བོད་ཁམས་ཏྲེ་ཧོར་དར་རྒྱས་ཡུལ་ཚོའི་རྒྱལ་བསྟན་དགེ་རྩའི་བསླབ་གཞི་དང་ཁྲིད་གཞི་ཚང་མ་རྒྱ་ཡིག་རྒྱ་སྐད་ནང་བསྒྱུར་ཏེ་ལོ་འཁོར་ཡིག་རྒྱུགས་ཀྱང་རྒྱ་ཡིག་ནང་གཏོང་དགོས་པ་དང་དེ་ལྟར་མ་བྱས་ཚེ་སློབ་གྲྭ་སྒོ་བརྒྱག་རྒྱུ་ཡིན་པའི་བཙན་བཀའ་བཏང་ཡོད་འདུག
འདི་གའི་གསར་འགོད་པར་བོད་ནང་གི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་མགོ་ཙམ་ལ་རྒྱ་ནག་ས་གནས་སྲིད་གཞུང་གིས་མདོ་ཁམས་ཏྲེ་ཧོར་དར་རྒྱས་ཡུལ་གྱི་རྒྱལ་བསྟན་དགེ་རྩ་སློབ་གྲྭའི་བསླབ་གཞི་དང་ཁྲིད་གཞི་ཚང་མ་རྒྱ་ཡིག་རྒྱ་སྐད་ནང་བསྒྱུར་དགོས་པ་མ་ཟད། ལོ་འཁོར་ཡིག་རྒྱུགས་ཀྱང་རྒྱ་ཡིག་ནང་གཏོང་དགོས་པ་དང་། དེ་ལྟར་མ་བྱས་ཚེ་སློབ་གྲྭ་སྒོ་བརྒྱག་རྒྱུ་ཡིན་པའི་བཀོད་ཁྱབ་བཏང་ཡོད་ཀྱང་། ད་ལྟ་ས་གནས་སུ་རྒྱ་གཞུང་གིས་ཞིབ་བཤེར་དང་དམ་དྲག་ཤུགས་ཆེན་བྱས་པའི་རྐྱེན་གྱིས། ས་གནས་སྲིད་གཞུང་གི་བཀོད་ཁྱབ་ཡིག་ཆ་དེ་ཕྱིར་བསྐུར་ཐུབ་ཀྱི་མེད་པ་རེད།
གནས་ཚུལ་མཁོ་སྤྲོད་པས། བོད་མི་རིགས་རྩ་མེད་གཏོང་བར་བོད་ཀྱི་སྐད་དང་ཡི་གེ་བེད་མེད་གཏོང་དགོས་པའི་སྲིད་ཇུས་ངན་པ་སྤེལ་ནས། བོད་ཡུལ་གྱི་སློབ་གྲྭ་ཁག་ནང་བོད་སྐད་ཡིག་སློབ་ཁྲིད་ལ་དམ་དྲག་བྱས་དང་བྱེད་བཞིན་པ་རེད། ཅེས་དང་། གནད་དོན་དེའི་ཐད་ལ་ས་གནས་མི་མང་གིས་བོད་སྐད་ཡིག་བེད་མེད་བཏང་ནས། བོད་རིགས་རྒྱ་རིགས་ལ་བསྒྱུར་བའི་སྲིད་ཇུས་ཡིན་པར་བློ་འཚབ་བྱེད་བཞིན་འདུག ཅེས་ཡིག་ཐོག་ནས་འགྲེལ་བརྗོད་གནང་སོང་།
འདི་གའི་གསར་འགོད་པས་རྒྱུས་ལོན་བྱུང་བའི་གནས་ཚུལ་ལྟར་ན། རྒྱལ་བསྟན་དགེ་རྩ་སློབ་གྲྭ་ནི་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཁོངས་ཀྱི་མདོ་ཁམས་ཏྲེ་ཧོར་རོང་པ་ཚ་ཡུལ་ཚོའི་བཀྲ་ཤིས་དར་རྒྱས་དགོན་པའི་མཆོག་སྤྲུལ་རྒྱལ་བསྟན་བློ་བཟང་བྱམས་པ་མཆོག་གིས། ཕྱི་ལོ་ ༡༩༩༤ ཟླ་ ༡༠ བའི་ཚེས་ ༡ ཉིན་གསར་འཛུགས་གནང་བའི་སྒེར་གཉེར་སློབ་ཆུང་ཞིག་ཡིན་པ་དང་། སློབ་གྲྭ་དེར་འཛིན་རིམ་དང་པོ་ནས་དྲུག་པའི་བར་དང་། ལོ་རིམ་བརྒྱད་པའི་འཛིན་གྲྭ་གཅིག་དང་། སློབ་སྔོན་འཛིན་གྲྭ་གཅིག་བཅས་ཡོད་པར་སློབ་ཡོན་སྤྲོད་མི་དགོས་པ་དང་། བོད་སྐད་ཡིག་གཙོས་པའི་དབྱིན་ཡིག་དང་རྒྱ་ཡིག རྩིས་རིག་དང་གསོ་རིག ལག་ཤེས་སོགས་བོད་ཀྱི་གནའ་དེང་གི་ཤེས་བྱ་སྣ་ཚོགས་ཀྱི་སློབ་གསོ་སྒྲུབ་ཀྱི་ཡོད་ཅིང་། ཕྱི་ལོ་༢༠༢༠ ལོར་སློབ་གྲྭར་སློབ་མ་གྲངས་ ༣༧༧ དང་དགེ་ལས་ ༣༥ དང་། ད་བར་དུ་མཐར་ཕྱིན་སློབ་མ་ ༦༤༢ དང་ལས་རིགས་ལག་རྩལ་སློབ་གསོར་ཞུགས་མཁན་ ༡༧༠ བཅས་ཁྱོན་སློབ་ཕྲུག་ཆིག་སྟོང་ལྷག་སྐྱེད་སྲིང་གནང་ཡོད་འདུག
རྒྱལ་བསྟན་དགེ་རྩ་སློབ་ཆུང་བཙུགས་ནས་ད་བར་དུ་ས་གནས་མང་ཚོགས་ཀྱི་ངོས་ནས་རྒྱབ་སྐྱོར་དང་དགའ་བསུ་ཆེན་པོ་ཐོབ་ཡོད་པར་མ་ཟད། སྔ་རྗེས་སུ་ཟི་ཁྲོན་ཞིང་ཆེན་སྤྱི་ཚོགས་ནུས་པ་ལྡན་པའི་སློབ་འཛུགས་སྔོན་ཐོན་ཚོགས་པའི་བྱ་དགའ་དང་ཟི་ཁྲོན་ཞིང་ཆེན་སྤྱི་ཚོགས་ནུས་པ་ལྡན་པའི་སློབ་འཛུགས་སྔོན་ཐོན་མི་སྣའི་བྱ་དགའ་སོགས་ཐོབ་ཡོད་འདུག
རྒྱལ་བསྟན་དགེ་རྩ་སློབ་ཆུང་གསར་འཛུགས་གནང་མཁན་མཆོག་སྤྲུལ་བརྒྱལ་བསྟན་བློ་བཟང་བྱམས་པ་མཆོག་ནི་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཁོངས་ཀྱི་འབྲོག་ཁྱིམ་ཕལ་བ་ཞིག་ནས་འཁྲུངས་ཤིང་། ཕྱི་ལོ་༡༩༤༩ ལོར་རང་ལོ་གསུམ་གྱི་སྟེང་བཀྲ་ཤིས་དར་རྒྱས་དགོན་གྱི་མཆོག་སྤྲུལ་རྒྱལ་བསྟན་རིན་པོ་ཆེའི་ཡང་སྤྲུལ་དུ་ངོས་འཛིན་གནང་ནས་ཁྲི་སར་འཁོད་ཡོད་པ་དང་། ད་ལྟའི་ཆར་རྒྱལ་ཡོངས་འཐུས་མི་ཚོགས་ཆེན་གྱི་འཐུས་མི་དང་ཟི་ཁྲོན་ཞིང་ཆེན་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པའི་འགན་ཁུར་ཡོད་འདུག
གསར་འགོད་པ། སྐལ་བཟང་སྦྱིན་པ།
