ཧི་མ་ལ་ཡའི་ཁུལ་དུ་བོད་དོན་སྐོར་སྐྱོད་གནང་གི་འདུག

བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ལ་དྭགས་ཀྱི་རྒྱལ་ས་གླེ་ནས་མགོ་བཙུགས་ཏེ་རྒྱ་གར་གྱི་བྱང་ཤར་མངའ་སྡེ་ཨ་རུ་ཎ་ཅལ་བར་སྐོར་སྐྱོད་ལས་འགུལ་སྤེལ་བཞིན་འདུག

བསྟན་འཛིན་བརྩོན་འགྲུས་ལགས་ཀྱིས་ཟླ་འདིའི་ཕྱི་ཚེས་ ༡༧ ནས་ཟླ་བ་ ༣ ལྷག་གི་རིང་། རྒྱ་གར་གྱི་བྱང་ཕྱོགས་ལ་དྭགས་ནས་མགོ་བརྩམས་ཏེ། ཁུ་ནུ་དང་། སྤི་ཏི། ནེ་ནི་ཏཱལ་སོགས་ཧི་མ་ལ་ཡའི་རི་རྒྱུད་ཀྱི་འདབས་སུ་ཆགས་པའི་ཡུལ་ལུང་རྣམས་བརྒྱུད་དེ་རྒྱ་གར་གྱི་བྱང་ཤར་མངའ་སྡེ་ཨ་རུ་ཎ་ཅལ་བར་ཧི་མ་ལ་ཡའི་སྐོར་སྐྱོད་(Walking the Himalayas) ཞེས་པ་གནང་བཞིན་ཡོད་པ་དང་། སྐོར་སྐྱོད་སྐབས་རྒྱ་གར་གྱི་ས་གནས་མི་མང་རྣམས་ལ་བོད་དོན་དང་འབྲེལ། ཉེ་ལམ་བྱུང་བའི་བོད་ཧིན་ས་མཚམས་ཀྱི་དཀའ་རྙོག་དང་འབྲེལ་ནས་ས་གནས་མི་མང་རྣམས་ལ་གོ་རྟོགས་སྤེལ་གྱི་ཡོད་འདུག

འདི་གའི་གསར་འགོད་པར་ཐེངས་འདིའི་སྐོར་སྐྱོད་ཀྱི་དགོས་དམིགས་སྐོར་ལ་ཁོང་གིས། ཉེ་དུས་ཧི་མ་ལ་ཡའི་རི་རྒྱུད་དུ་ཆགས་པའི་རྒྱ་གར་གྱི་མངའ་སྡེ་ལྔའི་ནང་ལ། རྒྱ་ནག་གི་དམག་མིས་སྡིགས་ར་བསྐུལ་བ་དང་ས་མཚམས་ནང་འཛུལ་བའི་གནས་ཚུལ་ཁྱབ་ཆེན་པོ་བྱུང་ཡོད་པར་བརྟེན། རྒྱ་མིའི་དམག་མི་བོད་ནང་བསླེབས་ཏེ་གཞི་ནས་རྒྱ་གར་ནང་གནས་ཚུལ་དེ་དག་འབྱུང་གི་ཡོད་པ་དང་། ལོ་རྒྱུས་ནང་བོད་དེ་རང་བཙན་ལྡན་པའི་རྒྱལ་ཁབ་ཅིག་ཡིན་པ་དང་། རྒྱ་མིས་བོད་ལ་བཙན་འཛུལ་བྱས་རྗེས་རྒྱ་གར་གྱི་ས་མཚམས་ནས་སྡིགས་ར་བསྐུལ་ཐུབ་པའི་གནས་སྟངས་ཆགས་ཡོད་པ་སོགས་དང་། མ་འོངས་པར་བོད་རང་བཙན་འཐོབ་ཚེ་རྒྱ་གར་ལ་དེ་ལྟ་བུའི་ཉེན་ཁ་མེད་པ་སོགས་ཀྱི་གནས་ཚུལ་འགྲེལ་བཤད་དང་། དེ་དང་འབྲེལ་ནས་བོད་དོན་དྲིལ་བསྒྲགས་གནང་གི་ཡོད་སྐོར་བརྗོད་བྱུང།

