲུབ་འབྲས་གཟེངས་སུ་ཐོན་པ་དེ་དག་བྱུང་བ་ཞིག་རེད། དེ་དག་ནི་དགའ་འོས་པའི་གཏམ་བཟང་ཞིག་ཀྱང་རེད་སྙམ། ང་ཚོའི་ལས་ཀྱི་སྣེ་མོ་ཚོས་སློབ་ཕྲུག་སེམས་ཤུགས་འཕར་བའི་བཀའ་མོས་གནང་དགོས་པ་ཞིག་ལས་སློབ་ཕྲུག་སེམས་ཤུགས་ཆགས་པའི་བཀའ་མོས་དེ་འདྲའི་རིགས་གཏན་ནས་གནང་མི་ཉན་སྙམ།
ལྷག་པར་ཆབ་སྲིད་ཀྱི་ཐུགས་འགན་བཞེས་མཁན་ལས་ཀྱི་སྣེ་མོ་བ་ཚོས་བཀའ་མོས་གནང་དུས་ཡིད་གཟབ་གནང་ནས་བཀའ་མོས་གནང་དགོས་ཀྱི་མ་གཏོགས་སེམས་ནང་དུ་དྲན་ཚད་བཤད་ན་དགེ་ལས་གནོད་སྐྱོན་ཆེ་བ་ཞིག་ཏུ་མཐོང་ལ། ངེས་པར་བཀའ་མོས་གནང་དུས་ཡིད་གཟབ་གནང་དགོས་ཀྱི་འདུག་སེམས་ཚོར་ཆེན་པོའི་ཐོག་ནས་ཞུ་བཞིན་ཡོད་པ་བཅས། དེ་དག་ནི་རང་ཉིད་ཀྱི་སེམས་ནང་དུ་གང་དྲན་པ་ཞིག་ཀཡིན་པ་ལས་གཞན་ལ་དམའ་འབེབས་ཀྱི་སྐད་ཆ་དེ་འདྲའི་གང་ཡང་མིན། ཞེས་པ་འདི་ནི་ཆབ་མདོ་ངག་ཕུན་གྱིས་ཕྱི་ལོ་ ༢༠༢༡ ཟླ་ ༨ ཚེས་ ༡༥ ཉིན་མོར་བྲིས་པའོ།
མཆན། གོང་བཀོད་བསམ་ཚུལ་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།
