དོན་དངོས་འདི་རེད།

(ཁ་དང་གྲུ་མོ་ནང་ལ་འཁོར་ཏེ། མཛུབ་མོ་ལྔ་བཅིང་ཁུ་ཚུར་བྱོས།)

གཡུ་སྒང་དགེ་འདུན།

སྤྱིར་ང་རང་ལ་མཚོན་ན་ཁྲིམས་དང་སྒྲིག་གཞི་ལ་རྒྱུས་མངའ་དང་དོ་སྣང་ཡོད་མཁན་ཞིག་མིན། སྤྱི་འཐུས་སྐབས་བཅུ་དྲུག་པའི་རྒྱུན་ལས་དང་ཁྲིམས་ཞིབ་པ་གསུམ་གྱི་རྙོག་གླེང་ལས་ང་ལའང་རང་བཞིན་གྱིས་བཅའ་ཁྲིམས་རིན་པོ་ཆེར་དོ་སྣང་སྤྲད་དགོས་པའི་ཚོར་ཤུགས་ཤིག་གིས་རྩོད་གཞི་རེ་རེ་བཅའ་ཁྲིམས་ཀྱི་དགོངས་དོན་དང་མཐུན་མིན་ལྟ་འདོད་བྱུང་། འདི་ནི་ང་ལ་མཚོན་ན། བཅའ་ཁྲིམས་ཀྱི་སློབ་ཚན་ཞིག་ནང་སྦྱོང་བྱས་པ་དང་གཅིག་མཚུངས་ཡིན་པས། ད་རེས་རྙོག་གླེང་འདིས་མང་ཚོགས་ལའང་ཁྲིམས་དང་སྒྲིག་གཞིའི་ཟབ་སྦྱོང་ཞིག་སྤྲད་ཡོད་ལས་ཆེ། རང་རྒྱལ་གཞན་ཕམ་གྱི་ལས་དོན་ཤ་སྟག་གི་འཐབ་ར་ལྟ་བུ་བྱས་ཏེ་བསྡད་ན་སྤྱི་བའི་ལས་དོན་མང་པོ་ཞིག་འཐུས་ཤོར་ལ་འགྲོ་བ་གདོན་མི་ཟ། འདས་པའི་ལོ་བཅུའི་ནང་ལ་མཇུག་བསྡོམས་ཤིག་བརྒྱབ་སྟེ། ད་ལྟའི་རྙོག་གྲ་འདི་ཐོག་མའི་མགོ་ཚུགས་ས་དེ་ནས་ཉེ་ཆར་སྤྱི་འཐུས་ཉེར་གཉིས་ཀྱིས་བར་བརྒལ་ཚོགས་གཙོ་ལས་དམ་འབུལ་མ་ཞུས་པའི་བར་དོན་དངོས་བཅའ་ཁྲིམས་དང་སུ་འགལ་ཡོད་མེད། བཅའ་ཁྲིམས་རིན་པོ་ཆེའི་དགོངས་དོན་རེ་རེ་རྒྱུ་མ་ཕུ་འདེད་བྱས་ན། ཧ་ཅང་གསལ་པོ་གསལ་རྐྱང་ཡིན་པས། ཁ་དང་གྲུ་མོ་ནང་ལ་འཁོར་ཏེ། མཛུབ་མོ་ལྔ་བཅིང་ཁུ་ཚུར་བྱས་ན་བཟང་། དེ་མ་གཏོགས་རང་རྒྱལ་གཞན་ཕམ་གྱི་ཀུན་སློང་ཁོ་ནའི་ཐོག་བསྡད་ན། མཐའ་མའི་སྤྱི་བའི་འཐུས་ཤོར་ཡོད་ཚད་བཅའ་ཁྲིམས་དང་སུ་འགལ་ཡོད་ན་དེས་འཁུར་དགོས་པ་རེད། མི་མང་དཀྱུས་མ་ཞེན་ཁོག་གི་ཚོར་བའི་སྨྱོས་ཟིན་པ་དག་ལ་མི་ཕན་ཡང་། རང་ཉིད་ཀྱིས་མགོ་མ་འཚོས་པར་དབར་དུ་ལྷག་པའི་བར་དོ་བ་རྣམས་ཀྱི་ཁྲོད་ནས་རེ་གཉིས་ལ་ཕན་སྲིད་པས་ངས་བཅའ་ཁྲིམས་དང་འགལ་བའི་ཆ་དག་འདིར་འགོད་པར་བྱ། ཡིན་ནའང་དེ་དོན་དངོས་སུ་མཐོང་དང་མི་མཐོང་མི་རང་ཉིད་ཀྱི་ཀུན་སློང་གཙང་མིན་དང་རང་གཤིས་དྲང་མིན་ལ་ཐུག་ཡོད། 

