རོགས་དངུལ་བསྡུ་སློང་གནང་ཕྱོགས་ཀྱི་ལམ་སྟོན།

བཙན་བྱོལ་བོད་མིའི་སྤྱི་ཚོགས་ནང་ཉམ་ཐག་དང་དཀའ་ངལ་ཅན་ལ་རོགས་རམ་གནང་མཁན་ཚོགས་སྐྱིད་དང་མི་སྒེར་གང་མང་ཡོང་གི་ཡོད་པ་ལྟར། ཟླ་འདིའི་ཕྱི་ཚེས་ ༤ ཉིན་བོད་མིའི་སྒྲིག་འཛུགས་བཀའ་ཤག་ནས་བོད་མི་ནང་ཁུལ་དུ་དངུལ་བསྡུ་སློང་གནང་སྟེ་རོགས་རམ་གནང་སྐབས། གནས་ཡུལ་གྱི་སྐུ་ཚབ་དོན་གཅོད་དང་། ཡང་ན་ས་གནས་མགོ་འཛིན་དང་འབྲེལ་མཐུད་པ་རྣམ་པར་ཡར་ཞུས་ཏེ་མཁྱེན་རྟོགས་ཡོད་པའི་ཐོག་ནས་གནང་དགོས་སྐོར་གྱི་ལམ་སྟོན་བཀོད་ཁྱབ་ཅིག་གནང་འདུག

དེ་རིང་འདི་གའི་གསར་འགོད་པས་ཁ་པར་བརྒྱུད་བཀའ་དྲུང་སྦྲ་གཉིས་ཚེ་རྒྱལ་ལགས་ལ་ལམ་སྟོན་བཀོད་ཁྱབ་ཀྱི་དགོས་དམིགས་སྐོར་བཀའ་འདྲི་ཞུ་སྐབས་ཁོང་གིས། ཕྱི་ལོ་ ༡༩༩༧ ནས་བོད་མིའི་སྒྲིག་འཛུགས་ཀྱི་ནང་ཤེས་འཕྲོད་གསུམ་གྱིས་ཉམ་ཐག་ཞིབ་འཇུག་ཚོགས་ཆུང་བཙུགས་ནས་ད་བར་ལོ་ངོ་ ༢༤ ལྷག་ཕྱིན་ཡོད་པ་དང་། འདིའི་རིང་ལ་ས་གནས་ལ་ཉམ་ཐག་ཞིབ་འཇུག་ཚོགས་ཆུང་ཡོད་པ་མ་ཟད། ས་གནས་ཀྱིས་ཞིབ་འཇུག་བྱས་པའི་གནས་སྟངས་དབུས་ལ་བཏང་ནས་དབུས་ཀྱིས་རྟོག་ཞིབ་བྱས་ཏེ། ས་གནས་སུ་ཕེབས་དགོས་བྱུང་རུང་ཕེབས་པ་དང་བསྐྱར་ཞིབ་གནང་སྟེ་ཉམ་ཐག་ལ་གཟིགས་རྟོག་གནང་གི་ཡོད་པ་དེ་ནི་གཞུང་གི་འོས་འགན་ཡིན་པ་འགྲེལ་བརྗོད་གནང་བ་དང་སྦྲགས་ཁོང་གིས། བར་ལམ་ནས་ཉམ་ཐག་རིགས་གཅིག་གིས་སྤྱི་ཚོགས་དྲ་རྒྱའི་ནང་བཏོན་ཏེ་རོགས་དངུལ་བསྡུ་རུབ་གནང་གི་ཡོད་རེད། དེ་འདྲའི་རོགས་དངུལ་བསྡུ་སློང་གནང་སྟངས་ཐད་ང་ཚོའི་སྤྱི་ཚོགས་ནང་དགོངས་ཚུལ་མི་འདྲ་བ་བསླེབས་ཡོང་གི་ཡོད་པས། སྤྱིར་བཏང་བོད་པས་བོད་པ་ལ་རོགས་སྐྱོར་གནང་གི་ཡོད་པ་དེ་དགའ་བསུ་ཞུ་འོས་པ་རེད་དེ་གནང་ལུགས་གནང་སྟངས་ཚང་མ་ལ་བཏང་སྙོམས་དང་ཚད་སྙོམས་པོ་བྱུང་བའི་ཆེད་དུ་བཀའ་ཤག་གིས་གཅིག་གྱུར་བྱུང་ན་བསམ་པའི་དགོངས་པ་བཞེས་ཡོད་པ་རེད། གཉིས་པ་དེ་ལ་བཙན་བྱོལ་སྤྱི་ཚོགས་ནང་ལ་ཉམ་ཐག་ལྟ་སྐྱོང་ཞུ་རྒྱུ་དེ་བོད་མིའི་སྒྲིག་འཛུགས་ཀྱི་འགན་ཡིན་པས། ཉམ་ཐག་རེ་ཟུང་ལ་ཕྱག་དངུལ་རག་གི་ཡོད་རེད་དེ། ཕྱག་དངུལ་གྱིས་མ་འདང་བའི་དཀའ་ངལ་དང་གློ་བུར་གོད་ཆག་གི་དཀའ་ངལ་འཕྲད་པའི་རྐྱེན་གྱིས། སྤྱི་ཚོགས་ནང་ཞལ་འདེབས་བསྡུས་པའི་གནས་སྟངས་ཆགས་པ་ཡིན་ན། ས་གནས་གང་རུང་ཞིག་ལ་སྐུ་ངལ་དེ་འདྲ་འཕྲད་ཀྱི་ཡོད་ན། ས་གནས་ལ་འབྲེལ་ཡོད་ལས་ཁུངས་བཙུགས་ཡོད་པ་དང་། ས་གནས་མགོ་འཛིན། སྐུ་ཚབ་དོན་གཅོད། འབྲེལ་མཐུད་པ་སོགས་ཡོད་རེད། ཁོང་ཚོས་མཁྱེན་པའི་ཐོག་ནས་རོགས་དངུལ་བསྡུ་རུབ་བྱེད་དགོས་པའི་དགོངས་པ་གཙོ་བོ་དེ་རེད། ཅེས་ཁོང་ཚོའི་འགན་ཡང་མི་མང་གི་བདེ་སྡུག་ལ་ལྟ་སྐྱོང་གནང་རྒྱུ་དེ་ཡིན་པས་གཅིག་མཚུངས་ཆགས་ཡོད་སྐོར་བརྗོད་བྱུང་།

