ཉམས་ཞིབ་པ་ཀརྨ་བསྟན་འཛིན་ལགས་ཀྱིས་བོད་ནང་དུ་སྐུ་ཚབ་ཕེབས་པའི་གཞུང་འབྲེལ་གྱི་ཡིག་ཆ་རྣམས་སྤྱི་ཚོགས་ནང་དགྲམ་མེད་དུས་དབང་འདུས་ལགས་ཀྱིས་བྲིས་པའི་ཉིན་ཐོ་དེར་ཉམས་ཞིབ་པ་ཚོས་དོ་སྣང་བྱེད་དགོས་པ་དེ་གལ་ཆེན་པོ་ཡིན་སྐོར་བརྗོད་བྱུང་།
དེ་རིང་ཕྱི་དྲོའི་ཆུ་ཚོད་ ༦ པའི་ཐོག་དྷ་ཤོད་ལམ་གྱི་ཀ་ཤི་མེར་གསོལ་མགྲོན་ཁང་གི་ཉེ་འགྲམ་དུ་ཡོད་པའི་(Dolls for Tibet)ནང་དུ། ཕྱི་ལོ་ ༡༩༨༠ ལོར་བོད་ནང་ཕེབས་པའི་སྐུ་ཚབ་ཐེངས་གསུམ་པའི་ཚོགས་མི་དབང་འདུས་ལགས་ཀྱིས་བརྩམས་པའི་དབང་འདུས་ཀྱི་ཉིན་ཐོ་ཞེས་པའི་དབྱིན་དེབ་དེ་རྩོམ་པ་པོ་ལྡུམ་ར་བུ་ཆུང་བསོད་ནམས་ལགས་ཀྱིས་དབྱིན་སྒྱུར་གནང་བ་དབུ་འབྱེད་དང་སྦྲགས། བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཀརྨ་བསྟན་འཛིན་ལགས་དང་། འཇམ་དབྱངས་ཤེས་ཡོན་ཞབས་ཞུ་ཁང་གི་བུདྷ་སྐྱབས་ལགས་གཉིས་དང་ལྷན་དུ་གླེང་མོལ་འདུ་འཛོམས་ཤིག་གནང་ཡོད་པ་དང་། དེ་རིང་གི་འདུ་འཛོམས་ཐོག་དྷ་རམ་ས་ལ་ཁུལ་གྱི་རྩོམ་པ་པོ་སོགས་དོ་སྣང་ཅན་ཁག་ཅིག་ཀྱང་བསླེབས་ཡོད་པ་རེད།
དཔེ་དེབ་ཀྱི་བརྗོད་བྱ་གཙོ་བོའི་སྐོར་ལ་རྩོམ་པ་པོ་བུ་ཆུང་བསོད་ནམས་ལགས་ཀྱིས་འདི་གའི་གསར་འགོད་པར། དེབ་དེ་ནི་སྐུ་ཚབ་འཐུས་མི་དབང་འདུས་ལགས་བོད་དུ་ཟླ་བ་གསུམ་རིང་ལྟ་སྐོར་དུ་ཕེབས་སྐབས། བོད་ནང་གི་ཤེས་ཡོན་སྡེ་ཁག་གི་གནས་བབ་དང་། བོད་ཡུལ་གྱི་གནས་བབ་རྣམས་རྒྱུས་ལོན་བྱས་པའི་ཉིན་རེའི་ཉིན་ཐོ་ཞིག་ཡིན་པ་དང་། ཉིན་ཐོ་དེ་ནི་དབྱིན་བོད་ཤན་སྦྱར་གྱི་དཔེ་དེབ་ཅིག་ཡིན་པ་རེད། བོད་ཀྱི་ལོ་རྒྱུས་ལ་གོད་ཆག་བྱུང་བའི་མི་ལོ་བཅུ་སྟེ་རིག་གནས་གསར་བརྗེ་ཆེན་མོ་མཇུག་སྒྲིལ་ཏེ། བོད་ནང་དུ་སྲིད་ཇུས་ཅུང་གུ་ཡངས་སུ་བཏང་སྟེ། རིག་གནས་གསར་བརྗེ་སྐབས་སུ་གཏོར་སྐྱོན་བཏང་བའི་དགོན་སྡེ་དང་སློབ་གྲྭ་ཁག་ཉམས་གསོ་བྱེད་བཞིན་པའི་སྐབས་དབང་འདུས་ལགས་བོད་དུ་ཕེབས་ཏེ། གཞུང་བཙུགས་སློབ་གྲྭ་དང་སྒེར་བཙུགས་སློབ་གྲྭ་ཁག་གི་ཤེས་ཡོན་གྱི་གནས་བབ་རྣམས་གཙོ་བོར་གསལ་འདོན་བྱས་ཡོད་སྐོར་བརྗོད་བྱུང་།