བཅའ་ཁྲིམས་དོན་ཚན་བཞི་བཅུ་པ། སྤྱི་འཐུས་ལྷན་ཚོགས་ཀྱི་ཚོགས་འདུ།

འཆར་ཅན་སྤྱི་འཐུས་ལྷན་ཚོགས་ཀྱི་ཚོགས་འདུའི་ཚོགས་ཚེས་དང་། དུས་ཡུན། ས་གནས་བཅས་སྤྱི་འཐུས་རྒྱུན་ལས་དང་གོ་བསྡུར་ཐོག་སྤྱི་འཐུས་ཚོགས་གཙོ་ལྷན་རྒྱས་ཀྱིས་གཏན་ལ་ཕབ་པ་ལྟར་ཚོགས་དྲུང་ལས་ཁུངས་ནས་སྤྱི་འཐུས་སོ་སོར་ཚོགས་བསྐོང་བརྡ་ཁྱབ་གཏོང་རྒྱུ་དང་། ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ། ཞེས་པ་ལྟར།

ད་ལྟའི་རྙོག་གྲའི་འབྱུང་རྩ་གོང་དུ་འཁོད་པའི་ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ་ཞེས་པ་དེ་རེད། མང་ཚོགས་ཚང་མས་ཤེས་དགོས་པ་ཞིག་ནི། སྤྱི་འཐུས་རྒྱུན་ལས་ཀྱིས་བཅའ་ཁྲིམས་དོན་ཚན་ ༦ པ་དང་། དོན་ཚན་ ༤༩ པའི་ནང་གསེས་ ༢ པའི་དགོངས་དོན་ལྟར་ ༢༠༢༡ ཟླ་ ༣ པའི་བར་ཚོགས་འདུ་འཕར་འགྱངས་བྱས་པ་རེད།

སྐབས་དེ་དུས་ང་ཚོའི་གནས་ཡུལ་རྒྱ་གར་ནང་དབུས་དང་མངའ་སྡེའི་གྲོས་ཚོགས་ནི། ཚོགས་ཟིན་པ་དང་། འཚོགས་བཞིན་པ། མ་འོངས་པར་ཚོགས་རྒྱུ་བཅས་རེད། ཐ་ན་གློག་བརྙན་ཁང་གི་སྒོ་ཡང་ཕྱེ་ཡོད་པ་རེད། སྐབས་དེར་རྒྱ་ནད་ཏོག་དབྱིབས་ ༡༩ བའི་རྐྱེན་གྱིས་ཚོགས་ཐུབ་ཀྱི་མི་འདུག་པའི་གནས་ཚུལ་བགྲང་སྟེ་ཚོགས་འདུ་ ༢༠༢༡ ཕྱི་ཟླ་གསུམ་པ་བར་ཕྱིར་འགྱངས་བྱས་ཏེ་ཚོགས་སྐབས་གཅིག་མེད་པར་བཟོས་པ་རེད། འདི་བཅའ་ཁྲིམས་དང་འགལ་བ་རེད། འགལ་མཁན་སྤྱི་འཐུས་ལྷན་ཚོགས་མ་རེད། རྒྱུན་ལས་རེད། སྤྱི་འཐུས་རྒྱུན་ལས་ཀྱིས་གོ་བསྡུར་ཐོག་ཟླ་དྲུག་ནང་ཚུན་ཚོགས་ཚེས་དང་དུས་ཡུན་སོགས་གཏན་ཕབ་ལྟར་ཚོགས་དྲུང་ལས་ཁུངས་ནས་སྤྱི་འཐུས་སོ་སོར་བརྡ་ཁྱབ་གཏོང་དགོས་པ་ཞིག་རེད། 

