རྒྱལ་ཚོགས་ཀྱི་སྒྲིག་ལམ་ལ་སྣང་མེད་ཀྱིས་བྱང་ཀོ་རི་ཡས་ཟླ་འདིའི་ནང་མེ་ཤུགས་འཕུར་མདའ་ཐེངས་གསུམ་རིང་འཕངས་བ་དང་ཨ་རི་དང་ལྷོ་ཀོ་རི་ཡ། དེ་བཞིན་ཉི་ཧོང་སོགས་ནས་བྱང་ཀོ་རི་ཡའི་བྱ་སྤྱོད་དེའི་ཐད་སེམས་འཚབ་དང་སྐྱོན་བརྗོད་བྱེད་ཀྱི་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་བྱང་ཀོ་རི་ཡའི་གཞུང་གིས་རྒྱལ་ཁབ་ཀྱི་བྱང་རྒྱུད་མངའ་སྡེ་ཇཱ་གྷན་ (Jagang) ཕྱོགས་ནས་རྒྱང་ཚད་ཐུང་བའི་མེ་ཤུགས་འཕུར་མདའ་འཕངས་ཏེ། དེའི་ཤར་ཕྱོགས་ཀྱི་མཚོའི་ནང་ལྷུང་ཡོད་པ་དང་། ཨ་རི་དང་ལྷོ་ཀོ་རི་ཡ། ཉི་ཧོང་བཅས་ནས་བྱང་ཀོ་རི་ཡའི་གང་བྱུང་མེ་ཤུགས་འཕུར་མདའ་འཕངས་པའི་གནད་དོན་དེར་ཞིབ་འཇུག་བྱེད་ཀྱི་ཡོད་པ་མ་ཟད། ཉི་ཧོང་གིས་ཐེངས་འདིའི་བྱང་ཀོ་རི་ཡའི་འཕུར་མདའ་དེ་ནི་ལེ་བར་སྟོང་ཕྲག་གི་སར་ཕར་རྒོལ་གྱི་ནུས་པ་ལྡན་པའི་མེ་ཤུགས་འཕུར་མདའ་ཞིག་ཡིན་སྐོར་བརྗོད་ཡོད་པ་དང་། གལ་སྲིད་དེ་ལྟར་ཡིན་ཚེ་བྱང་ཀོ་རི་ཡ་རྒྱལ་ཚོགས་ཀྱི་སྒྲིག་ཁྲིམས་དང་འགལ་གྱི་ཡོད་འདུག
དེ་རིང་བྱང་ཀོ་རི་ཡས་མེ་ཤུགས་འཕུར་མདའ་འཕངས་བ་དང་རྒྱལ་ཚོགས་ནང་ཡོད་པའི་བྱང་ཀོ་རི་ཡའི་གཞུང་ཚབ་པས། འཛམ་གླིང་རྒྱལ་ཁབ་གཅིག་གིས་ཀྱང་བྱང་ཀོ་རི་ཡའི་རྒྱལ་སྲུང་གི་ཐོབ་ཐང་དང་གོ་མཚོན་ཚོད་ལྟ་བཀག་འགོག་བྱེད་ཐུབ་ཀྱི་མེད། ཅེས་བརྗོད་ཡོད་པ་དང་། ད་ལྟ་ལྷོ་བྱང་ཀོ་རི་ཡའི་འབྲེལ་ལམ་ཇེ་སྡུག་ཏུ་འགྲོ་ཡི་ཡོད་པ་རེད།
དེ་འབྲེལ་ཐད་ལྷོ་ཀོ་རི་ཡའི་སྲིད་འཛིན་མོན་ཇའེ་ཨིན་ (Moon Jae-in) ལགས་ཀྱིས། རྒྱལ་ཁབ་ཀྱི་བདེ་སྲུང་ལྷན་ཁང་ལ་བཀོད་འདོམས་བྱས་ཏེ། བྱང་ཀོ་རི་ཡའི་ཐེངས་འདིའི་མེ་ཤུགས་འཕུར་མདའ་འཕངས་པའི་གནད་དོན་དང་དེའི་རྒྱབ་ལྗོངས་ཐོག་ཞིབ་འཇུག་བྱ་དགོས་པ་མ་ཟད། ཉེ་སྔོན་ཀེམ་ཇོན་ཨན་གྱི་སྲིང་མོ་ཀེམ་ཡོ་ཇོན་ (Kim Yo-jong) ནས་ལྷོ་བྱང་ཀོ་རི་ཡ་གཉིས་བར་གྲོས་མོལ་སླར་གསོ་བྱ་འདོད་ཡོད་པའི་བསྒྲགས་གཏམ་གྱི་ཐད་ལའང་རྟོག་ཞིབ་བྱ་དགོས་པའི་བཀའ་བཏང་འདུག
