ཟླ་རྗེས་མར་འཚོག་འཆར་ཡོད་པའི་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་ཐོག་བོད་ནང་གི་ཁོར་ཡུག་གི་སྐོར་ལ་གླེང་སློང་བྱ་དགོས་པའི་རེ་སྐུལ་ཞུ་རྒྱུ་ཡིན་འདུག
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་བོད་མིའི་སྒྲིག་འཛུགས་ཀྱི་ལྷག་པ་ཚེ་རིང་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་སྲིད་བྱུས་ཉམས་ཞིབ་ཁང་ནས་དཔར་སྐྲུན་བྱས་པའི་ ༢༠༢༠ ལོའི་བོད་གནས་བསྐྱར་ཞིབ་དང་བོད་མི་ཚོས་བོད་ཀྱི་ཁོར་ཡུག་ལ་བཟུང་བའི་ལྟ་ཚུལ་ ( Tibetan perspectives on Tibet’s environment ) ཞེས་པའི་དཔེ་དེབ་གཉིས་དབུ་འབྱེད་གནང་སོང་བ་དང་། བོད་མི་ཚོས་བོད་ཀྱི་ཁོར་ཡུག་ལ་བཟུང་བའི་ལྟ་ཚུལ་ཞེས་པའི་དཔེ་དེབ་དེའི་ཁྲོད་དུ་ ༢༠༡༠ ནས་ ༢༠༢༠ བར་རྒྱ་ནག་གཞུང་གིས་བོད་ཁམས་ཀྱི་ཁོར་ཡུག་རྩ་གཏོར་བྱས་པའི་རྐྱེན་གྱིས། བོད་ནང་གི་གཏན་འཇགས་ཀྱི་འཁྱག་རོམ་ཞུ་བ་དང་། གངས་རི་ཞུ་བ། རྩྭ་ཐང་བྱེ་ཐང་དུ་གྱུར་བ། འབྲོག་ས་གནས་སྤོར་བཏང་བ། གཏེར་ཁ་སྔོག་འདོན་སོགས་ལོ་ ༡༠ རིང་བོད་ཀྱི་ཁོར་ཡུག་གི་གོད་ཆག་རིགས་འཁོད་ཡོད་པ་དང་། ཡང་ ༢༠༢༠ བོད་གནས་བསྐྱར་ཞིབ་ཅེས་པའི་དཔེ་དེབ་དེ་ནི་རྒྱ་ནག་གཞུང་གིས་བོད་ནང་དུ་སྤེལ་བའི་སྲིད་ཇུས་ཁག་དང་། ཁོར་ཡུག་རྩ་གཏོར། དེ་བཞིན་བོད་མི་འཛིན་བཟུང་བྱས་པ་སོགས་སྐོར་གྱི་སྙན་ཐོ་ཞིག་ཡིན་པ་རེད།
མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བོད་ཀྱི་ཁོར་ཡུག་གི་གནས་བབ་སོགས་ཀྱི་སྐོར་ལ་ཕྱི་ནང་གི་ཉམས་ཞིབ་པ་མང་པོས་དཔྱད་རྩོམ་རིགས་སྤེལ་མྱོང་ནའང་། རྗེས་སུ་རྒྱ་ནག་གཞུང་གིས་བོད་ནང་གི་བོད་མིར་དམ་དྲག་དང་ཕྱི་ནང་གི་བོད་མི་མང་པོར་འགྲོ་འོང་གི་དམ་བསྒྲགས་ཡོད་པའི་རྐྱེན་གྱིས། བོད་ནང་གི་གནས་ཚུལ་མཁོ་སྒྲུབ་བྱ་རྒྱུ་དཀའ་ཁག་ཆེ་ནའང་། སྲིད་ཇུས་ཉམས་ཞིབ་ཁང་གི་ཉམས་ཞིབ་པ་རྣམས་ཀྱིས་བོད་ནང་གི་གནས་ཚུལ་མཁོ་སྒྲུབ་བྱས་ཏེ། བོད་མི་རང་གིས་བྲིས་པའི་དཔེ་དེབ་དེ་ནི་བོད་ནང་གི་ཁོར་ཡུག་ལ་ཉམས་ཞིབ་བྱེད་མུས་ཡིན་པའི་ཉམས་ཞིབ་པ་དང་རྒྱལ་སྤྱིའི་ཚོགས་སྡེ་ཁག་གི་དཔྱད་གཞིའི་རྒྱུ་ཆ་རུ་གྱུར་ཡོད། རྒྱལ་སྤྱིའི་ཁོར་ཡུག་ཉམས་ཞིབ་པ་ཚོས་བོད་ནང་གི་ཁོར་ཡུག་གི་གལ་ཆེའི་རང་བཞིན་དང་། བོད་གཅིག་པུ་མིན་པར་ཁྱིམ་མཚེས་རྒྱལ་ཁབ་མང་པོ་ཞིག་གི་ཁོར་ཡུག་ལ་དོ་ཕོག་འགྲོ་མུས་ཡིན་པ་ཤེས་པར་བགྱིས་ནས། རྒྱལ་སྤྱིའི་ཁྱོན་ཡོངས་ནས་སྲིད་ཇུས་ཇི་ལྟར་གཟུང་དགོས་མིན་ཐད་ལ་དགོངས་པ་བཞེས་དགོས་པ་དང་། དེ་བཞིན་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་དེ་ཟླ་བ་གཅིག་གི་རྗེས་ཏག་ཏག་འཚོག་གི་ཡོད་སྟབས། དཔེ་དེབ་དེ་དག་ད་ལྟ་ནས་འགྲེམས་སྤེལ་བྱེད་ཐུབ་ན། ཁོར་ཡུག་ལ་དོ་སྣང་ཡོད་མཁན་དང་ཉམས་ཞིབ་པ་ཚོས་བོད་ནང་གི་ཁོར་ཡུག་གི་གནས་བབ་སོགས་ཀྱི་སྐོར་ལ་གླེང་སློང་ཡོང་བའི་ཆེད་དུ་ཡིན་སྐོར་སོགས་གསུངས་བྱུང་།
ཡང་སྲིད་སྐྱོང་མཆོག་གིས། ༢༠༢༠ བོད་གནས་བསྐྱར་ཞིབ་ཅེས་པའི་དཔེ་དེབ་ཏུ་ཕྱི་ལོ་ ༢༠༢༠ ལོར་རྒྱ་ནག་གཞུང་གིས་བོད་ནང་དུ་སྤེལ་བའི་སྲིད་ཇུས་དང་། བོད་མིའི་རང་དབང་སོགས་མཚོན་པའི་བོད་ནང་གི་ལོ་གཅིག་རིང་གི་གནད་དོན་མང་པོ་ཞིག་ཕྱོགས་བསྡུས་བྱས་ཡོད་པ་རེད། ལོ་ལྟར་བོད་ནང་གི་གནས་བབ་སོགས་མཚོན་པའི་སྙན་ཐོའི་རིགས་མང་ཙམ་བཀྲམ་དགོས་པ་དང་། ད་ལྟའི་བཀའ་ཤག་གི་དགོངས་དོན་གཙོ་བོ་ནི་བོད་ནང་གི་བོད་མིའི་བདེ་སྡུག་སོགས་མཚོན་པའི་བོད་ནང་གི་གནས་སྟངས་རྒྱུས་ལོན་བྱ་རྒྱུ་ཡིན་པ་ལྟར། བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཚོས་བོད་ཀྱི་དགོས་མཁོ་དང་བསྟུན་ནས། བོད་ནང་གི་གནས་སྟངས་ཉམས་ཞིབ་ཚད་ལྡན་བྱས་ཏེ། རྒྱལ་སྤྱིའི་སྤྱི་ཚོགས་ནང་དངོས་ཡོད་ཀྱི་གནས་ཚུལ་ར་སྤྲོད་དང་དྲིལ་བསྒྲགས་བྱ་དགོས་སྐོར་སོགས་གསུངས་སོང་།
བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་དང་འགན་འཛིན་གཞོན་པ་འཛམ་ལྷ་བསྟན་པ་རྒྱལ་མཚན་ལགས་ཀྱིས། རྒྱ་ཕྱི་ནང་གི་ཉམས་ཞིབ་པ་མང་པོས་བོད་ནང་གི་ཁོར་ཡུག་གི་གནས་བབ་སོགས་མཚོན་པའི་དཔྱད་རྩོམ་རིགས་མང་པོ་ཞིག་བྲིས་ཡོད་ཀྱང་། དཔྱད་རྩོམ་ཁ་ཤས་ལ་རྒྱ་ནག་གཞུང་གི་ཆབ་སྲིད་ཀྱི་ལྟ་བ་དང་ཤན་ཞུགས་ཡོད་པ་དང་། ཡང་དཔྱད་རྩོམ་ཁ་ཤས་ནི་ནུབ་ཕྱོགས་པས་བོད་ཀྱི་ཁོར་ཡུག་ལ་བཟུང་བའི་ལྟ་ཚུལ་ཡིན་སྟབས། བོད་མི་ཚོས་བོད་ཀྱི་ཁོར་ཡུག་ལ་བཟུང་བའི་ལྟ་ཚུལ་ ( Tibetan perspectives on Tibet’s environment ) ཞེས་པའི་དཔེ་དེབ་དེ་ནི་བོད་མི་རྣམས་ཀྱིས་བོད་ཀྱི་ཁོར་ཡུག་གི་གནས་བབ་ལ་བཟུང་བའི་ལྟ་ཚུལ་དང་བློ་འཚབ་མཚོན་པའི་དཔེ་དེབ་ཅིག་ཡིན་པ་དང་། དཔེ་དེབ་དེའི་ཁྲོད་ཀྱི་རྩོམ་ཡིག་འབྲི་མཁན་རེ་རེར་བོད་ནང་གི་ཁོར་ཡུག་སྲུང་སྐྱོབ་དང་བདག་གཅེས་བྱེད་པའི་འགན་འཁྲི་ཡོད་སྟབས། ཁོང་ཚོས་རང་ནུས་གང་ཡོད་ཀྱིས་བོད་ནང་གི་ཁོར་ཡུག་གི་གནས་བབ་གསལ་སྟོན་བྱས་ཡོད་པ་དང་། བོད་ཀྱི་སྲིད་ཇུས་ཉམས་ཞིབ་ཁང་གིས་དཔེ་དེབ་དེ་དག་དབུ་འབྱེད་བྱེད་དོན་གཙོ་བོ་ནི། ཟླ་བ་གཅིག་ཏག་ཏག་གི་རྗེས་སུ་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་དེ་ཡུ་རོབ་ཀྱི་རྒྱལ་ཁབ་སི་ཁོ་ལན་ཌི་ Scotland རུ་འཚོག་གཏན་ཁེལ་བ་ལྟར། དེ་རིང་དཔེ་དེབ་དེ་དག་འགྲེམས་སྤེལ་བྱས་པ་བརྒྱུད། ཛ་དྲག་ཏུ་གྱུར་བའི་བོད་ནང་གི་ཁོར་ཡུག་ལ་སྲུང་སྐྱོབ་སོགས་བྱ་དགོས་པ་དང་། ལྷག་པར་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚོགས་ཆེན་སོགས་སུ་བོད་ནང་གི་ཁོར་ཡུག་གི་གནས་བབ་སྐོར་གཙོ་བོ་བཟུང་ནས་གླེང་སློང་དང་གོ་བསྔུར་བྱ་དགོས་པའི་རེ་སྐུལ་ཞུ་ཆེད་དུ་ཡིན་སྐོར་སོགས་གསུངས་སོང་།
དཔལ་ལྡན།
