རྒྱ་ནག་གཞུང་ལ་ངོ་རྒོལ་གྱིས་རྩོམ་ཡིག་གང་མང་བྲིས་མྱོང་བའི་བོད་ཀྱི་ན་གཞོན་སྙན་ངག་པ་དང་ཆབ་སྲིད་བཙོན་ཟུར་ཚེ་དཔའ་ལགས་ནད་གཞིའི་རྐྱེན་བྱས་ཏེ་གཅིག་སྒྲིལ་རྫོང་སྨན་ཁང་ཞིག་ཏུ་འདས་གྲོངས་སུ་ཕྱིན་ཡོད་འདུག
འདི་གའི་གསར་འགོད་པར་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༡༩ ཉིན་བོད་མགོ་ལོག་གཅིག་སྒྲིལ་ནས་ཡིན་པའི་བོད་རིགས་གཞོན་སྐྱེས་སྙན་ངག་པ་དང་དེ་སྔ་རྒྱ་ནག་གཞུང་གིས་འཛིན་བཟུང་དང་བཀག་ཉར་སོགས་བྱས་མྱོང་བའི་ཚེ་དཔའ་འམ་སྨྱུག་མིང་ལ་འཕྱན་བྷང་ལགས་ཆང་འཐུང་བར་རྐྱེན་བྱས་ཏེ་སྨན་ཁང་དུ་འདས་གྲོངས་སུ་ཕྱིན་ཡོད་པ་དང་། ཁོང་ནི་བོད་ཀྱི་སྐད་ཡིག་དང་བོད་མི་རིགས་ཀྱི་ལས་དབང་ཐད་ནམ་རྒྱུན་ནས་སེམས་ཤུགས་ཅན་ཞིག་ཡིན་པ་དང་། ཐེངས་འདིར་ཁོང་འདས་གྲོངས་སུ་ཕྱིན་པར་བོད་ནང་གི་སྐད་འཕྲིན་སོགས་དྲ་ལམ་ཁག་ཏུ་བོད་མི་ཚོས་གླེང་སློང་ཤུགས་ཆེར་བྱེད་བཞིན་འདུག
བོད་ནང་གི་འབྲེལ་ཡོད་བོད་མི་ཞིག་གིས་འདི་གར་འགྲེལ་བརྗོད་གནང་བ་ལྟར་ན། ཚེ་དཔའ་ལགས་ནི་ནམ་རྒྱུན་སྙན་ངག་དང་རིག་གནས་ཀྱི་ལས་རིགས་ཕྱོགས་ལ་དགའ་མོས་ཡོད་མཁན་ཞིག་ཡིན་པ་དང་། སློབ་གྲྭ་ཆེན་མོའི་སྐབས་སུ་རྒྱ་ནག་གཞུང་ལ་ངོ་རྒོལ་གྱིས་རྩོམ་ཡིག་ཁག་སྤེལ་བ་ལ་བརྟེན་ནས་ཐེངས་འགའི་རིང་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ཁོང་གི་རྩོམ་ཡིག་ཁག་ཅིག་བཀག་བསྡོམས་དང་འབྲེལ་ནས་ཉེན་བརྡ་སོགས་ཀྱང་བཏང་མྱོང་ཡོད་འདུག
ཐེངས་འདིར་སྙན་ངག་པ་ཁོང་འདས་གྲོངས་སུ་སོང་བར་བོད་ནང་གི་སྙན་ངག་པ་དང་ཤེས་ཡོན་པ་མང་པོས་གདུང་སེམས་མྱ་ངན་ཞུ་བཞིན་ཡོད་པའི་ཁྲོད། བོད་ཀྱི་སྙན་ངག་པ་དང་རྩོམ་པ་པོ་སྲིན་པ་ལགས་ནས། ད་ལྟའི་ཆར་བོད་ལ་སྙན་ངག་ལ་བློ་དཀར་ཡིན་པའི་ན་གཞོན་ཁོང་ལྟ་བུ་ཧ་ཅང་ཉུང་བ་དང་། ཁོང་ནི་རིག་གནས་སློབ་གཉེར་ལ་དགའ་མོས་དང་ཕུགས་བསམ་ཅན་གྱི་མི་ཞིག་ཡིན་སྐོར་དང་། ཡང་གཞན་ཞིག་གིས་ཁོང་གི་མི་ཚེ་ཧྲིལ་བོ་གནའ་གནོན་ལ་མགོ་མི་སྒུར་བར་ཁེར་ཚུགས་ལྡན་པའི་ངང་སྐྱེལ་ཡོད་སྐོར་སོགས་བརྗོད་འདུག
དྲ་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཚེ་དཔལ་ལགས་ནི་ཕྱི་ལོ་ ༡༩༩༢ ལོར་བོད་མགོ་ལོག་གཅིག་སྒྲིལ་ཏུ་སྐྱེས་ཤིང་། ཁོང་ལ་ཚེར་བསྟར་ལྗང་ལོ་ཞེས་པའི་སྙན་ངག་དེབ་ཅིག་དང་། ལྷུག་རྩོམ་གྱི་དེབ་ཆོབ་ཚ་པོ་དང་ར་རོ་པ། འགྱུར་དེབ་སྐྱེས་ཆེན་གྱི་སྙིང་སྟོབས་དང་དོགས་ནད་ཨང་དོན་བཞི། དེ་བཞིན་འཁྲབ་གཞུང་རྒུད་པ་སོགས་རྩོམ་ལུས་སྣ་ཚོགས་ཀྱི་བརྩམས་ཆོས་མང་པོ་བྲིས་གནང་ཡོད་འདུག
ལྷོ་ཕྱོགས་གསར་འགོད་པ་དོན་འགྲུབ་བཀྲ་ཤིས།
