༧གོང་ས་མཆོག་ནས་མ་འོངས་པར་གང་འདྲ་ཡོང་དང་མི་ཡོང་ནི་སོ་སོའི་ལག་པར་ཡོད་ཅེས་གསུངས།

༧གོང་ས་མཆོག་ནས་ལྷོ་ཀོ་རི་ཡའི་དད་ལྡན་དོན་གཉེར་ཅན་ཚོར་བཀའ་སློབ་གནང་སྐབས་ང་ཚོའི་སྡུག་བསྔལ་གྱི་རྩ་བ་རྒྱུད་མ་འདུལ་བའི་རྐྱེན་གྱིས་ཡོང་གི་ཡོད་དུས་རྒྱུད་མ་འདུལ་བ་དག་ཉམས་ལེན་བྱས་ནས་ག་ལེར་སེམས་ལ་འགྱུར་བ་ཐེབས་དགོས་སྐོར་བཀའ་སློབ་སྩལ།

ལྷོ་ཀོ་རི་ཡའི་བསླབ་གསུམ་ཤེས་རབ་གླིང་གིས་ཇི་ལྟར་གསོལ་བ་བཏབ་པ་ལྟར། དེ་རིང་སྔ་དྲོར་བཞུགས་སྒར་རྒྱལ་བའི་ཕོ་བྲང་ནས་ཐད་གཏོང་བརྒྱུད་༧གོང་ས་སྐྱབསམ་མགོན་ཆེན་པོ་མཆོག་གིས། ལྷོ་ཀོ་རི་ཡའི་དད་ལྡན་དོན་གཉེར་ཅན་རྣམས་ལ་འཚེ་མེད་ཞི་བདེ་དང་བྱམས་སྙིང་རྗེའི་སྐོར་བཀའ་སློབ་སྩལ་ཡོད་པ་དང་། ༧གོང་ས་མཆོག་གིས། དེ་རིང་ལྷོ་ཀོ་རི་ཡའི་ཆོས་གྲོགས་ཚོར་ནང་ཆོས་འགྲེལ་བཤད་རྒྱག་རྒྱུའི་གོ་སྐབས་ཞིག་བྱུང་བར་ངོས་རང་ཧ་ཅང་དགའ་བོ་བྱུང་། ངོས་རང་བཅོམ་ལྡན་འདས་ཀྱི་རྗེས་འབྲང་གི་དགེ་སློང་ཞིག་ཆགས་ཡོད། བོད་གངས་ཅན་ཀྱི་ལྗོངས་སུ་མཁན་ཆེན་ཞི་བ་འཚོས་དཔལ་ན་ལེཎྜའི་ཆོས་བརྒྱུད་དེ་བཙུགས་གནང་ཡོད། དེ་འདྲ་ཡིན་དུས་ལོ་སྟོང་ཕྲག་ལྷག་གི་རིང་ལ་ང་ཚོ་བོད་པ་ཚོས་གཞུང་ཆེན་སློབ་སྦྱོང་བྱས་ཏེ། དེའི་ཐོག་ནས་བསླབ་པ་གསུམ་གྱི་ཉམས་ལེན་བྱེད་ཀྱི་ཡོད་པར་བཤད་ཀྱི་ཡོད་པ་རེད། ངོས་རང་ལ་ཆ་བཞག་ནའང་དང་པོ་ཐོས་བྱུང་གི་ཤེས་རབ་སྩལ། དེ་ནས་བསམ་བྱུང་གི་ཤེས་རབ་ཀྱི་ཐོག་ནས་སེམས་ལ་ངེས་པ་ཐོབ་པར་བྱས། དེ་ནས་ཞི་གནས་ཐོབ་མེད་ཀྱང་། དཔྱད་འཇོག་ཟུང་འབྲེལ་གྱི་ཐོག་ནས་བསམ་བློ་བཏང་ནས་སེམས་ལ་ཉམས་མྱོང་གང་ཙམ་ཡོད་པ་རེད། གང་ལྟར་ཆོས་གྲོགས་ཚོ་ལ་ངོས་ཀྱི་ཉམས་མྱོང་དང་འབྲེལ་ནས་འགྲེལ་བཤད་ཞུ་ཡི་ཡིན། ཞེས་གསུངས་སོང་།

