བོད་རང་བཙན་སོགས་བཀག་པའི་རྒྱ་ནག་གི་ཁ་པར་རྣམས་མར་གཡུག་དགོས་པའི་ལམ་སྟོན་གནང་།

དེ་རིང་རྒྱ་ནག་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། ཡུ་རོབ་ཀྱི་རྒྱལ་ཁབ་ལི་ཐུ་ནི་ཡའི་རྒྱལ་སྲུང་ལྷན་ཁང་གིས་ཡུལ་དེའི་མང་ཚོགས་ལ་རྒྱ་ནག་གིས་བཟོ་སྐྲུན་བྱས་པའི་ཁ་པར་གྱིས་བོད་རང་བཙན་དང་ཐའེ་ཝན་རང་བཙན་ལ་སོགས་པའི་བརྗོད་ཚིག་དག་བཀག་སྡོམ་བྱེད་ཀྱི་ཡོད་པའི་རྐྱེན་གྱིས་ཁ་པར་རྣམས་རྒྱའི་ཁ་པར་བེད་སྤྱོད་མཚམས་འཇོག་དགོས་པའི་ཡོངས་ཁྱབ་ལམ་སྟོན་བྱས་འདུག

ལི་ཐུ་ནི་ཡའི་རྒྱལ་སྲུང་བློན་ཆེན་གཞོན་པ་མར་གྷི་རི་སི་ (Margiris Abukevicius) ལགས་ཀྱིས། ང་ཚོའི་ལམ་སྟོན་ནི། མང་ཚོགས་རྣམས་ཀྱིས་འབྱུང་འགྱུར་རྒྱ་ནག་གི་ཁ་པར་མི་ཉོ་རྒྱུ་དང་། ད་ལྟ་ཉོས་ནས་བཀོལ་སྤྱོད་བྱེད་བཞིན་པ་དག་གང་མགྱོགས་གཡུག་དགོས་པ་དེ་ཡིན། ཞེས་བརྗོད་ཡོད་འདུག འོན་ཀྱང་། ད་ལྟའི་ཆར་རྒྱ་ནག་གཞུང་དང་ཤའོ་མི་ཁ་པར་བཟོ་ཚོང་ཁང་གིས་གནད་དོན་འདིའི་ཐད་གསལ་བཤད་ལྟ་བུ་གང་ཡང་བྱས་མི་འདུག

ལི་ཐུ་ནི་ཡའི་རྒྱལ་སྲུང་ལྷན་ཁང་གི་དྲ་ལམ་བདེ་འཇགས་ཚན་པས་ཉེ་ཆར་ཡུ་རོབ་ཁུལ་དུ་ཚོང་འགྲེམ་བྱས་པའི་རྒྱ་ནག་གི་ཁ་པར་ལ་ཞིབ་འཇུག་བྱེད་སྐབས། རྒྱ་ནག་གི་ཁ་པར་བཟོ་ཚོང་ཁང་ཆེ་གྲས་ཤའོ་མི་ (Xiaomi) ཡི་ཁ་པར་མ་ལག་ནང་བོད་རང་བཙན་དང་། ཐའེ་ཝན་གྱི་རང་བཙན་ཁྲི་ལོར་བརྟན་པར་ཤོག དམངས་གཙོའི་ལས་འགུལ་གྱིས་མཚོན་པའི་རྒྱ་ནག་གཞུང་ལ་གནོད་པའི་ཚིག་བརྗོད་རྣམས་བཀག་སྡོམ་བྱེད་པའི་ནུས་པ་ལྡན་པ་ཤེས་རྟོགས་བྱུང་ཡོད་པ་མ་ཟད། སྤྱིར་ཤའོ་མིས་བཟོ་སྐྲུན་བྱས་པའི་ཡུ་རོབ་ཁུལ་གྱི་Mi 10T 5G ཁ་པར་གྱི་བཀག་སྡོམ་ནུས་པ་དེ་སྒོ་བརྒྱབ་ཡོད་ནའང་། བསྐྱར་དུ་སྒོ་འབྱེད་ཐུབ་ཀྱི་ཡོད་པའང་ཤེས་རྟོགས་བྱུང་འདུག

