སེང་འབྲུག་སྟག་རྩེ་སློབ་གྲྭ་སྒོ་བརྒྱབ་པའི་རྐྱེན་གྱིས་ས་ཐག་རིང་གི་སློབ་མ་རྣམས་སོ་སོའི་ས་གནས་ཀྱི་སློབ་གྲྭ་ཞུགས་ཆོག་གི་མེད་པ་དང་། ཕ་མ་མེད་པའི་དྭ་ཕྲུག་སློབ་མ་རྣམས་ད་ལྟའང་འགྲོ་ས་འདུག་ས་ངེས་མེད་ཀྱི་དཀའ་ངལ་འོག་ལུས་ཡོད་འདུག
དེ་རིང་འདི་གའི་གསར་འགོད་པར་མིང་བརྗོད་འདོད་མེད་པའི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཉེ་ལམ་ཕྱི་ཟླ་ ༧ པའི་ནང་རྒྱ་ནག་གིས་བཅད་བགོས་བྱས་པའི་མཚོ་སྔོན་ཞིང་ཆེན་མགོ་ལོག་ཁུལ་དར་ལག་རྫོང་དུ་ཆགས་པའི་སེང་འབྲུག་སྟག་རྩེའི་སློབ་གྲྭ་སྒོ་བརྒྱབ་བཅུག་སྟེ། ད་ལྟའི་ཆར་སློབ་གྲྭ་དེའི་སློབ་མ་རྣམས་སློབ་གྲྭ་གཞན་ནང་སློབ་འཇུག་བྱེད་མི་ཆོག་པ་དང་དྭ་ཕྲུག་སློབ་མ་རྣམས་ལ་ངེས་གཏན་གྱི་སྡོད་གནས་མེད་པ་སོགས་ཀྱི་དཀའ་ངལ་འཕྲད་ཀྱི་ཡོད་འདུག
གནས་ཚུལ་མཁོ་སྤྲོད་པས། སེང་འབྲུག་སྟག་རྩེ་སློབ་གྲྭའི་ཁྲོད་ཀྱི་དྭ་ཕྲུག་སློབ་མ་རྣམས་འགྲོ་ས་འདུག་ས་མེད་པར་གནས་སྐབས་རིང་ཁྱིམ་ཚང་ཁག་ཅིག་ལ་བཅོལ་སྡོད་བྱས་ཡོད་པ་དང་། ས་ཕྱོགས་གཞན་ནས་ཡོང་བའི་སློབ་མ་རྣམས་ཕྱིར་སོ་སོའི་ས་གནས་སུ་ལོག་བཏང་ཡོད་ཀྱང་། ད་སྔ་དབར་ས་གནས་སུ་སློབ་ཞུགས་བྱེད་ཆོག་གི་མི་འདུག ཅེས་བརྗོད་བྱུང་།
གསར་འགོད་པས་རྒྱུས་ལོན་བྱུང་བ་ལྟར་ན། སེང་འབྲུག་སྟག་རྩེ་སློབ་གྲྭ་སྒོ་བརྒྱབ་པ་དང་། སློབ་གྲ་དེར་དྭ་ཕྲུག་དང་ས་ཐག་རིང་ནས་ཡོང་བའི་སློབ་མ། ས་གནས་ཡུལ་མིའི་སློབ་ཕྲུག་བཅས་སློབ་ཕྲུག་གི་རིམ་པ་གསུམ་ཡོད་པ་ལས། ས་གནས་ཡུལ་མིའི་སློབ་ཕྲུག་རྣམས་གཞུང་གི་སློབ་གྲ་ཁག་ཏུ་བགོས་འགྲེམས་བྱས་ཡོད་ཅིང་། རྫ་ཆུ་ཁ་དང་སྡེ་དགེ་སོགས་ས་ཐག་རིང་ནས་ཡོང་བའི་སློབ་མ་རྣམས་སོ་སོའི་ས་གནས་སུ་ལོག་བཏང་ཡོད་ཀྱང་སློབ་ཞུགས་ཐུབ་ཀྱི་མེད་པའི་དཀའ་ངལ་འཕྲད་ཀྱི་ཡོད་པ་མ་ཟད། སེང་འབྲུག་སྟག་རྩེའི་དགེ་རྒན་ཚོས་དྭ་ཕྲུག་སློབ་མ་རྣམས་བདག་ཉར་སོགས་ཀྱི་ལས་ཀ་བྱེད་མི་ཆོག་པར་བཟོས་ཡོད་འདུག