༧གོང་ས་མཆོག་གིས། སྤྱིར་ངོས་ནས་ཆོས་ལུགས་ཚང་མར་གུས་བརྩི་ཞུ་ཡི་ཡོད། མིའི་ཁམས་དང་མོས་པ་སྣ་ཚོགས་ཡིིན་པས་ཆོས་ལུགས་ལྟ་གྲུབ་སྣ་ཚོགས་ཡོད་པ་དེས། མིའི་ཁམས་དང་མོས་པ་སྣ་ཚོགས་པ་དེར་ཕན་གྱི་ཡོད་པ་རེད། བཅོམ་ལྡན་འདས་ལ་ཆ་བཞག་ན། གདུལ་བྱ་རིགས་ཅན་གསུམ་ཞེས་པ། དེ་འདྲའི་རིགས་མི་འདྲ་བ་མང་པོ་ཞིག་ཡོད་པ་དང་། ལྷག་པར་ལྟ་གྲུབ་ཀྱི་ཐོག་ལ་ཁམས་དང་མོས་པ་མི་འདྲ་བ་ཡོད་པའི་རྐྱེན་གྱིས། དེ་ལུགས་ཀྱིས་བཅོམ་ལྡན་འདས་ཀྱི་ཁམས་དང་མོས་པར་འཚམ་པ་ཞིག་གསུང་ཡོང་གི་འདུག དེ་འདྲ་ཡིན་དུས་སེམས་ཅན་མོས་པ་སྣ་ཚོགས་པ་དེར་ཆོས་ལུགས་སྣ་ཚོགས་ཡོད་པ་དེས་ཕན་གྱི་ཡོད་པ་རེད། ཆོས་ལུགས་ཚང་མའི་བསླབ་བྱ་གཅིག་གྱུར་ནི་སེམས་བཟང་པོ་བྱ་རྒྱུ་དང་། མི་ལ་གནོད་མི་བྱེད་པར། བྱམས་བརྩེའི་ཉམས་ལེན་དགོས་པ་ཞིག་ཚང་མས་གསུང་གི་ཡོད་པ་རེད། ལྟ་གྲུབ་མི་འདྲ་ནའང་བསླབ་བྱ་ནི་སེམས་བཟང་པོ་བྱ་རྒྱུ་དང་། འཚེ་བ་མི་བྱ་རྒྱུ། ཀུན་ལ་ཕན་བདེ་བསྒྲུབ་རྒྱུ་ཞིག་ཆོས་ལུགས་ཚང་མས་གསུང་གི་འདུག ང་ཚོའི་ལོ་རྒྱུས་ཀྱི་ཁྲོད་དུ་སྐབས་རེར་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་གསོད་རེས་བྱས་ཡོད། དེ་དག་ནི་འདས་པའི་ལོ་རྒྱུས་ལ་ཆ་བཞག་ན། རྒྱ་གར་དུ་ཆོས་ལུགས་ཚང་མ་ཡོད་ཀྱང་། ཚང་མས་གཅིག་གིས་གཅིག་ལ་གུས་བརྩི་བྱས་ནས་སྐབས་རེར་ཕན་ཚུན་སློབ་སྦྱོང་བྱེད་ཀྱི་ཡོད། ང་ཚོའི་འཛམ་གླིང་གིས་རྒྱ་གར་གྱི་ཆོས་ལུགས་མཐུན་སྒྲིལ་དེར་སློབ་སྦྱོང་བྱས་ནས་རིས་མེད་ཀྱི་ཆོས་ལུགས་སོ་སོས་ཕན་ཚུན་མཐུན་པོ་བྱས་ནས་མིག་དཔེ་སྟོན་ཐུབ་པ་བྱ་དགོས།  ཞེས་གསུངས་སོང་།

