རྒྱ་གར་གྱི་སྲིད་བློན་མུ་དྷི་མཆོག་དགུང་གྲངས་ ༧༡ ཕེབས་པའི་འཁྲུངས་སྐར་དང་བསྟུན་དྷ་ས་བོད་ཁྱིམ་ཉིན་སློབ་ཏུ་བོད་མི་གཙོ་བོར་གྱུར་བའི་རྒྱ་གར་ཡུལ་མི་བཅས་ལ་ཏོག་དབྱིབས་འགོག་ཁབ་རྒྱག་པ་དང་བརྟག་དཔྱད་བྱེད་བཞིན་འདུག་ལ་དེ་རིང་ཉིན་རྒྱབ་བར་ཏོག་དབྱིབས་འགོས་མཁན་གསུམ་ཤེས་རྟོགས་བྱུང་ཡོད་འདུག
དེ་རིང་རྒྱ་གར་སྲིད་བློན་མུ་དྷི་མཆོག་གི་འཁྲུངས་སྐར་དང་བསྟུན། དྷ་ས་བོད་ཁྱིམ་ཉིན་སློབ་ཏུ་བདེ་ལེགས་སྨན་ཁང་གིས་གཙོ་འགན་བླངས་ཏེ། དྷ་ས་ས་གནས་མགོ་འཛིན་ལས་ཁུངས་དང་རོ་ཊ་རི་(Rotary Club)། ཧིན་བོད་མཛད་འབྲེལ་ཚོགས་པ། ཀུན་ཕན་བདེ་རྩ་བཅས་མཉམ་རུབ་ཀྱིས། བོད་མི་དང་རྒྱ་གར་ཡུལ་མིར་ཏོག་དབྱིབས་འགོག་ཁབ་དང་། ཏོག་དབྱིབས་བརྟག་དཔྱད་གནང་གི་འདུག་ལ། འཁྲུངས་སྐར་སྲུང་གཙིའི་ཐོག་ཀང་ར་རྫོང་གི་རྫོང་དཔོན་གཞོན་པ་སྐུ་ཞབས་རཱ་ཧུལ་ཀུ་མར་ (Rahul Kumar )ལགས་དང་སྨན་པ་ཆེན་མོ་སོགས་ཕེབས་འདུག
དེ་རིང་ཉིན་བརྒྱབ་ཆུ་ཚོད་ ༣ མ་ཟིན་ཙམ་ལ་བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་ཀྱིས་འདི་གའི་གསར་འགོད་པར་བརྗོད་པ་ལྟར་ན། རིན་མེད་ཐོག་མི་གྲངས་ ༥༠༠ ལྷག་ལ་ཏོག་དབྱིབས་འགོག་ཁབ་བརྒྱག་ཐུབ་རྒྱུའི་རེ་བ་བྱེད་བཞིན་ཡོད་ལ། དེ་རིང་ཞོགས་པ་ནས་ད་ལྟ་བར་མི་གྲངས་ ༣༢ ལ་འགོག་ཁབ་བརྒྱབ་ཟིན་པ་དང་། མི་གྲངས་ ༢༢ ལ་ནད་གཞི་བརྟག་དཔྱད་བྱས་པའི་ཁྲོད། མི་ ༣ ལ་ཏོག་དབྱིབས་འགོས་ཡོད་འདུག ད་ལྟ་མུ་མཐུད་འགོག་ཁབ་རྒྱག་པ་དང་བརྟག་དཔྱད་གནང་མུས་ཡིན་འདུག