བཅའ་ཁྲིམས་དོན་ཚན་ཞེ་གཉིས་པ། སྤྱི་འཐུས་ཀྱི་རྒྱུན་ལས།

ནང་གསེས་གཉིས་པ། ༢༽ རྒྱུན་ལས་ཀྱི་ལས་དོན་བྱེད་ཕྱོགས་དང་། དབང་ཚད་སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་ཁྲིམས་ལུགས་སམ། སྒྲིག་གཞི་ལྟར་ལག་ལེན་བསྟར་རྒྱུ། ཞེས་པ་ལྟར་སྤྱི་འཐུས་རྒྱུན་ལས་བཅའ་ཁྲིམས་ཀྱི་རྒྱ་ལས་འགྲོ་ས་མེད་པ་གསལ་པོ་རེད།

 སྤྱི་འཐུས་རྒྱུན་ལས་ཀྱིས་དོན་ཚན་ཞེ་དགུ་པ། སྤྱི་འཐུས་ལྷན་ཚོགས་སུ་སྤྱི་འཐུས་ཀྱི་ཉུང་ཚད། ཅེས་པའི་ནང་གསེས་ ༢ དགོངས་དོན་ལྟར་ཚོགས་འདུ་ཕྱིར་འགྱངས་བྱས་པ་ཡིན་ཚུལ་བརྗོད་ཀྱི་ཡོད། ནང་གསེས་གཉིས་པའི་གོ་དོན་འདི་ལྟར། སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ། ཞེས་གསལ། ཚོགས་འདུ་བསྡུ་སྐོང་བྱས་ཏེ་ཉུང་མཐའི་གྲངས་ཚད་ལོངས་མིན་ལྟ་དགོས་པ་ལས། གང་ཡང་མ་བྱས་པར་དབང་ཚད་བེད་སྤྱོད་གཏོང་ཆོག་པ་ཞིག་མ་ཡིན་པ་གསལ་པོ་རེད། སྤྱི་འཐུས་རྩ་འབོར་གྱི་སུམ་ཆ་གཉིས་འཛོམས་ན་ཚོགས་གཙོ་ཚོགས་གཞོན་འོས་བསྡུ་བྱ་རྒྱུའི་མཚོན་རང་རང་གི་ལས་དོན་བྱེད་པའི་དབང་ཆ་ཡོད། རྩ་འབོར་སུམ་ཆའི་གཉིས་འཛོམས་ཐུབ་དང་མི་ཐུབ་མ་བལྟས་པར་ཐག་གཅོད་བྱེད་རྒྱུའི་ཐོབ་དབང་བཅའ་ཁྲིམས་སུ་སྤྲད་མེད་པ་ཞིག་རེད། དེ་ཡང་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན། ཞེས་ཉིན་གྲངས་བདུན་ལས་མང་པ་ཙམ་མ་གཏོགས། ཟླ་དྲུག་ཡོལ་བ་ཙམ་མ་ཟད་ཚོགས་འདུ་རྗེས་མར་ཐུག་རག་བར་བཞག་ཆོག་པའི་དབང་ཚད་སྤྲད་མེད་པ་གསལ་པོ་གསལ་རྐྱང་རེད། 

བཅའ་ཁྲིམས་དོན་ཚན་རེ་དྲུག་པ། ཆེས་མཐོའི་ཁྲིམས་ཞིབ་ཁང་གི་དབང་ཚད།

༡ ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཞིབ་ཁང་དང་། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན། ཞེས་འཁོད་ཡོད་པ་དང་།

ནང་གསེས་གཉིས་པའི་ ༢། ཀ བཙན་བྱོལ་བོད་མིའི་བཅའ་ཁྲིམས་ཀྱི་ཚིག་དོན་འགྲེལ་བརྗོད་བྱེད་ཕྱོགས་ལ་བརྟེན་པའི་རྩོད་གླེང་དང་། ཞེས་པའི་ཚིག་དོན་གྱིས་ཁྲིམས་ཞིབ་ཁང་གི་གོང་ན་གང་ཡང་མེད་པ་གསལ་པོ་བརྟན་འདུག བཅའ་ཁྲིམས་སྲུང་སྐྱོབ་པ་གཙོ་པོ་ཡིན་པ་ཧ་གོ་དོན་གསལ་རེད། རྒྱུ་མཚན་དེས་རྐྱེན་པའི་སྤྱི་འཐུས་རྒྱུན་ལས་བཅའ་ཁྲིམས་དོན་ཚན་བཞི་བཅུ་པ་དང་འགལ་བ་ལ་ཆེས་མཐོའི་ཁྲིམས་ཞིབ་ཁང་ནས་ལས་དོན་གནང་ཕྱོགས་བཅའ་ཁྲིམས་དགོངས་དོན་དང་མ་འགལ་བ་བཟོ་དགོས་པའི་བཀའ་ཁྱབ་བཏང་བ་རེད། རྒྱུན་ལས་ཀྱིས་བཅའ་ཁྲིམས་དོན་ཚན་ང་བརྒྱད་པའི་དགོངས་དོན་ལྟར་ཁྲིམས་ཞིབ་ཁང་གིས་ཇུས་གཏོགས་བྱེད་མི་ཆོག་ཚུལ་བཀོད།

