དེ་རིང་༧གོང་ས་རྒྱལ་བ་རིན་པོ་མཆོག་གིས་ཁེ་ན་ཌའི་སྲིད་བློན་ཇ་སི་ཊན་ཊུ་རུ་ཌོ་ལགས་ལ་རྒྱལ་ཡོངས་འོས་བསྡུའི་ཁྲོད་སྲིད་བློན་དུ་བསྐྱར་འདེམས་བྱུང་བར་འཚམས་འདྲི་དང་ཁེ་ན་ཌའི་མི་སེར་ཞིག་ཡིན་པའི་ཆ་ནས་ཕན་བདེའི་བྱ་བ་དེར་དགའ་སྤོབས་ཡོད་སྐོར་གསུངས་འདུག
དེ་ཡང་མགོན་པོ་མཆོག་གི་འཚམས་འཕྲིན་ནང་། སྲིད་བློན་ངོས་ནས་ཏོག་དབྱིབས་གཉན་རིམས་ལྟ་བུའི་གཉན་འཕྲང་གི་དུས་སྐབས་སུ་མི་མང་གི་སྣེ་ཁྲིད་གནང་བར་བསྔགས་བརྗོད་ཞུ་ཡི་ཡོད། ཅེས་དང་། ངོས་རང་འདས་པའི་ལོ་ཤས་ནང་ཁེ་ན་ཌར་བསྐྱོད་རྒྱུ་བྱུང་བ་ནི་བསྐལ་བ་བཟང་པོ་ཡིན་ལ། ཁེ་ན་ཌའི་གཅེན་གཅུང་རྣམས་ཀྱིས་གུས་པར་གྲོགས་འདྲིས་དང་བརྩེ་འདང་བྱིན་པ་དེས་ངོས་ལ་སེམས་འགུལ་ཆེན་པོ་ཐེབས་བྱུང་། ངས་གོ་སྐབས་འདི་དང་བསྟུན་ནས། ཁྱེད་ཀྱི་ཕ་དམ་པ་སྲིད་བློན་ཡིན་པའི་དུས་ནས་ཁེ་ན་ཌ་གཞུང་གིས་སྤྲོ་སེམས་འཁོལ་བོའི་ཐོག་ནས་བཙན་བྱོལ་བོད་མི་རྣམས་ཁེ་ན་ཌར་སྣེ་ལེན་ཞུས་པར་ཐུགས་རྗེ་ཆེ་ཞུ། ངོས་ལ་བོད་མི་རྣམས་ཀྱིས་ཁེ་ན་ཌའི་རིག་གཞུང་སྣ་མང་གི་སྤྱི་ཚོགས་ལ་ཞབས་འདེགས་རྒྱ་གང་ཆེ་ཞུ་ཡི་ཡོད་པ་ཤེས་རྟོགས་ཡོད། ཅེས་གསུངས་ཡོད་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་སྤེལ་བ་ལྟར། ཁེ་ཎ་ཌའི་གྲོས་ཚོགས་ཀྱི་འོས་བསྡུ་ལ་སླར་ཡར་ལས་ཐོག་སྲིད་བློན་ཇ་སི་ཊན་ཊུ་རུ་ཌོ་ (Justin Trudeau) ལགས་ཀྱིས་སྣེ་ཁྲིད་པའི་ད་ལྟའི་གཞུང་འཛིན་ཚོགས་པ་ལི་བི་རལ་ (Liberal) ལ་རྒྱལ་ཁ་ཐོབ་ཡོད་འདུག ཐེངས་འདིར་ལི་བི་རལ་ཆབ་སྲིད་ཚོགས་པར་འོས་བསྡུའི་རྒྱལ་ཁ་ཐོབ་ཡོད་ཀྱང་། དེ་སྔོན་ཕྱི་ལོ་ ༢༠༡༥ འོས་བསྡུའི་སྐབས་ཀྱི་གྲུབ་འབྲས་བཞིན་འདི་ལོར་སྤྱི་མོས་ཀྱི་འོས་གྲངས་ཐོབ་མེད་སྟབས། ཐེངས་འདིར་ཆབ་སྲིད་ཚོགས་པ་གཞན་དང་ཟུང་འབྲེལ་ཐོག་གཞུང་འཛིན་བྱེད་ཀྱི་དགོས་ཡོད་འདུག