ཡང་ཁོང་གིས། དཔེ་དེབ་དེའི་ནང་དབང་འདུས་ལགས་བོད་དུ་བསྐྱོད་པའི་ཉིན་རེའི་བྱེད་སྒོ་མཐའ་དག་གི་ཁྲོད་ནས་སློབ་གྲྭ་ཁག་ཏུ་བསྐྱོད་པའི་ཁ་གྲངས་དང་། དེ་བཞིན་ཚོགས་འདུ་འཚོགས་པའི་དུས་ཚེས་སོགས་ཧ་ཅང་གསལ་ཁ་ལྡན་སྟབས། མ་འོངས་པར་བོད་ནང་གི་ཤེས་ཡོན་གྱི་གནས་བབ་ལ་རྒྱུས་ལོན་ཉམས་ཞིབ་བྱེད་མཁན་ཚོར་ཕན་ཐོགས་ཆེན་པོ་ཡོད་པ་དང་། དེ་བཞིན་ཁོང་ཉིད་བོད་དུ་བསྐྱོད་སྐབས་༧པཎ་ཆེན་རིན་པོ་ཆེ་དང་། འབའ་བ་ཕུན་ཚོགས་དབང་རྒྱལ། ཀུན་མཁྱེན་འཇམ་དབྱངས་བཞད་པ་སོགས་དང་མཇལ་འཕྲད་བྱས་པའི་གནས་ཚུལ་རྣམས་ཀྱང་ཁ་གསལ་བཀོད་ཡོད་སྐོར་བརྗོད་བྱུང་།
བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཀརྨ་བསྟན་འཛིན་ལགས་ཀྱིས། སྤྱིར་བོད་པའི་སྤྱི་ཚོགས་ཀྱི་ཁྲོད་དུ་ཉིན་ཐོ་འབྲི་མཁན་ཧ་ཅང་དཀོན་པོ་ཞིག་ཡིན་ཡང་། དབང་འདུས་ལགས་ཀྱིས་བོད་ལ་སྐོར་སྐྱོད་དུ་ཕེབས་སྐབས་བྲིས་པའི་ཉིན་ཐོ་དེ་ནི། ལོ་རྒྱུས་ཀྱི་ཡིག་ཚགས་ཤིག་ཏུ་བརྩི་དགོས་པ་དང། ཉིན་ཐོ་དེ་རུ་སློབ་གྲྭ་ཁག་གི་ཁ་གྲངས་དང་། བོད་ནང་གི་ཤེས་ཡོན་གྱི་གནས་བབ། བོད་ནང་གི་གནས་ཚུལ་མང་པོ་ཞིག་བྲིས་ནས་ཉར་ཚགས་བྱས་ཡོད་པས། མ་འོངས་པར་ཉམས་ཞིབ་པ་ཚོས་ཉིན་ཐོ་དེའི་ཁྲོད་ཀྱི་གནད་དོན་མང་པོ་ཞིག་ལ་ཉམས་ཞིབ་དང་དོ་སྣང་བྱ་རྒྱུ་གལ་ཆེན་པོོ་རེད། བོད་ནང་དུ་གཞུང་འབྲེལ་སྐོར་སྐྱོད་གནང་བའི་གཞུང་འབྲེལ་གྱི་ཡིག་ཆ་རྣམས་སྤྱི་ཚོགས་སུ་དགྲམ་མེད་སྟབས། དབང་འདུས་ལགས་ཀྱིས་བྲིས་པའི་ཉིན་ཐོ་དེ་ནི་བོད་ནང་དུ་སྐོར་སྐྱོད་ལ་ཕེབས་པའི་ཡིག་ཚགས་སུ་བརྩི་རུང་བ་ཡིན་སྐོར་བརྗོད་བྱུང་།
དཔལ་ལྡན།
