རྒྱ་གར་ལྷོ་ཕྱོགས་མངའ་སྡེ་ཀར་ན་ཊ་ཀ་གཞུང་གིས་མངའ་སྡེ་དེའི་ནང་རྟེན་གཞི་བྱས་པའི་བོད་མིའི་གཞིས་ཆགས་ཆེ་གྲས་མོན་གྷོ་འདོད་རྒུ་གླིང་གི་གཞུང་ལམ་ཡར་རྒྱས་གཏོང་ཆེད་ཧིན་སྒོར་འབུམ་ ༣༠༠ གྱི་རོགས་དངུལ་གནང་རྒྱུར་བཀའ་འཁྲོལ་ཐོབ་ཡོད་འདུག
Tibetan settlement officer Lhakpa Tsering with Shri Arbail Hebbar Shivram, Minister of Karnataka State. Photo:tibet.net
མོན་གྷོ་འདོད་རྒུ་གླིང་གི་ས་གནས་མགོ་འཛིན་ལྷག་པ་ཚེ་རིང་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ཉེ་ཆར་ཕྱི་ཚེས་ ༢༢ ཉིན་ཀར་ན་ཊ་ཀ་མངའ་སྡེ་གཞུང་གི་ངལ་རྩོལ་ལྷན་ཁང་གི་བློན་ཆེན་སྐུ་ཞབས་ཨར་བྷེལ་ཧེ་བྷར་ཤིབ་རམ་ (Arbail Hebbar Shivram) ལགས་མོན་གྷོ་གཞིས་ཆགས་བརྒྱུད་ས་གནས་གཞན་དུ་སྐྱོད་བཞིན་པའི་སྐབས་དང་བསྟུན། མོན་གྷོ་ས་གནས་མགོ་འཛིན་ལས་ཁུངས་དང་གཞིས་ཆགས་ཀྱི་སྤྱི་མི་ཡོངས་ནས་བློན་ཆེན་དང་ཁོང་གི་ཕྱག་རོགས་ལས་བྱེད་རྣམས་ལ་གསོལ་ཇ་འདེགས་འབུལ་ཞུ་སྐབས། ཁོང་གིས་ཞལ་ནས་མོན་གྷོ་འདོད་རྒུ་གླིང་གི་གཞུང་ལམ་འཛུགས་སྐྲུན་ལས་གཞི་དེར་ཧིན་སྒོར་འབུམ་ ༣༠༠ ཡི་བཀའ་འཁྲོལ་ཐོབ་ཡོད་སྐོར་གསུངས་ཡོད་འདུག འོན་ཀྱང་། ད་ལྟའི་ཆར་ས་གནས་མགོ་འཛིན་ལས་ཁུངས་ལ་མངའ་སྡེ་གཞུང་ངོས་ནས་ཡིག་ཐོག་ནས་བཀའ་འཁྲོལ་ཐོབ་པའི་ཡི་གེ་འབྱོར་མེད་པར་བརྟེན། འབྲེལ་ཡོད་ལས་ཁུངས་ལ་ཆེད་བཅར་གྱིས་བཀའ་འཁྲོལ་ཐོབ་པའི་ཡིག་ཆ་རག་ཐབས་བྱ་རྒྱུ་ཡིན་སྐོར་དང་། ད་ལྟའི་ཆར་འཛུགས་སྐྲུན་ལས་གཞི་དངོས་དེ་ག་དུས་མགོ་ཚུགས་ཐུབ་མིན་གསལ་པོ་མེད་པ་རེད་འདུག