དོན་ཚན་ང་བརྒྱད་པའི་དགོངས་དོན་འདི་ལྟར། སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་པ། ཞེས་པའི་གནང་གསེས་ ༡ སྤྱི་འཐུས་ལྷན་ཚོགས་ཀྱི་ལས་དོན་གང་ཞིག་ཚད་ལྡན་ཡིན་མིན་དང་ཐག་གཅོད་བྱེད་ཕྱོགས་ལྷན་ཚོགས་ཀྱི་སྒྲིག་གཞི་དང་མཐུན་མིན་ལ་བསྙད་དེ་ཁྲིམས་ཞིབ་ཁང་ནས་རྩད་གཅོད་མི་ཆོག ཅེས་པ་འདི་གཙོ་བོར་བཟུང་བ་རེད། ཁྲིམས་ཞིབ་པས་བཀའ་ཁྱབ་གནང་ཡུལ་དང་བཅད་ཁྲལ་ཕོག་ཡུལ་སྤྱི་འཐུས་རྒྱུན་ལས་ཡིན་པ་ལས་སྤྱི་འཐུས་ལྷན་ཚོགས་མིན་པ་ཧ་གོ་དགོས་པ་གལ་ཆེན་པོ་རེད། མགོ་བདེ་དྲན་འཕྲུལ་མང་པོ་ཞིག་གིས་ལོག་འགྲེལ་བྱེད་ཀྱི་ཡོད་པ་རེད། སྤྱི་འཐུས་རྒྱུན་ལས་ཀྱིས་སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་ཁྲིམས་ལུགས་སམ། སྒྲིག་གཞི་ལྟར་ལག་ལེན་བསྟར་དགོས་པ་ཞིག་རེད་དེ། རྒྱུན་ལས་ཀྱིས་ལག་བསྟར་བྱས་མེད་པ་གསལ་པོ་རེད། གོང་འཁོད་དོན་ཚན་ང་བརྒྱད་པའི་ནང་གསེས་ ༡ དགོངས་དོན་སྤྱི་འཐུས་ལྷན་ཚོགས་ཀྱི་ལས་དོན་ཞིབ་རྩད་གཅོད་མི་ཆོག་པ་མ་གཏོགས། སྤྱི་འཐུས་རྒྱུན་ལས་ལ་ཞིབ་རྩད་མི་ཆོག་པ་ཞིག་མ་རེད། བཅའ་ཁྲིམས་དོན་ཚན་ཞེ་གཉིས་པའི་ནང་གསེས་ ༢ དགོངས་དོན་ལ་ཞིབ་གཟིགས་གནོངས། 

བཅའ་ཁྲིམས་དོན་ཚན་དྲུག་ཅུ་རེ་གསུམ་པ།

ནང་གསེས་(༤) སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གྱི་གསུམ་ཆ་གཉིས་ཡན་གྱིས་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོད་བཞག་སྟེ་འཕོ་འགྱུར་བྱེད་དགོས་བྱུང་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུན་ལོ་ལྔའམ། རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན། ཁྲིམས་ཞིབ་པ་གཞན་གཉིས་རང་ལོ་དྲུག་ཅུ་རེ་ལྔ་ཧྲིལ་པོ་མ་ལོན་པར་ལས་འཁུར་རྒྱུན་འཛིན་བྱ་རྒྱུ། ཞེས་གསལ།

ཁྲིམས་ཞིབ་པ་གསུམ་འཕོ་འགྱུར་གྱི་ཐད། སྤྱི་འཐུས་ལྷན་ཚོགས་ཀྱི་གྲོས་ཆོད་དེའི་ནང་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ (༤) གཞིར་བཟུང་སྟེ་འཕོ་འགྱུར་བཏང་བ་ཡིན་ལུགས་བཀོད། དེ་ནི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་ཀྱི་ཡུན་ཚད་སྐོར་རེད། འཕོ་འགྱུར་གཏོང་རྒྱུའི་བྱ་རིམ་ཞིག་མ་རེད། 