སངས་རྒྱས་ཀྱི་ཆོས་ལུགས་ནི། སེམས་ཅན་གྱི་སྡུག་བསྔལ་རྣམས་བཅོམ་ལྡན་འདས་ཀྱིས་ཕྱག་གིས་སེལ་མི་ཐུབ་པ་དང་། སྡུག་བསྔལ་གྱི་རྒྱུ་སྡིག་པ་དེ་དག་ཆུ་ཡིས་བཀྲུ་མི་ཐུབ་ཅིང་། བཅོམ་ལྡན་འདས་ཀྱིས་ཐུགས་ཀྱི་ཡོན་ཏན་རྣམས་ང་ཚོར་སྦྱིན་རྒྱུ་མེད།བཅོམ་ལྡན་འདས་ཀྱི་གདུལ་བྱའི་དོན་ཅི་ལྟར་མཛད་ཀྱི་ཡོད་ཅེ་ན། ཆོས་རྣམས་ཀྱི་ཡིན་ལུགས་དེ་དག་འགྲེལ་བཤད་བསྐྱོན་གྱི་ཡོད་པ་རེད། བདག་ཉིད་བདག་གི་མགོན་ཞེས་གསུང་པ་བཞིན། མ་འོངས་པར་གང་འདྲ་ཡོང་དང་མི་ཡོང་ནི་སོ་སོའི་ལག་པར་ཡོད་པ་རེད། དེ་འདྲ་ཡིན་དུས། བཅོམ་ལྡན་འདས་ཀྱི་ལས་འགན་ནི་ང་ཚོར་བསླབ་བྱ་བསྐྱོན་པ་དེ་ཡིན་ལ། བླང་དོར་གྱི་གནས་སྟོན་བཞག་པ་དེར། ང་རང་ཚོས་ལག་ལེན་བྱས་ནས་སྡུག་བསྔལ་གྱི་རྩ་བ་རྒྱུད་མ་འདུལ་བའི་རྐྱེན་གྱིས་ཡོང་གི་ཡོད་དུས། རྒྱུད་མ་འདུལ་བ་དག་ཉམས་ལེན་བྱས་ནས་ག་ལེར་སེམས་ལ་འགྱུར་བ་ཐེབས་དགོས། དེའི་ཐོག་ནས་ང་རང་ཚོའི་སངས་རྒྱས་པའི་གཞུང་ནས་ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ་ཞེས་རིམ་པས་བློ་ལ་ཡར་རྒྱས་ཕྱིན་ནས་འགྲོ་རྒྱུ་ཞིག་གསུང་གི་ཡོད་པ་རེད།  མ་རིག་པའི་གཉེན་པོར་བརྟེན་ནས་དཔྱད་འཇོག་ཟུང་འབྲེལ་གྱི་ཐོག་ནས་སེམས་ལ་ངེས་པ་བརྙེད་དུས། སེམས་ལ་འགྱུར་བ་འགྲོ་ཐུབ། ངོས་རང་སྒེར་ལ་ཆ་བཞག་ན་ལོ་མང་པོར་དཔྱད་འཇོག་ཟུང་འབྲེལ་གྱི་ཐོག་ནས་སྒོམ་བརྒྱབ་པ་དང་། དེས་སེམས་ལ་འགྱུར་བ་ཐེབས་རྒྱུ་འདུག སངས་རྒྱས་པའི་ཆོས་ལུགས་ཞེས་པ་དེ། སྨོན་ལམ་རྒྱག་པ་དང་། འདོན་པ་གདོན་རྒྱུ་ཙམ་མ་ཡིན་པར། ཆོས་རབ་ཏུ་རྣམ་འབྱེད་ཀྱི་ཤེས་རབ་ཡོད་པ་དེ་མཐིལ་ཕྱིན་པ་བེད་སྤྱོད་བྱས་ནས་སེམས་ལ་འགྱུར་བ་ཐེབས་སླད་ཐབས་ཤེས་ཟུང་འབྲེལ་གྱི་ཐོག་ནས་སྙིང་རྗེ་རྩ་བར་བཞག་སྟེ་ས་ལམ་གྲོལ་ཐབས་བྱ་དགོས། ཞེས་གསུངས་སོང་།

