༧གོང་ས་མཆོག་ནས་སྲིད་བློན་མུ་དྷི་མཆོག་གི་འཁྲུངས་སྐར་ལ་འཚམས་འདྲི་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་དགུང་གྲངས་ ༧༡ ལ་ཕེབས་པའི་འཁྲུངས་སྐར་ལ་འཚམས་འདྲིའི་གསུང་འཕྲིན་སྩལ་ཏེ་སྲིད་བློན་མཆོག་སྐུ་གཟུགས་བདེ་ཐང་ཡོང་བའི་ཐུགས་སྨོན་གནང་།

དེ་རིང་རྒྱ་གར་གྱི་སྲིད་བློན་ན་རེན་དྷ་ར་མུ་དྷི་མཆོག་གི་འཁྲུངས་སྐར་དང་བསྟུན། ༧གོང་ས་རྒྱལ་བ་རིན་པོ་ཆེ་མཆོག་ནས་སྲིད་བློན་མཆོག་ལ་འཚམས་འདྲིའི་ཕྱག་ཡིག་ཅིག་བསྐུར་གནང་བའི་ནང་། སྲིད་བློན་མཆོག་གིས་ཏོག་དབྱིབས་གཉན་རིམས་ལྟ་བུའི་དཀའ་ངལ་ལ་མ་ལྟོས་པར། རྒྱ་གར་གྱི་མང་ཚོགས་ལ་གདེང་སྤོབས་སྔར་ལྷག་སྦྱིན་པ་དེར་ཡི་རང་དང་སྦྲགས། སྲིད་བློན་མཆོག་སྐུ་གཟུགས་བདེ་ཐང་ཡོང་བའི་ཐུགས་སྨོན་མཛད་འདུག

༧གོང་ས་མཆོག་གི་འཚམས་འདྲིའི་གསུང་འཕྲིན་གྱི་མགོར། ངོས་ནས་ཁྱེད་ཀྱི་འཁྲུངས་སྐར་ལ་སྙིང་ཐག་པ་ནས་འཚམས་འདྲི་ཞུ་ཡི་ཡོད་ལ། ཁྱེད་ཉིད་ནད་མེད་ཚེ་རིང་ཡོང་བར་ཤོག ཅེས་གསུངས་པ་དང་འབྲེལ། མགོན་པོ་མཆོག་རྒྱ་གར་གྱི་རྒྱལ་ཁབ་ལ་དགའ་ཞེན་ཆེན་པོ་བྱེད་མཁན་གྱི་གང་ཟག་ཅིག་ཡིན་པའི་ཆ་ནས། ཏོག་དབྱིབས་གཉན་རིམས་ལྟ་བུའི་དཀའ་ངལ་ལ་མ་ལྟོས་པར། སྲིད་བློན་མཆོག་གིས་མང་ཚོགས་ལ་གདེང་སྤོབས་སྔར་ལྷག་སྦྱིན་པར་དགའ་བསུ་ཞུ་ཡི་ཡོད། འཛམ་གླིང་ནང་གི་མི་འབོར་ཆེ་ཤོས་ཀྱི་དམངས་གཙོའི་རྒྱལ་ཁབ་ཅིག་ཡིན་པའི་ཆ་ནས། རྒྱ་གར་ལ་ལེགས་གྲུབ་གང་བྱུང་བ་དེས་རྒྱ་གར་གྱི་ཡུལ་མི་ཙམ་དུ་མ་ཟད། འཛམ་གླིང་སྤྱི་ཡོངས་ཀྱི་ཡར་རྒྱས་གོང་འཕེལ་ལའང་ཕན་ཐོགས་ཐུབ་ངེས་རེད། ཅེས་གསུངས་གནང་འདུག

ཡང་མགོན་པོ་མཆོག་གིས། རྒྱ་གར་གྱི་གནའ་བོའི་སྙིང་རྗེས་རྒྱབ་རྟེན་བྱས་པའི་འཚེ་མེད་ཞི་བའི་རིག་གཞུང་དེ་ཉིད། དེང་གི་འཇིག་རྟེན་ལ་རན་འཚམ་ཡོད་པ་ཙམ་དུ་མ་ཟད་མཁོ་གལ་ཆེ་བ་ཞིག་ཡིན་པར་ཡིད་ཆེས་རྙེད་ཡོད་པ་དང་། དེ་བཞིན་འགྲོ་བ་མིའི་རིགས་སྤྱི་ཡི་ཕན་བདེའི་ཆེད་དུ་འཚེ་མེད་ཞི་བའི་རིག་གཞུང་དེ་ཉིད་དེང་རབས་ཤེས་ཡོན་དང་ཟུང་འབྲེལ་བྱ་ཆོག་པ་ཞིག་ཡིན་སྟབས། གོ་སྐབས་ནམ་བྱུང་ལ་རྒྱ་གར་གྱི་རྩལ་སྟོབས་རྒྱས་པའི་དམངས་གཙོ་དང་། ཆོས་ལུགས་སྣ་མང་འདུས་པའི་ཁྱད་ཆོས། དེ་བཞིན་རྒྱ་གར་གྱི་མཛའ་མཐུན་དང་བརྟན་བརླིང་བཅས་ལ་བསྔགས་བརྗོད་གནང་གི་ཡོད་སྐོར་གསུངས་འདུག

འཚམས་འཕྲིན་གྱི་མཇུག་དེར་མགོན་པོ་མཆོག་གིས། ང་ཚོ་བོད་མི་བཙན་བྱོལ་བ་རྣམས་ལ་མཚོན་ན། རྒྱ་གར་འདིའི་ནང་སེམས་ཀྱི་རྟེན་ས་ཙམ་མིན་པར། འདས་པའི་ལོ་ངོ་ ༦༠ ལྷག་གི་རིང་ནས་ཕྱི་ལུས་པོ་རྟེན་སའི་ཁྱིམ་ལྟ་བུ་ཆགས་ཡོད། ངོས་ཀྱིས་གོ་སྐབས་འདི་བརྒྱུད་ནས་རྒྱ་གར་གྱི་གཞུང་མང་གཉིས་ནས་ང་ཚོ་བོད་མི་རྣམས་ལ་ད་བར་སྣེ་ལེན་( warm and generous hospitality we have received.)ཞུས་པར་སྙིང་ཐག་པ་ནས་ཐུགས་རྗེ་ཆེ་ཞུ་ཡི་ཡོད། ཅེས་གསུངས་འདུག

འདི་ལོར་སྲིད་བློན་མུ་དྷི་མཆོག་གིས་ཡོངས་གྲགས་ཀྱི་ཐོག་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་ཉིན་འཚམས་འདྲི་ཞུས་ཡོད་ཅིང་། དེ་ནི་ཕྱི་ལོ་ ༢༠༡༥ ལོའི་རྗེས་སུ་རྒྱ་གར་གྱི་སྲིད་བློན་ཞིག་གིས་ཡོངས་གྲགས་ཀྱི་ཐོག་ནས་སྐུའི་འཁྲུངས་སྐར་ལ་འཚམས་འདྲི་ཞུས་པ་ཐེངས་དང་པོ་ཆགས་ཡོད་པ་ལྟར། སྐབས་དེར་རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་ཁག་ཏུའང་སྲིད་བློན་མུ་དྷི་མཆོག་གི་གནང་ཕྱོགས་དེར་བསྔགས་བརྗོད་དང་སྐྱོན་བརྗོད་བྱེད་མཁན་ཡང་བྱུང་ཡོད་པ་རེད།

གསར་འགོད་པ། པ་སངས་ཚེ་རིང་།