བཅའ་ཁྲིམས་དོན་ཚན་ང་བཞི་པ། གྲོས་བསྡུར་བཀག་སྡོམ།

ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་གང་རུང་འཕོ་འགྱུར་བྱ་རྒྱུའི་སྐོར་དང་། སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོག་ཞིབ་ཐོག་སྤྱི་འཐུས་ལྷན་ཚོགས་སུ་སྙན་ཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སློང་དང་། གྲོས་བསྡུར་བྱེད་མི་ཆོག ཅེས་གསལ།

སྤྱི་འཐུས་ལྷན་ཚོགས་ཀྱིས་ཁྲིམས་ཞིབ་པ་གསུམ་དུས་གཅིག་ཏུ་འཕོ་འགྱུར་བཏང་། འཕོ་འགྱུར་གཏོང་དགོས་དང་མི་དགོས་ཞེས་པའི་གསང་བའི་འོས་འཕངས་པར་སྤྱི་འཐུས་སུམ་ཅུ་སོ་གཅིག་གིས་འཕོ་འགྱུར་གཏོང་དགོས་པར་འོས་འཕངས་ཏེ་གྲོས་ཆོད་ཡིག་ཆ་ཨང་ ༣༩ པ་བཞག འདིའི་གནད་དོན་གཙོ་བོ། ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་གང་རུང་འཕོ་འགྱུར་བྱ་རྒྱུའི་སྐོར་དང་། ཞེས་གསལ་བ་མ་གཏོགས་སྡེབ་གཅིག་ཏུ་གསུམ་ཆ་འཕོ་འགྱུར་གཏོང་སྟངས་བཅའ་ཁྲིམས་སུ་ཚིག་ཙམ་ཡང་གསལ་མེད་པ་དང་། སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོག་ཞིབ་ཐོག་སྤྱི་འཐུས་ལྷན་ཚོགས་སུ་སྙན་ཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སློང་དང་། གྲོས་བསྡུར་བྱེད་མི་ཆོག་ཅེས་པ་འདི་དང་འགལ་ཡོད་པ་རེད། སྤྱི་འཐུས་ལྷན་ཚོགས་ལ་ཁྲིམས་ཞིབ་པ་གསུམ་སྡེབ་གཅིག་ལ་འཕོ་འགྱུར་གཏོང་རྒྱུའི་དབང་ཚད་དང་། སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་སོགས་ཀྱི་བརྒྱུད་རིམ་ཡང་བྱུང་མེད་པས་གནད་དོན་འདི་ལྷག་པ་རེད། སྤྱི་འཐུས་ཉེར་གཅིག་གིས་གྲོས་ཆོད་ཡིག་ཆ་ཨང་ ༣༩ པ་དེ་བཅའ་ཁྲིམས་དང་འགལ་བའི་ནོར་འཁྲུལ་ར་འཕྲོད་པའི་ཐོག་ནས་ཁྲིམས་ཞིབ་པ་གསུམ་རང་འཇགས་ཞབས་སྟེགས་སུ་ཕེབས་དགོས་པའི་རེ་སྐུལ་ཞུས་པས་སྤྱི་འཐུས་ལྷན་ཚོགས་ཀྱི་རྩ་འབོར་གསུམ་ཆ་གཉིས་ཡན་གྱི་གྲོས་ཆོད་ ༣༩ པ་དེ་རྒྱབ་སྐྱོར་བྱས་ལུགས་གཞི་རྩ་བཤིག་ཟིན་པ་རེད། ཚོགས་གཙོ་དང་ཁྲིམས་ཞིབ་པ་ཆེ་བ་མེད་པའི་ཆོལ་ཁོངས་གཅིག་པ་ཡིན་པའི་ཚོགས་ཆུང་བཙུགས་ཏེ། ཐབས་བརྒྱ་ཇུས་སྟོང་གིས་ཁྲིམས་ཞིབ་པའི་འོས་མི་བཙལ་ཀྱང་མ་རྙེད་པ་རེད། གྲོས་ཚོགས་འཕར་མ་འཚོགས་ཐུབ་པའི་དུས་སུ་མ་ཚོགས་པར་ཕྱིར་འགྱངས་བྱས་ཏེ། རྗེས་སུ་ཡུལ་ཁྲིམས་ཀྱིས་ཁྱིམ་སྡོད་བཀག་རྒྱ་བཏང་སྐབས་ཚོགས་འདུ་འཕར་མ་འཚོག་རྒྱུའི་ཚོགས་བརྡ་བཏང་བས་ཡུལ་ཁྲིམས་དང་འགལ་བ་སོགས་བཅའ་ཁྲིམས་དང་ཡུལ་ཁྲིམས་གཉིས་ཀ་འགལ་བའི་སྐྱོན་བྱུང་ཡོད། བཅའ་ཁྲིམས་དོན་ཚན་ལྔ་པའི་དགོངས་དོན་ལྟར་རྩིས་མེད་མ་ཆགས་རང་ཆགས་རེད། ཁྲིམས་ཞིབ་པ་འཕོ་འགྱུར་གཏོང་སྟངས་སྐོར་གྱི་བཅའ་ཁྲིམས་དགོངས་དོན་ངོ་མ་ནི། གོང་འཁོད་བཅའ་ཁྲིམས་དོན་ཚན་ང་བཞི་པ་དེ་རེད། དོན་ཚན་དེ་དང་གཏན་འགལ་ཆགས་འདུག 

