ཉེ་སྔོན་རྒྱ་ནག་གཞུང་གིས་སྔ་གཞུག་ཏུ་བཙན་འཁྲིད་བཀག་ཉར་བྱས་པའི་རྫ་དབོན་པོའི་སྡེ་དགོན་གཉིས་ཀྱི་བོད་མི་སེར་སྐྱ་ ༡༢༡ ཡས་མས་འཛིན་བཟུང་བྱས་ཡོད་པ་རྣམས་ལ་ཆབ་སྲིད་སློབ་གསོ་སྤྲད་པ་དང་གཅར་རྡུང་འདྲི་རྩད་བྱས་རྗེས་གྲྭ་པ་གསུམ་མ་གཏོགས་གཞན་རྣམས་ཀློད་གྲོལ་བཏང་ཡོད་འདུག
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཚེས་ ༢༣ དང་ ༢༦། ༢༧ བཅས་ལ་དེ་སྔོན་རྫ་དབོན་པོ་སྡེ་དགོན་གཉིས་ནས་འཛིན་བཟུང་བཀག་ཉར་བྱས་ཏེ། སེར་ཤུལ་རྫོང་དུ་བཙན་འཁྲིད་བྱས་ཡིན་པའི་སྐྱ་སེར་རྣམས་ཀྱི་ཁྲོད་ནས། དབོན་པོ་དགོན་གྱི་དགེ་འདུན་པ་གསུམ་མ་གཏོགས་གཞན་ཚང་མ་ཀློད་གྲོལ་བཏང་ཡོད་པ་དང་། བཀག་ཉར་ཁང་དུ་ཟ་མ་སོགས་ཀྱི་འཚོ་བའི་མཐུན་རྐྱེན་ཞན་པའི་ཐོག ཉིན་ལྟར་འདྲི་རྩད་བྱས་ཏེ་གང་བྱུང་གཅར་རྡུང་བཏང་བ་དང་མཐོང་ཆུང་དམའ་འབེབ་སོགས་ནས་ལུས་སེམས་གཉིས་ཀར་མནར་གཅོད་ཆེན་པོ་བཏང་ཡོད་འདུག
ཡང་གནས་ཚུལ་མཁོ་སྤྲོད་པས། ད་ལན་རྫ་དབོན་པོ་སྡེ་དགོན་གཉིས་ནས་འཛིན་བཟུང་བཀག་ཉར་བྱས་པའི་བོད་མི་རྣམས་ལ་རྒྱ་ནག་གཞུང་གིས་རྒྱལ་ཁབ་ཀྱི་སྲིད་ཇུས་ཐོག་ཏུ་ཤར་བསྐྱོད་དགོས་པ་དང་། ༧གོང་ས་མཆོག་གི་དབུས་པའི་ཕྱི་ཕྱོགས་ཀྱི་བོད་མིར་འབྲེལ་བ་བྱེད་མི་ཆོག་པ་མ་ཟད། ༧གོང་ས་མཆོག་གི་སྐུ་པར་སོགས་སྒྲིག་གཤོམ་མི་ཆོག་པ་དང་། རྒྱལ་ཁབ་ཀྱི་ཁྲིམས་སྒྲིག་སོགས་དང་འགལ་བའི་ལས་རིགས་སྤེལ་མི་ཆོག་པ། རྒྱ་ནག་རྒྱལ་ཁབ་དང་མི་རིགས་ལ་དགའ་ཞེན་དང་ཤ་ཚ་དགོས་པའི་ཆབ་སྲིད་སློབ་གསོ་སྤྲད་ཡོད་པ་མ་ཟད། རྗེས་ཕྱོགས་སྤྱི་ཚོགས་བརྒྱུད་ལམ་དུ་བཤད་མི་ཆོག་པ་བཤད་པ་དང་བརྒྱུད་སྐུལ་བྱས་པ། དེ་བཞིན་སྒེར་གྱི་ཁ་པར་ནང་དུ་ཉར་ཚགས་མི་ཆོག་པའི་པར་རིས་སོགས་ཉར་ཚགས་བྱས་ཚེ་ཁྲིམས་ཆད་ལྕི་མོ་གཅོད་རྒྱུ་ཡིན་པའི་སྡིགས་ར་བསྐུལ་ཡོད་འདུག
འདི་ལོའི་ཕྱི་ཟླ་ ༨ ཚེས་ ༢༥ ནས་ ༢༩ བར་དུ། རྒྱ་ནག་གཞུང་གིས་རྫ་དབོན་པོ་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་བོད་མི་རྣམས་ལ་འབྲེལ་འདྲིས་བྱས་པའི་ཉེས་མིང་འོག བོད་མི་ ༥༣ ཙམ་འཛིན་བཟུང་བཀག་ཉར་བྱས་ཡོད་པ་དང་། ཕྱི་ཟླ ༨ ཚེས་ ༢༢ ནས་བཟུང་སྔ་གཞུག་ཏུ་ཉེས་མིང་དེའི་འོག རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་བཙན་འཁྲིད་བྱས། ཡང་ཟླ་འདིའི་ཕྱི་ཚེས ༣ ཉིན་རྫ་སྨད་དབོན་པོ་དགོན་གྱི་དགེ་འདུན་པ་དྲུག་དང་། དབོན་པོ་སྡེ་བའི་བུད་མེད་གཉིས་བཅས་སྔ་གཞུག་ཏུ་བོད་མི་སེར་སྐྱ་ཁྱོན་ ༡༢༡ ཡས་མས་སེར་ཤུལ་རྫོང་ཐོག་ཏུ་བཙན་འཁྲིད་བཀག་ཉར་བྱས་ཡོད་པ་མ་ཟད། བཀག་ཉར་འོག་ཏུ་ཡོད་པའི་བུད་མེད་སྐལ་སྒྲོན་ཞེས་པ་ཞིག་ལ་ནད་གཞི་ལྕི་མོ་ཕོག་ཡོད་པའི་གནས་ཚུལ་ཐོན་ཡོད་པ་རེད།
འབྲེལ་ཡོད་གནས་ཚུལ།
རྫ་སྨད་དབོན་པོ་ནས་བོད་མི་སེར་སྐྱ་ ༦༠ ཡས་མས་བཙན་འཁྲིད་བྱས་ཡོད་འདུག
ཡང་བསྐྱར་རྫ་དབོན་པོ་ནས་བོད་མི་ ༥༣ ཙམ་བཙན་འཁྲིད་བྱས་འདུག
རྡུང་རྡེག་མནར་གཅོད་འོག་རྫ་དབོན་པོའི་བུད་མེད་ཅིག་ལ་ནད་གཞི་ལྕི་མོ་ཕོག་ཡོད་འདུག
ཡང་རྫ་དབོན་པོ་ནས་བོད་མི་སེར་སྐྱ་ ༨ འཛིན་བཟུང་བྱས་འདུག
དཔལ་ལྡན།
