རྒྱ་སྒྱུར་སློབ་གསོར་མི་འདོད་པའི་སྐད་ཆ་བཤད་པའི་ཉེས་མིང་འོག་བོད་མི་གཉིས་འཛིན་བཟུང་བྱས།

ཕྱི་ཟླ་དགུ་བའི་སློབ་མགོ་ཚུགས་ལ་ཉེ་བ་དང་བསྟུན་མགོ་ལོག་དར་ལོག་རྫོང་ཁུལ་གྱི་བོད་མི་གཉིས་ནས་རྒྱ་ནག་གི་རྒྱ་སྒྱུར་སློབ་གསོར་མི་འདོད་པའི་སྐད་ཆ་བཤད་པའི་ཉེས་མིང་འོག་འཛིན་བཟུང་བཙན་ཁྲིད་བྱས་ཡོད་འདུག

དེ་རིང་འདི་གར་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་འདིའི་ཕྱི་ཚེས་ ༢༤ ཉིན་རྒྱ་ནག་གཞུང་གིས་བཅད་བགོས་བྱས་པའི་མཚོ་སྔོན་ཞིང་ཆེན་མགོ་ལོག་ཁུལ་དར་ལག་རྫོང་ཁོངས་ནས་བོད་མི་གཞོན་སྐྱེས་གཉིས་ཀྱིས། ས་གནས་དེར་འདི་ལོའི་སློབ་མགོ་ཚུགས་པ་དང་བསྟུན། སློབ་ཚན་ཚང་མ་རྒྱ་ཡིག་ནང་འཁྲིད་རྒྱུ་ཡིན་པའི་བཀོད་ཁྱབ་ལ་མི་དགའ་བའི་སྐད་ཆ་བཤད་པའི་ཉེས་མིང་འོག  རྒྱ་གཞུང་ཉེན་རྟོག་པས་འཛིན་བཟུང་བཙན་ཁྲིད་ཀྱིས་བཀག་ཉར་འོག་བཞག་ཡོད་འདུག

གནས་ཚུལ་མཁོ་སྤྲོད་པས། འཛིན་བཟུང་བྱས་པའི་བོད་མི་གཉིས་ཀྱི་མིང་ལ་གཡང་རིས་དང་མགུལ་གྲགས་ཞུ་ཡི་ཡོད་འདུག་ལ། སློབ་མགོ་གསར་པ་ཚུགས་ལ་ཉེ་བ་དང་བསྟུན། ཕ་མ་ཚོས་རང་གི་བུ་ཕྲུག་སློབ་གྲྭར་སྐྱེལ་ཡོང་སྐབས། དེ་སྔ་འགྲེམས་སྤེལ་བྱས་པའི་བོད་ཡིག་སློབ་དེབ་ཀྱི་ཚབ་ཏུ་རྒྱ་ཡིག་སློབ་དེབ་ཁག་ལེན་དགོས་པའི་བཀོད་ཁྱབ་གཏོང་གི་ཡོད་པ་དང་། གཡང་རིས་དང་མགུལ་གྲགས་གཉིས་ནས་སྐད་འཕྲིན་ཚོགས་པའི་ནང་རྒྱ་སྒྱུར་སློབ་གསོ་སྤེལ་བ་ཡིན་ན་མ་འོངས་པར་བོད་མི་ཚོར་དཀའ་ངལ་འཕྲད་རྒྱུ་ཡིན་པའི་བསམ་ཚུལ་བརྗོད་པར་བརྟེན་འཛིན་བཟུང་བྱས་ཡོད་སྐོར་བརྗོད་བྱུང་།

ཡང་མུ་མཐུད་གནས་ཚུལ་མཁོ་སྤྲོད་པས། ཐེངས་འདིའི་རྒྱ་སྒྱུར་སློབ་གསོ་དང་འབྲེལ་ནས་གཞོན་སྐྱེས་དེ་གཉིས་ཙམ་མ་ཡིན་པར་གཞན་པའང་འཛིན་བཟུང་བྱས་ཡོད་པ་གོ་ཐོས་ཡོད་ཀྱང་། ད་ལྟའི་ཆར་ཞིབ་ཕྲའི་གནས་ཚུལ་ལག་སོན་བྱུང་མ་སོང་བ་དང་། ད་ལྟ་འཛིན་བཟུང་བཀག་ཉར་འོག་ཡོད་པའི་བོད་མི་གཅིག་གིས་སློབ་ཚན་ཚང་མ་རྒྱ་ཡིག་ཏུ་བསྒྱུར་བ་ཡིན་ན། མ་འོངས་པར་ང་ཚོས་ཁ་ཡང་སོས་རྒྱུ་མིན་སྟབས་དེ་ལས་རི་མགོར་སོང་ནས་ནོར་ལུག་འཚོས་ནས་བསྡད་ན་ཡག་སྐོར་གྱི་བསམ་ཚུལ་བཤད་ཡོད་སྐོར་འགྲེལ་བརྗོད་གནང་བྱུང་།

ཉེ་སྔོན་རྒྱ་ནག་གི་ཤེས་རིག་ལྷན་ཁང་ཟེར་བས་སྤེལ་བའི་གནས་ཚུལ་ལྟར་ན། ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ཁུལ། གྲོང་སྡེ་ཁག་སོགས་ནས་ཞི་ཅིན་ཕིན་གྱི་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་ཤུགས་རྐྱེན་འཇོག་དགོས་སྐོར་བརྡ་ཁྱབ་བཏང་ཡོད་པ་ལྟར། ད་ལྟའི་ཆར་བོད་ཁུལ་གྱི་ས་ཆ་མང་པོའི་ནང་དངོས་སུ་རྒྱ་སྒྱུར་སློབ་གསོའི་སྲིད་ཇུས་ཁག་ལག་བསྟར་བྱེད་མགོ་ཚུགས་བཞིན་ཡོད་འདུག

གཡང་རིས་དང་མགུལ་གྲགས་གཉིས་ནི་འདི་ལོའི་མགོ་ལག་ཁུལ་དར་ལག་རྫོང་སློབ་འབྲིང་གི་མཐར་ཕྱིན་སློབ་མ་ཡིན་པ་དང་། ཁོང་གཉིས་ཕ་མ་སྤུན་མཆེད་དུ་འགྲོ་བའི་གཉེན་ཉེའང་ཡིན་འདུག

རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པ་དོན་འགྲུབ་བཀྲ་ཤིས།