ཨ་རིའི་གཞུང་གིས་ཚོགས་དྲུང་ལས་ཁུངས་སུ་འཕྲིན་ཡིག་ཅིག་བསྐུར་ཏེ་ཕྱི་ཟླ་དགུ་བའི་གྲོས་ཚོགས་འཚོག་ལ་ཉེ་བ་དང་བསྟུན་འདས་དོན་གྱི་འགལ་ཟླ་ཕར་བཞག་སྟེ་ཁ་ཚ་དགོས་གཏུག་གི་དཀའ་ངལ་སེལ་རྒྱུ་གལ་ཆེན་ཡིན་པའི་སྐུལ་ལྕག་གནང་འདུག
ཉེ་སྔོན་འདི་གའི་གསར་འགོད་པས་ཁ་པར་བརྒྱུད་ཚོགས་དྲུང་ལས་ཁུངས་ལ་བཀའ་འདྲི་ཞུས་ཏེ། ཨ་རིའི་གཞུང་གིས་བོད་མི་མང་སྤྱི་འཐུས་ལྷན་ཚོགས་ཀྱི་དཀའ་རྙོག་སེལ་ཐབས་བྱ་དགོས་པའི་འཕྲིན་ཡིག་ཅིག་བཏང་ཡོད་པ་དེའི་ནང་དོན་ག་རེ་ཡིན་པ་དང་ད་ལྟའི་ཆར་བོད་མི་མང་སྤྱི་འཐུས་རྣམས་ལ་ཕུལ་རྒྱུ་བྱུང་ཡོད་མེད་དྲིས་པར། སྐབས་དེར་ཚོགས་དྲུང་ཚེ་དབང་དངོས་གྲུབ་ལགས་ཀྱིས། ད་ལྟ་གནས་ཚུལ་དེའི་སྐོར་ལ་ཞུ་རྒྱུ་གང་ཡང་མེད་སྐོར་གསུངས་བྱུང་བ་དང་། གསར་འགོད་པས་ཤེས་རྟོགས་བྱུང་བ་ལྟར་ན། དེ་རིང་ཉིན་རྒྱབ་གཞི་ནས་ཚོགས་དྲུང་ལས་ཁུངས་ནས་དམ་འབུལ་ཞུ་ཕྱོགས་གཉིས་ཆགས་པའི་འདེམས་ཐོན་སྤྱི་འཐུས་རྣམས་ལ་འཕྲིན་ཡིག་དེ་ཕུལ་ཡོད་པ་རེད།
དེ་ཡང་འཕྲིན་ཡིག་དེ་ནི་ཨ་རིའི་བར་བརྒལ་རྒྱལ་སྲིད་དྲུང་ལས་ལེ་སཱ་པེ་ཊར་སན་ (Lisa Peterson) ལགས་ཀྱིས། ཟླ་འདིའི་ཚེས་ ༢ ཉིན་ཚོགས་དྲུང་ཚེ་དབང་དངོས་གྲུབ་ལགས་ཀྱི་མཚན་ཐོག་ཏུ་བཏང་གནང་ཡོད་ཅིང་། ནང་དོན་གཙོ་བོ་ནི། ང་ཚོས་བོད་མིའི་གྲོས་ཚོགས་འཐུས་མི་གསར་པའི་ནང་དམ་འབུལ་ཞུ་རྒྱུ་འགོར་འགྱངས་གནང་གི་ཡོད་པ་ཤེས་རྟོགས་བྱུང་། ཕྱི་ཟླ་དགུ་བའི་གྲོས་ཚོགས་འཚོག་ལ་ཉེ་བ་དང་བསྟུན་དུས་ཡུན་ཐུང་ཐུང་ཞིག་གི་རིང་ལས་དོན་མང་པོ་ཞིག་བསྒྲུབ་རྒྱུ་ཡོད་པ་རེད། བོད་མི་མང་སྤྱི་འཐུས་ལྷན་ཚོགས་དང་བོད་མིའི་སྒྲིག་འཛུགས་ནས་རྒྱ་ནག་གཞུང་དང་ལྷན་དུ་བོད་རྒྱ་ཞི་མོལ་སླར་གསོ་ཡིས་བོད་རང་སྐྱོང་ལྗོངས་ནང་རང་སྐྱོང་འཐོབ་ཐབས་དང་། བོད་ཀྱི་སྐད་ཡིག་རིག་གཞུང་དང་ཆོས། དེ་བཞིན་བོད་མིའི་འགྲོ་བ་མིའི་ཐོབ་ཐང་སོགས་སྲུང་སྐྱོབ་བྱ་རྒྱུར་རྒྱལ་སྤྱིའི་སྤྱི་ཚོགས་ཀྱིས་མིག་གིས་བལྟས་བསྡད་ཡོད། གྲོས་ཚོགས་ཀྱི་བྱ་རིམ་དང་འབྲེལ་བའི་རྩོད་རྙོག་དུས་ཐོག་དང་ཁྲིམས་གཞིར་བཟུང་སེལ་མ་ཐུབ་པ་དེས། བོད་མི་མང་དང་རྒྱལ་སྤྱིའི་སྤྱི་ཚོགས་ཀྱིས་བོད་མིའི་སྒྲིག་འཛུགས་དང་སྤྱི་འཐུས་ལྷན་ཚོགས་ལ་བཅོལ་བའི་ཡིད་ཆེས་ཁྱད་གསོད་གཏོང་གི་ཡོད། དེར་བརྟེན། ང་ཚོས་བདམས་ཐོན་བྱུང་བའི་སྤྱི་འཐུས་ཚོས་འདས་པའི་མི་མཐུན་པའི་ཕྱོགས་ཕར་བཞག་སྟེ། ད་ལྟ་ཁ་ཚ་དགོས་གཏུགས་ཀྱི་ལས་དོན་ཐོག་དོ་ནན་བྱ་དགོས་པའི་སྐུལ་ལྕག་གཏོང་གི་ཡོད། ཅེས་བརྗོད་ཡོད་པ་རེད།
གཞན་ཡང་འཕྲིན་ཡིག་གི་མགོར། འདི་ལོར་ཏོག་དབྱིབས་གཉན་རིམས་འགོས་ཁྱབ་དང་དཀའ་ངལ་གཞན་ག་རེ་འཕྲད་ཀྱང་། བཙན་བྱོལ་བོད་མི་ཚོས་སྲིད་སྐྱོང་གསར་བ་དང་གྲོས་ཚོགས་འཐུས་མི་གསར་བ་འདེམས་ཐུབ་པ་དེས་ང་ཚོར་སེམས་ཤུགས་སྦྱིན་བྱུང་། བོད་མིའི་སྒྲིག་འཛུགས་མང་གཙོའི་ལམ་དུ་བསྐྱོད་པ་དང་མང་གཙོའི་གྲུབ་ཆར་གྱུར་བའི་ལྷན་ཁང་ཁག་གི་ལས་འགན་ནི་འཛམ་གླིང་ཡུལ་གྲུ་གང་སར་ཁྱབ་པའི་བོད་མི་ཚོར་རྒྱབ་སྐྱོར་བྱ་རྒྱུ་མཚོན་པའི་ཧ་ཅང་གལ་ཆེན་པོ་ཆགས་ཡོད་སྟབས། ཨ་རིའི་གཞུང་དང་བོད་མིའི་སྒྲིག་འཛུགས་ཀྱི་མཉམ་འབྲེལ་ལ་འགྱུར་བ་མེད་པར། ཨ་རིས་མུ་མཐུད་བོད་མིའི་སྒྲིག་འཛུགས་དང་དེའི་ལས་དོན་ཐོག་རྒྱབ་སྐྱོར་གང་ཐུབ་ཞུ་རྒྱུ་ཡིན། ཞེས་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
གལ་ཆེའི་ཡིག་ཆ་འདི་ཉིན་གྲངས་༢༢་རིང་ལ་སུ་ཞིག་གིས་སྦེད་བསྡད་པ་ཡི་ནམ། གསར་པོ་བཟོ་དགོས་པ་རེད།
ང་ཚོའི་སྒྲིགས་འཛུགས་དེ་ཆོ་ཁ་དང་ཆོས་ལུགས་ཀྱི་ཞེན་ཁོག་ཀྱང་བྱས་ནས་ཡོ་རེད།
བོད་ཀྱི་མ་འོངས་པའི་རེ་བ་དང་ཡིད་ཆེས་ཚང་མ་ད་ལྟའི་སྤྱི་ལྷན་འདི་ཚོས་མེད་པ་ཟོ་ས་རེད།
ཁྱེད་ཚོ་སྤྱི་འཐུས་བྱེད་མདོད་མེད་ན་དགོངས་པ་ཞུས། བོད་མི་ཚད་ལྡན་སེམས་ཤུགས་ཅན་མང་པོ་ཡོ་རེད། རྟ་ལམ་བོང་བུས་སྐག་མ་དོད།