ཡང་བསྐྱར་རྫ་དབོན་པོ་ནས་བོད་མི་ ༥༣ ཙམ་བཙན་འཁྲིད་བྱས་འདུག

འདས་པའི་ཉིན་གྲངས་ ༡༠ མ་ཟིན་ཙམ་ནང་རྫ་དབོན་པོ་དགོན་དང་གྲོང་སྡེ་གཉིས་ནས་བོད་མི་སེར་སྐྱ་གྲངས་ ༡༡༣ ཙམ་ལ་༧གོང་ས་མཆོག་གི་སྐུ་པར་ཉར་བ་དང་ཕྱི་ལོག་གི་མི་ལ་འབྲེལ་བ་བྱས་པའི་ཉེས་མིང་གཡོགས་ཏེ་འཛིན་བཟུང་བཙན་འཁྲིད་བྱས་འདུག

Dza Wonpo Monastery and Wonpo Town. Image:Tibet Times Source(Tibet)

དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཉིན་ཤས་ཉིན་སྔོན་ཏེ་ཕྱི་ཟླ་ ༨ ཚེས་ ༢༥ ནས་ ༢༩ བར་དུ། རྒྱ་ནག་གཞུང་གིས་རྫ་དབོན་པོ་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་མི་ལ་འབྲེལ་འདྲིས་བྱས་པའི་ཉེས་མིང་འོག བསྐྱར་དུ་བོད་མི་ ༥༣ ཙམ་འཛིན་བཟུང་བཀག་ཉར་བྱས་ཡོད་པ་མ་ཟད། མུ་མཐུད་སྔོག་བཤེར་དམ་དྲག་བྱེད་བཞིན་ཡོད་འདུག

ཡང་གནས་ཚུལ་མཁོ་སྤྲོད་པས། རྫ་སྨད་ཀྱི་ས་གནས་གཞུང་ནས་མི་སྣ་གཉིས་ཆེད་བསྐོས་ཀྱིས། དབོན་པོ་དགོན་གྱི་དགེ་འདུན་པ་རྣམས་ལ་ཞིབ་བཤེར་དང་འདྲི་རྩད་བྱ་དགོས་པའི་བཀའ་ཕབ་པ་ལྟར། ཁ་སང་ནས་བཟུང་ཉིན་རེར་རྫ་དབོན་པོ་དགོན་གྱི་རང་ལོ་བཅོ་བརྒྱད་ཡན་གྱི་དགེ་འདུན་པ་ ༢༠ རེ་ས་གནས་ལས་ཁང་དུ་འདྲི་རྩད་བྱེད་དུ་བཅར་ཏེ། སོ་སོ་ལ་ནག་ཉེས་མེད་པ་དང་། ཕྱི་ཕྱོགས་སུ་ཡོད་པའི་མི་དང་འབྲེལ་བ་བྱས་མྱོང་མེད་པ། ཁ་པར་ནས་པར་རིས་དང་ཆབ་སྲིད་དྲིལ་བསྒྲགས་བྱས་མྱོང་མེད་པ། རྒྱ་ནག་གཞུང་གི་ཁྲིམས་སྒྲིག་དང་འགལ་མེད་པའི་དཀར་འདོན་དང་། མ་འོངས་པ་ལའང་དེ་ལྟར་བྱ་རྒྱུ་མིན་པའི་ཁས་ལེན་དམ་བཅའ་འཇོག་དགོས་པའི་བྱ་འགུལ་ཞིག་ཀྱང་ལག་བསྟར་བྱེད་བཞིན་ཡོད་སྐོར་བརྗོད་བྱུང་།

Dza Wonpo Town. Image:Tibet Times Source(Tibet)

ཕྱི་ཟླ ༨ ཚེས་ ༢༢ ནས་བཟུང་སྔ་གཞུག་ཏུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱས་པ་དང་ཕྱི་ལོག་ཏུ་ཡོད་པའི་བོད་མི་རྣམས་ལ་འབྲེལ་བ་བྱས་པའི་ཉེས་མིང་འོག རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་སེར་ཤུལ་རྫོང་དུ་བཙན་འཁྲིད་བྱས་ཡོད་པ་ལྟར། ཉེ་སྔོན་སྔ་གཞུག་ཏུ་རྫ་སྨན་དབོན་པོ་སྡེ་དགོན་གཉིས་ནས་ཁྱོན་སྐྱ་སེར་མི་གྲངས་ ༡༡༣ ཙམ་ཞིག་འཛིན་བཟུང་བཙན་འཁྲིད་བྱས་ཡོད་འདུག

གནས་ཚུལ་མཁོ་སྤྲོད་པས་འདི་གའི་གསར་འགོད་པར། སེར་ཤུལ་རྫོང་དུ་བཀག་ཉར་དྲག་གནོན་བྱེད་མུས་ཡིན་པ་དང་། ཁ་སང་མི་སྐྱ་གཉིས་དང་། བུད་མེད་གཅིག དགེ་འདུན་པ་གཅིག་བཅས་སྐྱ་སེར་ ༤ ཀློད་གྲོལ་བཏང་ཡོད་པའི་གནས་ཚུལ་ཞིག་གོ་རྒྱུ་ཡོད་སྐོར་བརྗོད་པ་ཙམ་ལས། ད་ལྟ་བར་དུ་བོད་མི་བརྒྱ་ལྷག་དེ་གང་དུ་ཡོད་མེད་དང་གནས་སྟངས་ག་འདྲ་ཆགས་ཡོད་སོགས་ཀྱི་གནས་ཚུལ་གང་ཡང་ཐོན་མེད་པ་རེད།

དཔལ་ལྡན།