བཅའ་ཁྲིམས་དོན་ཚན་ལྔ་པ། བཅའ་ཁྲིམས་ཀྱི་ཚད་འཛིན།

༡ ཁྲིམས་ལུགས་དང་། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་ཡང་བཅའ་ཁྲིམས་འདིའི་དོན་ཚན་གང་རུང་དང་འགལ་ཚེ་འགལ་བའི་ཆ་དེ་རྩ་འཛིན་མེད་པ་བྱ་རྒྱུ། ཞེས་པའི་དགོངས་དོན་ལྟར། རྒྱུན་ལས་ཀྱིས་གོང་འཁོད་ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ་ཞེས་པའི་བཅའ་ཁྲིམས་དགོངས་དོན་དང་ཡོངས་སུ་བརྒལ་ཏེ་ཚོགས་དུས་གཅིག་མེད་པ་བཟོས་པ་སྟེ། སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་ཁྲིམས་ལུགས་སམ། སྒྲིག་གཞི་ལྟར་ལག་ལེན་བསྟར་ཐུབ་མེད་པ། རྒྱུན་ལས་ཀྱིས་བཅའ་ཁྲིམས་དོན་ཚན་བགྲང་བ་དག་གི་དགོངས་དོན་ནི། ལག་བསྟར་བྱེད་པའི་དོན་དངོས་དང་འགལ་བའི་ཆ་ཤ་སྟག་ཏུ་གྱུར་པ། ལག་བསྟར་བྱས་པའང་བཅའ་ཁྲིམས་དང་འགལ་བ་ཤ་སྟག་ཡིན་པ་བཅས་ཀྱིས་བཅའ་ཁྲིམས་དོན་ཚན་ལྔ་པའི་ནང་གསེས་ ༡ དགོངས་དོན་ལྟར་རྩ་འཛིན་མེད་པར་བཏང་སྟེ། ཁྲིམས་ཞིབ་པ་གསུམ་སླར་ཡང་ལས་གནས་སུ་ཕེབས་པ་རེད། གོང་འཁོད་ཚང་མ་ཉོག་བཤད་མ་མང་བར་མདོར་བསྡུས་ན་དེ་འདྲ་ཞིག་རེད། 

