འདས་པའི་བདུན་ཕྲག་གཅིག་རིང་རྒྱ་གར་དང་བལ་ཡུལ་ནང་ཁྱོན་བོད་མི་ ༢༤ ལ་ཏོག་དབྱིབས་ན་ཚ་ཕོག་ཡོད་པ་དང་བོད་མི་གཅིག་འདས་གྲོངས་སུ་ཕྱིན་ཡོད་འདུག
དེ་རིང་ཉིན་རྒྱབ་ཆུ་ཚོད་ ༤ ཙམ་གྱི་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༦ སྤེལ་བ་ལྟར་ན། འདས་པའི་བདུན་གཅིག་ནང་རྒྱ་གར་གྱི་ས་གནས་ ༡༤ དང་བལ་ཡུལ་གྱི་ས་གནས་ ༦ ཡི་ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༧༠༥ དང་ཚོགས་སྡེའི་ཟུར་བཀག་ཁང་དུ་མི་ ༣༤ བཅས་ཁྱོན་བསྡོམས་མི་གྲངས་ ༡༠༣༩ ཟུར་བཀག་འོག་ཡོད་པ་དང་། རྒྱ་གར་ནང་ཏོག་དབྱིབས་ནད་གཞི་གསར་དུ་ཕོག་མཁན་བོད་མི་ ༢༤ བྱུང་བའི་ཁྲོད་ནས་ལོ་ན་མཐོ་ཤོས་ ༦༧ དང་ལོ་ན་ཆུང་ཤོས་ ༡༩ ཡིན་འདུག འདས་པའི་བདུན་ཕྲག་ནང་བོད་མི ༡ རྐྱེན་འདས་སུ་ཕྱིན་ཡོད་པ་རེད། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་ ༦༢༧༠ བྱུང་བའི་ཁྲོད་དྲག་སྐྱེད་ཟིན་པ་ ༦༠༧༡ དང་། འདས་གྲོངས་སུ་ཕྱིན་པ་ ༡༥༠། ད་ལྟ་ཏོག་ནད་ཀྱིས་མནར་བཞིན་པ་བོད་མི་ ༤༩ ཡོད་འདུག
གསར་འགོད་གསལ་བསྒྲགས་སྟེང་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས། ཉིན་ཤས་སྔོན་ལ་རྒྱ་གར་བྱང་ཤར་ཁུལ་གྱི་བོད་མི་གཞིས་ཆགས་ཁག་ཏུ་ཏོག་དབྱིབས་གཉན་རིམས་དང་འབྲེལ་ནས་སྐོར་བསྐྱོད་བྱེད་རིང་ས་གནས་ཀྱི་འཕྲོད་ལས་པ་ལྷན་དུ་བཀའ་མོལ་བྱུང་ཡོད་ཅིང་། མང་ཚོགས་ཁྲོད་གཉན་རིམས་བརྟག་དཔྱད་བྱེད་རྒྱུ་སོགས་པའི་ཐད་ལ་ཞེད་སྣང་བྱེད་མཁན་མང་པོ་ཡོད་པ་དང་། ཡང་ས་གནས་འགའ་ཤས་ལ་གཡས་གཡོན་ཏུ་བསྟེན་གཏུག་བྱ་སའི་སྨན་ཁང་ཆེན་པོ་མེད་པ་དང་། ཡོད་པའི་དབང་དུ་བཏང་ནའང་ཆུ་ཚོད་གསུམ་ནས་དྲུག་ཙམ་བསྐྱོད་དགོས་པ་ལྟ་བུའི་གནས་སྟངས་ཡོད་སྟབས། མི་མང་ལ་དངོས་སུ་ཐུག་འཕྲད་ཀྱིས་ལམ་སྟོན་ཞུ་རྒྱུ་བྱུང་ཡོད་སྐོར་དང་། ཚང་མས་ནད་བརྟག་ཡོད་མེད་བརྟག་དཔྱད་བྱ་རྒྱུ་དེ་ཧ་ཅང་གལ་ཆེན་པོ་ཡིན་པ་དང་། གལ་ཏེ་ནད་རྟགས་ཐོན་ཏེ་སྔ་ས་ནས་སྨན་བཅོས་བྱས་པ་ཡིན་ན་ཕྱིས་སུ་སྨན་ཁང་ནང་ཉལ་སྡོད་པ་སོགས་པའི་ཉེན་ཁ་འཕྲད་རྒྱུར་ཉུང་དུ་འགྲོ་ཡི་ཡོད་སྐོར་དང་། བྱང་ཤར་ས་གནས་འགའ་ཤས་ནང་ཉེ་འཁྲིས་སུ་སྨན་ཁང་ཆེན་པོ་མེད་སྟབས། ནད་གཞི་མ་ཕོག་གོང་དུ་ཟུར་བཀག་སྡོད་རྒྱུ་སོགས་པའི་སྔོན་འགོག་རིགས་ལག་ལེན་བྱ་རྒྱུ་གལ་འགངས་ཆེན་པོ་ཡིན་པ་དང་། ཡང་ས་གནས་གནས་སུ་གསར་འགྱུར་བརྒྱུད་ལམ་གྱི་གནས་ཚུལ་འདྲ་མིན་ལ་བརྟེན་ནས་མང་ཚོགས་ཁྲོད་འགོག་ཁབ་བརྒྱག་རྒྱུར་ཞེད་སྣང་བྱེད་མཁན་མང་པོ་། རྒྱ་གར་ནང་ད་བར་མི་བྱེ་བ་ ༧༡།༦༥ ཙམ་ལ་འགོག་ཁབ་བརྒྱབ་ཟིན་པ་དང་། དེ་དག་ཕལ་ཆེ་བར་དཀའ་ངལ་ཆེན་པོ་ཕྲད་མེད་པར་བརྟེན། མང་ཚོགས་ངོས་ནས་ཕན་ཚུན་དབར་བར་ཐག་འཇོག་རྒྱུ་དང་ཁ་རས་གྱོན་རྒྱུས་མཚོན་པའི་རང་ཉིད་ལ་གཉན་རིམས་མི་འགོ་བའི་ཐབས་ཤེས་དེ་དག་སྟེང་། འགོག་ཁབ་བརྒྱབ་རྒྱུ་དེ་ཧ་ཅང་གལ་ཆེན་པོ་ཆགས་ཡོད་སྐོར་སོགས་ལམ་སྟོན་བྱས་ཡོད་འདུག
ཡང་ཁོང་གིས། ད་ལྟའི་ཆར་རྒྱ་གར་ནང་མཚོན་ན་ལྷོ་ཕྱོགས་ཀྱི་མངའ་སྡེ་ཁག་ཅུང་ཛ་དྲག་པ་ཆགས་ཀྱི་ཡོད་པ་དང་། དེའི་ནང་ནས་ཀྱང་ཀེ་ར་ལ་དང་བོད་མི་མང་པོ་གནས་སྡོད་བྱ་སའི་མངའ་སྡེ་ཀར་ན་ཊ་ཀའི་ནང་གཉན་རིམས་ཕོག་མཁན་མང་པོ་འབྱུང་བཞིན་ཡོད་པ་དང་། དེའི་ཐོག་ད་ལྟའི་ཆར་ཀེ་ར་ལ་ནང་ཏོག་དབྱིབས་གཉན་རིམས་ཙམ་མ་ཟད། ཕྱི་ལོ་ ༢༠༡༨ ལོར་མངའ་སྡེ་དེར་ཁྱབ་སྤེལ་བྱུང་བའི་ནི་པ་གཉན་སྲིན་ (Nipah Virus) འགོས་པའི་ནད་པ་ཐོན་པའི་གནས་ཚུལ་བྱུང་ཡོད་སྟབས། ཀར་ན་ཊ་ཀ་མངའ་སྡེ་གཞུང་ངོས་ནས་མེ་སོར་གཙོས་པའི་འབྲེལ་ཡོད་ས་གནས་གསུམ་ནང་ངེས་གཟབ་དགོས་པའི་ལམ་སྟོན་ཕེབས་ཡོད་པ་ལྟར། སྦེལ་ཀོབ་དང་ཀོ་ལེ་གྷལ། ཧུན་སུར་གཞིས་ཆགས་ཀྱི་བོད་མི་རྣམས་ཀྱིས་དོ་གཟབ་དགོས་པ་དང་། ནི་པ་གཉན་སྲིན་གྱི་ནད་རྟགས་གཙོ་བོ་ཁག་ནི་ཚ་བ་འཕར་བ་དང་། མགོ་ན་བ། ལུས་སྟོབས་ཟད་པ། རིག་པ་གྲིབ་པ་ལྟ་བུ། དབུགས་གཏོང་ལེན་དཀའ་བ་དང་། སྐྱུག་མེར་ལངས་བ་སོགས་ཡིན་པས། ནད་རྟགས་དེ་རིགས་ཐོན་པ་རྣམས་ཀྱིས་སྨན་པར་བསྟེན་གཏུག་དགོས་སྐོར་ལམ་སྟོན་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་བོད་ཀྱི་སྨན་རྩིས་ཁང་ནས་རིན་མེད་ཐོག་གསོ་རིག་ལུས་སེམས་ནད་གསོའི་སྨན་ ༥༡༨༣༧ བགོ་འགྲེམས་དང་། དམིགས་བསལ་བྱིས་པ་རྣམས་ལ་ལུས་སེམས་ནད་གསོའི་སྨན་ ༡༣༡༥༡ བགོ་འགྲེམས་བྱུང་ཡོད་ཅིང་། འདས་པའི་བདུན་ཕྲག་གཅིག་རིང་མི་གྲངས་ ༤༣ ལ་སེམས་ཁམས་འཕྲོད་བསྟེན་ལམ་སྟོན་གནང་ཡོད་པ་དང་རྒྱ་གར་གྱི་ས་གནས་ ༡༣ དང་བལ་ཡུལ་ནང་གི་ས་གནས་གྲངས་ ༤ ནས་མི་གྲངས་ ༨༤༨ ལ་ཏོག་དབྱིབས་བརྟག་དཔྱད་གནང་ཡོད་པ་རེད་ལ། ད་བར་རྒྱ་གར་ནང་ཏོག་དབྱིབས་འགོག་ཁབ་ཚར་གཉིས་ཀ་བརྒྱབ་ཟིན་པའི་མི་གྲངས་ ༣༡༥༦༡ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༣༡༩༡ དང་འགོག་ཁབ་ཚར་དང་པོ་ཐོབ་མཁན་མི་གྲངས་ ༥༣༣ ཆགས་ཡོད་འདུག
གསར་འགོད་པ། པ་སངས་ཚེ་རིང། དཔལ་ལྡན།