རྒྱ་གར་སྲིད་བློན་མུ་དྷི་མཆོག་གིས་༧གོང་ས་མཆོག་གི་དབུས་བོད་ཀྱི་དགོན་སྡེ་ཁག་དང་མངའ་སྡེ་བློན་ཆེན་གྱི་དབུས་སྨན་པ་དང་སྨན་ཞབས་པ་ཚོའི་ཐུགས་ཁུར་འོག ཧི་མ་ཅལ་གྱི་མི་མང་ཡོངས་ལ་འགོག་ཁབ་དང་པོ་བརྒྱབ་ཟིན་པར་སྤོབས་པ་དང་བསྟོད་བསྔགས་གནང་།
ཁ་སང་རྒྱ་གར་སྲིད་བློན་མུ་དྷི་མཆོག་གིས་ཧི་མ་ཅལ་གྱི་མངའ་སྡེ་སྤྱི་ཁྱབ་བློན་ཆེན་གྱི་དབུས་འཕྲོད་བསྟེན་དང་འབྲེལ་བའི་ཆེད་མཁས་པ་ཁག་ཅིག་དང་ལྷན་དུ་དྲ་ལམ་ཚོགས་འདུ་ཞིག་བསྡུས་པའི་སྟེང་། ཧི་མ་ཅལ་གྱི་མི་འབོར་ས་ཡ་བདུན་དང་ཕྱེད་ཀ་(༧།༥༡)ལྷག་སྟེ། ཧི་མ་ཅལ་གྱི་མི་འབོར་བརྒྱ་ཆའི་བརྒྱ་ལ་ཏོག་དབྱིབས་འགོག་ཁབ་དང་པོ་བརྒྱབ་ཟིན་པའི་གནས་སྟངས་ཕྱིར་བསྒྲགས་དང་འབྲེལ། ཧི་མ་ཅལ་ནི་མི་མང་ལ་ཏོག་དབྱིབས་འགོག་ཁབ་དང་པོ་བརྒྱབ་ཟིན་པའི་རྒྱ་གར་གྱི་མངའ་སྡེ་ཐོག་མ་དེ་ཆགས་པར་བསྟོད་བསྔགས་དང་སྤོབས་པ་སྐྱེས་ཡོད་པ་མ་ཟད། ༧གོང་ས་མཆོག་གི་དབུས་བོད་བརྒྱུད་ནང་བསྟན་གྱི་དགོན་ཁག་དང་སྨན་པ་དང་སྨན་ཞབས་པ་སོགས་ནས་ཏོག་དབྱིབས་འགོག་ཁབ་བརྒྱག་དགོས་པའི་ཐུགས་ཁུར་དང་རྒྱབ་སྐྱོར་གནང་བར་ཡི་རངས་བྱེད་ཀྱི་ཡོད་སྐོར་བརྗོད་འདུག
སྲིད་བློན་མུ་དྷི་མཆོག་གིས། ཏོག་དབྱིབས་གཉན་རིམས་ཐོག་མར་ཧི་མ་ཅལ་གྱི་གྲོང་གསེབ་ཁག་ཏུ་འགོས་ཁྱབ་བྱུང་དུས་མི་མང་པོར་སྐྲག་སྣང་བྱུང་ཡོད་མོད། ང་ཚོས་ནང་པའི་དགོན་སྡེ་ཁག་གི་མཁན་པོ་དང་བླ་མ་རྣམས་ལ་འབྲེལ་བ་ཞུས་ཏེ། འགོག་ཁབ་ལ་ཟུར་སྐྱོན་མེད་པ་དང་དགེ་འདུན་པ་ཚོ་དང་མི་མང་ནས་འགོག་ཁབ་བརྒྱག་པར་སྐུལ་མ་གཏོང་དགོས་པའི་འབོད་སྐུལ་ཞུས་ཡོད། ༧གོང་ས་རྒྱལ་བ་རིན་པོ་ཆེ་མཆོག་གིས་ཏོག་དབྱིབས་འགོག་ཁབ་བསྐྱོན་པའི་བརྙན་ཞིག་ཁྱབ་བརྡལ་དུ་ཕྱིན་པ་དེས་ལྷག་ཏུ་མང་ཚོགས་ནས་འགོག་ཁབ་བརྒྱག་པར་སེམས་སྐུལ་ཐེབས་ཡོད། ཅེས་བརྗོད་ཡོད་པ་རེད།