བཀའ་ཤག་གི་ལམ་སྟོན་བཀོད་ཁྱབ་དེའི་ནང་། བོད་མིའི་སྒྲིག་འཛུགས་ནས་བོད་མི་ཉམ་ཐག་རྣམས་ལ་ལྟ་སྐྱོང་བྱེད་ཕྱོགས་ཀྱི་སྲིད་བྱུས་དང་ལམ་སྟོན་གཏན་འབེབས་གནང་དོན་ལྟར། ཕྱི་ལོ་ ༡༩༩༧ ནས་ནང་སྲིད་དང་ཤེས་ཡོན། འཕྲོད་བསྟེན་གསུམ་གྱི་ཉམ་ཐག་རྟོག་ཞིབ་ཚོགས་ཆུང་ཟུར་འཛུགས་གནང་སྟེ། ད་བར་ལོ་ངོ་ ༢༤ ལྷག་ཕྱིན་པའི་ནང་། ས་གནས་ཉམ་ཐག་ཞིབ་འཇུག་ཚོགས་ཆུང་ནས་དུས་ནས་དུས་སུ་ཉམ་ཐག་གི་གནས་སྟངས་ཐོ་འགོད་འགོད་འབུལ་བྱུང་བ་རྣམས་ལ་དབུས་ཉམ་ཐག་ཞིབ་འཇུག་ཚོགས་ཆུང་ནས་རྟོག་ཞིབ་ཀྱིས་འཚོ་སྣོན་དང་། སློབ་ཡོན། སྨན་གྲོན་སོགས་རོགས་རམ་གང་ཐུབ་གནང་གི་ཡོད་ཀྱང་། ཉམ་ཐག་རེ་ཟུང་ནས་སྤྱི་ཚོགས་དྲ་ལམ་བརྒྱུད་ཞལ་འདེབས་བསྡུ་སློང་གི་གནས་ཚུལ་བྱུང་བ་དང་། སྤྱི་ཚོགས་ནང་དུ་བསམ་ཚུལ་མང་པོ་བྱུང་གི་ཡོད་པ་དེ་དག་བོད་མི་ནང་ཁུལ་གཅིག་གིས་གཅིག་ལ་རོགས་རམ་བྱེད་ཕྱོགས་ཚད་དང་ལྡན་པ་དང་གཅིག་གྱུར་དགོས་པའང་གལ་ཆེན་ཆགས་ཀྱི་ཡོད་པ་བཀོད་འདུག་ལ། མཇུག་ཏུ་སླད་གཞིས་ཆགས་དང་ཁ་འཐོར་གནས་སྡོད་བོད་མི་སུ་འདྲ་ཞིག་གི་ཆེད་དུ་རོགས་དངུལ་བསྡུ་རུབ་བྱེད་འཆར་ཡོད་པ་རྣམས་ཀྱིས། དང་ཐོག་ནས་ཕྱི་རྒྱལ་སྐུ་ཚབ་དོན་ཁང་དང་། འབྲེལ་ཡོད་ས་གནས་མགོ་འཛིན། འབྲེལ་མཐུད་པར་ལམ་སྟོན་ཞུས་ཏེ་གནང་དགོས་སྐོར་འཁོད་འདུག

གསར་འགོད་པ།  བསྟན་འཛིན་ཕུར་བུ།