གཞན་ཡང་ཞིབ་འཇུག་སྙན་ཐོའི་ནང་། ཤའོ་མི་ཁ་པར་གྱིས་ཁ་པར་ནང་ཉར་ཚགས་བྱས་པའི་ཁ་པར་བཀོལ་སྤྱོད་ཀྱི་གནས་ཚུལ་རྣམས་སིང་གྷ་པུར་དུ་རྟེན་གཞི་བྱས་པའི་གསབ་ལེན་པ་(server) ཞིག་ལ་བརྒྱུད་བསྐུར་བྱེད་ཀྱི་ཡོད་པ་དང་། ཤའོ་མི་ཁ་པར་མ་ལག་གིས་བཀག་སྡོམ་བྱ་སྲིད་པའི་རྒྱ་ཡིག་གི་ཚིག་བརྗོད་ཁྱོན་བསྡོམས་ ༤༤༩ ལྷག་ཡོད་པ་མ་ཟད། ཚིག་བརྗོད་རྣམས་དུས་བསྟུན་གྱིས་སྣོན་འཕྲི་བྱེད་ཀྱི་ཡོད་འདུག དེ་བཞིན་རྒྱ་ནག་གི་ཧྭ་ཝེ་ཁ་པར་ P40 5G ལའང་དྲ་ལམ་བདེ་འཇགས་ཀྱི་དཀའ་གནད་ཅིག་ཡོད་སྐོར་འཁོད་འདུག

ཉེ་ལམ་རྒྱ་ནག་དང་ལི་ཐུ་ནི་ཡའི་རྒྱལ་འབྲེལ་ཉམས་རྒུད་དུ་སོང་ཡོད། དེ་ཡང་ཟླ་བ་སྔོན་མར་ལི་ཐུ་ནི་ཡ་གཞུང་གིས་ཡུལ་དེར་ཡོད་པའི་ཐའེ་ཝན་གྱི་གཞུང་ཚབ་ཁང་གི་མིང་དེ་ཐའེ་པེ་ནས་ཐའེ་ཝན་དོན་གཅོད་ཁང་ཞེས་པར་བསྒྱུར་བཅོས་བྱ་རྒྱུར་མོས་མཐུན་གནང་ཡོད་པར་བརྟེན། རྒྱ་ནག་གཞུང་གིས་ལི་ཐུ་ནི་ཡར་ཡོད་པའི་རྒྱ་ནག་གི་གཞུང་ཚབ་དེ་ཉིད་ཕྱིར་འཐེན་བྱས་ཡོད་པ་མ་ཟད། རྒྱ་ནག་ནང་ཡོད་པའི་ལི་ཐུ་ནི་ཡའི་གཞུང་ཚབ་ཀྱང་ཕྱིར་འཐེན་བྱ་རུ་བཅུག་ཡོད་པ་རེད། རྒྱ་ནག་གི་གནོན་ཤུགས་གྱི་རྐྱེན་པས་ད་བར་རྒྱ་ནག་དང་ཕྱི་འབྲེལ་ཡོད་པའི་རྒྱལ་ཁབ་ཕལ་མོ་ཆེའི་ནང་དུ་ཡོད་པའི་ཐའེ་ཝན་གཞུང་ཚབ་ཁང་གི་མིང་ལ་ཐའེ་ཝན་ཞེས་དངོས་སུ་བཤད་ཆོག་གི་མེད་ནའང་། ཉེ་ལམ་ཐའེ་ཝན་གཞུང་གི་རེ་སྐུལ་ལྟར་ཨ་རིའི་གཞུང་ངོས་ནས་ཝ་ཤིང་ཊོན་དུ་ཡོད་པའི་ཐའེ་པེ་དཔལ་འབྱོར་དང་རིག་གཞུང་ཁང་གི་མིང་དེ་ཐའེ་ཝན་དུ་བཅོས་སྲིད་པའི་གནས་ཚུལ་ཐོན་ཡོད་ལ། བདུན་ཕྲག་སྔོན་མར་ཨ་རིའི་རྒྱལ་སྲུང་སློབ་སྟོན་པ་ཇེག་སུ་ལི་ཝན་གྱིས་ལི་ཐུ་ནི་ཡའི་སྲིད་བློན་ལ། ཨ་རིས་ངོས་ནས་རྒྱ་ནག་གི་གནོན་ཤུགས་ལ་འགོག་རྒོལ་བྱ་རྒྱུར་རོགས་འདེགས་བྱ་ངེས་ཡིན་སྐོར་བཤད་ཡོད་པ་རེད།

གསར་འགོད་པ། པ་སངས་ཚེ་རིང་།