ཉེ་སྔོན་ཕྱི་ཟླ་ ༧ པའི་ཟླ་མགོར་སེང་འབྲུག་སྟག་རྩེ་སློབ་གྲྭ་སྒོ་བརྒྱབ་པ་དང་འབྲེལ་ནས། མགོ་ལོག་ཁུལ་དར་ལག་རྫོང་ཁོངས་ཀྱི་སེང་འབྲུག་སྟག་རྩེའི་བཅའ་སྡོད་སློབ་གྲྭ་དང་། རྨ་ཆེན་རྫོང་ཁོངས་ཀྱི་སློབ་གྲྭ་གསུམ། དགའ་བདེ་རྫོང་ཁོངས་ཀྱི་སློབ་གྲྭ་གཅིག དེ་བཞིན་གཅིག་སྒྲིལ་རྫོང་ཁོངས་ཀྱི་སློབ་གྲྭ་གཉིས་བཅས་སྒེར་གཉེར་སློབ་གྲྭ་ཁག་བདུན་སྒོ་བརྒྱག་དགོས་པའི་བཀའ་བཏང་ཡོད་པ་འདི་གའི་གསར་འགོད་པར་ཐོག་མར་ཤེས་རྟོགས་བྱུང་བ་དང་། སེང་འབྲུག་སྟག་རྩེ་སློབ་གྲྭའི་དགེ་རྒན་རྣམས་ལ་བཙན་གྱིས་ལས་མཚམས་འཇོག་དགོས་པའི་བཀའ་ཁྱབ་བཏང་བ་ལ་བརྟེན་ནས། དགེ་རྒན་རིན་ཆེན་སྐྱིད་ལགས་ཀྱིས་རྒྱ་ནག་གི་བྱ་སྤྱོད་ལ་ངོ་རྒོལ་མཚོན་སླད་ཟས་བཅད་ངོ་རྒོལ་གནང་རྗེས། ཕྱི་ཟླ་ ༨ ཚེས་ ༡ འཛིན་བཟུང་བཙན་འཁྲིད་བྱས་ཏེ། ད་ལྟའང་གར་སོང་ཆ་མེད་དུ་གྱུར་ཡོད་པ་མ་ཟད། ད་ལྟ་ད་དུང་དར་ལག་རྫོང་སུ་དམ་དྲག་ཤུགས་ཆེན་བྱས་དང་བྱེད་མུས་ཡིན་འདུག
མགོ་ལོག་ཁུལ་དར་ལག་རྫོང་གི་ཁོངས་སུ་ཡོད་པའི་སྐུ་མཁར་སེང་འབྲུག་སྟག་རྩེའི་བཅའ་སྡོད་སློབ་གྲྭ་ནི། ཕྱི་ལོ་ ༡༩༩༨ ཟླ་ ༡༢ ཚེས་ ༥ ཉིན་མགོ་ལོག་ཁུལ་སྲིད་གཞུང་དང་དར་ལག་རྫོང་སྲིད་གཞུང་གཉིས་ནས་དམངས་སྒྲུབ་སློབ་གསོའི་བཅའ་ཁྲིམས་གཞིར་བཟུང་ཆོག་མཆན་ཐོབ་པ་བརྒྱུད། ས་གནས་ཀྱི་མཁན་པོ་ཀུན་བཟང་རྒྱལ་མཚན་ལགས་དང་ཐུབ་ནོར་རིན་པོ་ཆེ་རྣམ་གཉིས་ནས་ས་གནས་བོད་མིའི་སློབ་གསོ་ཡར་སྐུལ་ཆེད་གསར་འཛུགས་གནང་ཡོད་པ་དང་། ཐོག་མར་ཁུལ་དང་རྫོང་སྲིད་གཞུང་ནས་སློབ་འབྲིང་གི་ཆོག་མཆན་སྤྲད་པ་དང་། ཕྱི་ལོ་ ༢༠༠༥ ལོར་དམའ་འབྲིང་གི་ཆོག་མཆན་སྤྲད་ཡོད་འདུག ད་བར་དུ་སློབ་གྲྭ་དེ་ནས་ཁྱོན་སློབ་མ་ ༧༠༠ ལྷག་མཐར་ཕྱིན་ཡོད་འདུག་ལ། སློབ་གྲྭའི་ནང་བོད་ཡིག་དང། རྒྱ་ཡིག ཨང་རྩིས། དངོས་ལུགས། རྫས་འགྱུར། ཆབ་སྲིད། རི་མོ་སོགས་སློབ་ཁྲིད་གནང་ཡོད་པ་མ་ཟད། འཛམ་གླིང་ཡོངས་སུ་སྙན་པའི་གྲགས་པ་འབར་ཞིང་། བོད་མི་རིགས་ཀྱི་དམངས་ཁྲོད་རིག་གནས་སྒྱུ་རྩལ་གྱི་སྙིང་བཅུད་དུ་གྱུར་བའི་གླིང་གེ་སར་གྱི་ལོ་རྒྱུས་སྐོར་ལ་ཆེད་སྦྱོང་གནང་སྟེ། བོད་རིགས་རྒྱ་ཆེ་མང་ཚོགས་དང་ས་གནས་སྲིད་གཞུང་སོགས་ནས་སྔ་གཞུག་ཏུ་བསྔགས་བརྗོད་དང་དགའ་མགུ་ཆེན་པོ་ཐོབ་ཡོད་འདུག
གསར་འགོད་པ། སྐལ་བཟང་སྦྱིན་པ།