རྒྱ་གར་ཧིན་རྡུལ་སི་ཐན་གསར་ཁང་གི་གནས་ཚུལ་ནང་སྲིད་བློན་མུ་དྷི་མཆོག་གིས། ཧི་མ་ཅལ་མངའ་སྡེ་གཞུང་གིས། ལོ་བཅོ་བརྒྱད་ཡན་གྱི་མི་མང་བརྒྱ་ཆ་བརྒྱ་ལ་ཏོག་དབྱིབས་འགོག་ཁབ་དང་པོ་བརྒྱབ་ཟིན་པ་དང་བརྒྱ་ཆའི་གསུམ་ཆ་གཅིག་ལ་འགོག་ཁབ་ཐེངས་གཉིས་པ་བརྒྱབ་ཟིན་པ་ནི་ཧ་ཅང་དགའ་སྤོབས་སྐྱེས་ཡུལ་ཞིག་རེད། ཅེས་བརྗོད་ཡོད་པ་དང་། ད་ལྟ་ཧི་མ་ཅལ་མངའ་སྡེ་ཡི་གཙོས་འབྲས་ལྗོངས་དང་རང་སྐྱོང་ཁུལ་ (Dadra and Nagar Haveli) སོགས་ནས་མི་མང་བརྒྱ་ཆའི་བརྒྱ་ལ་ཏོག་དབྱིབས་འགོག་ཁབ་དང་པོ་བརྒྱབ་ཟིན་ཡོད་པ་དང་། གཞན་ཡང་རྒྱ་གར་གྱི་མངའ་སྡེ་མང་དག་ཅིག་གིས་ཏོག་དབྱིབས་འགོག་ཁབ་དང་པོ་བརྒྱབ་ཟིན་གྲབས་ཡོད་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ཚོགས་ཆུང་ལ་འབྲེལ་བ་ཞུས་ཏེ། ཧི་མ་ཅལ་མངའ་སྡེའི་ནང་བོད་མི་ག་ཚོད་ཅིག་ལ་ཏོག་དབྱིབས་འགོག་ཁབ་བརྒྱབ་ཡོད་མེད་ཀྱི་བཀའ་འདྲི་ཞུ་རྩིས་བྱས་ནའང་། ཛ་དྲག་ཚོགས་ཆུང་གི་ལས་མི་མང་པོ་སྐོར་བསྐྱོད་དུ་ཕེབས་ཀྱི་ཡོད་པའི་གནས་སྟངས་འོག་མཐུད་ཐུབ་མ་སོང་བ་དང་། ཉེ་སྔོན་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ཚོགས་ཆུང་གི་གསལ་བསྒྲགས་ལྟར་ན། ཕྱི་ཟླ་ ༩ ཚེས་ ༢ བར་རྒྱ་གར་ནང་ལོ་ན་ ༡༨ ཡན་གྱི་བོད་མི་གྲངས་ ༢༩༤༡༩ ལ་སྔོན་འགོག་སྨན་ཁབ་རིམ་པ་གཉི་ག་བརྒྱབ་ཟིན་ཡོད་ཅིང་། དེའི་ཁྲོད་ཀྱི་བོད་མི་གྲངས་ ༢༠༣༩༡ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་ཡོད་འདུག དམིགས་བསལ་བལ་ཡུལ་ནང་བོད་མི་ ༦༧༣ ལ་སྔོན་འགོག་སྨན་ཁབ་རིམ་པ་དང་པོ་དང་མི་གྲངས་ ༣༠༨༧ ལ་འགོག་ཁབ་རིམ་གཉིས་ཀ་ཐོབ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
སྐད་ཆ་བཤད་སྟངས དེས་ཐོམ་བཅུག་ཉེན་འདུག ངོ་ནས་བྱས་ན་རིམ་གཉིས་ཀ་ཐོམ་ཟིན་པ་་་་་་་་ཅིག་དང་། འགོག་དང་བོ་ཐོབ་མཁན་མང་དགོས་པ་དང། གཉིས་ཀ་ཐོབ་མཁན་ཉུང་དགོས་པ་རེད། འདིར་ ་བོད་མི་ ༦༧༣ ལ་སྔོན་འགོག་སྨན་ཁབ་རིམ་པ་དང་པོ་དང་མི་གྲངས་ ༣༠༨༧ ལ་འགོག་ཁབ་རིམ་གཉིས་ཀ་ཐོབ་ཡོད་པ་རེད། >ཅེས་<བཤད་པ་དང་བོ་མ་གཏོག་གཉིས་ཀ་ཐོབ་མེད་མཁན་ཡིན་པ་འདྲ། ་