ཕྱི་ལོ་ ༢༠༢༡ ལོའི་སྦེལ་ཇམ་མཛངས་མ་ཆེན་པོའི་འགྲན་བསྡུར་ནང་བོད་ཀྱི་བུད་མེད་བསྟན་འཛིན་འཛོམས་སྐྱིད་ལགས་ཀྱིས་མཉམ་ཞུགས་བྱས་ཏེ་རྟིང་རྩོད་འགྲན་བསྡུར་ཁྲོད་རྩེ་ཕུད་ཀྱི་རྒྱལ་ཁ་ཐོབ་འདུག
ཟླ་འདིའི་ཕྱི་ཚེས་ ༡༨ ཉིན་ཡུ་རོབ་སྦེལ་ཇེམ་ (Belgium) རྒྱལ་ཁབ་ཏུ་ཕྱི་ལོ་ ༢༠༢༡ ལོའི་སྦེལ་ཇམ་གྱི་མཛངས་མ་ཆེན་མོ་ (Miss Grand Belgium) ཞེས་པའི་བུད་མེད་མཛངས་མའི་འགྲན་བསྡུར་དེ་ཚོགས་ཡོད་པ་་དང་། འགྲན་བསྡུར་དེའི་ནང་བོད་ཀྱི་བུད་མེད་བསྟན་འཛིན་འཛོམས་སྐྱིད་ལགས་ཀྱིས་མཉམ་ཞུགས་བྱས་ཏེ་ཁོང་མོར་མཛངས་མ་རྩེ་ཕུད་ཀྱི་རྒྱལ་ཁ་ཐོབ་ཡོད་འདུག
སྤྱི་ཚོགས་དྲ་ལམ་ཁག་ཏུ་བོད་ཕྱི་ནང་གི་བོད་མི་གཙོས་མི་མང་པོ་ཞིག་གིས་ཁོང་ལ་དགའ་བསུ་ཞུ་བཞིན་འདུག ཁོང་མོས་རང་ཉིད་ཀྱི་སྤྱི་ཚོགས་དྲ་ལམ་ (Instagram) དུ་གསལ་བསྒྲགས་སྤེལ་བའི་ནང་། ཁོ་མོས་ཐེངས་འདིར་རྒྱལ་ཁ་ཐོབ་པ་འདི་ཁོ་མོར་རྒྱབ་སྐྱོར་བྱེད་མཁན་ཚོའི་བཀའ་དྲིན་ཡིན་པ་དང་། མཛངས་མའི་འགྲན་བསྡུར་གྱི་ཨང་རིམ་དང་པོ་ཐོབ་པ་ལས་ལྷག་པ་ནི། རྒྱབ་སྐྱོར་གནང་མཁན་གྱི་ཡིད་ཆེས་དང་རང་ཉིད་ཀྱི་ཕུགས་བསམ་ལ་ཡིད་ཆེས་བརྟན་པོ་རྙེད་པ་དེ་ཡིན་སྐོར་བརྗོད་འདུག་པ་མ་ཟད། རྗེས་སུ་ཏོག་དབྱིབས་གཉན་རིམས་ཀྱི་ནད་ཡམས་མེད་པ་ཆགས་ན། བོད་ཀྱི་མཛངས་མའི་འགྲན་བསྡུར་ (Miss Tibet) ནང་མཉམ་ཞུགས་བྱ་འདོད་ཡོད། ཅེས་བརྗོད་འདུག
ཡང་འཛོམས་སྐྱིད་ལགས་ཀྱིས། རང་ལོ་ ༡༥ སྐབས་མཛངས་མའི་འགྲན་བསྡུར་ནང་མཉམ་ཞུགས་བྱས་མྱོང་ཡོད་ཀྱང་། སྐབས་དེར་རྒྱལ་ཁ་ལས་ཕམ་ཁའི་ཚོར་སྣང་མང་དུ་བྱུང་། འོན་ཀྱང་ཡིད་ཆེས་དང་གདེང་ཚོད་མ་བརླག་པར་མུ་མཐུད་མདུན་བསྐྱོད་བྱས་སྟབས། ཐེངས་འདིའི་རྒྱལ་ཁ་དེ་ནི་ལོ་ལྔའི་རིང་དཀའ་ལས་བརྒྱབས་པའི་འབྲས་བུ་ཡིན་སྐོར་ཡང་བརྗོད་འདུག
བསྟན་འཛིན་འཛོམས་སྐྱིད་ལགས་ནི་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་འཚར་ལོངས་བྱུང་ཞིང་ད་ལྟའི་ཆར་སྦེལ་ཇམ་ནང་གནས་སྡོད་བྱེད་ཀྱི་ཡོད་འདུག ཕྱི་ལོ་ ༢༠༡༧ ལོའི་ཟླ་ ༤ ནང་སྦེལ་ཇམ་གྱི་བུད་མེད་སྒེག་ཉམས་ངོམ་སྟོན་རྩེ་ཕུད་ (Belgium Top Model) འགྲན་བསྡུར་ཞིག་གི་ནང་དུའང་མཉམ་ཞུགས་བྱས་མྱོང་ཡོད་པ་དང་། སྒེག་ཉམས་འགྲན་བསྡུར་དེའི་ཁྲོད་མཉམ་ཞུགས་པ་བུད་མེད་ ༤༠༠ ཡོད་པའི་ནང་ནས། དངོས་གཞིའི་འགྲན་བསྡུར་ཁྲོད་བུད་མེད་ ༦༥ འདེམས་སྒྲུག་བྱས་པའི་ནང་དུ་ཁོང་མོ་ཡང་ཚུད་ཡོད་འདུག
སྤྱིར་སྦེལ་ཇམ་མཛངས་མ་ཆེན་མོ་ཞེས་པའི་འགྲན་བསྡུར་དེ་ནི་རྒྱལ་སྤྱིའི་མཛངས་མ་ཆེན་མོ་ (Miss Grand International)ཞེས་པའི་ཚོགས་པའི་ཆ་ཤས་ཤིག་ཡིན་པ་དང་། རྒྱལ་སྤྱིའི་མཛངས་མའི་འགྲན་བསྡུར་ནང་དུ་རྒྱལ་ཁབ་སོ་སོ་ནས་རྒྱལ་ཁ་ཐོབ་པའི་མཛངས་མ་ཚོས་སོ་སོའི་རྒྱལ་ཁབ་ཀྱི་ངོ་ཚབ་བྱས་ཏེ་འགྲན་བསྡུར་ནང་མཉམ་ཞུགས་ཆོག་པ་ཡིན། འགྲན་བསྡུར་ཆེན་མོ་དེ་ཉིད་ཐོག་མར་ཕྱི་ལོ་ ༢༠༡༣ ལོར་ཐའེ་ལན་ཌ་ (Thailand) རྒྱལ་ཁབ་ནང་ནས་མགོ་བཙུགས་ཡོད་པ་དང་། འདི་ལོའི་འགྲན་བསྡུར་ཕྱི་ཟླ་ ༡༢ ནང་ཐའེ་ལན་ཌའི་གྲགས་ཅན་གླིང་ཕྲན་ཕུ་ཀེཏ་ (Phuket) ཞེས་པའི་ནང་གོ་སྒྲིག་ཞུ་འཆར་འདུག
གསར་འགོད་པ་བསྟན་འཛིན་ཕུར་བུ།