དེ་ཡང་ཟླ་འདིའི་ཕྱི་ཚེས་ ༢༥ ཉིན་བྱང་ཀོ་རི་ཡའི་མགོ་ཁྲིད་ཀྱི་སྲིང་མོ་ཀེམ་ཡོ་ཇོན་གྱིས། གལ་སྲིད་ལྷོ་ཀོ་རི་ཡས་ཀོ་རི་ཡ་གཉིས་ཁ་གཏད་ཡིན་པ་དང་བྱང་ཀོ་རི་ཡར་དམའ་འབེབ་བྱེད་པ་སོགས་མཚམས་འཇོག་གིས་ཆ་རྐྱེན་ཁག་ཅིག་དང་དུ་ལེན་ཐུབ་ཚེ། ལྷོ་བྱང་གཉིས་བར་གྲོལ་མོལ་སླར་གསོ་བྱ་འདོད་ཡོད། ཅེས་བརྗོད་ཡོད་པ་དང་། དཔྱད་བརྗོད་པས། བྱང་ཀོ་རི་ཡས་ལྷོ་ཀོ་རི་ཡ་གོ་སྤྱོད་ཀྱིས་རྒྱལ་ཚོགས་བརྒྱུད་ཨ་རིས་བྱང་ཀོ་རི་ཡར་བཅད་པའི་ཉེས་ཆད་ཁག་ལྷོད་ཡང་ཡོང་ཐབས་སུ་བརྩོན་གྱི་ཡོད་སྐོར་བརྗོད་ཡོད་འདུག
ཡང་ཨ་རིའི་དམག་གིས། དེ་རིང་བྱང་ཀོ་རི་ཡས་མེ་ཤུགས་འཕུར་མདའ་འཕངས་པའི་གནས་ཚུལ་དེ་ཤེས་རྟོགས་བྱུང་བ་དང་དེས་ཨ་རི་དང་མཐུན་གྲོགས་རྒྱལ་ཁབ་ཁག་ལ་འཇིགས་སྐུལ་ཐེབས་ཀྱི་མེད་སྐོར་བརྗོད་ཡོད་ཀྱང་། ཞི་བདེ་རྒྱ་མཚོའི་ཁུལ་གྱི་ཨ་རིའི་དམག་གིས། བྱང་ཀོ་རི་ཡས་ཐེངས་འདིར་མེ་ཤུགས་འཕུར་མདའ་འཕངས་བ་དེས། སླར་ཡང་བྱང་ཀོ་རི་ཡས་རྒྱལ་ཚོགས་ཀྱི་ཁྲིམས་འགལ་འོག་ནུས་མེད་དུ་བཏང་བའི་གོ་མཚོན་བསྐྱར་བསྐྲུན་གྱི་ལས་གཞི་རྩོམ་གྱི་ཡོད་སྐོར་བརྗོད་ཡོད་འདུག
ད་ལན་ནི་བྱང་ཀོ་རི་ཡས་ཟླ་འདིའི་ནང་མེ་ཤུགས་འཕུར་མདའ་ཚོད་ལྟ་བྱས་པ་ཐེངས་གསུམ་པ་དང་ཕྱི་ལོ་ ༢༠༢༡ ནང་ད་སྔ་བར་ཐེངས་དྲུག་པ་དེ་ཡིན་ཞིང་། ཟླ་འདིའི་ཕྱི་ཚེས་ ༡༣ ཉིན་བྱང་ཀོ་རི་ཡས་རྒྱང་ཐག་རིང་བའི་མེ་ཤུགས་འཕུར་མདའ་གསར་བ་ཞིག་ཚོད་ལྟ་བྱས་པ་དང་བསྟུན། འཕུར་མདའ་དེར་ཧ་ལམ་ཉི་ཧོང་རྒྱབ་ཁབ་ཧྲིལ་པོ་གཏོར་སྐྱོན་གཏོང་བའི་ནུས་པ་ཡོད་སྐོར་བསྒྲགས་ཡོད་པ་རེད། དེ་བཞིན། ཕྱི་ཚེས་ ༡༥ ཉིན་བྱང་ཀོ་རི་ཡས་ཤར་ཕྱོགས་ཀྱི་མཚོ་འགྲམ་དུ་རྒྱང་ཐག་རིང་བའི་མེ་ཤུགས་འཕུར་མདའ་ཐེངས་གཉིས་རིང་ཚོད་ལྟ་བྱས་པར། ལྷོ་ཀོ་རི་ཡའི་མཚོ་དམག་གིས་རྒྱང་ཚད་རིང་བའི་མེ་ཤུགས་འཕུར་མདའ་ཚོད་ལྟ་བྱས་ཏེ། བྱང་ཀོ་རི་ཡའི་འཇིགས་སྐུལ་ལ་ཡ་ལན་སློག་ཡོད་པ་མ་ཟད། སྲིད་འཛིན་མོན་ལགས་ཀྱིས་ད་ལྟ་ནས་ལྷོ་ཀོ་རི་ཡར་བྱང་ཀོ་རི་ཡའི་སྟོབས་ཤུགས་ཚར་གཅོད་ཐུབ་པའི་ནུས་པ་འདང་ངེས་ཡོད། ཅེས་བརྗོད་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