བཅའ་ཁྲིམས་དོན་ཚན་ཞེ་བདུན་པ། སྤྱི་འཐུས་ཀྱི་དམ་འབུལ།

འདེམས་ཐོན་སྤྱི་འཐུས་ཁོངས་ནས་སྤྱི་འཐུས་ལས་རྒྱུན་རིང་ཤོས་དེར་སྤྱི་འཐུས་རྒྱུན་ལས་ཀྱིས་བར་བརྒལ་ཚོགས་གཙོར་བསྐོ་བཞག་བྱེད་དགོས། གལ་ཏེ་ལས་རྒྱུན་འདྲ་མཉམ་བྱུང་ཚེ་དེའི་ཁོངས་ནས་རང་ལོ་བགྲེས་ཤོས་དེར་བསྐོ་གཞག་བྱེད་དགོས། བར་བརྒལ་ཚོགས་གཙོས་ཆེས་མཐོའི་ཁྲིམས་ཞིབ་པ་ཆེ་བའི་མདུན་སར་དམ་འབུལ་ཞུས་རྗེས། སྤྱི་འཐུས་རེ་རེས་རང་ཉིད་སྤྱི་འཐུས་ཀྱི་ལས་འཁུར་དུ་མ་ཞུགས་གོང་བར་བརྒལ་ཚོགས་གཙོའི་མདུན་སར་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས། ཚོགས་གཙོ་དང་ཚོགས་གཞོན་འདེམས་ཐོན་བྱུང་རྗེས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང་། ཚོགས་གཙོ་ས་གནས་སུ་མེད་སྐབས་ཚོགས་གཞོན་མདུན་སར་དམ་འབུལ་ཞུ་དགོས། ཞེས་གསལ་བ་ལྟར། སྐབས་བཅུ་བདུན་པའི་སྤྱི་འཐུས་སུ་མདོ་སྟོད་སྤྱི་འཐུས་བཅུ་དང་ཆོལ་ཁོངས་མདོ་སྟོད་ནས་ཡིན་པའི་ཆོས་བརྒྱུད་སྤྱི་འཐུས་བཅུ། དབུས་གཙང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར། བྱང་ཨ་རིའི་སྤྱི་འཐུས་བསྟན་འཛིན་འཇིགས་མེད་བཅས་མི་ཉེར་གཉིས་ཀྱིས་བར་བརྒལ་ཚོགས་གཙོའི་མདུན་ནས་སྤྱི་འཐུས་དམ་འབུལ་མ་ཞུས་པར་༸རྒྱལ་བའི་སྐུ་པར་དང་བཅའ་ཁྲིམས་དེབ་ཀྱི་མདུན་ནས་དམ་འབུལ་ཞུས། ཁོ་ཚོས་བཤད་དོན། ཁྲིམས་ཞིབ་པ་གསུམ་ཁྲིམས་འགལ་གྱིས་ཡར་ལས་གནས་སུ་ཡོང་བ་ཡིན་པས་ངོས་ལེན་མེད་ཟེར། ཡར་ཡོང་ན་ཡོང་ལུགས་ཡོང་སྟངས་ཤིག་དགོས་ཟེར། ཕར་བལྟས་ཚེ་ཁོ་ཚོས་བཤད་པ་འདྲ་ཆགས་པོ་ཞིག་འདུག་ཀྱང་། དོན་ངོ་མའི་སྒང་ལ་སོང་ན། གོང་འཁོད་བཞིན་བཅའ་ཁྲིམས་དང་འགལ་བའི་ཆ་གང་ན་མང་བ་ཞིབ་ལྟ་ཞིག་བྱས་ན། ཁོ་ཚོས་མགོ་ནས་མཇུག་བར་ཅི་བྱས་བཅའ་ཁྲིམས་དང་འགལ་བའི་རིགས་ཤ་སྟག་ལས་བྱུང་མེད་པ་གསལ་གསལ་ཐང་ཐང་ཡིན་པ་ཤེས་དགོས་པ་གལ་ཆེན་པོ་རེད།