ཁེ་ཎ་ཌའི་གྲོས་ཚོགས་ནང་ཁྱོན་བསྡོམས་རྐུབ་སྟེགས་ ༣༣༨ ཡོད་པ་ལས། ཐེངས་འདིའི་འོས་བསྡུའི་ཁྲོད་ད་ལྟའི་གཞུང་འཛིན་ཚོགས་པ་ལི་བི་རལ་ལ་རྐུབ་སྟེགས་ ༡༥༨ ཐོབ་པ་དང་། (Conservative) ཀན་སར་བི་ཏི་ཚོགས་པར་རྐུབ་སྟེགས་ ༡༡༩། (New Democrat) ནེའུ་ཌེ་མོ་ཀ་རེཏ་ཚོགས་པར་ ༢༥། རྐུབ་སྟེགས་ལྷག་མ་རྣམས་ཆབ་སྲིད་ཚོགས་པ་གཞན་ལ་ཁ་ཐོར་ནས་ཐོབ་ཡོད་པ་རེད།
འོས་བསྡུའི་གྲུབ་འབྲས་རྗེས་སྲིད་བློན་ཇ་སི་ཊན་ཊུ་རུ་ཌོ་ལགས་ཀྱིས་རང་གི་སྤྱི་ཚོགས་དྲ་ལམ་བརྒྱུད་ཁེ་ན་ཌ་མི་མང་རྣམས་ལ། ཁེ་ན་ཌ་མི་མང་གིས་སོ་སོའི་འོས་ཤོག་གི་ཐོབ་ཐང་བླངས་ཏེ། འོད་སྟོང་འཕྲོ་བའི་མ་འོངས་ཀྱི་ཆེད་དུ་ལི་བི་རལ་ཚོགས་པར་ཡིད་ཆེས་གནང་བར་ཐུགས་རྗེ་ཞུ། ང་ཚོས་མི་མང་ཚང་མའི་བདེ་དོན་ཆེད་ཏོག་དབྱིབས་ནད་ཡམས་ལ་གདོང་ལེན་གནང་གིན་ཁེ་ན་ཌ་རྒྱལ་ཁབ་འདི་ཉིད་མདུན་དུ་འཁྲིད་དགོས། ཞེས་བརྗོད་འདུག
ཟླ་འདིའི་ཕྱི་ཚེས་ ༢༠ ཉིན་ཁེ་ན་ཌའི་འོས་བསྡུ་དངོས་གཞི་མགོ་འཛུགས་ཞུས་ཡོད་པ་དང་། ལས་ཐོག་སྲིད་བློན་གྱིས་ཁེ་ཎ་ཌའི་ནང་ཏོག་དབྱིབས་ནད་ཡམས་ཁྱབ་བརྡལ་ཕྱིན་པར་སྟངས་འཛིན་གང་ལེགས་བྱས་པར་བརྟེན། ཐེངས་འདིའི་འོས་བསྡུའི་སྐབས་མང་ཚོགས་ནས་ཁོང་གི་སྣེ་ཁྲིད་ཚོགས་པར་ལེགས་སྐྱེས་ཀྱི་ཚུལ་དུ་འོས་ཤོག་གི་རྒྱབ་སྐྱོར་ཆེས་ཆེར་འཐོབ་རྒྱུའི་རེ་བ་བྱས་ཡོད་ཀྱང་། ཕྱི་ལོ་ ༢༠༡༥ ལོའི་འོས་བསྡུ་བཞིན་སྤྱི་མོས་མ་ཡིན་པར་མང་མོས་ཀྱི་རྒྱལ་ཁ་ཐོབ་ཡོད་པ་རེད།
སྤྱིར་ཁེ་ན་ཌའི་གྲོས་ཚོགས་ཀྱི་འོས་བསྡུ་ནི་ལོ་གཉིས་གོང་དུ་བྱེད་དགོས་ཀྱང་ཏོག་དབྱིབས་ནད་ཡམས་ལ་བརྟེན་དེ་ལྟར་འཕར་རྒྱང་བྱས་དགོས་བྱུང་ཡོད་ན་ཡང་། ཁ་གཏད་ཕྱོགས་པས་ངོས་ནས་ལས་ཐོག་སྲིད་བློན་གྱིས་དུས་ཐོག་འོས་བསྡུ་མ་བྱེད་པ་ནི་མི་མང་གི་མདུན་དུ་ཐོན་ནས་འོས་ཤོག་ཐོབ་ཕྱིར་གཏམ་བརྗོད་སྣ་ཚོགས་ཁྲབ་ཏེ་སོ་སོའི་འདོད་འདུན་ཁོ་ན་བསྒྲུབ་ཕྱིར་ཡིན་ལུགས་ཀྱི་སྐྱོན་བརྗོད་ཆེན་པོ་བྱས་ཡོད་འདུག
ལྡི་ལི་གསར་འགོད་པ་ཉི་མ་ཚེ་རིང་།