ཟླ་འདིའི་ཕྱི་ཚེས་ ༡༧ ཉིན་བསྟན་འཛིན་བརྩོན་འགྲུས་ལགས་ཀྱིས་རང་གི་སྤྱི་ཚོགས་དྲ་ལམ་ངོ་དེབ་སྟེང་སྤེལ་བའི་ལས་འགུལ་དེའི་སྐོར་གྱི་གསལ་བསྒྲགས་ནང་། ཁོང་གིས་ལ་དྭགས་ནས་ཨ་རུ་ཎ་ཅལ་བར་གྱི་སྐོར་སྐྱོད་རིང་། ལ་དྭགས་ཀྱི་གྲོང་ཁྱེར་ལྟེ་བ་གླེ་དང་། ནུབ་ར། ཀར་གྷིལ། ཟངས་དཀར་བཅས་དང་། ཧི་མ་ཅལ་གྱི་ལ་ཧུལ་དང་། སྤི་ཏི། ཁུ་ནུ། དེ་ནས་ཨུ་ཏྲ་ཁན་ཌི་མངའ་སྡེའི་ཀུ་མོན་(Kumaon, Uttrakhand)  ཁུལ་དུ་གཏོགས་པའི་པོ་རི་གྷར་ཝལ་ (Pauri-Garhwal) དང་། ནེ་ནི་ཏཱལ་ (Nainital)། ཨལ་མོ་ར་(Almora)། དྷར་ཅུ་ལ་(Darchula) བཅས་དང་། མཐའ་མཇུག་དེར་བྱང་ཤར་མངའ་སྡེ་ཨ་རུ་ཎ་ཅལ་གྱི་ཀ་ལིམ་པོང་དང་། རྡོ་རྗེ་གླིང་། སྒང་ཏོག ཨི་ཊི་ན་གྷར། རྟ་དབང་བཅས་ནང་བསྐྱོད་རྒྱུ་ཡིན་འདུག

སྐོར་སྐྱོད་ཀྱི་ལམ་བར་དུ་ས་གནས་ཀྱི་སློབ་གྲྭ་དང་གྲོང་གསེབ། ཁྲོམ་ར། ཚོགས་སྡེ་སོགས་འདུ་འཛོམས་ཅི་རིགས་སུ།  ༧གོང་ས་རྒྱལ་བ་རིན་པོ་ཆེ་མཆོག་བོད་ནས་རྒྱ་གར་ལ་བཙན་བྱོལ་དུ་ཆིབས་བསྒྱུར་བསྐྱངས་པའི་སྐོར་གྱི་ཧིན་སྐད་ཐོག་ཕབ་བསྒྱུར་ཞུས་པའི་གློག་བརྙན་ (Dalai Lama- Escape to India) སྐར་མ་ ༨༠ ཅན་དེ་ཉིད་གང་མང་སྟོན་ཐབས་བྱ་རྒྱུ་ཡིན་སྐོར་དང་། དེ་བཞིན་ལམ་བར་གྱི་ས་གནས་གཞོན་སྐྱེས་རྣམས་ལ་རྩོམ་ཡིག་སྐོར་གྱི་ཟབ་སྦྱོང་ཡང་སྤྲོད་ཐབས་བྱ་རྒྱུ་ཡིན་སྐོར་བཀོད་ཡོད་འདུག

བསྟན་འཛིན་བརྩོན་འགྲུས་ལགས་ཀྱིས་འདི་ལོའི་ཕྱི་ཟླ་ ༢ པའི་ཚེས་ ༡༢ ཏེ་བོད་ཀྱི་ལོ་སར་ཚེས་གཅིག་ནས་ཕྱི་ཟླ་ ༣ ཚེས་ ༩ བར་ཟླ་གཅིག་ཙམ་རིང་བོད་རང་བཙན་ཆེད་བཞུགས་སྒར་དྷ་ས་ནས་ལྡི་ལི་བར་བོད་དོན་གོམ་བགྲོད་ལས་འགུལ་སྤེལ་ཡོད་པ་དང་། ཐེངས་འདིའི་ལས་འགུལ་སྐབས་བསྟན་འཛིན་བརྩོན་འགྲུས་ལགས་ཀྱིས་བོད་དང་ས་འབྲེལ་ཡིན་པའི་རྒྱ་གར་གྱི་མངའ་སྡེ་ཁག་གི་བློན་ཆེན་རྣམ་པས་སོ་སོའི་མངའ་སྡེ་དེ་བོད་དང་ས་འབྲེལ་ཡིན་པ་ལས། རྒྱ་ནག་དང་ས་འབྲེལ་མིན་པའི་ཡོངས་ཁྱབ་གསལ་བསྒྲགས་གནང་དགོས་པའི་རེ་འདུན་ཤུགས་ཆེན་པོ་འདོན་གྱི་ཡོད་པ་རེད།

གསར་འགོད་པ། པ་སངས་ཚེ་རིང་།