མོན་གྷོ་གཞིས་ཆགས་ཀྱི་གཞུང་ལམ་ཡར་རྒྱས་འཛུགས་སྐྲུན་ལས་གཞི་དེ་ཉིད་དགའ་ལྡན་དགོན་པ་ནས་འབྲས་སྤུངས་བརྒྱུད། གཞིས་གྲོང་དྲུག་པ་དབར་གྱི་གཞུང་ལམ་དེར་ཐུག་ཡོད་ཅིང་། ལོ་ཤས་ནང་ཆར་ཆུ་སོགས་ཀྱི་རྐྱེན་པས་རླངས་འཁོར་འགྲོ་འོང་བདེ་པོ་མེད་པ་ཆགས་ཡོད་པ་རེད་འདུག དེ་ཡང་ཕྱི་ལོ་ ༢༠༡༨ ལོར་གཞིས་ཆགས་ཀྱི་སྤྱི་མི་བརྒྱ་དཔོན་རྣམས་ཀྱིས་ད་ལྟའི་གཞིས་ཆགས་ཀྱི་དཀའ་ངལ་ཆེ་ཤོས་དེ་གཞུང་ལམ་ཡིན་སྐོར་སྙན་སེང་ཞུས་པ་ལྟར། ས་གནས་མགོ་འཛིན་ལས་ཁུངས་ནས་ས་གནས་རྫོང་དཔོན་ལས་ཁུངས་དང་། ས་གནས་ལ་བཅའ་སྡོད་མངའ་སྡེའི་གྲོས་ཚོགས་འཐུས་མི། མངའ་སྡེའི་ལས་ཁུངས་ལྟེ་བ་བཅས་ལ་ཞུ་སྐུལ་གནང་ཡོད་པ་མ་ཟད། ལྷོ་སྤྱི་གསར་རྙིང་གཉིས་ཀའི་ངོས་ནས་མངའ་སྡེའི་འབྲེལ་ཡོད་མགོ་འཁྲིད་རྣམས་ལ་འབོད་སྐུལ་རིམ་པ་ཞུས་པར་བརྟེན་ནས་བཀའ་འཁྲོལ་ཐོབ་པ་ཞིག་ཡིན་སྐོར་འགྲེལ་བརྗོད་གནང་བྱུང་།
Mundgod Tibetan settlement road near Drephung Monastery. 25/08/2021. Image:tibettimes.net
ཡང་ཁོང་གིས་མུ་མཐུད་འགྲེལ་བརྗོད་བྱས་པ་ལྟར་ན། ད་ལན་གྱི་གཞུང་ལམ་ཡར་རྒྱས་འཛུགས་སྐྲུན་ལས་གཞི་དེ་ཉིད་མངའ་སྡེ་གཞུང་རང་གི་ལས་གཞི་ཞིག་ཆགས་ཡོད་སྟབས། ལས་གཞི་ཡོངས་སུ་རྫོགས་པ་ས་གནས་གཞུང་གི་སྤྱི་དམངས་ཞབས་ཞུ་ཚན་པས་ (PWD) ལག་བསྟར་བྱ་རྒྱུ་ཡིན་པ་ལས་རང་གཞུང་དང་ས་གནས་མགོ་འཛིན་ལས་ཁུངས་དང་འབྲེལ་བ་མེད་སྐོར་བརྗོད་བྱུང་། གཞན་ཡང་མོན་གྷོ་གཞིས་གྲོང་གསུམ་པ་ནས་རྒན་གསོ་ཁང་དང་། ས་གནས་འཕྲོད་བསྟེན་སྨན་ཁང་། བཙུན་དགོན་བྱང་ཆུབ་ཆོས་གླིང་བཅས་བརྒྱུད་ནས་གཞིས་གྲོང་བཞི་པ་བར་གྱི་གཞུང་ལམ་དེ་ཡང་ཡར་རྒྱས་འཛུགས་སྐྲུན་ཡོང་རྒྱུའི་ཞུ་སྐུལ་ཞུས་ཡོད་ནའང་། ད་ལྟའི་ཆར་དེའི་ཐད་བཀའ་འཁྲོལ་སོགས་གང་ཡང་བྱུང་མེད་པ་རེད་འདུག
གསར་འགོད་པ། པ་སངས་ཚེ་རིང་།
