ཉི་ཧོང་ནང་གི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་འཐུས་མི་རྣམས་ལ་བོད་ནང་གི་ཛ་དྲག་གནས་སྟངས་དང་འབྲེལ་བའི་གནས་ཚུལ་དང་པར་རིས་སོགས་འཁོད་པའི་ཤོག་གྲངས་དགུ་ཅན་གྱི་སྙན་ཐོ་ཞིག་ཕུལ་ཏེ་བོད་ནང་གི་གནས་སྟངས་འགྲེལ་བརྗོད་གནང་ཡོད་འདུག
ཁ་སང་ཕྱི་ཚེས་ ༢༦ ཉིན་བོད་དང་ཡུ་གུར། ལྷོ་སོག ཧོང་ཀོང་། རྒྱ་ནག་གི་དམངས་གཙོ་ལ་རྒྱབ་སྐྱོར་གནང་མཁན་ཉི་ཧོང་གྲོས་ཚོགས་ཀྱི་རྒྱབ་སྐྱོར་ཚོགས་པ་ཁག་གི་གོ་སྒྲིག་འོག ཉི་ཧོང་གྲོས་ཚོགས་གོང་མའི་ཚོགས་ཁང་དུ་བོད་ནང་གི་གནས་སྟངས་དང་འབྲེལ་བའི་ཉན་ཞིབ་ཀྱི་ཚོགས་འདུ་ཞིག་ཚོགས་ཡོད་པ་དང་། ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་རྒྱབ་སྐྱོར་ཚོགས་པ་ཁག་གི་ཚོགས་མི་ཡོངས་ལ་ད་ལྟའི་བོད་ནང་གི་གནས་སྟངས་སྐོར་དང་། བོད་ནི་དབང་སྒྱུར་བྱས་པའི་རྒྱལ་ཁབ་ཅིག་ཡིན། ཞེས་པའི་མགོ་བརྗོད་ཡོད་པའི་ཤོག་གྲངས་དགུ་ཅན་གྱི་བོད་ནང་གི་གནས་ཚུལ་དང་པར་རིས་བཀོད་པའི་སྙན་ཐོ་ཞིག་ཀྱང་ཕུལ་ཡོད་པ་དང་། ཉན་ཞིབ་ཀྱི་ཚོགས་འདུ་དེར་ཉི་ཧོང་གི་ཆབ་སྲིད་ཚོགས་པ་ཁག་གི་གྲོས་ཚོགས་འཐུས་མི་དང་ལས་བྱེད་ ༤༠ ཙམ་མཉམ་ཞུགས་གནང་ཡོད་འདུག་ལ། འདི་ལོའི་ཉི་ཧོང་གི་སྟོན་ཁའི་གྲོས་ཚོགས་ནང་དུའང་ཐེངས་འདིའི་ཉན་ཞིབ་སྐོར་ངོ་སྤྲོད་གནང་རྒྱུ་ཡིན་སྐོར་བརྗོད་ཡོད་འདུག
ཉི་ཧོང་གྲོས་ཚོགས་ཡུ་གུར་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ (Furuya Keiji) ལགས་ཀྱིས། ཉན་ཞིབ་དབུ་འབྱེད་དང་འབྲེལ་ནས་ས་ཕྱོགས་གང་དུ་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ་ཡིན་ན། དེར་བཟོད་བསྲན་བྱེད་མི་ཐུབ། ཅེས་པ་དང་། ཉི་ཧོང་གྲོས་ཚོགས་རྒྱབ་སྐྱོར་ཚོགས་པ་ཁག་གིས་མཉམ་རུབ་ཐོག་ཕྱག་ལས་གནང་སྟེ་གནད་དོན་འདིའི་ཐད་རྒྱ་ནག་ལ་ཉེན་བརྡ་དང་ངོ་རྒོལ་གྱི་བསྒྲགས་གཏམ་སྤེལ་རྒྱུ་ཡིན། ཞེས་བརྗོད་ཡོད་འདུག
ད་ེབཞིན་ཉི་ཧོང་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ (Shimomura Hakubun) ལགས་ཀྱིས། བོད་དོན་དང་བོད་ཀྱི་འགྲོ་བ་མིའི་ཐོབ་ཐང་གི་ཐད་ལ་རྒྱབ་སྐྱོར་ཤུགས་ཆེ་གནང་གི་ཡིན། ཞེས་དང་། ༧གོང་ས་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་ཉི་ཧོང་ནང་ཕེབས་ཏེ་ཉི་ཧོང་གི་གྲོས་ཚོགས་ཚོགས་ཁང་དུ་བཀའ་སློབ་གསུང་བཤད་གནང་ཡོད་པ་རེད། ཉི་ཧོང་ལ་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་ཡོད་པ་རེད། ཅེས་བརྗོད་ཡོད་འདུག དེ་བཞིན་ཉི་ཧོང་གི་གྲོས་ཚོགས་རྒྱབ་སྐྱོར་ཚོགས་པ་ཁག་གི་ཚོགས་གཙོ་དང་སྐུ་ཚབ་ནས་རྒྱ་ནག་དམར་ཤོག་ཚོགས་པའི་ཚོགས་མི་ཚོའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་ཤུགས་ཆེ་བརྗོད་ཡོད་འདུག
སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉན་ཞིབ་ཚོགས་འདུའི་ཐོག རྒྱ་ནག་དམར་ཤོག་གཞུང་གིས་བོད་མཐོ་སྒང་དེ་དམག་ས་ལྟ་བུར་སྒྱུར་བཞིན་པ་དང་། བོད་མིའི་དགོན་སྡེ་ཁག་དང་སློབ་གྲྭ་ཁག་སྒོ་བརྒྱབ་པ། དེ་བཞིན་རྒྱ་གར་དང་འབྲུག་གི་ས་མཚམས་ཁུལ་དུ་བཙན་དབང་གིས་བོད་མི་རྣམས་གཞིས་ཆགས་བཅུག་པ་སོགས་ལ་བརྟེན་ནས་བོད་ཀྱི་ས་ཁུལ་ཡོངས་རྫོགས་ཛ་དྲག་གི་གནས་སྟངས་འོག་ཡོད་པའི་སྐོར་དང་། རྒྱ་ནག་གཞུང་གིས་རྒྱལ་གཅེས་ཆོས་གཅེས་ཞེས་པའི་སློབ་གསོའི་ལས་འགུལ་སྤེལ་ཏེ་བོད་ཀྱི་བྱིས་པ་རྣམས་ལ་དམག་སྦྱོང་སྤྲད་པ་དང་། ཆོས་ལུགས་ཀྱི་བྱེད་སྒོ་ཁག་གི་ནང་མཉམ་ཞུགས་བྱེད་དུ་མི་འཇུག་པ། བསམ་བློ་བསྒྱུར་བཅོས་ཀྱི་སློབ་གསོ་སྤེལ་བཞིན་ཡོད་པ་སོགས་འགྲེལ་བརྗོད་གནང་ཡོད་འདུག
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