ཁྲིམས་ཞིབ་པ་གསུམ་ཡར་ཞབས་སྟེགས་སུ་ཕེབས་ལུགས་ཕེབས་སྟངས་བཅའ་ཁྲིམས་དང་མཐུན་པའི་དོན་ཚན་རེ་རེ་བགྲང་ནས་གསལ་བཤད་ཡག་ཐག་ཆོད་ཅིག་འདུག་པ་དེས་གོ་མི་ཆོད་པར་ད་དུང་ཁྲིམས་འགལ་ཡིན་ཚུལ་གྱིས་འཕག་འཚག་རྒྱག་ན། སྐབས་བཅུ་བདུན་པའི་སྤྱི་འཐུས་འོས་ཐོན་མདོ་སྟོད་སྤྱི་འཐུས་བཅུ་དང་ཆོལ་ཁོངས་མདོ་སྟོད་ནས་ཡིན་པའི་ཆོས་བརྒྱུད་སྤྱི་འཐུས་བཅུ། དབུས་གཙང་སྤྱི་འཐུས་གཅིག བྱང་ཨ་རིའི་སྤྱི་འཐུས་གཅིག་བཅས་མི་ཉེར་གཉིས་ཀྱིས་བྱེད་སྟངས་ནི། དེ་ལས་ཀྱང་བཅའ་ཁྲིམས་དང་འགལ་འདུག རང་གི་ངོའི་གཡག་འདྲ་བོ་མི་བཤད་པར་གཞན་གྱི་ངོའི་ཤིག་འདྲ་པོ་བརྗོད་ན་ངོ་ཚ་དགོས་པ་ཞིག་རེད། ཁོ་ཚོས་མདའ་མོ་འཕེན་འདོད་མ་ཡིན་པར། གཞུ་མོ་གཅོག་འདོད་ཀྱིས་དཔེ་ལྟར། དམ་འབུལ་མ་ཞུས་སྔོན་ནས་ཚོགས་དྲུང་ལས་ཁུངས་སུ་འཇིགས་སྐུལ་གྱིས་བཅའ་ཁྲིམས་སུ་མ་གསལ་བའི་དམ་འབུལ་བྱེད་སྟངས་གསར་གཏོད་བྱས་ཏེ་གསལ་བསྒྲགས་བྱེད་བཅུག་པ་ཡིན་ནམ། ཡང་ན། ཚོགས་དྲུང་གིས་དབང་ཐག་ཆོད་པོས་དེ་འདྲ་གསར་གཏོད་བྱས་པ་ཡིན་གསལ་པོ་མི་ཤེས་མོད། འོན་ཀྱང་། ཁ་གསལ་དོན་གསལ་དུ་ཡོད་པའི་བཅའ་ཁྲིམས་དགོངས་དོན་རྡོག་རལ་དུ་བཏང་། ཞེན་ཁོག་གི་བུད་ཤིང་ལ་གཡོ་སྒྱུ་ཁྲམ་གསུམ་གྱིས་མེ་སྦར་ཏེ་དམངས་སེམས་འཁྲུག་ཏུ་བཅུགས། རྩམ་པ་རང་གིས་ཟོས། རྩམ་ཁུག་མིའི་མགོར་སྐོན་བཞིན་པ་དེ་ཤེས་དགོས། ཁྲིམས་ཡིག་གི་གཞི་རྟེན་མེད་པར་འཕོ་འགྱུར་གྱི་བྱ་རིམ་ལག་བསྟར་བྱས་པ་ཡིན་ན། དེ་ཁྲིམས་འགལ་དུ་མི་བརྩི་ཀ་མེད་རེད། དེའི་གྲས་མ་འོངས་པར་བོད་མིའི་སྒྲིག་འཛུགས་འཐོར་ཞིག་ཏུ་འགྲོ་བྱེད་ཀྱི་ཉེན་ཚབས་ཆེ་ཤོས་ཤིག་ཡིན་པ་ཟུར་བལྟས་ལེབ་མཐོང་རེད།

བརྒྱ་བཤད་ན་སྟོང་བཤད་ན་བསྡོམས་ཚིག་གསུམ་སྟེ།

༡༽ བཅའ་ཁྲིམས་དོན་ཚན་བཞི་བཅུ་པའི་དགོངས་དོན་དང་འགལ་བ།

༢༽ བཅའ་ཁྲིམས་དོན་ཚན་ང་བཞི་པའི་དགོངས་དོན་དང་འགལ་བ། གོང་འཁོད་འདི་གཉིས་དང་འགལ་མེད་ན། ད་ལྟའི་རྙོག་གྲ་དེ་ཡོང་གི་མ་རེད། གཞན་རྣམས་གོང་འཁོད་འདི་གཉིས་དང་འབྲེལ་ནས་བཅའ་ཁྲིམས་དང་འགལ་བ་ཤ་སྟག་རེད།

༣༽ འགལ་བའི་ཆ་དེ་ལ་བརྟེན་ནས་བཅའ་ཁྲིམས་དོན་ཚན་ལྔ་པའི་དགོངས་དོན་ལག་བསྟར་གནང་སྟེ། ཁྲིམས་ཞིབ་པ་གསུམ་ཡར་ཕེབས་པ་ཞིག་རེད། ཕྱོགས་ཞེན་དང་བསླུ་བྲིད་ཀྱི་གཡོ་འོག་ཏུ་མ་ཚུད་པར་མི་མང་གི་བསམ་བློ་རང་རྐྱ་འཕེར་དགོས།

མཆན། གོང་དུ་བཀོད་པའི་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།