དེའི་རྗེས་ལྷོ་ཀོ་རི་ཡའི་སམ་བྷོ་བཟོ་གྲའི་( SUMBO industries ) སྤྱི་གཉེར་བ་ཆེའུ་ཀུན་སིག ( cho kun sik ) གིས། ཁྱིམ་ཚང་དུ་ཕྲུ་གུ་ཚོས་ཕ་མར་རླུང་བསླངས་བ་དང་། ཕ་མའི་རྩུབ་སྤྱོད་ལའང་ཕྲུ་གུ་རླུང་ལངས་ཚེ། དེར་གདོང་ལེན་ཇི་ལྟར་བྱ་དགོས་སྐོར་གྱི་བཀའ་འདྲི་ཞུས་པར་༧གོང་ས་མཆོག་གིས། ཀོ་རི་ཡའི་སྐད་དུ་བསྒྱུར་ཡོད་པའི་སྤྱོད་འཇུག་ཉམས་ལེན་དང་། ཕ་མ་ཚོས་སྤྱོད་འཇུག་གི་ལེའུ་དྲུག་པ་དང་བརྒྱད་པ་གཉིས་བལྟ་དགོས། ལེའུ་དྲུག་པར་ཁོང་ཁྲོའི་ཉེས་དམིགས་ཤུགས་ཆེན་པོ་གསུངས་ཡོད་པ་དང་། ལེའུ་བརྒྱད་པར་རང་གཅེས་འཛིན་གྱི་སྐྱོན་སྐོར་ཡག་པོ་གསུངས་ཡོད་པ་རེད། ཕ་མ་ཚོའི་ངོས་ནས་སྤྱོད་འཇུག་ལ་ཏོག་ཙམ་བསམ་བློ་བཏང་བ་དང་། ཕྲུ་གུ་ཚོའི་ངོས་ནས་ཀྱང་ཆུང་ཆུང་ནས་སེམས་ལ་སྦྱང་བ་བྱས་ནས་བསམ་བློ་བཏང་བ་ཡིན་ན་ཕན་ཐོགས་ཆེན་པོ་ཡོད་པ་རེད། སྐྱེས་བ་སྔ་ཕྱིའི་སྐད་ཆ་མེད་པ་བྱས་ནས་འཕྲལ་དུ་སེམས་ཞི་བདེ་དང་སྐྱིད་པོ་ཡོང་ཐབས་ལ་སྤྱོད་འཇུག་ལ་བསམ་བློ་བཏང་བ་དང་། མི་ཚང་མར་གྲོགས་པོའི་འདུ་ཤེས་དང་། སེམས་པ་བཟང་པོ་བྱ་རྒྱུ། འཛམ་གླིང་དུ་ཡོད་པའི་མི་གྲངས་དུང་ཕྱུར་ ༧༠ ཚང་མ་མི་གཅིག་པ་རེད། ཚང་མ་མི་གཅིག་གྱུར་གྱི་འདུ་ཤེས་ཀྱི་ཐོག་ནས་གཅིག་གིས་གཅིག་ལ་བརྩེ་བ་བྱ་རྒྱུ་གལ་ཆེན་པོ་རེད། ང་རང་ཚོ་གཙོ་བོ་བརྩེ་བ་ལ་བརྟེན་ནས་འཚོ་ཡི་ཡོད། དུད་འགྲོ་ཚོ་ཡང་བརྩེ་བ་ལ་བརྟེན་ནས་འཚོ་ཡི་ཡོད། བྱིས་པ་ཞིག་བཙས་མ་ཐག་དང་མི་ཚེ་གང་བོར་བརྩེ་བས་འཚོ་དགོས་པ་ཞིག་རེད། བརྩེ་བ་ཞེས་པ་ནི་ཆོས་ཁས་ལེན་མི་ལེན་གྱི་གནས་ཚུལ་ཁ་ཁ་རེད། གང་ལྟར་མི་སེམས་བཟང་པོ་ཞིག་དང་། བརྩེ་བའི་སེམས་ཤིག་དགོས་རྒྱུ་ནི་ཧ་ཅང་གལ་ཆེན་རེད། དེང་སང་བྱིས་པ་རྣམས་ལ་ཕ་མ་གཉིས་དང་ལྷག་པར་མ་ཡི་བརྩེ་བ་ནི་གལ་ཆེན་ཡིན་པའི་ཚོར་སྣང་རྒྱུན་དུ་ཡོད་པ་རེད། དེ་ནས་སློབ་ཚན་དུ་སེམས་ཀྱི་བདེ་སྡུག་སོགས་ཀྱི་སྐོར་ལ་མེད་དུས། ངོས་ནས་ཚན་རིག་པ་རྣམས་ལ་བྱིས་པ་ཆུང་ཆུང་རྣམས་ཀྱི་སློབ་ཚན་དུ་བརྩེ་བ་དང་བྱམས་བརྩེ་སོགས་ཀྱི་སྐོར་ལ་སློབ་ཚན་དགོས་ཀྱི་འདུག་ཅེས་བཤད་ཀྱི་ཡོད། ང་ཚོས་ལུས་པོའི་སློབ་སྦྱོང་རྣམས་སློབ་ཚན་དུ་སློབ་ཀྱི་ཡོད་དུས། ད་སེམས་ཀྱི་སློབ་སྦྱོང་སྤྲད་དགོས་ཀྱི་འདུག དེ་ནི་ཆོས་ཀྱི་སྐད་ཆ་ཞིག་མིན་པར་མིའི་ལུས་བདེ་པོ་དང་སེམས་སྐྱིད་པོ་བཟོ་རྒྱུ་ནི་ཤེས་ཡོན་གྱི་དམིགས་ཡུལ་ཡིན་པ་རེད། ཅེས་གསུངས་སོང་།

དེ་ནས་སྨན་ཞབས་པ་བྷ་ཡའེ་ཡིས་ (bae hyoung duk)  དེང་སང་འགྲོ་འོང་བཀག་འགོག་བྱེད་ཀྱི་ཡོད་རྐྱེན་མི་རྣམས་ལ་ཁེར་རྐྱང་གི་དཀའ་ངལ་ཡོང་གི་ཡོད་སྟབས། སྨན་ཞབས་པ་ཞིག་གི་ངོས་ནས་ཁེར་རྐྱང་གིས་མནར་བའི་མི་རྣམས་ལ་རོགས་རམ་ཇི་ལྟར་དགོས་སྐོར་བཀའ་འདྲི་ཞུས་པར་༧གོང་ས་མཆོག་གིས། ནད་ཡམས་ཀྱི་རྐྱེན་པས་ང་རང་ཚོར་འགྲོ་འོང་གི་བཀག་རྒྱ་ཞིག་ཡོད་ཀྱང་། ཁ་པར་གྱི་ལམ་ནས་མང་པོ་དང་མཉམ་དུ་འབྲེལ་བ་བྱ་རྒྱུ་དང་གྲོགས་པོ་མང་པོ་བཟོ་ཐུབ་པ་དང་། ཉམས་མྱོང་དང་འབྲེལ་བའི་བསླབ་བྱ་མང་པོ་ཞིག་དྲ་རྒྱ་བརྒྱུད་ནས་བླང་ཐུབ་ཀྱི་ཡོད། མིར་ཐུག་རྒྱུར་དཀའ་ངལ་ཡོད་ཀྱང་། དྲ་རྒྱའི་ཐོག་ནས་འབྲེལ་བ་མང་ཙམ་བླངས་ན་ཁེར་རྐྱང་གི་དཀའ་ངལ་སེལ་ཐུབ་ཀྱི་རེད། ཅེས་གསུངས་སོང་།

དཔལ་ལྡན།