ཞོགས་པའི་མཛད་སྒོའི་ཐོག་སྐུ་ཞབས་རཱ་ཧུལ་ཀུ་མར་ (Rahul Kumar ) ལགས་ཀྱིས། དེ་རིང་རྒྱ་གར་གྱི་སྲིད་བློན་མུ་དྷི་མཆོག་དགུང་གྲངས་ ༧༡ ཕེབས་པའི་འཁྲུངས་སྐར་དང་བསྟུན་ང་རང་འདིར་བཅར་བ་ཡིན་ལ། གཞུང་འབྲེལ་མ་ཡིན་པའི་ཚོགས་སྡེ་ཁག་ཅིག་གིས་སྨན་བཅོས་ལྟ་སྐྱོང་གི་ས་ཚུགས་བཙུགས་ཏེ། མི་མང་ལ་འགོག་ཁབ་རྒྱག་གིན་ཡོད་སྟབས། ངས་ཁོང་ཅག་གི་བྱ་བ་ལམ་ལྷོངས་ཡོང་བའི་རེ་བ་ཡོད། གལ་ཏེ་རྡ་སའི་ཁུལ་དུ་ཏོག་དབྱིབས་འགོག་ཁབ་ཀྱི་དཀའ་ཁག་རིགས་བྱུང་ཚེ། ང་ཚོའི་མཐུན་འགྱུར་རོགས་རམ་གནང་རྒྱུ་ཡིན། ཞེས་སོགས་གསུངས་སོང་།
ཡང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས། བོད་མི་རྣམས་ཀྱི་སྐད་ཡག་པོ་མི་ཤེས་པ་དང་། ས་གནས་སོགས་ལ་རྒྱུས་མངའ་མེད་སྟབས་དཀའ་ངལ་འཕྲད་མུས་ཡིན་པ་ལྟར། དགོན་པ་གྲྭ་ཚང་སོགས་ལ་བཅར་ནས་འགོག་ཁབ་བརྒྱབ་ཡོད་པ་དང་། དྷ་ས་ཁུལ་གྱི་ཁ་འཐོར་མི་མང་ལའང་འགོག་ཁབ་རྒྱག་མུས་ཡིན་པ་རེད། དེ་རིང་རྒྱ་གར་གྱི་སྲིད་བློན་མུ་དྷི་མཆོག་གི་འཁྲུངས་སྐར་དང་བསྟུན་ནས། བོད་མི་གཙོས་རྒྱ་གར་ཡུལ་མི་རྣམས་ལ་རིན་མེད་ཐོག་འགོག་ཁབ་རྒྱག་གི་ཡོད། རྒྱ་གར་གཞུང་མང་གཉིས་ཀ་བོད་མི་རྣམས་ལ་བཀའ་དྲིན་ཆེན་པོ་ཡིན་པ་ལྟར། ཁོང་ཅག་ལ་སྲི་ཞུ་དང་རོགས་རམ་མཚོན་ཆེན་དུའང་ཡིན་སྐོར་སོགས་གསུངས་སོང་།
རྒྱ་གར་ནང་གི་ས་གནས་གང་སར་ཏོག་དབྱིབས་རིམས་ནད་ཀྱི་འགོག་ཁབ་རྒྱག་མུས་ཡིན་པ་ལྟར། བདེ་ལེགས་སྨན་ཁང་ནས་ཀྱང་སྨན་ཁབ་མཁོ་སྒྲུབ་ཀྱིས་བོད་མི་གཙོ་བོར་གྱུར་བའི་རྒྱ་གར་ཡུལ་མི་བཅས་ལ་འགོག་ཁབ་རྒྱག་མུས་ཡིན་པ་བཞིན། བདེ་ལེགས་སྨན་ཁང་ནས་ད་བར་དུ་ཏོག་དབྱིབས་འགོག་ཁབ་ ༦༢༣༢ བརྒྱབ་ཟིན་པའི་ཁྲོད། མི་གྲངས ༤༢༧༦ ལ་འགོག་ཁབ་དང་པོ་ཐོབ་ཡོད་པ་དང་། མི་གྲངས་ ༡༨༤༠ ལ་འགོག་ཁབ་གཉིས་ཀ་ཐོབ་ཡོད་པ་རེད།
དཔལ་ལྡན།
